Vətəndaş Həmrəyliyi Partiyası

Category: Slayder

  • Samir Əsədli: “Gürcüstan “Evə, Avropaya” doğru israrlıdır”

    Yaxın dönəmdə Saakaşvilinin həbsi ilə bağlı dəyişiklikləri də görəcəyik
     
      Gürcüstanın paytaxtı Tbilisidə “Evə, Avropaya” şüarı altında etiraz aksiyaları başlayıb. Aksiya təşkilatçıları deyiblər ki, iyunun 24-də Baş nazir İrakli Qaribaşvilinin istefası və milli razılıq hökumətinin yaradılması ilə bağlı irəli sürdükləri ultimatumun vaxtı başa çatıb. Mitinqə Gürcüstanın müxtəlif regionlarından iştirakçılar və bir sıra ali məktəblərin tələbələri də qatılıb. Aksiyanı aparıcı müxalifət partiyalarının nümayəndələri də dəstəkləyiblər. 
     
      Məlumat üçün bildirək ki, qonşu ölkədə kütləvi aksiyalar Gürcüstanın Avropa İttifaqına üzvlüyə namizəd statusu almamasından sonra keçirilməyə başlanılıb. Təşkilatçılar hesab edirlər ki, statusun verilməsi üçün Avropa Komissiyasının təqdim etdiyi 12 şərtin yerinə yetirilməsini milli razılıq hökuməti təmin edə bilər.
    Qonşu ölkədə baş verən olayları “Şərq”ə dəyərləndirən Vətəndaş Həmrəyliyi Partiyasının sədr müavini Samir Əsədli deyib ki, Gürcüstanda Avropaya inteqrasiya ilə bağlı müxalifətlə hökumət arasında fikir ayrılığı Avropa Birliyinin qərarından sonra kəskin hal alıb. Partiya rəsmisi bildirib ki, müxalifət Baş nazir İrakli Qaribaşvilinin istefasını, Avropa Birliyinin 12 şərtini yerinə yetirmək üçün xalqın etimadına malik “texniki hökumət”in yaradılmasını tələb edir: 
    “Ancaq bu tələblər yerinə yetirilmədiyi üçün küçə etirazları başlayır. Əslində Gürcüstan özünü çoxdan “Avropa dövləti” hesab edir. Baxmayaraq ki, onun coğrafi məsafəsi və Cənubi Qafqaz regionunda Rusiya, Azərbaycan, Ermənistan və Türkiyə ilə sərhəddə yerləşməsi kontinental mənsubiyyətlə bağlı suallar yaradır. Qonşu ölkənin qarışması sözsüz ki, Rusiya-Ukrayna müharibəsi ilə bağlıdır. Rəsmi Tbilisi ilk gündən bu müharibədə neytral mövqe tutub ki, bu da Qərbi qane etmir.   Rusiyaya qarşı tətbiq edilən sanksiyalar faktiki olaraq təsirsizdir. Bu da Avropanı narazı salır. Neft və qaz satışından daxil olan vəsaitlər günbəgün artır. Rusiya da Ukraynada geri çəkilənə oxşamır. Gürcüstan hakimiyyəti bunları nəzərə alaraq, Rusiya ilə münasibətləri gərginləşdirməyə getmir. Bu durum Qərbə xoş gəlmədiyindən Gürcüstana qarşı ögey münasibət sərgiləyir. Vəziyyətdən yararlanmağa çalışan gürcü müxalifəti isə xalqı küçələrə çıxarır”.
     
      S.Əsədliyə görə, Gürcüstan müxalifəti əmindir ki, ölkənin Avropa yolunda irəliləməsində ən böyük maneə “Gürcü Arzusu” Partiyasının qurucusu, milyarder Bidzina İvanişvilidir:
     “Fikrimcə, proseslər hökumətin güzəştə getməsi ilə yekunlaşacaq. Yaxın dönəmdə eks prezident Mixail Saakaşvilinin həbsdə saxlanmasından tutmuş, Ukrayna müharibəsinə münasibətə qədər bir çox məsələlərdə dəyişikliyin şahidi olacağıq”.

  • Samir Əsədli: “Artıq Gürcüstan hökumətinə qarşı tənqidlər ən yüksək səviyyədə, Avropa Parlamentində səslənir”

    Samir Əsədli: “Gürcüstan da Ukrayna kimi bundan sonra Rusiyaya heç vaxt simpatiya duymayacaq” 
     
    “Amma təcrübə Gürcüstanı ehtiyatlı davranmağa məcbur edir”
     
    Gürcüstan Prezidenti Salome Zurabişvili ölkə vətəndaşlarını Avropaya inteqrasiya siyasəti kursuna dəstək məqsədilə Avropa meydanında aksiya keçirməyə çağırıb. Zurabişvili Avropa İttifaqı ölkələrinin Gürcüstandakı səfirlərini də mitinqdə iştiraka səsləyib: “Gəlin Avropaya inteqrasiya yolunda özümüzü, birliyimizi, iradəmizi göstərək. Əhali, cəmiyyət, mən, siyasi partiyaların nümayəndələri, hakimiyyət – hamımız sadə vətəndaş olacağıq. Çıxışlar, bəyanatlar, plakatlar olmayacaq”. 
    Zurabişvili yarım saatlıq çıxışında Avropaya inteqrasiya yolunda yarana biləcək problemlərdən, o cümlədən Gürcüstanın tərəfdaşlarından təcrid olunmaq təhlükəsindən danışıb. Prezident belə vəziyyətin yaranmasında hakim “Gürcü arzusu” partiyasını günahkar bilib. Onun sözlərinə görə, Brüsselə səfəri zamanı məlum olub ki, “iş bərbaddır” və Gürcüstan “Şərq Tərəfdaşlığı”nın aparıcı ölkələri sırasından ən sona pillələrə enib. O, hakimiyyətin səhvləri arasında 2021-ci ilin yazında Avropa İttifaqı Şurasının prezidenti Şarl Mişelin vasitəçiliyi ilə müxalifətlə imzalanmış sazişin yerinə yetirilməməsini göstərib. Hakimlərin saxta yolla təyinatını, müxalif Nika Qvaramiyanın həbsini və Dövlət Müfəttişliyi Xidmətinin ləğvini hökumətin Gürcüstanı gözdən salan qərarı kimi dəyərləndirib.
    Zurabişvili hakimiyyəti Avropa ölkələri liderləri ilə işləmək üçün yüksək səviyyəli səfərlər etməməkdə ittiham edib. Prezidentin fikrincə, Avropa Parlamentində partiyalarla iş düzgün aparılmayıb, nəticədə Gürcüstanla bağlı sərt qətnamə qəbul edilib. Onun sözlərinə görə, “Gürcü arzusu”nun liderləri öz ritorikaları ilə Avropa parlamentarilərini narazı salıblar. Həmçinin dost Ukraynaya münasibətdə qəbuledilməz hərəkətlərə yol veriblər. Prezident vurğulayıb ki, Gürcüstanın təcrid olunması real təhlükə yaradır. Xatırladaq ki, Avropa Parlamenti Gürcüstanda demokratik durumu qəti şəkildə pisləyən bəyanatla çıxış edib. Qətnaməyə görə, son illər Gürcüstanda media mühiti pisləşib, jurnalistlərə qarşı çoxsaylı fiziki zorakılıq hallarına yol verilir.
    Vətəndaş Həmrəyliyi Partiyasının sədr müavini, siyasi şərhçi Samir Əsədli “Şərq”ə bildirib ki, Gürcüstanda prezident-hökumət qarşıdurması təkcə bunlardan ibarət deyil. Partiya funksioneri deyib ki, hökumət Salome Zurabişvili ilə bağlı hakimiyyət qolları arasında hüquq və səlahiyyətlərin dəqiqləşdirilməsi tələbi ilə Konstitusiya Məhkəməsinə müraciət etmişdi: “Konstitusiya Məhkəməsinə müraciətə səbəb prezidentin hökumətin təklifi ilə bir sıra ölkələrdə səfir təyin etməkdən imtina etməsi olub. Nazirlər Kabinetinin fikrincə, səfirlərin təyin edilməsi və onların vəzifədən azad edilməsi Gürcüstan prezidentinin konstitusiya səlahiyyətlərinə aid deyil. Hakim partiya prezidenti konstitusiyanı pozmaqda ittiham etmiş, daha sonra isə hökumət əlavə etmişdi ki, Prezident bir sıra səfirlərin təyinatına qarşı çıxıb”.
     
    S.Əsədli vurğulayıb ki, əslində bütün bunlar məsələnin formal tərəfidir: “Salome Zurabişvilinin qərbyönümlü, hökumətin isə rusyönümlü olduğu, İvanişvilinin nəzarətində olduğu məlumdur. Bu qüvvələrin qarşıdurması əslində Rusiya-Qərb gərginliyinin təzahürüdür. Gürcüstan da Ukrayna kimi bundan sonra Rusiyaya heç vaxt simpatiya duymayacaq. 
    Amma təcrübə Gürcüstanı ehtiyatlı davranmağa məcbur edir. Rusiya Ukrayna bataqlığına batdıqca, hesab etmək olar ki, bunun əksini fikirləşənlərin sayı artacaq. Bu arada Avropa Parlamentinin ən zəngin gürcü hesab olunan Bidzina İvanişviliyə qarşı sanksiya tətbiq edilməsi tələbinin yer aldığı qətnaməsini diqqətdən qaçırmaq olmaz. Keçmiş prezident Mixail Saakaşvilinin həbsi Gürcüstanın hazırkı iqtidarı üçün ciddi problemə çevrilib. “Gürcü arzusu” iqtidarı Moskvanın sifarişini yerinə yetirməkdə, keçmiş prezidentdən intiqam almaqda ittiham olunur. Saakaşvilinin həbsinə görə Gürcüstan hökumətini Qərb siyasətçiləri ilə yanaşı, Ukrayna və Moldova prezidentləri də tənqid edir. Artıq Gürcüstan hökumətinə qarşı tənqidlər ən yüksək səviyyədə, Avropa Parlamentində səslənir. Bidzina İvanişviliyə qarşı sanksiyanın tətbiqi tələbi isə Qərbin “Gürcü arzusu” iqtidarına qarşı sözdən əmələ keçdiyini göstərir. Ukrayna və Moldovadan fərqli olaraq, Avropa Parlamentinin deputatları Gürcüstana namizəd statusunun verilməsinə birbaşa çağırış etməyə çəkiniblər. Bununla belə, qeyd olunub ki, hökumətin avropalı tərəfdaşların tövsiyələrini yerinə yetirməsi şərti ilə ölkə namizəd statusu almalıdır”.

  • Qarabağdan həmişə kart kimi istifadə edən revanşist siyasi dairələr… — ŞƏRH

    Ermənistanda revanşistlər Laçın şəhərinin Azərbaycanın nəzarətinə keçməsinə qarşı təxribat hazırlayır. Mümkün təxribatlar “Azadlıq hərəkatı” adlanan radikallar tərəfindən planlaşdırılıb. Hərəkatın həmtəsisçisi Nairi Oxikyan deyir ki, hazırda onların üzvləri Laçının “müdafiəsində” fəal iştirak edir. 

    Məsələ ilə bağlı fikirlərini Demokrat.az-a dəyərləndirən VHP-nin Mərkəzi İcra Aparatının rəhbəri Samir Əsədli deyib ki, Ermənistan hakimiyyətinin alternativ yolu qalmayıb. O qeyd edib ki, onlar Azərbaycanın ərazi bütövlüyünü tanıyır və ölkəmizə qarşı ərazi iddiasından geri çəkilirlər:

    “Təbii olaraq bu proses Qarabağdan həmişə kart kimi istifadə edən, varlanan və müxtəlif resurslar əldə edən, hakimiyyət rıçaqlarına sahib olan həmin “Qarabağ klanı”nı təmsil edən Koçaryan, Sarkisyan, Ohanyanların olduğu siyasi mərkəzləri və digər revanşist siyasi dairələri narahat edir. Onlar özləri də məqsədli şəkildə erməni cəmiyyətində bir rəy formalaşdırmağa çalışırlar ki, artıq Qarabağ məsələsində hər addımda Azərbaycanın mövqeyi möhkəmlənir. Ermənistan hakimiyyəti guya Qarabağı Azərbaycana satır. Yaxud başqa bir tezis görürük ki, əgər Qarabağı itirsələr guya bu, Ermənistan dövlətçiliyinin sonu olacaq və s. Bu tip tezislərlə manipulyasiyalar etməyə çalışırlar“.

    S.Əsədli əlavə edib ki, Laçın dəhlizi məsələsi də Ermənistan müxalifətinin revanşist dairələrin informasiya spekulyasiyası kimi qiymətləndirilə bilər:

    “Yəni, məqsədli şəkildə süni təşviş yaratmağa çalışırlar. Guya Qarabağ erməniləri üçün vəziyyət faciəvi həddə gəlib çatacaq. Halbuki, burada belə isterika üçün heç bir əsas yoxdur. Çünki 10 noyabr bəyanatının müvafiq maddəsində qeyd olunur ki, Laçın şəhəri 3 il ərzində alternativ yolun çəkilməsindən sonra Azərbaycana təhvil veriləcək. Bu 10 noyabr bəyanatı üzrə Ermənistanın üzərinə götürmüş olduğu öhdəlikdir və bu da yerinə yetirilməlidir. Azərbaycanın Laçın dəhlizində nəzarət-buraxılış postları qurmasından sonra baş verəcək olayları indidən proqnozlaşdırmaq o qədər də çətin deyil. Darmadağın edilmiş Ermənistan ordusunun silahlı tör-töküntüləri bölgədən çıxarılacaq. Araik Arutyunyan və onun separatçı-terrorçu dəstəsi bölgədən qaçmaq məcburiyyətində qalacaq“.

    “Buna imkan tapmayanlar, yəni qaçmaqda gec qalanlar həbs olunacaq. Azərbaycan vətəndaşlığını qəbul edəcək sadə ermənilər isə bölgədə dövlətimizin himayəsi altında yaşaya biləcəklər. Ona görə də, tezliklə baş verəcəklərdən məlumatlı olan revanşistlər populist bəyanatlar səsləndirirlər. Bu gün İrəvan küçələrində revanşist bəyanatlar səsləndirən Koçaryanlar, Sarkisyanlar və Ohanyanlar 44 günlük Vətən müharibəsi zamanı ətrafında məğlubedilməzlik mifi yaratdıqları ordusunu məhv edən “Dəmir yumruğ”umuzu yaddan çıxartmamalıdırlar. Bu gün Azərbaycan həmişə olduğu kimi öz mədəniyyətini, humanizmini nümayiş etdirərək və sivil dünyanın normalarına hörmətlə yanaşaraq danışıqlar masasında məsələlərin həlli təşəbbüsü ilə çıxış edir. Əgər uzatdığımız sülh əlimizi tutmaqdan müxtəlif bəhanələr gətirərək yayınmaq istəsələr onları daha ağır günlər gözləyəcək“, -deyə VHP rəhbəri fikirlərini yekunlaşdırıb.

    Aynurə Pənahqızı
    Demokrat.az

  • VHP Qusarda konfrans keçirdi – FOTO

    Bu gün VHP Qusar rayon təşkilatının növbəti konfransı keçirilib. Konfrans iştirakçıları ilk öncə şəhidlərin və təşkilatın mərhum sədri Həsənbala Məmmədovun xatirərəsini yad ediblər.
    Konfransın sədarəti seçildikdən sonra RT sədr müavini Məzahir İlyasov hesabat məruzəsi ilə çıxış edərək konfranslararası müddətdə təşkilatın fəaliyyəti barədə geniş məlumat verib. Ardınca
    NTK sədri Gülarə Əlməmmədova da hesabat çıxışı edib.
    Konfrans iştirakçılarından Əlişəfa Məmmədov, Edik Hacıxanov, Bəhruz Bədəlov, Xalidə Dadaşbalayeva və digərləri çıxış edərək təşkilatın fəaliyyəti, görülmüş işlər haqda danışıblar.
    Konfransda iştirak edən VHP sədrinin müavini və Mərkəzi İcra Aparatının rəhbəri Samir Əsədli çıxışında ölkədə, regionda baş verən siyasi olaylar, partiyanın fəaliyyəti, qarşıda duran işlər və partiyanın yaranmasının 30 illiyi ilə bağlı planlaşdırılan tədbirlər barədə geniş çıxış edib.
    Konfransda təşkilati məsələlərə baxılıb. Rayon Təşkilatının sədri, Məclis və Nəzarət Təftiş Komissiyasının üzvləri seçilib. Açıq səs vermə nəticəsində Əlişəfa Məmmədov rayon təşkilatının sədri, Edik Hacıxanov sədrin birinci müavini, Əfsanə Rəsulova, Elman Gərayxanov müavin, Məzahir İlyasov NTK sədri seçilib.


  • ABŞ sülh sazişinin imzalanmasına inanır

    Vaşinqton güclü Azərbaycanla bütün istiqamətlərdə əlaqələrini gücləndirəcək
     
    “ABŞ-ın Azərbaycanla ikitərəfli əlaqələri ən yüksək səviyyədədir”. Bunu ABŞ-ın Azərbaycandakı səfiri Li Litzenberger brifinqdə deyib. Diplomat qeyd edib ki, ölkələr arasında təmaslar yüksək səviyyədə davam edir. ABŞ səfiri vurğulayıb ki, bu təmasları davam etdiriləcək, gücləndiriləcək: “Həm davamlı sülhün əldə olunması, həm də yerdə qalan digər məsələlərin həlli üçün tərəflər əməkdaşlıq etməyə davam edəcək”.
    Səfir 907-ci düzəlişdən də danışıb:
     “Konqresin “Azadlığa Dəstək Aktı”na 907-ci düzəlişi qüvvədədir. Lakin bu, bizim Azərbaycana çox vacib təhlükəsizlik dəstəyi verməyimizə mane olmayıb. Biz bu sahədə Azərbaycana 100 milyon dollardan çox maliyyə dəstəyi vermişik. Bu vəsait daha çox Azərbaycanın cənub sərhədlərinin təhlükəsizliyinə yönəldilib”. Səfir vurğulayıb ki, 907-ci düzəlişlə bağlı yekun qərar ABŞ Konqresinə aiddir: “Ancaq mən optimistəm ki, Azərbaycan və Ermənistanın dayanıqlı sülhə nail olması imkanı – hansı ki, biz bu istiqamətdə irəliləyiş görürük – şərait yaradacaq ki, biz Cənubi Qafqaz ölkələri ilə münasibətlərimizi bütün miqyasda əhəmiyyətli dərəcədə nəzərdən keçirək”. O, Prezidentin köməkçisi Hikmət Hacıyevin Vaşinqtonda ABŞ Prezidentinin milli təhlükəsizlik üzrə köməkçisi Ceyk Sallivanla görüşdüyünü xatırladıb. Diplomatın sözlərinə görə, Hikmət Hacıyev və Ceyk Sallivan digər məsələlərlə yanaşı, regionda sülh prosesini də müzakirə ediblər:
    “Biz düşünürük ki, ABŞ normallaşma prosesində önəmli rol oynaya bilər. Biz hazırda Avropa İttifaqının tərəflərlə təmasda uğurlu olduğunu görürük və bunu çox dəstəkləyirik. Onlar tərəflər arasında birbaşa təmasların və görüşlərin baş tutmasında vasitəçilik edir. Liderlər, XİN rəhbərləri və digər səviyyələrdə təmaslar davam edir, sərhədlərin delimitasiyası, regionda kommunikasiyaların açılması məsələləri müzakirə edilir”.
    ABŞ-Azərbaycan əlaqələri ilə bağlı “Şərq”ə danışan Vətəndaş Həmrəyliyi Partiyasının sədr müavini Samir Əsədli deyib ki, 44 gün davam edən Vətən müharibəsi nəticəsində Azərbaycanın beynəlxalq səviyyədə tanınmış ərazilərinin Ermənistan tərəfindən işğalına son qoyulub. Ölkəmizin ərazi bütövlüyü bərpa olunub. BMT Təhlükəsizlik Şurasının müvafiq qətnamələrinin icrası təmin edilib: 
    “Münaqişənin başa çatması bölgədə yeni geosiyasi reallıq yaradıb. Davamlı sülh, iqtisadi dirçəliş və regional əməkdaşlıq üçün əlverişli zəmin formalaşdırıb. Ukraynada baş verənlər də bölgədə böyük güclərin siyasətinə əhəmiyyətli təsir göstərib. ABŞ və Avropa Birliyinin son mövqelərində bunun şahidi ola bilərik. İndiki situasiyada  Vaşinqtona Cənubi Qafqaz siyasətində Azərbaycanla daha da yaxınlaşmaq sərfəlidir. Rusiyanın regionda təsirlərinin azaldılması üçün Amerika konfrantasiya yolundan imtina etməlidir, yəni Ermənistan hakimiyyətinə açıq dəstəklə yanaşı rəsmi Bakı üzərində Rusiya təsirlərinin güclənməsinə imkan verməməlidir. Rusiya məsələsi ötən bu müddət ərzində beynəlxalq normalara cavab verə biləcək səviyyədə deyil. ABŞ onu artıq başlıca təhlükə mənbəyi olaraq görür. Odur ki, Azərbaycanın Ukraynanın suverenliyi və beynəlxalq enerji təhlükəsizliyi sahəsində oynadığı rola əhəmiyyət verir. Avropa İttifaqı kimi qurumların, ABŞ kimi söz sahibi olan dövlətlərin son illərdə ölkəmizə etimadı daha da artıb və onlar əməkdaşlığa hazır olduqlarını bildirirlər. Bu əməkdaşlıqlar arasında mühüm amillərdən biri də hazırda dünyada cərəyan edən mürəkkəb hadisələr fonunda enerji təhlükəsizliyinə Azərbaycanın verə biləcəyi töhfədir”.
     
    S.Əsədli xatırladıb ki, ABŞ Prezidenti Cozef Baydenin dövlətimizin başçısına son məktubunda təkcə Azərbaycana məxsus qaz yataqlarının vacibliyindən deyil, həm də ölkəmizin bu sahədə böyük, regional tranzit oyunçuya çevrilməsindən danışılması diqqətçəkən məqamlardandır:
     “ABŞ prezidentinin bu məktubu onu deməyə əsas verir ki, dünyanın super gücü olan Amerika Azərbaycanı regionun lider dövləti kimi qəbul edir.
    Xüsusilə, Qafqaz və ümumən Trans-Xəzər regionunun inkişafı və gələcək əməkdaşlıq perspektivləri baxımından Azərbaycanla münasibətlərin inkişaf etdirilməsinə önəm verilir.
     Burada bir məsələni də xüsusilə qeyd etməliyik ki, ABŞ fərqindədir ki, regionun inkişafı Azərbaycanın və onun liderinin qlobal miqyaslı səyləri və konstruktiv mövqeyi ilə sıx bağlıdır.
      Bu baxımdan, ABŞ Azərbaycanla münasibətlərə yüksək dəyər verir və gələcək əməkdaşlığı da yeni müstəvidə davam etdirməkdə maraqlıdır”.

  • VHP-dən Rusiyaya etiraz: suverenliyimizin əleyhinə istənilən addımın qarşısı alınacaq

    Uzun illər Azərbaycan torpaqlarının işğal altında qalmasında birbaşa iştirakçı olan Rusiya yenidən separatçı ermənipərəst mövqeyini ortaya qoyub. Bu dəfə Rusiya Xarici İşlər Naziri Sergey Lavrov İrəvanda Xocalı rayonunun Fərrux kəndi ilə əlaqəli vəziyyətin Azərbaycan və Ermənistan arasında sərhədlərin delimitasiyası kontekstində nəzərdən keçiriləcəyinə dair fikir səsləndirib. Sonradan Rusiya XİN  fikirlərə düzəliş etsə də Lavrov kimi peşəkar diplomatın məlum fikirləri təsadüfi, yanlışlıqla  səsləndirdiyinə inanmaq çətindir.  Rusiya xarici işlər naziri S.Lavrovun Ankarada Türkiyə diplomatiyasının lideri Mövlud Çavuşoğlu ilə qapalı görüşdən sonra “Biz Cənubi Qafqazda necə fəaliyyət göstərəcəyimiz barədə anlaşma əldə etdik” deməsinin ardınca İrəvanda fərqli mövqe göstərməsi Kremlin ənənəvi “bulanıq suda balıq tutmaq” siyasətinin davamıdır. Son vaxtlar rus sülhməramlılarının nəzarəti altında olan ərazilərdə baş verən təxribatlar və Azərbaycanın suveren hüququna qarşı yönəlik hərəkətlər də bu siyasətin  tərkib hissəsidir. Kreml artıq qəbul etməlidir ki, tərəflər problemi özü həll etmək iqtidarındadır, delimitasiya və demarkasiya prosesi  yalnız Azərbaycan və Ermənistan sərhədlərinin dəqiqləşdirilməsini nəzərdə tutur. Xankəndi və ətraf bölgə isə Azərbaycanın ayrılmaz tərkib hissəsidir. Azərbaycanın tərkib hissəsi olan bir ərazi ilə bağlı delimitasiyadan danışmaq sadəcə, beynəlxalq hüquq normalarından uzaqlaşmaq deyil, həm də, Azərbaycanın beynəlxalq hüquqla təsbit olunmuş ərazi bütövlüyünə açıq təhdiddir. Bütün bunlar onu göstərir ki, Rusiya Azərbaycan-Ermənistan münasibətlərinin normallaşmasında hər hansı müsbət irəliləyişin olmasını istəmir. Əksinə, Kreml əlindən gələn hər şeyi edir ki, iki ölkə arasında sülh sazişinin hazırlanması prosesi pozulsun.

    Vətəndaş Həmrəyliyi Partiyası Rusiyanın son addımlarını və siyasətini qətiyyətlə pisləyərək bəyan edir ki, Azərbaycan bütün qonşu dövlətlərlə normal münasibətlərə sadiqdir, amma dövlətimzin suverenliyinə qarşı istənilən addımın qətiyyətlə qarşısı alınacaq.

  • “Şuşa əhalisi quruculuq işlərinə cəlb edilməlidir”- Sabir Rüstəmxanlı

    Sabir Rüstəmxanlı: “Prosesi daha da sürətləndirmək üçün əhaliyə müraciət etmək olar”

    Şuşa işğaldan azad edildikdən sonra bu şəhərdə bərpa və yenidənqurma işləri sahəsində mühüm addımlar atılır, bir çox əhəmiyyətli layihələr gerçəkləşdirilir. Bununla belə, “Şuşa əhalisi Qalaya necə qayıdacaq?” deyə suallar da verilir. Bununla bağlı plan-layihə varmı? Bəs fərdi yaşayış evlərinin taleyi necə olacaq, onları da dövlət bərpa edəcək?

    Millət vəkili Sabir Rüstəmxanlı mövzu ilə bağlı “Yeni Müsavat”a bunları şərh etdi: “Şuşaya tez-tez səfər edirəm. Həm poeziya günlərində, həm Milli Məclisin siyasi partiyaları ilə bir yerdə, həm Türkiyə, Gürcüstan və Azərbaycan parlamentlərinin beynəlxalq əlaqələr komitələrinin birgə yığıncağının keçirilməsi ilə bağlı səfərlərimiz olub. Şuşaya hər dəfə gedəndə dəyişiklikləri görürəm. Şuşada quruculuq işləri başlayıb. 30 ildə orada ermənilər hay-küylərinə baxmayaraq heç bir iş görməyiblər. Əksinə, nə var idisə, onları dağıtmaqla məşğul olublar. Şuşada yolun çəkilişi, orada minaların təmizlənməsi, o yolların təhlükəsizliyinin qorunması, əlbəttə, böyük vaxt tələb edən bir işdir. Şuşaya gedən Zəfər yolu çox çətin  yerdə yerləşir, meşələr, dərələr, sərt yoxuşlar oradan keçir. Amma nəticədə son dərəcə gözəl yol çəkildi.

    Bunlar hamısı görülən işlərdir. Bunlar olmadan Şuşada məskunlaşmaqdan danışmağa dəyməzdi. İndi Şuşada bir neçə muzey açılıb, hotellər fəaliyyət göstərir, hər gün adamlar gəlib-gedir. Şuşa Şəhər İcra Hakimiyyətinin binası tikilir. Orada bir neçə böyük müəssisənin təməli qoyulub. Bülbülün ev muzeyi bərpa olunub. Bir sözlə, abadlıq işləri sürətlənir. Bu prosesi daha da sürətləndirmək üçün Şuşa əhalisinə müraciət etmək olar. Onların öz mülklərinə baxması, hansının imkanı varsa, bərpa işində iştirak etməsi, evini bərpa etməsi lazımdır. Onlar yenidən qurmaq işində iştirak edərlərsə, bu, dövlətə ciddi yardım olar. Bu iş sürətlənər. Hesab edirəm ki, müəyyən müddətdən sonra Şuşa əhalisi quruculuq işinə cəlb edilməlidir”.

    Afaq MİRAYİQ,
    “Yeni Müsavat”

  • Milli Məclisdəki bir mühahisə haqqında – Sabir Rüstəmxanlı

    Sabir Rüstməmxanlı
    Sabir Rüstməmxanlı

    Millət vəkili, Azərbaycan Dil Qurumunun sədri Sabir Rüstəmxanlı ötın gün parlamentdə qanun layihəsi ilə bağlı çıxışına hüquqşünaslar təəfindən tutulan irada cavab verib. Millət vəkilinin öz facebook səhifəsində açıqladığı fikirləri Vhp.az olaraq diqqətinizə çatdırırıq:

    “Milli Məclisin may ayının 31-ində keçirilən yığıncağında Azərbaycan Respublikasının İnzibatı Presessual Məcəlləsində dəyişikliklərin müzakirəsində mən “mübahisələndirilməsi” sözünə və qanunlarımızda bu tipli yapma (süni) sözlərin çoxluğuna etiraz etmişdim. (Qanunda həmin sözün işlədildiyi cümlə də qüsurludur. Lakin bu məsələyə toxunmamışdım)).
    Çıxışımda onu da bildirmişdim ki, Azərbaycan Respublikasının Prezidentinin “Hüquqi Ekspertiza və Qanunvericilik Təşəbbüsləri Mərkəzi” yaratması çox ciddi, dəyərli bir addımdır və yaxşı olardı ki, həmin komissiyanın tərkibində təcrübəli filoloq da olsun.
    “Mübahisələndirmə” sözü hüquqşünasların süni sürətlə yaratdıqları və dilimizin söz- yaratma qanunlarına uyğun olmayan bir kəlmədir. Ola bilsin mənim yanaşmamın özündə də mübahisəli məqam var. Həqiqət bu cür mübahisələrədə ortaya çıxır.
    Qanunların dilinin süni surətdə akademikləşdirilməsinə və aydın olmayan terminlərlə doldurulmasına ehtiyac yoxdur.
    Mənim sözümə etiraz edən Milli Məclis sədrinin birinci müavini, hörmətli Əli Hüseynli bildirdi ki, “mübahisələndirilmə” hüquqi termindir; digər həmkarım Ziyafət Əsagərov isə qətiyyətlə dedi ki, bu termin Nazirlər Kabineti tərəfindən təsdiqlənmiş orfoqrafiya lüğətimizdə vardır. Düşündüm ki, sahələr üzrə terminləri izləmək imkanımız yoxdur, bir halda ki, hörmətli hüquqşünas həmkarlarım bu sözün orfoqrafiya lüğətində olduğunu deyirlər və bu məsələdə təkid edirlər, bəyənmədiyim söz olsa da söhbəti uzatmağa dəyməz. Doğrudan da, hüquq araşdırmalarında, nadir hallarda olsa da, bu sözə rast gəlmək mümkündür (məsələn “əqdin mübahisələndirilməsi”), lakin söz uğursuz olduğuna və mahiyyəti ifadə etmədiyinə görə dalınca açıqlama verilir, “mübahisə edilmə” və s.
    “Mübahisələndirilməsi”- “qəsdən mübahisə yaratmaq” anlamı verir; halbuki qanunda söhbət “məsələnin müzakirəyə açılması”ndan, vətəndaşın Mərkəzi Seçki Komissiyasının qərarından şikayət etmək hüququndan gedir.
    Kiməsə bunlar xırda şey kimi görünə bilər. Amma dildə xırda şey yoxdur. Sözün necə deyilməsi bəzən mahiyyəti dəyişdirir. Qanunların qrammatikasının nə qədər mühüm olduğunu hüquqşünaslar yaxşı bilirlər.
    Orfoqrafiya lüğətimizdə müxtəlif sahə lüğətlərindən gələn və bəzi dilçilərimizin xəyal məhsulu olan yüzlərlə qondarma söz var və bu barədə mətbuatda gedən mübahisələri də unutmamışıq. Düşündüm ki, yəqin həmkarlarım düz deyir, ola bilsin bu söz də orfoqrafiyamızda özünə yer tapıb.
    Maraq üçün Milli Elmlər Akademiyasının Nəsimi adına Dilçilik insititutunun hazırladığı “Azərbaycan dilinin orfoqrafiya lüğəti”nin 2021-ci ildə buraxılmış və Azərbaycan Respublikası Nazirlər Kabinetinin təsdiqlədiyi 7-ci nəşrini açdım və həmin sözü axtardım, sonra Orfoqrafiyanın 2004- cü il nəşrinə də baxdım
    Həmkarlarıma bildirməliyəm ki, orfoqrafiya lüğətində “mübahisələndirmə” sözü yoxdur.
    Bəlkə hüquq terminləri lüğətində var, bilmirəm. Lakin Milli Məclisdə məhz Nazirlər Kabinetinin təsdiqləyi lüğət vurğulanmışdı və bu rəsmi lüğətə istinad edilmişdi.
    Yanılıblar…
    Yeri gəlmişkən bir daha deyim ki, bəzi qanunlarımızda ana dilinə yanaşma tərzini qətiyyən qəbul etmirəm. Qanunlarımız sadə insanların anlamadığı, tərcümədən gələn və özümüzküləşdirilməsi mümkün olan yabançı sözlərlə doludur.
    Dəfələrlə demişəm, yazmışam ki, qanun yaradıcılığı ilə məşğul olan insanların bir qismi ana dilini yaxşı bilmədiklərinə görə istifadə etdikləri yabançı mənbələrin dilimizə yad olan terminlərini qanunlarımıza axıdırlar. Bəhanə də budur ki, “bunlar beynəlxalq sözlərdir, dünya belə işlədir, biz də belə işlədək”. Dünyada “beynəlxalq söz” deyilən bir anlayış yoxdur. Dilinin saflığını qorumaq istəyən xalqlar bu “beynəlxalq kəlmə”lərin qarşılığını tapırlar. Bu barədə 2015-ci ildə yazdığım məqalədən bir parçanı bura köçürüb xatırlatmağı və qanun yaradıcılarından dilimizə sayqı ilə yanaşmağı tələb etməyi özümə borc bilriəm.
    “Yaradıcı yanaşmanın olmadığına görə, həm arxaikləşmiş ərəb-fars sözləri, həm də Avropa sözləri öncə qanunlarımıza, sonra da işlək dilə yol tapır. Bu baxımdan iki qanunun dilini gözdən keçirmək yetərlidir. Təhsil Qanunu dilimizə – adyunktura, akkreditasiya, distant təhsil, informal təhsil, innovasiya, kampus, nostrifikasiya, rezidentura, eksternat təhsil, kurikulum, təhsil françayzinqi, tyotor… Qiymətli Kağızlar bazarı qanunu isə – anderaytinq, benefisiar, emitent, listinq, institusional investor, marketmeyker, nettinq, repo müqaviləsi – kimi sözləri zorla pərçimləmişdir. Son illərdə qanunlarımız vasitəsi ilə dilimizə keçmiş çoxlu belə söz var. Əslində, bu sözlərin çoxunun ana dilində hamının başa düşəcəyi qarşılığını tapmaq olar. Deyək ki, distant təhsil əvəzinə – uzaqdan və ya məsafəli təhsil, informal təhsil yerinə – özeyitim və ya özünütəhsil, kampus əvəzinə – tələbə yurdu, hind quşlarının qurultsuna bənzəyən kurikulum yerinə– təhsil proqramı, eksternet təhsil yerinə – qabaqlayıcı təhsil yazsaq dünya dağılmazdı. Təbii ki, mənim atüstü dediklərimdən daha uğurlu variantlar da tapmaq olar. “İnvestisiya”, “unifikasiya”, “identifikasiya”, “regional”, “kollekvium”, “miqrasiya”, “kvorium”, “resurs”, “ombusdman”, “prosedur”, “monitor”, “klerinq”, “market”, “kvota”, “koalisiya”, “aksiya”, “arqument”, “bakalavr”, “vakansiya”, “vizual”, “deqradasiya”, “diskussiya”, “instruksiya”, “kontrast”, “fraza” və s. kimi dilimizə nəzarətsizlikdən və dəb xətrinə gətirilən onlarla sözün ana dilində qarşılığı var və ya yaradıla bilər. Bu şəkildə qapıları açıb bütün sözləri içəri buraxsaq, dilimizin taleyi necə olacaq?”
    Qanunların dilinə tələbkarlıqla yanaşmağımın arxasında bu narahatçılığım dayanır…
    P.S: Yeri gəlmişkən, bu gün Uşaqların Müdafiə günüdür. Bütün uşaqları və ata-anaları ürəkdən təbrik edirəm. Yazıçının bir övladı da sözdür…

    Sabir Rüstəmxanlı
    Azərbaycan Dil Qurumunun sədri
    01.06.2022”

  • Samir Əsədli: “Ukraynanın savaşı haqq uğrunda mübarizədir”

    Türkiyə Prezidenti Rəcəb Tayyib Ərdoğan Qərb ölkələrinin “Bayraktar” və “Akıncı” PUA-larına birmənalı olmayan münasibətini tənqid edib. Ərdoğan bildirib ki, Ukraynada uğurlarına görə adına mahnılar bəstələnən Türkiyə istehsalı PUA-lar Qarabağ müharibəsində “günahsız insanları” qətlə yetirən “ölüm maşınları” kimi təqdim edilib.
    Türkiyə lideri vurğulayıb ki, hazırda Türkiyənin NATO-nun təhlükəsizliyinə töhfələr verdiyini hayqıranlar vaxtı ilə Liviyada, Suriyada atılan addımlara görə ölkəmizi sərt şəkildə tənqid edirdilər. Türkiyənin Xarici işlər naziri Mövlud Çavuşoğlu da bir müddət əvvəl bu məsələyə toxunmuşdu. Prezident İlham Əliyevin sözlərini xatırladan xarici işlər naziri “Qərb ölkələrinin münasibətinə baxsaq, Türkiyə PUA-ları Qarabağda qatil idi, Ukraynada isə sanki mələyə döndü” demişdi. Xatırladaq ki, Almaniyanın aparıcı KİV-i olan “Bild” nəşrində yayımlanan “Ümid silahı” başlıqlı məqalə sosial şəbəkələrdə geniş müzakirələrə səbəb olmuşdu. Məqalədə vurğulanmışdı ki, Ukrayna ordusu Rusiya ilə müharibədə Türkiyə texnologiyasına  – “Bayraktar” pilotsuz uçuş aparatlarına ümid edir. Nəşr Türkiyə istehsalı olan dronların texniki göstəricilərindən bəhs açmış, ukraynalıların ona hətta mahnı belə qoşduğuna diqqət çəkmişdi. Maraqlı isə odur ki, aylar öncə Almaniyanın həmin media qurumu “Bayraktar PUA”ları barədə məqalə dərc edərkən onu “Ərdoğanın qatil dronu” adlandırmışdı.
     
    Vətəndaş Həmrəyliyi Partiyasının sədr müavini Samir Əsədli “Şərq”ə bildirib ki, İkinci Qarabağ müharibəsi zamanı, yəni Azərbaycan Ordusu işğal altında olan torpaqlarını azad edərkən, bir çox Qərb ölkəsi Türkiyə istehsalı PUA-ları ciddi tənqid hədəfinə çevirmişdi. Partiya təmsilçisinin sözlərinə görə, pilotsuz uçuş aparatlarının dinc əhalinin yaşadığı yerləri hədəf aldığı iddia olunurdu:
     “Lakin müharibədən sonra bəlli oldu ki, ümumiyyətlə, Azərbaycan Ordusu mülki insanların olduqları bölgələrdə heç bir yerə silah tətbiq etməyib. Erməni silahlılarının, quldur dəstələrinin, separatçıların mövqeləri dəqiq hesablamalarla məhv edilib. Fransa və Kanada bu məsələdə daha irəli getmişdi.
    Kanada həmin PUA-larda istifadə olunan bəzi texniki detalları Türkiyəyə satmaqdan imtina etmişdi. Ancaq Ukrayna savaşında belə qadağaların heç birinə rast gəlinmir. Təbii ki, bütün hallarda Ukraynanın savaşı haqq uğrunda mübarizədir. Biz də Kiyevin yanındayıq və Rusiyanın hərbi təcavüzünü qəti şəkildə pisləyirik.
     
    Ancaq dünyanın bir sıra ölkələri də ciddi məsələlərə ikili standartlarla yanaşmamalı, haqsız olanları müdafiə etməkdən çəkinməlidir”.

  • Milli Kitabxananın “Sabir Rüstəmxanlı. Biblioqrafiya” kitabının təqdimatı keçirilib

    Mayın 19-da Mədəniyyət Nazirliyi və Milli Kitabxananın birgə təşkilatçılığı ilə Milli Kitabxananın “Azərbaycanın görkəmli şəxsiyyətləri” seriyasından nəşr etdiyi “Sabir Rüstəmxanlı. Biblioqrafiya” kitabının təqdimatı keçirilib.

    Milli Kitabxanadan AZƏRTAC-a bildirilib ki, tədbirdə tanınmış elm və mədəniyyət xadimləri iştirak ediblər.

    Milli Kitabxananın direktoru, professor Kərim Tahirov deyib: “Bu gün “Sabir Rüstəmxanlı. Biblioqrafiya” kitabının, eləcə də Nizami adına Ədəbiyyat İnstitutunun yeni nəşr etdiyi “Xalq şairi Sabir Rüstəmxanlı” adlı monoqrafiyanın təqdimatına toplaşmışıq. Sabir Rüstəmxanlı bütün duyğularını, azadlıq arzularını, vətəndaşlıq borcunu, xalqının taleyindən nigaranlığını öz əsərlərində qələmə alıb”.

    Tərtib edilmiş biblioqrafik göstərici haqqında məlumat verən direktor vurğulayıb ki, bu vəsait yazıçı haqqında ilk fundamental biblioqrafiyadır. Biblioqrafiyada Sabir Rüstəmxanlının kitabları, dövri mətbuatda, dərsliklərdə, məcmuələrdə çap olunmuş əsərləri, elmi-tənqidi və publisistik məqalələri, tərcümələri, redaktə etdiyi kitablar, rus və başqa dillərdə çap olunmuş əsərləri, habelə ədibin həyat və yaradıcılığını, ictimai-siyasi fəaliyyətini əks etdirən bütün nəşrlər toplanıb. Vəsaitdə şairin həyat və yaradıcılığının əsas tarixləri, görkəmli şəxsiyyətlərin onun haqqında fikirləri də öz əksini tapıb.

    Milli Məclisin deputatı, Azərbaycan Milli Elmlər Akademiyasının vitse-prezidenti, akademik İsa Həbibbəyli vurğulayıb ki, Sabir Rüstəmxanlının yubileyi münasibətilə Nizami adına Ədəbiyyat İnstitutu “Xalq şairi Sabir Rüstəmxanlı” adlı monoqrafiya nəşr edib. “Sabir Rüstəmxanlı bütün oxucu kütləsinin etibarını qazanan bir sənətkardır. Vətəndaşlıq poeziyası, milli istiqlal ruhu, müstəqillik ideyaları, dövlətçilik onun yaradıcılığının əsas ana xəttini təşkil edir. Fəxrlə deyə bilərəm ki, Sabir Rüstəmxanlı Azərbaycanın milli istiqlal mübarizəsinə çox böyük töhfələr verib. O, həm şair, həm də deputat kimi fəaliyyət göstərərək şair ideyaları ilə siyasi ideyalarını birləşdirib. Bu gün də Sabir Rüstəmxanlı hər iki cəbhədə – həm ədəbiyyatda, həm də siyasi müstəvidə öz fəaliyyətini uğurla davam etdirməkdədir”,- deyə akademik vurğulayıb.

    İ.Həbibbəyli Milli Kitabxananın nəşri olan “Sabir Rüstəmxanlı. Biblioqrafiya” kitabının məzmunundan, mövzu əhatəliliyindən, eləcə də onun həcminin böyüklüyü barədə danışıb.

    AMEA-nın müxbir üzvü, ədəbiyyatşünas alim, professor Tehran Əlişanoğlu çıxış edərək biblioqrafiyaların tədqiqatçılar üçün əhəmiyyətli nəşr olduğunu vurğulayıb. Monoqrafiya barədə məlumat verən T.Əlişanoğlu bildirib ki, kitabda Sabir Rüstəmxanlının həyat və yaradıcılığını tam əhatə etməyə çalışıblar.

    Milli Məclisin sədr müavini, professor Fəzail İbrahimli Sabir Rüstəmxanlı haqqında belə gözəl tədbiri təşkil etdiyinə görə Milli Kitabxanaya öz təşəkkürünü bildirib. Qeyd edib ki, S. Rüstəmxanlı yaradıcılığını 3 dövrə bölmək olar. Birinci mərhələ 70-ci illəri əhatə edir ki, bu mərhələdə Sabir Rüstəmxanlının şairlik keyfiyyətləri ortaya çıxır. İkinci mərhələ şairin yaradıcılığında yeni mərhələ hesab edilə bilər. Bu mərhələdə onun yaradıcılığının yeni xüsusiyyətləri “Gəncə qapısı”, “Qan yaddaşı”, “Sağ ol, ana dilim” kimi əsərlərdə əks olunur. Ən nəhayət üçüncü mərhələdə o, Azərbaycan türk poeziyasının “atəş xəttinin” önünə keçir. Bildirib ki, Sabir Rüstəmxanlı daim bəşəri ideyalarla yaşayıb-yaradıb, ürəyi daima xalqı, milləti üçün döyünüb.

    Xalq yazıçısı Çingiz Abdullayev çıxış edərək Yazıçılar Birliyi adından Sabir Rüstəmxanlını doğum günü münasibətilə təbrik edib. O, S.Rüstəmxanlının ictimai fəaliyyətindən, cəsarətli çıxışlarından və onunla bağlı olan xatirələrdən bəhs edib.

    Tədbirin davamında Azərbaycan Dövlət Tərcümə Mərkəzinin idarə heyətinin sədri, Xalq yazıçısı Afaq Məsud, Əməkdar elm xadimi, professor Qəzənfər Paşayev, şair Məmməd İsmayıl, Milli Məclisin deputatları Nizami Cəfərov, Əlövsət Ağalarov və başqaları çıxış ediblər.

    Sonda Xalq şairi Sabir Rüstəmxanlı çıxış edərək tədbirdə iştirak edən hər kəsə, təşkilatçılara təşəkkürünü bildirib. Biblioqrafiya, onun bölmələri, əhatə genişliyindən bəhs edərək əməyi keçən hər kəsə minnətdarlığını çatdırıb.

    Sonda iştirakçılar Sabir Rüstəmxanlının həyat və yaradıcılığını əhatə edən Milli Kitabxananın fondunda mühafizə edilən kitabların geniş sərgisi ilə tanış olublar.