Vətəndaş Həmrəyliyi Partiyası

Category: Slayder

  • BDU-da Xalq şairi Sabir Rüstəmxanlı ilə görüş keçirilib

    Bakı Dövlət Unveristetinin 105 illik yubileyi münasibəti ilə “BDU məzunları” layihəsi çərçivəsində Xalq Şairi, Milli Məclisin deputatı Sabir ilə görüş keçirilib. Tədbiri yazıçı-publisist Məti Osmanoğlu şairin “”Sağ ol ana dilim” şeri ilə açaraq BDU rektoru Elçin Babayevə söz verib. Rektor Elçin Babayev Universitetin 105 illik yubileyi ərəfəsində BDU-nun Sabir Rüstəmxanlı kimi nüfuzlu məzunları ilə görüşlərin qürurverici olduğunu bildirib. O qeyd edib ki, Sabir Rüstəmxanlının milli düşüncənin oyanmasına səbəb olan əsərləri ilə bütöv bir nəsil yetişib, bu əsərlər örnək, dəyər hesab edilib. Tədbirin aparıcısı, BDU-nun Azərbaycan ədəbiyyatı tarixi kafedrasının dosenti Məti Osmanoğlu Sabir Rüstəmxanlının həyat və yaradıcılığı haqqında tələbələrə məlumat verib. Sabir Rüstəmxanlının yaradıcılığının milli səciyyə daşıdığını vurğulayan Məti Osmanoğlu tələbələri bu cür əsərlərlə mənəviyyatlarını zənginləşdirməyə çağırıb.
    Doğma Universitetdə tələbələrlə görüşə şad olduğunu deyən Sabir Rüstəmxanlı BDU-nun ölkəmizin həyatında böyük missiya daşıdığını vurğulayıb. O, tələbəlik illəri ilə bağlı xatirələrini bölüşüb. “Ədəbiyyatsız millət olmaz, ədəbiyyatsız dünya ruhsuz bədənə dönər” deyən şair ilk şeirlərini elə universitet illərində yazdığını bildirib: “Mənim bütün həyatım mübarizə və savaş dolu olub, hətta sözümlə də mübarizə aparmışam. Azərbaycanın hər bir vətəndaşı millətin taleyində rol oynamağa hər an hazır olmalıdır. Milli düşüncənin formalaşmasına kömək etmək mənim ən böyük missiyalarımdan biridir. Bu, “Ömür kitabı”nda da belə idi, onun davamı olan “Vətəndaşlığın əlifbası”nda da. Tələbələrimiz bu dəyərləri daha çox mənimsəməli, müstəqillik ideyası daşıyan əsərlər dərsliklərimizə daha çox salınmalıdır”.
    Daha sonra şair son illərdə çap olunmuş “Vətəndaşlığın əlifbası”, “Qarabağa qayıdış”, “Ölüm son deyil: tanıdığım Heydər Əliyev”, “Şair və şər” kitablarından sitatlar gətirərək, bugünkü görüşün həm də bu əsərlərin təqdimatı olduğunu deyib.
    Sabir Rüstəmxanlı sevilən şeirlərini oxuyub, tələbələrin suallarını cavablandırıb, sonda kitablarını BDU-nun Elmi Kitabxanasına hədiyyə edib.

  • “Seçkilərin erkən keçirilməsi çox ciddi hadisə deyil”

    “Qanunvericiliyə əsasən, bu ilin noyabrında parlament seçkiləri olmalıdır, ancaq seçkilərin müddəti önə də çəkilə bilər”. Bunu mayın 2-də Mərkəzi Seçki Komissiyasının (MSK) iclasında qurumun sədri Məzahir Pənahov bildirib.

    Pənahov bunu seçkilərin noyabrda Azərbaycanda keçiriləcək COP-29 (BMT-nin İqlim Dəyişikliyi Konfransı) ilə eyni vaxta təsadüf etməsi ilə əlaqələndirib: “Bu səbəbdən seçkilərin önə çəkilməsi barədə qərar verilə bilər”.

    Son illər Azərbaycanda seçkilərin əksəriyyəti növbədənkənar keçirilir.

    Milli Məclisin Beynəlxalq münasibətlər və parlamentlərarası əlaqələr komitəsinin üzvü, Vətəndaş Həmrəyliyi Partiyasının sədri Sabir Rüstəmxanlı “Turan”a bildirib ki, bu il parlament seçkilərinin bir neçə ay tezləşdirilməsində heç bir səbəb axtarmaq lazım deyil: “Burada səbəb böyük beynəlxalq tədbirin keçirilməsidir. Həmin tədbirə on minlərlə insan gələcək. Onların qarşılanması, yerləşdirilməsi, yola salınması çox ciddi işdir və bunun öhdəsindən gəlmək asan məsələ deyil”.

    Deputatın fikrincə, həmin günlər seçkilərin keçirilməsi mümkün deyil: “Seçkilərin erkən keçirilməsi çox ciddi hadisə deyil. Burada başqa səbəb də axtarmaq lazım deyil. Səbəb elə COP-29 tədbirinin keçirilməsidir. Biz bu tədbirlərin Bakıda keçirilməsində maraqlıyıq. Ona görə də seçkilə

  • Sabir Rüstəmxanlı İYİ Partiyanın yeni genel başkanı Müsavat Dervişoğlunu təbrik etdi

    Vətəndaş Həmrəyliyi Partiyası sədri, millət vəkili Sabir Rüstəmxanlı Müsavat Dərvişoğlunu İYİ Pariyanın genel başkanı seçilməsi münasibəti ilə təbrik edib.
    Təbrikdə deyilir: “Sizi İYİ Partiyanın başqanı seçilməniz dolayısıyla təbrik edirəm. Qardaş Türkiyə Cumhuriyyətinin siyasi mühitində qısa müddət ərzində özünəməxsus mövqeyi olan İYİ partiya hər zaman milli mövqeyi və qətiyyəti ilə seçilib. Sizinlə illərə dayanan şəxsi tanışlığımız məndə əminlik yaradır ki, İYİ partiya Sizin rəhbərliyiniz dönəmində daha böyük uğurlara imza atacaq. Bir daha Sizi yeni görəviniz münasibətilə təbrik edir, işlərinizdə və fəaliyyətinizdə uğurlar arzulayıram”.

  • Bizə Blinkenin mövqeyi vacibdir.

    Milli Məclisin Amerika Birləşmiş Ştatları ilə parlamentlərarası əlaqələr üzrə işçi qrupunun üzvləri Azərbaycanda səfərdə olan ABŞ Konqresi üzvlərinin bir qrup köməkçisi ilə görüşüblər. Milli Məclisin Beynəlxalq münasibətlər və parlamentlərarası əlaqələr komitəsinin sədri, Azərbaycan – ABŞ parlamentlərarası əlaqələr üzrə işçi qrupunun rəhbəri Səməd Seyidov ərazi bütövlüyünü və suverenliyini təmin etdikdən sonra bəzi Qərb dairələrinin və beynəlxalq təşkilatların ölkəmizə təzyiqləri, sülh prosesi, Rusiya sülhməramlı qüvvələrinin ölkəmizdən çıxması, Azərbaycan tərəfindən bölgədə davamlı sülhün bərqərar olunması istiqamətində atılan addımlar, ölkəmizin multikulturalizm, tolerantlıq ənənələri və digər məsələlər barədə fikirlərini çatdırıb.

    Görüşdə iştirak edən Azərbaycan – ABŞ parlamentlərarası əlaqələr üzrə işçi qrupunun üzvləri Sevinc Fətəliyeva, Asim Mollazadə, Tural Gəncəliyev, Vüqar Bayramov, Məzahir Əfəndiyev, Məlahət İbrahimqızı, Emin Hacıyev qonaqları maraqlandıran suallara cavab veriblər, Azərbaycan-ABŞ münasibətlərinin perspektivləri barədə fikirlərini bölüşüblər. ABŞ konqresmenlərini köməkçilərin Bakı səfəri ilk deyil. Ümumiyyətlə konqresmenlərin köməkçilərinin müxtəlif dövlətlərə belə səfərlər praktikası var. Amma bunlar əsasən tanışlıq və texniki səfər kimi dəyərləndirilir. Bəs belə səfərlərin hansısa əhəmiyyəti varmı? Xüsusən də səfər ermənipərəst konqresmenlərin Azərbaycanda 40 nüfuzlu şəxsə sanksiya tətbiq edilməsi haqda irəli sürdüyü qanun layihəsinin gündəmdə olduğu dövrə təsadüf edir. Ümumən Konqresdə erməni lobbisinin təsiri altında olan üzvlər var, bir də obyektiv mövqe sərgiləyənlər var. Bu görüşdə isə Seyidov onlara bütün aktual məsələləri çatdırıb. Bu görüş münasibətlərə təsir edəcəkmi?

    Vətəndaş Həmrəyliyi Partiyası Mərkəzi İcra Aparatının rəhbəri Samir Əsədli qəzetimizə açıqlamasında bu görüşlərin vacibliyini ikitərəfli əlaqələrin güclənməsində görür: “Biz ABŞ kimi mühüm tərəfdaşla gərginliyin artmasında maraqlı olmamalıyıq. Razıyam ki, hansısa konqresmen suyu bulandırır. Amma bizə Blinkenin mövqeyi vacibdir. ABŞ-Azərbaycan əlaqələri son vaxtlarda yüksəlişdə olmasa da, Vaşinqton addımlarımıza əngəl olmur. Orada seçki dövrüdür deyə erməni lobbisindən dəstək almaq üçün bizi narazı salan addımların atılması gözləniləndir. Ancaq Azərbaycan təmasları davam etdirməlidir və konqresmenlərin köməkçiləri ilə müzakirələr də onların məlumatlandırılması baxımdan yaxşıdır”. 

    S.Əsədlinin fikrincə, Tramp prezident seçilsə, münasibətlər indiki formada olmayacaq: “ABŞ alqışlamalıdır ki, onun düşməni olan Rusiyanın sülhməramlı qüvvələri bölgədən razılaşma əsasında çıxıb. ABŞ sevinməlidir ki, onun rəqibi Rusiyanın vasitəçiliyi olmadan Vaşinqtonun dəstək verdiyi Paşinyan administrasiyası ilə rəsmi Bakı arasında ikitərəfli formatda sülh mətninin razılaşdırılması müzakirə edilir, kəndlər qaytarılır, praktiki olaraq sərhədlərin dəqiqləşməsi prosesi başlanıb, Ermənistanla Azərbaycan arasında bir etimad mühiti formalaşmaqdadır…Yəni orada hansısa bəyanatlar verməkdənsə, hesabatlar yaymaqdansa, əsassız qanun layihələri irəli sürməkdənsə, proseslərin Qərbin istədiyi şəkildə inkişaf etməsinə diqqət yetirməlidirlər”.

    Yeni Müsavat

  • Sabir Rüstəmxanlı: “Böyük Avrasiya türkün coğrafiyasıdır və burada yaşayan xalqların qarşılıqlı münasibətlərinin genişlənməlidir”

    “Türk dövlətlərinin bir araya gəlmək və Türk Dövlətləri Birliyi yaratmaq istiqamətində atdığı addımların real nəticəsində artıq Mərkəzi Asiya ölkələrinin Azərbaycana marağı artıb”.

    Bu sözləri Yenicag.az-la söhbətində Milli Məclisin deputatı, Vətəndaş Həmrəyliyi Partiyasının (VHP) sədri Sabir Rüstəmxanlı deyib.

    O, Qırğızıstan prezidenti Sadır Japarovun Azərbaycana səfəri çərçivəsində türk dövlətlərinin ölkəmizə olan marağını şərh edib.

    S. Rüstəmxanlı düşünür ki, sözügedən səfərlər getdikcə intensivləşəcək və tərəflər bir-birini ziyarət edib tez-tez görüşəcəklər:

    “Bu, qaçılmazdır, çünki dünyada gedən proseslər onu göstərir ki, müsəlman-türk ölkələrini əzmək istəyən köhnə səlib dünyasının qarşısında birləşməkdən başqa yol yoxdur. Bizim taleyimiz, tariximiz birdir, bir-birimizi başa düşürük.

    Onsuz da bizim uzun müddət bir araya gəlmək arzumuz olub. Hələ türk dünyasının bir hissəsi Rusiyanın tərkibindədir. Tatarıstan, Başqırdıstan, Çuvaşıstan, Yakutiya – Böyük Avrasiya türkün coğrafiyasıdır və burada yaşayan xalqların qarşılıqlı münasibətlərinin genişlənməsi, bir-birinin mədəniyyətini və tarixini öyrənmək, güclərini birləşdirmək, gələcəkdə eyni iqtisadi zonaya çevrilmək prioritet məsələdir”, – deyə o əlavə edib.

    VHP sədri xatırladıb ki, bununla bağlı müəyyən addımlar atılıb, TÜRKSOY, Türk Parlament Asssambleyası, TDT və s. qurumlar yaranıb:
    “Sözsüz ki, qarşılıqlı əlaqələr və inteqrasiya prosesi daha da genişləndirilə bilər. Ona görə də bu səfərlərə təbii baxıram və güman edirəm ki, bunun bölgəyə xeyri böyükdür. Digər yandan isə Azərbaycanın Qarabağda separatçı rejimi məhv etməsi, ermənilərin könüllü şəkildə oradan getməsi, həmin şeytan ocağına ümid bəsləyənlərin ümidlərinin qırılması Azərbaycanın dünyadakı beynəlxalq nüfuzunu gücləndirir. Baxmayaraq ki, bizə qarşı ermənipərəst qüvvələr əks-təbliğat aparsalar da, ermənilərin başlarını sığallayıb ciblərinə silah soxsalar da, təsiri yoxdur, çünki Azərbaycanın nüfuzu get-gedə artır.

    Rusiya sülhməramlılarının Qarabağdan çıxması, 4 kəndin geri qaytarılması, Azərbaycanın mövcud sərhədlərinin tanınması, sərhədlərin müəyyənləşdirilməsi və sülh müqaviləsinə hazırlıq Azərbaycanın son 4 ildə apardığı uğurlu siyasətin və fəal diplomatik addımların nəticəsidir”.

    Xatırladaq ki, Qırğızıstan hökumətinin Ağdam rayonunda məktəb inşa etdirməsi planından daha öncə Qazaxıstan və Özbəkistan tərəfindən Füzulidə Kurmanqazı Yaradıcılıq Mərkəzi və Mirzə Uluqbəy adına 1 nömrəli tam orta məktəb tikilərək istifadəyə verilib.

    Rafi Müslümov

  • Son gediş olsun – Sabir Rüstəmxanlının yazısı

    Sabir Rüstəmxanlı

    VHP sədri, Millət vəkili

    Rus ordusunun hələ Kiyev Rus Dövləti zamanından Güneyə, Qafqaza və o cümlədən Azərbaycana qanlı yürüşləri tarixin yaddaşından silinməyib.

    Bu yürüşlərdən biri – qədim şəhərimiz Bərdəyə olmuşdu və onun faciələri dahi Nizami tərəfindən də qələmə alınıb. O zaman işğalçıların çoxu heç sağ salamat qayıdıb Kiyevə çata bilməmişdi. Ondan sonra da rus əsgərlərinin Xəzərdən və qurudan dəfələrlə Azərbaycana yürüşləri olub. Eyni zamanda türklərin də Rusiya torpaqlarına sayı bilinməyən hücumları unudulmayıb. Hər bir millətin, dövlətin öz torpaqlarını qorumaq və imkan daxilində genişləndirmək istəyi tarixin reallıqlarıdır, bunu inkar etmək olmaz.

    Çar Rusiyasının hərbi yürüşləri son əsrlərdə ardıcıl xarakter aldı və bir sıra qonşu dövlətlərin, o cümlədən Azərbaycanın şimal xanlıqlarının uzun müddət davam edən işğalı ilə nəticələndi. 220 illik tarximizdə kabusa çevrilən fakt bundan ibarətdir ki, 1804-cü ildə Gəncə hakimi Cavad xanın məğlubiyyətindən sonra ruslar burda daimi yerləşdilər. Çar Rusiyasının ordusu sonrakı illərdə “Qızıl ordu”, “ Ağ qvardiya”, “Sovet ordusu”, “Rusiya Federasiyasının silahlı qüvvələri”kimi müftəlif adlar daşısalar da mahiyyət dəyişilmədi. Yalnız Xalq Cumhuriyyəti dönəmində və 1991-ci ildə müstəqilliyimizin bərpasından sonra qısa müddətdə rus ordusunun ayağı Azərbaycandan çəkildi. Amma sonradan biz bu ordunun Ermənistanın havadarı olduğunu gördük. Sovet otdusunun 366-cı alayının Xocalı qətliamında və bir çox kəndlərimizin işğalında rolu yaxın tariximizin faktıdır.

    Zəfər savaşı ilə torpaqlarımız azad olunduqdan sonra rus ordusu bu dəfə Azərbaycana sülhməramlı adı altında qayıtdı. Adı sülhməramlı olsa da bu ordunun da ermənipərəstliyini gördük, sülhməramlıların gözünün qarşısında separatçı rejimə Ermənistandan silah daşınırdı, ərazilər minalanırdi və bir çox hallarda sülhməramlılar qanunsuz erməni hərbi birləşmələrinə yardım edirdilər. Bütün bu tarixi göz önünə gətirəndə sülhməramlı adlanan rus ordusunun sakitcə çıxıb getməsi çox böyük tarixi uğurdur. Çünki 2020-ci il 10 noyabr sənədindən sonra sülhməramlı adı altında Azərbaycanın Qarabağ bölgəsinə yerləşdirilən ordunun nə vaxtsa burdan çıxacağı çoxlarına inandırıcı görünmürdü və bu faktla Azərbaycanın böyük qələbəsinə kölgə salmağa çalışırdılar.

    Sülhməramlıların Azərbaycandan sakitcə çıxarılması son 220 illik tariximizdə çox ciddi bir hadisədir. 220 il ərzində rus ordusu heç vaxt bu qədər müqvimətsiz və artıq burda gərəkli olmadığını etiraf edərək çıxıb getməyib. Bu ordu hər zaman gedərkən müəyyən sorunlar yaradıb ki, bura yenidən qayıtmağa bəhanə olsun. Bu dəfə isə bu ordu həmişəlik getdi. Bu, Azərbaycan dövlətinin apardığı çox uğurlu siyasətin nəticəsidir. Qazaxın 4 kəndinin heç bir kənar vasitəçi olmadan, güllə atılmadan boşaldılması da bu uğurun tərkib hissəsi və davamıdır!

  • Azərbaycan Şimali Kiprin müstəqilliyini tanıyacaq -PROQNOZ

    Qarşımızda heç bir əngəl qalmayacaq
     Şimali Kipr Türk Cümhuriyyətinin (ŞKTC) Prezidenti Ersin Tatar Azərbaycan Prezidenti İlham Əliyevin dəvəti ilə yaxın günlərdə Azərbaycana səfər edəcəyini deyib. Ersin Tatar iki dövlət arasında əlaqələrin qarşılıqlı səfərlərlə daha da möhkəmlənəcəyini bildirib. Qeyd edək ki, Ersin Tatar Şimali Kipr Taekvondo, Karate, Cüdo, Aykido Federasiyasının yaradılmasının 47-ci ildönümü münasibəti ilə təşkil olunan tədbirdə iştirak edib və Azərbaycandan gələn nümayəndə heyəti ilə görüşüb. Vurğulayıb ki, Azərbaycan və Şimali Kipr Türk Cümhuriyyəti gənclərinin idmanda bir araya gəlməsi vacibdir.
    Vətəndaş Həmrəyliyi Partiyasının sədr müavini Samir Əsədli “Sherg.az”a deyib ki, Kipr türklərinin keçdiyi tarixi yol, torpaqları, halal haqları uğrunda vətənpərvər mübarizəsi, müstəqil dövlət atributlarının formalaşdırılması, idarəetmə institutlarının tam təşkil olunması, qanunverici hakimiyyət, məhkəmə orqanlarının sərbəst fəaliyyəti, iqtisadi imkanları imkan verir ki, Şimali Kipr müstəqil dövlət olaraq yaşasın, fəaliyyət göstərsin: 
    “Təəssüf ki, onlara qarşı beynəlxalq birlik tərəfindən çox haqsızlıqlar olub. Azərbaycan xalqı mənəvi olaraq kiprli qardaşlarımıza dəstək verir və gələcəkdə də verəcək. Qarşı tərəfin apardığı hiyləgər, hər hansı hüquq normalarına uyğun olmayan siyasətə qarşı olaraq, təbii ki, hüquq normaları çərçivəsində kiprlilərlə münasibətlərimizi qururuq. Daha çox mədəni əlaqələrə üstünlük verilir. Azərbaycanın ərazi bütövlüyünün bərpasından sonra bu əlaqələrin siyasi müstəviyə keçməsinə şərait yaranıb. Bu baxımdan Şimali Kipr Türk Cümhuriyyətinin prezidentinin ölkəmizə səfəri  mühüm bir addımdır. Təbii ki, Ermənistanla münasibətləri tam yoluna qoyandan sonra Şimali Kiprin müstəqilliyinin tanınması ilə bağlı qarşımızda heç nə dayanmayacaq. Biz Kiprin müstəqilliyini tanıyacağıq, buna əminəm”.

  • Sabir Rüstəmxanlıdan gənclərə çağırış – FOTO

    Sabir Rüstəmxanlıdan gənclərə çağırış-FOTO

    Qaradağ rayonu, Qobustan qəsəbəsində Aşıq Rza Qobustanlı adına Mədəniyyət Evində Xalq şairi, Milli Məclisin deputatı Sabir Rüstəmxanlı ilə görüş keçirilib.
    Bakupost.az xəbər verir ki, görüşdə rayon ictimaiyyəti, ədəbiyyatsevərlər iştirak ediblər. Tədbirin əvvəlində Sabir Rüstəmxanlının həyat və yaradıcılığı haqqında məlumat verilib. Bildirilib ki, belə görüşlərin ədəbi mühitin inkişafına, gənclərin bədii ədəbiyyata marağının artmasına, dünyagörüşlərinin əhatəli olmasına xidmət edir.

    Vurğulanıb ki, Sabir Rüstəmxanlı geniş oxucu rəğbəti qazanmış “Ömür kitabı” adlı əsərin, “Tanımaq istəsən”, “Xəbər gözləyirəm”, “Gəncə qapısı”, “Sağ ol, ana dilim!”, “Qan yaddaşı”, “Zaman məndən keçir” və s. şeir kitablarının, poemaların, “Atamın ruhu”, “Xətai yurdu”, “Göy Tanrı”, “Ölüm zirvəsi (Cavad xan)” kimi romanların müəllifidir.
    Görüş zamanı şair tədbir iştirakçılarının ona ünvanladıqları sualları cavablandırıb, gənclərə öz tövsiyələrini verib, onları Azərbaycan yazarlarının əsərlərini mütaliə etməyə çağırıb. Xalq şairi şeirlərindən nümunələr söyləyib. Görüşün sonunda Sabir Rüstəmxanlı imzalı kitablarını hədiyyə edib.

  • Türk birliyi sürətlə irəliləməlidir

    Çağdaş geopolitik durum türk dövlətləri qarşısında yeni sistemli və təsirli mexanizmlərini formalaşdırmaq zərurətini qoyub
     
     Türkiyə Xarici İşlər Nazirliyində (XİN) struktur islahatları çərçivəsində Türk Dövlətləri Təşkilatı (TDT) Departamenti yaradılıb. Məlumata görə, Türk dünyasının əhəmiyyətini nəzərə alaraq yaradılan Departamentin səlahiyyətlərinə türk dövlətləri ilə əlaqələrin qurulması və inkişaf etdirilməsi daxildir. Vurğulanıb ki, islahatlar ikitərəfli və çoxtərəfli əlaqələri inkişaf etdirmək məqsədi daşıyır. Eyni zamanda ayrı-ayrı bölgələrin və ölkələrin əhəmiyyətini nəzərə alaraq bəzi dövlətlər üzrə idarələr də yaradılıb. Məsələn, Amerika ölkələri Departamenti ilə yanaşı, Latın Amerikası ölkələri üzrə ayrıca idarə yaradılıb. Eyni zamanda Asiya ölkələri Departamenti ilə yanaşı, İran və İraq şöbəsi də yaradılıb. Həmçinin Beynəlxalq Vasitəçilik İdarəsi yaradılıb ki, bu da ziddiyyətlərin və münaqişələrin həlli sahəsində mütəxəssisləri bir araya gətirmək imkanı verəcək.
    Vətəndaş Həmrəyliyi Partiyasının sədr müavini Samir Əsədli “Sherg.az”a açıqlamasında deyib ki, Türk Dövlətləri Təşkilatı struktur, icra mexanizmi və siyasi-ideoloji baxımından dünya siyasi arenasında yeni növ birlik formatıdır. Ekspertin sözlərinə görə, digər regional və beynəlxalq birliklərdən, əməkdaşlıq formalarından fərqli olaraq Türk Dövlətləri Təşkilatında üzv dövlətləri tam mənada bərabərhüquqludur və onların hər birinin milli maraqları təşkilat miqyasında əsas götürülür: 
    “Əsas hədəf türklərin haqq və hüquqlarının dünyanın bütün guşələrində qorunması, regonal iqtisadi layihələrdə türk dövlətlərinə üstünlük verilməsi bu birliyin əsas prinsipləridir. Bu baxımdan Türk Dövlətləri Təşkilatının daha sürətli inkişafı, beynəlxalq müstəvidə perspektivi mütləqdir. Çağdaş geopolitik durum türk dövlətləri qarşısında yeni sistemli və təsirli mexanizmlərini formalaşdırmaq zərurətini qoyub. Buna görə zamanın tələbinə cavab verərək sürətli şəkildə yeni inteqrasiya formaları yaradılmalıdır. Avrasiyada türk adına yeni siyasi güc mərkəzinin formalaşması vacibdir. Məhz bu səbəbdəndir ki, tarixi baxımdan çox qısa olan cəmi 14 il müddətində türk dövlətləri “Türkdilli ölkələr” kimi münasibətlər qurmaq miqyasından “Müstəqil Türk Dövlətləri” kimi vahid təşkilatda qlobalmiqyaslı güc olmaq məqsədini qarşıya qoyan dinamik bir sistem halına gəlib”.
     Siyasi şərhçi vurğulayıb ki, Azərbaycan və Türkiyə dövlət olaraq bu prosesdə daha fəal rol oynayır: 
    “Milli Məclisin qərarı ilə Azərbaycan-Şimali Kipr Türk Cümhuriyyəti parlamentlərarası əlaqələr üzrə İşçi qrupu yaradılması bu baxımdan rəsmi Bakı tərəfindən atılmış çox mühüm bir addımdır. Parlamentlərarası İşçi qrup xalqlarımız arasında dostluq və qardaşlıq əlaqələrinin möhkəmləndirilməsi, mədəni-humanitar və siyasi-iqtisadi münasibətlərin canlandırılması ilə yanaşı, Orta Asiya respublikaları üçün də bir təkan olmalıdır. Gələcəkdə Şimali Kipr Türk Cümhuriyyətinin bütün türkdilli dövlətlər tərəfindən rəsmən tanınması və Türk Dövlətləri Təşkilatının bərabərhüquqlu üzvü olması əsas məqsəd olmalıdır”.

  • Sabir Rüstəmxanlı: “Türk Dünyası bir yerdə olsa, bizi əzmək qeyri-mümkündür”

    “Türk dövlətlərinin başçıları bizi gözləyən təhlükəni iki-üç əvvəldən hiss edirdilər”

     
      Brüsseldə ABŞ, Avropa Birliyi və Ermənistan Baş naziri arasında keçirilən üçtərəfli görüşün iddia olunduğu kimi ciddi nəticələr doğurmamasında Azərbaycanın rəhbərinin qətiyyətli və prinsipial mövqeyi ilə yanaşı, qardaş Türkiyənin sərt reaksiyası da mühüm rol oynadı.
    Türkiyə Xarici İşlər Nazirliyi görüşdən öncə bəyanat yayaraq, Azərbaycanın iştirakı olmadan keçirilən görüşün Cənubi Qafqazda sülhə xidmət etməyəcəyini, regionun geosiyasi qarşıdurma məkanına çevrilməsinə yol açacağını vurğulamışdı. Türkiyə XİN üçüncü ölkələri regionun parametrlərini nəzərə almağa və münaqişə tərəflərinə bərabər məsafədən yanaşmağa çağırmışdı: “Həmişə olduğu kimi, Türkiyə bu məsələdə öz üzərinə düşəni etməyə və Azərbaycanla Ermənistan arasında davamlı sülhün təşviqinə davam edəcək”. Məhz görüş günü Türkiyənin sabiq xarici işlər naziri, TBMM-nin NATO Parlament Assambleyasındakı nümayəndə heyətinin rəhbəri Mövlud Çavuşoğlunun Bakıya səfəri, Prezident İlham Əliyevin qəbulunda olması da Ankaranın Bakıya dəstəyinin nümayişi idi. Dövlət başçısı İlham Əliyev M.Cavuşoğlunu qəbul edərkən onun bütün dövrlərdə Azərbaycanın yanında olmasını yüksək qiymətləndirdiyini bildirib. Ölkə rəhbəri vurğulayıb ki, xüsusilə İkinci Qarabağ müharibəsi zamanı Mövlud Çavuşoğlu müntəzəm surətdə çox önəmli açıqlamalar verib: “O, bütün dünyaya Türkiyənin səsini çatdırıb ki, Azərbaycan tək deyil, Türkiyə onun yanındadır. Bu açıqlamalar öz növbəsində Azərbaycanın işinə qarışmaq istəyən qüvvələrin qarşısının alınmasında önəmli rol oynayıb”.
      Geosiyasi vəziyyətin dəyişdiyini deyən Prezident belə bir şəraitdə Azərbaycan-Türkiyə birliyinin hər zaman olduğu kimi, bu gün də güclü olmasının vacibliyini qeyd edib. Bu birliyi pozmaq istəyənlərin arzularının puç olacağına əminliyini bildirib. Fevralın 14-də keçirilən andiçmə mərasimində və aprelin 5-də Mövlud Çavuşoğlu ilə görüşündə dövlət başçısının səsləndirdiyi “Türk dünyası bizim bir ailəmizdir” fikirləri də türk birliyinin gücünün nümayişidir. Azərbaycanla Türkiyə arasında münasibətlər digər dövlətlərə örnəkdir, cox güclü siyasi münasibətlərimiz var.
    Ümumiyyətlə, Azərbaycan-Türkiyə qardaşlığı, strateji tərəfdaşlığı dünya üçün nadir nümunəyə çevrilib. Sarsılmaz birliyə, tarixi köklərə, qardaşlığa əsaslanan Azərbaycan-Türkiyə əlaqələri bütün sahələrdə, o cümlədən siyasi, iqtisadi-ticarət, humanitar, hərbi və digər sahələrdə ən yüksək müstəvidədir və daim yüksələn xətlə inkişaf etməkdədir. Xalqlarımızın eyni soy-kökə, dilə, dinə, mədəniyyətə malik olduğu üçün iki ölkə hər zaman bir-birinin sevincini, kədərini paylaşıb. Hər iki ölkə beynəlxalq müstəvidə də bir-birini birmənalı olaraq dəstəkləyib. 30 il əvvəl Ermənistan tərəfindən işğal olunmuş Azərbaycan torpaqlarının 2020-ci ildə 44 günlük müharibədə erməni qəsbkarlarından azad edilməsi zamanı Türkiyə dövlətinin və onun lideri cənab Rəcəb Tayyib Ərdoğanın Azərbaycana göstərdiyi mənəvi və diplomatik dəstək sözün həqiqi mənasında təmənnasız qardaşlığın təntənəsi idi. Vətən müharibəsi dövründə Türkiyənin dövlət strukturları, bütün xalqı Azərbaycanın Qələbəsi üçün bütün sferalarda böyük əzmkarlıq göstərdi. Bütün dünya Azərbaycan-Türkiyə qardaşlığının bir daha şahidi oldu.
      Prezident Rəcəb Tayyib Ərdoğanın Şuşaya səfəri, sonra Füzuli Beynəlxalq Hava Limanının açılışında iştirakı bir daha nümayiş etdirdi ki, Azərbaycan-Türkiyə qardaşlığı və müttəfiqliyi əbədi və dönməzdir. Bu qardaşlıq və müttəfiqlik Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın polad kimi möhkəm liderlik iradəsindən qaynaqlanan davamlı birlik və inkişaf strategiyasının təntənəsidir. 2021-ci ilin iyunun 15-də Şuşa şəhərində imzalanan Azərbaycan və Türkiyə arasında müttəfiqlik münasibətləri haqqında Bəyannamə iki qardaş ölkənin birlik və həmrəyliyinin tərənnümü olmaqla bərabər, özündə üç mühüm tarixi ehtiva edir. Birincisi, bu Bəyannamə tarixi Qars müqaviləsini yeni çalarlarla təsdiqlədi. İkincisi, bu sənəd Ulu Öndər Heydər Əliyevin xilaskarlıq missiyasını özündə yaşadan Milli Qurtuluş Günündə imzalandı. Üçüncüsü isə iki qardaş lider tarixi sənədə Qafqazın incisi, Türk dünyasının qeyrət qalası sayılan Şuşada imza atdılar.
      Hazırda davamlı inkişafda olan Azərbaycan-Türkiyə münasibətləri bütün beynəlxalq təşkilatlarda olduğu kimi, Türk Dövlətləri Təşkilatı, TÜRKSOY, TÜRKPA, Beynəlxalq Türk Mədəniyyəti və İrsi Fondu kimi beynəlxalq və regional təşkilatlar, həmçinin Azərbaycan-Türkiyə Yüksək Səviyyəli Strateji Əməkdaşlıq Şurası, Azərbaycan-Türkiyə Hökumətlərarası Müştərək İqtisadi Komissiya, Kənd Təsərrüfatı İcra Komitəsi, Quru Nəqliyyatı Birgə Komissiya, Gömrük Məsələləri üzrə Birgə Komitə, Azərbaycan-Türkiyə Qarışıq Komissiyası kimi mexanizmlər çərçivəsində genişlənməkdə və möhkəmlənməkdədir. Qardaş Türkiyə bu gün də hər şəraitdə Azərbaycanın yanında olduğunu vurğulamaqdadır. Şübhəsiz, iki ölkənin birgə addımlamasında Prezident İlham Əliyevlə Rəcəb Tayyib Ərdoğanın şəxsi dostluq və qardaşlıq münasibətləri də xüsusi rol oynayır. Hər iki ölkənin rəhbəri müxtəlif beynəlxalq tədbirlərdə daim bir-birinin haqlı mövqeyini birmənalı müdafiə edirlər. Yəni Türkiyə-Azərbaycan münasibətləri uğurlu regional və beynəlxalq əməkdaşlıq nümunəsi olmaqla yanaşı, həm də dostluq və qardaşlıq örnəyi kimi xarakterizə edilir. Bu məqam ötən gün Prezident İlham Əliyevin yerli televiziya kanallarına müsahibəsində bir daha gündəmə gətirildi. Dövlət başçısı ona ünvanlanan “kritik məqamda ilk kimə telefon edərsiniz” sualına cavab olaraq bildirdi ki, prinsipcə, ümumiyyətlə, çox nadir hallarda hansısa dövlət başçısına telefonla zəng edir. Ölkə başçısı qeyd edib ki, İkinci Qarabağ müharibəsi zamanı ən çox telefonla danışdığı insanlardan birincisi Türkiyə lideri olub: “Amma yəqin bu gün əgər hansısa ciddi bir məsələ ölkəmiz qarşısında dursa, əlbəttə, ilk növbədə qardaşım Rəcəb Tayyib Ərdoğana zəng edərəm, onu məlumatlandıraram”.
      Millət vəkili, Xalq şairi Sabir Rüstəmxanlı “Sherg.az”a açıqlamasında bildirib ki, müəyyən kritik məqamlarda Azərbaycan və Türkiyə rəhbərliyi, yaxud rəsmilər arasında təmaslar xeyli vacibdir. Deputatın sözlərinə görə, digər türk dövlətlərinin başçıları bizi gözləyən təhlükəni iki-üç əvvəldən hiss edirdilər: 
    “Ona görə də Türk Dünyası anlayışının gündəmə gəlməsi, türk dövlət başçılarının müntəzəm görüşləri, Türk Dövlətləri Təşkilatının formalaşması, müəyyən idarəçilik modellərinin yaradılması hamısı ona xidmət edir ki, “biz tək deyilik”. Bizim öz dünyamız, mühitimiz var. Türk Dünyası öz potensialına görə Avropa Birliyindən, yaxud digər regionlardan az əhəmiyyətli deyil və böyük perspektiv vəd edir. Türk birliyi dünyanın gələcək taleyində mühüm rol oynaya bilər. Tək-tək bizi əzərlər, imkanlarımızı əlimizdən alarlar. Amma bir yerdə olsaq, bizi əzmək qeyri-mümkündür. Türk dünyasının həlledici nöqtələri Türkiyə və Azərbaycandır. Ötən gün Azərbaycan Milli Məclisi Şimali Kipr Türk Cümhuriyyəti ilə dostluq qrupu yaratdı. Bunun özü mühüm mesajdır. Türkiyənin NATO-dakı nümayəndəsi, keçmiş XİN rəhbəri Mövlud Çavuşoğlunun Bakıya gəlməsi, burada verilən mesajlar dünyada diqqətlə izlənilir. Dünya görür ki, biz Brüssel kimi görüşlərə biganə deyilik və bunun cavabı da var. Təsadüfi deyil ki, ABŞ dövlət katibi A.Blinken və Avropa Birliyi Komissiyasının prezidenti Ursula Fon der Lyayen dövlət başçısı İlham Əliyevə zəng etdi. Görüşün Azərbaycana qarşı olmadığını iddia etdilər. Ermənistanı sülh prosesinə dəvət etdiklərini vurğuladılar. Əgər Ermənistana 270 milyon avro, 65 milyon dollar maddi yardım ayrılırsa, bu o deməkdir ki, Qərb həm də Ermənistanın müdafiəsini gücləndirir, İrəvanın hərbi xərclərini artırır”.
      Parlamentari qeyd edib ki, Qərb ölkələri Ermənistanı hərbi sənayesini inkişaf etdirməklə Azərbaycanın mövqelərini zəiflətməyə çalışırlar: “İnşallah, bu niyyətlərin heç biri baş tutmaz. Ermənistan ilk dəfə deyil ki, hansısa dövləti arxasına alaraq bizə baş qaldırır. Vaxtı ilə Rusiya erməniləri bizə baş bəlası edirdi. İndi də eyni şeyi ABŞ və Avropa edir. Nəticə etibarı ilə isə Ermənistan öz başına bəla açır. Balaca bir dövlətə bu qədər missionerlər, bu qədər hərbi sursat, texnika cəmləməyin gələcəyi yoxdur. Hər halda məsələlərə səbrlə, təmkinlə yanaşmalıyıq. Başqalarını ittiham etməkdənsə, dünyanın böyük gücləri ilə münasibətləri daha düzgün şəkildə qurmalı, ardıcıl iş aparmalıyıq”.