Fəzail İBRAHİMLİ
Milli Məclis sədrinin müavini

Bu gün Azərbaycanın İrandakı səfirliyinə edilən şərəfsiz, xain terror hücumu hamımızda böyük qəzəb doğurdu. Hücum edən şəxs kalaşnikov markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Azərbaycan səfirliyi, dövlətimizin bir hissəsidir, bu həm də dövlətimizə edilən silahlı hücum sayılmalıdır. Bu hücumu dəf edərkən şəhid olan qəhrəman soydaşımızın ailə üzvlərinə də dərin hüznlə başsağlığı verirəm.
Baş vermiş hadisə nə qədər qəzəb doğursa da həm də müəyyən mənada gözlənilməz sayılmır. Bu terror hadisəsi İran rəsmilərinin, diplomatlarının, generallarının, din xadimlərinin, deputatlarının və ekspertlərinin anti-Azərbaycan isteriyasının nəticəsidir.
Azərbaycan müstəqillik qazanmasından bu yana İran əlinə düşən hər fürsətdə ölkəmiz əleyhinə iş aparıb, təxribat xarakterli addımlar atıb, riyakar davranış nümayiş etdirib. Torpaqlarımızın işğalda olduğu 30 ilə yaxın müddət ərzində Ermənistanla sıx münasibətlər quraraq ona hər cür yardım və dəstək göstərib. Bu yardım 44 günlük Vətən müharibəsində də davam edib. Tehran rejimi bu addımları ilə islam dinindən öz mənfur niyyətləri üçün necə sui-istifadə etdiyini göstərib. Azərbaycanın zəfərini, ərazi btövlüyümüzün bərpasını həzm edə bilməyən İran, ölkəmizi ən son təbrik edənlər sırasında oldu. Eyni zamanda qələbəmizdən sonra müxtəlif çirkin oyunlara, düşmənçilik hərəkətlərinə əl atdı. Özünü müsəlmanlarının təəssübkeşi kimi qələmə verən İran rejimi işğal müddətidə Azərbaycan ərazilərindəki məscidlərin, dini abidələrin yerlə-yeksan olunmasına, təhqir edilməsinə, Xocalı soyqırımının törədilməsinə göz yumaraq Ermənistanla iş birliyini daha da möhkəmləndirdi. Üçtərəfli bəyanatda Ermənistan üzərinə bir sıra öhdəliklər götürüb ki, onlardan biri də Zəngəzur dəhlizi ilə bağlıdır. Tehran rejimi açıq şəkildə regionda təhlükəsizlik mühitinin yaranmasına, davamlı sülhün əldə edilməsinə mane olur. Eyni zamanda, Zəngəzur dəhlizinin reallaşdırılması prosesinə əngəl törədir. Özünün “qırmzı xətlərini” bəyan edir. Bir sözlə, İran əvvəllər pərdələməyə çalışdığı riyakar, mənfur xislətini artıq gizlədə bilmədi. Azərbaycan dövlətinin daxili işlərinə qarışmağa cəhd göstərdi. Azərbaycanda yaratdığı dini-ektremist qrupların, casus şəbəkələrin ifşası İranın necə təhlükəli olduğunu göstərdi. Son terror aktı bütün bu prosesin məntiqi sonluğu sayılmalıdır. Amma fars molla rejimi anlamalıdır ki, artıq regiondakı geosiyasi, təhlükəsizliklə bağlı hər hansı proseslərin aparalıb-aparılmaması Azərbaycandan asılıdır. Azərbaycan regionda söz sahibidir. Bu da o deməkdir ki, İran adlanan dövlətin bundan sonra Ermənistan üzərindən, yaxud hansısa terror təşkilatı üzərindən və ya yaratmağa çalışdığı casus şəbəkəsi vasitəsilə Azərbaycana qarşı bu və ya digər şəkildə təxribat aparmaq imkanı olmayacaq. Çünki Azərbaycan dövləti belə fəaliyyətləri cavabsız qoymayacaq. Bu gün Azərbaycanın beynəlxalq mövqeyi xeyli güclüdür. Bu güc Azərbaycanın Türkiyə, Pakistan və İsrail kimi regionun söz sahibi olan dövlətləri ilə strateji müttəfiqliyinə dayanır. Adını islam ölkəsi qoyan İranın isə bir müsəlman dövləti ilə normal münasibəti yoxdur. Özünü ABŞ və Avropanın hədəfinə çevirən İranın qonşuları ilə də qırmızı xətti keçməsi bu ölkənin sonunu gətirəcək. Digər bir tərəfdən ortada İranı bir yumruğu ilə əzə biləcək Güney Azərbaycan faktoru da var. Fars molla rejimi bütün bunları hesablayıb, ağlını başına yığmalıdlr. Azərbaycanla qarşıdurma bu ölkəni məhvə aparar.

Vətəndaş Həmrəyliyi Partiyası Tofiq Yaqublu və Bəxtiyar Hacıyevin həbsi, aclıq elan etməsi ilə bağlı bəyanat yayıb. Bəyanatda deyilir:
” Azərbaycanın azadlığı yolunda mübarizə aparan, Qarabağ uğrunda vuruşan, vətəni qoruyan hər kəsə diqqət və həssaslıqla yanaşılmalıdır. Bu baxımdan Tofiq Yaqubluya sərt cəza verilməsi təəssüf doğurur. Hökm çıxarılarkən Tofiq bəyin keçdiyi həyat yolu, mübarizəsi, dövlətə və vətənə bağlılığı nəzərə alınmalıydı. Artıq neçə gündür Tofiq aclıq edir. Qarabağ döyüşlərində sağlamlığını itirən bir insan bu gün ölüm aclığı keçirir və səhhəti ciddi şəkildə pisləşib. Əlbəttə, üzücü bir haldır. İşin bu yerə gəlib çatmasına imkan verilməməliydi. Bu sırada ictimai fəal Bəxtiyar Hacıyevin həbsi də böyük təəssüf doğurur.
Vətəndaş Həmrəyliyi Partiyası ilk növbədə Tofiq Yaqbluya və Bəxtiyar Hacıyevə aclığı dayandırmaq üçün çağırış edir və inanır ki, ümumi ictimai rəy, digər məhkəmə instansiyalarının da mövcudluğu fonunda həm Tofiq Yaqublu, həm də Bəxtiyar Hacıyev haqda həbs qərarına yenidən baxılması mümkündür.”

“Azərbaycanın ərazi bütövlüyünü bərpa etməsini dost dövlətlər alqışladı. Onlar Azərbaycanın Ermənistanla haqlı savaşına dəstək diplomatik dəstək verdilər. Bu qələbəyə ən çox sevinən, heç şübhəsiz, dünya azərbaycanlılarıdır. Hansı ölkənin vətəndaşı olmalarından asılı olmayaraq, onlar Azərbaycan torpaqlarının işğaldan azad edilməsini istəyiblər, bununla bağlı dünyanın bir çox ölkələrində aksiyalar keçiriblər. Bu mənada Vətən Müharibəsində qazanılan Qələbə bütün dünya azərbaycanlılarının Zəfəridir.
Çox təəəsüfləndirici haldır ki, Azərbaycanın öz torpaqlarını işğaldan azad etməsinə və dünya azərbaycanlılarının həmrəyliyinə qarşı ən çox əhalisinin yarısı türk olan İran hakimiyyəti çıxır. Belə görünür ki, rəsmi Tehran Azərbaycan Respublikasının uğurlarına sevinə bilmir. İslam dini arxasında pərdələnsə də, bu onun fars şovinisti düşüncəsindən irəli gəlir.
Azərbaycan Respublikası həmişə imkanı daxilində dünya azərbaycanlılarının da mili-mədəni hüquqlarının qorumağa, bu istiqamətdə addımlar atmağa çalışıb. 1918-ci ildən indiyədək Azərbaycanda siyasi-ideoloji baxışlarından asılı olmayaraq, hakimiyyətə gələn milli qüvvələr Güney Azərbaycan türklərinin taleyinə biganə qalmayıblar.
Dünya Azərbaycanlılarının II Qurultayında dövlətimizin başçısı İlham Əliyev 50 milyonluq azərbaycanlının Prezidenti olduğunu bəyan etdi. Prezident bununla Azərbaycan Respublikasının dünya azərbaycanlılarının hamisi olduğunu da beynəlxalq ictimaiyyətin diqqətinə çatdırdı. Dövlət başçısı bu kursu davam etdirdiyini Türk Dövlətləri Təşkilatının Səmərqənd sammitində bir daha nümayiş etdirdi. Onun Azərbaycanın hüdudlarından kənarda yaşayan soydaşlarımızın insan haqlarının qorunması barədə söylədiyi sözlər  İranda bəzi tarixdən bixəbər, şovinist  deputatların kürkünə birə salıb və sərsəm bəyanatlar səsləndirərək İranın Xarici İşlər Nazirliyini və Məclisi bu iradlara reaksiya verməyə çağırıblar.
Vətəndaş Həmrəyliyi Partiyası olaraq bəyan edirik ki, bu gün İranda amansızlıqla haqqı tapdanılan və kimliyi danılan Güney Azərbaycan türkünün taleyi dünyada hər bir normal insanı düşündürməlidir. Dünyada İran türkləri qədər milli sitəmə, irqi ayrı-seçkiliyə və ədalətsizliyə məruz qalan ikinci bir etnos tapmaq çətindir. Sayı İran əhalisinin yarısını təşkil etsə də, bu xalqın bütün milli-mədəni hüquqları əlindən alınmışdır. Odur ki, Azərbaycan Respublikasının fars şoviniziminin davamlı təzyiqi ilə üz-üzə qalan güneyli soydaşlarının haqqını tələb etməsi dünyanın bütün  mövcud yazılı qanunlarına uyğundur. Azərbaycanın bu məsələdi haqlı olduğunu həm dünyəvi qanunlar, həm də səmavi kitablar təsdiqləyir.
Azərbaycan dəfələrlə İrana dost əlini uzadıb, heç bir problem olmadan normal qonşuluq münasibətlərinin, mehriban əlaqələrin inkişafına çalışıb. Ancaq qarşı tərəf adekvat münasibət sərgiləməkdənsə, münasibətləri gərginləşdirən addımlar atıb, işğalçı Ermənistanın yanında yer alıb, ona iqtisadi və hərbi yardım edib. Azərbaycanı az qala öz ərazi subyekti sayıb. Azərbaycanla  hədə dilində, onun suverenliyini təhdid dilində danışmağa çalışıb.
Vətəndaş Həmrəyliyi Partiyası son günlər baş verənləri  İran molla rejiminin  Azərbaycana qarşı açıq düşmənçiliyinin yeni təzahürü sayır. Bu qarşıdurmada 50 milyonluq Azərbaycan türkü dövlətimizin və Azərbaycan Respublikasının Ali Baş Komandanın yanındadır. İran çirkin əməllərindən, düşmənçilikdən əl çəkməli və Azərbaycanla münasibətlərdə Bakının həssasiyyətini nəzərə almalıdır. Tehran seçim etməli, dinc qonşuıuq münasibətlərini dəyərləndirməli, ermənipərəst siyasətdən əl çəkməli və ilk növbədə Güneyli qardaşlarımızın milli haqlarının qorunması tələblərinə əməl etməlidir.
Başqa yol yoxdur!”

Fəzail İBRAHİMLİ
Milli Məclis sədrinin müavini

Azərbaycanın Zəfər savaşından sonra bölgədə Türkiyə-Azərbaycan İttifaqının söz sahibinə çevrilməsi, Türk Dövlətləri Təşkilatının yeni beynəlxalq güc mərkəzi kimi ortaya çıxması anti-türk qüvvələri hərəkətə gətirib. Təəssüflər olsun ki, bu sırada bəzi xristian qərb dövlətləri ilə yanaşı adını islam respublikası qoyan cənub qonşumuz İran da yer alıb. Minlərlə müsəlmanı qətlə yetirən, məscidləri murdarlayan erməni hökuməti ilə can bir qardaşlıq nümayiş etdirən Tehranın parlament üzvləri etdikləri əməllərdın xəcalət çəkmək əvəzinə bu günlərdə tamam əndazəni aşaraq sərsəm bəyanatlar səsləndirib. Belə ki, bir qrup iranlı deputat Azərbaycan prezidenti İlham Əliyevin Türk Dövlətlərinin 9-cu Sammitində Azərbaycanın hüdudlarından kənarda yaşayan azərbaycanlıların dil hüquqları haqqında fikirlərində əndişələnib. Onlar Azərbaycan prezidentinə Azərbaycan Respublikasının İranın bir hissəsi olduğunu, şimali Azərbaycan ərazisinin Gülüstan müqaviləsinə əsasən İrandan ayrıldığını xatırladıb. Fars dilində tarixi səhv edən bu mandat sahibləri siyasi normaları da pozub. Bu kəslərə xatırladıram ki, bu müqavilələr nəticəsində 50 milyonluq Azərbaycan türkü ikiyə bölünüb. Suz bu müqavilələrin adlarını xatırlatmaqla güneydə yaşayan 30 milyonluq xalqın hisslərinə toxunursuz. Həm Gülüstan, həm də Türkmənçay müqaviləsi imzalanandan sonra bir neçə dəfə ləğv olunub. 1921-ci ildə sovet Rusiyası çar Rusiyasının imzaladığı bütün müqavilələrin birtərəfli qaydada ləğv olunduğunu elan edib. Bundan başqa Azərbaycan Xalq Cümhuriyyətinin yaranması ilə bu müqavilə ləğv olundu və İran Azərbaycanın ərazisi ilə bir yerdə onun varlığını tanıdı. Yeri gəlmişkən, 1919-cu ildə Paris sülh konfransında İran torpaq iddiası ilə çıxış edib və Avropalılar bu iddianı dilinə gətirən İran nümayəndəsini otaqdan qovub. Təbii ki, o müqavilə çoxdandır tarixi hadisəyə çevrilib. Ona görə də bu gün o haqda danışmaq siyasi hoqqabazlıqdır və yalnız daxili auditoriya üçün təbliğati əhəmiyyəti ola bilər. Şimali Azərbaycan, yəni indiki Azərbaycan Respublikasının vətəndaşları da Türkmənçay və ya Gülüstan müqavilələrini tarixin zorakı olayı kimi xatırlayır və unutmur. Çünki bu müqavilə ilə parçalanan bizim vətənimizdir. Tarix bütün həqiqətləri öz yerinə qoyan ən böyük hakimdir. Şimali Azərbaycan öz müqəddəratını çoxdan müəyyən edib. Güney Azərbaycanda yaşayan soydaşlarımız da ”Haray, haray, mən türkəm” deyərək, iranlı olmadığını bildirir və milli kimliyini dünyaya bəyan edir. Amma İran deyilən bir zindanda olmağı heç farslar özü də istəmir və bu gün İranda baş verənlər də bunun təsdiqidir. Azərbaycan prezidentinin fikirləri isə tam yerində olan bir bəyanat idi. Bir necə il öncə cənab İlham Əliyev “mən təkcə Azərbaycan Respublikasında yaşayan xalqın yox, bütün dünyada yaşayan 50 milyon azərbaycanlının prezidentiyəm” demişdi. Hazırkı dövrə kimi harada yaşamasından asılı olmayaraq öz vətəndaşlarının hüquqlarını qorumaq, təhlükəsizliyini təmin etmək üçün qarşısında duran vəzifələri yerinə yetirən Azərbaycan dövləti bundan sonra dünyanın ayrı-ayrı ölkələrində yaşayan azərbaycanlıların hüquqlarının müdafiəsi, təhlükəsizliyinin təmin olunması, milli kimliyini qorunub saxlanması vəzifəsini icra etməyə hazır olduğunu bəyan edir. Yeri gəlmişkən, Güney Azərbaycanın bütün şəhərlərində Azərbaycan Prezidenti İlham Əliyevin fotosu olan və üzərinə “Güney Azərbaycan arxanızdadır, cənab prezident!” yazılmış plakatlar divarlara vurulub. Bu millətin ruhunun, ideyasının və liderinin bir olduğunun təsdiqləyir!

“Müharibə edən ölkədə 56-57 partiya var. Bu, yaxşı bir hal deyil. Bəzi ölkələrdə müharibə şəraitində heç partiya yaratmağa imkan verilmir”. 

“Qafqazinfo” xəbər verir ki, bunu “Siyasi partiyalar haqqında” yeni qanun layihəsinə dair keçirilən dinləmələrdə çıxışı zamanı deputat Sabir Rüstəmxanlı bildirib.

“Lakin bizdə belə bir qadağa olmadı. Müzakirəyə çıxarılan qanun nəyi tələb edir? Tələb edir ki, bu partiyalar yığışsınlar, birləşsinlər. 5-10, hətta daha az 2-3 güclü partiya yaransın. Onlar hakimiyyət uğrunda mübarizə apara bilsin, ölkə də bilsin kim-kimdir”, – deyə S.Rüstəmxanlı qeyd edib.

O, eyni zamanda qanunla bağlı bəzi tələblərin artırılmasını istəyib.

Sabir Rüstəmxanlı əlavə edib ki, demokratik dəyərlər, dünya təcrübəsi ciddi məsələlərdir: “Lakin siyasi partiyalar, QHT-lərin işinə milli maraqlar baxımından yanaşmaq lazımdır. Hər xalqın öz milli mentaliteti var.  Başqasının – İsveçdə, Skandinaviyada işləyən qanunu Azərbaycanda işləmir. İndi biz nə edək? On illər gözləməliyik ki, psixologiyalarımız, sistemlər yaxınlaşsın o qanunlardan istifadə edək?”

Eldar Tanrıverdi