Category: Arxiv

Martın 24-də narkotik vasitə saxlama ittihamı ilə həbs olunmuş gənc fəal Ömər Məmmədovun həbs olunmasının 2 ayı tamam olur.

Ömər Məmmədov 1995-ci ildə Bakıda anadan olub. Hazırda Şimali Kipr Türk Respublikasında fəaliyyət göstərən Beynəlxalq Kipr Universitetində təhsil alır. O, Vətəndaş Həmrəyliyi Partiyasının (VHP) üzvü, “Axın” maarifçi hərəkatını təsisçisidir. N!DA Vətəndaş Hərəkatının keçmiş üzvüdür. Ömər Məmmədov 24 yanvar 2014-cü il tarixində həbs edilib. Onun barəsində Azərbaycan Respublikası Cinayət Məcəlləsinin 234.4.3-cü maddəsi (narkotik vasitələrin və ya psixotrop maddələrin qanunsuz əldə edilməsi) ilə cinayət işi açılıb və barəsində 3 aylıq həbs-qətimkan tədbiri seçilib.

Hazırda Şüvəlan təcridxanasında saxlanır.

Gənc fəalın şərlənərək həbs olunması ilə əlaqədar Vətəndaş Həmrəyliyi Partiyası bəyanat yayaraq bu həbsin gənclərə göstərilən əsassız təzyiqlərin tərkib hissəsi olduğunu bildirmiş, hakim rejimi qanunsuz addımların qarşısını almağa çağırmış və həbsdə olan gənclərin azadlığa buraxılmasını tələb etmişdir.

“Hakimiyyət onun kimi gənclərin ağlından, savadından, dünya görüşündən istifadə etmək əvəzinə, onları həbs edir”

VHP-nin Mərkəzi İcra Aparatının rəhbəri Samir Əsədli Ömər Məmmədovun həbsini siyasi sifariş hesab edir: “Ömər Məmmədovun həbsi tamamilə siyasi sifarişdir. Hakimiyyət onu sosial şəbəkələrdəki fəallığına və aktiv siyasi fəaliyyətinə görə həbs edib. Ö.Məmmədovun həbsi gənclərə qarşı başlanan təzyiq və təqibin tərkib hissəsidir. Bunlar hesab edirdilər ki, fəal gəncləri həbs etməklə gənclər hərəkatının qarşısını alıb, başlanan prosesi beşikdə boğacaqlar. Amma yanıldılar. Hərəkat daha da böyüdü ve müsbət istiqamətdə vüsət aldı. NİDA-çıların və müxalifətçi səhifələrin adminlərinin həbsi həmin prosesi zəiflətmədi. Prosesə və siyasətə qoşulanlar daha da çoxaldı. Ömər Məmmədova qəzet verilməsinin qarşısı alınır. Onun kimi savadlı gəncləri bu yollarla yıxa bilməzlər. Ömər Məmmədov çox istedadlı və fəal gəncdir. Hakimiyyət Ömər Məmmədov kimi gənclərin ağlından, savadından, dünya görüşündən istifadə etmək əvəzinə, onları həbs edir. Cünki bunlara ağıllı ve savadlı gənclik yox, kölə və yaltaq gənclik lazımdır. Prosesi də ona doğru aparmaq istəyirlər. Amma bunu bacarmırlar və bacara da bilməyəcəklər. Cünki prosesin önündə Rəşadət, Rəşad, Zaur, Üzeyir, Ömər, Məhəmməd kimi gənclər varsa, mütləq bu ölkədə ədalət zəfər çalacaq”.

“Mən hər kəsdən xahiş edirəm ki, siyasi məhbusları, vicdan məhbuslarını unutmasınlar”

Ömər Məmmədovun atası Elyar Məmmədov oğlunun haqsız yerə həbsdə yatdığını deyir: “Mənim oğlumun heç bir şeyə ehtiyyacı olmayıb. Öz şəxsi mülkimi satıb, onun təhsil haqqını ödəmişəm. Gələcəyi üçün hər bir şeyi həll etmişəm. O, nə edibsə, bu xalq üçün edib. Özü üçün nəsə qazanmağa çalışmayıb. Mənim oğlum haqsız yerə həbsdə yatır. Mən hər kəsdən, əsasən də jurnalistlərdən xahiş edirəm ki, siyasi məhbusları, vicdan məhbuslarını unutmasınlar. Dövlət başçısı da bunlara nəzarət etməlidir. Bu qanunsuzluqların qarşısını almalıdır. Ömərin məhkəmələrində iştirak edə bilməmişəm. Çünki qapalı keçirilib. Bizi içəri buraxmayıblar. Amma oğlumla başqa vaxtlarda görüşmüşəm. Əsasən təhsili ilə bağlı danışmışıq. Mən onun oxuduğu universitetə məktub göndərmişəm ki, təhsilini dondursunlar. Məhkəmə prosesləri hələ də davam edir. Bizim məhkəmələrdən bir şey gözləmirəm. Ümidim Avropa təşkilatlarınadır. Bəlkə onların sayəsində Ömər azad oluna bilər. Çünki onun həbsi sırf siyasi sifarişdir”.

“Ömər Məmmədovun həbsi sırf onun siyasi fəallığı ilə bağlıdır”

Ömər Məmmədovun vəkili Fəxrəddin Mehdiyevin sözlərinə görə, istintaq yekunlaşmağa doğru gedir: “Nərimanov rayon məhkəməsinə və Bakı Apellyasiya Məhkəməsinə verdiyimiz vəsatətlər təmin edilməyib. Aydın məsələdir ki, belə də olmalı idi. Çünki bu, siyasi sifarişdir. Ömər Məmmədovun həbsi sırf onun siyasi fəallığı ilə bağlıdır. Bu gündən etibarən biz istintaqın yekunlaşması ilə bağlı vəsatətlər verəcəyik. Mən özüm Ömərlə görüşmüşəm. Onun vəziyyəti yaxşıdır. Özünü yaxşı hiss edir. Artıq özünün sifarişli həbsinə alışıb. Mərd və möhkəmdir. Ümid edirik ki, növbəti proseslərdə hakimlər ədalətli qərar verəcək və Ömər Məmmədov azad ediləcək. Çünki onun heç bir günahı yoxdur”.

VHP Lerik rayon təşkilatının sədri Həşim Nəsirovun 63 yaşı tamam olur.

Həşim doktor leriklilərə çox yaxşı tanışdır və hər dəfə bu adın ətrafında ancaq xoş hisslər, xoş münasibət hiss etmək bir əqidədaş olaraq bizdə məmnunluq doğurur. Biz sizi hər zaman sadə, təvazökar və əqidəsinə sadiq insan kimi görmüş və qiymətləndirmişik. Həşim bəy uzun illər bir həkim kimi el-obaya xidmət edib, insanların sağlamlığının keşiyində durub, millətə şərəf və vicdanla xidmət edib. Həmçinin sizin mənəvi böyüklüyünüz, xüsusi təşkilatçılıq qabiliyyətiniz, işə olan bağlılığınız, zəhmətkeşliyiniz sayəsində qazandığınız uğurlar isə bir rayonun, bölgənin sərhədlərindən kənara çıxıb.

Həşim bəy Sizi ad gününüz münasibəti ilə səmimi qəlbdən təbrik edir, sizə uzun ömür, can sağlığı arzulayırıq.

63 yaş – o qədər də kiçik yaş olmasa da, qocalıq yaşı da deyil. Sevinirik ki, bu yaşda belə gənclik enerjisi ilə işinizin başındasınız, ölkəmizin demokratikləşməsi və sivil toplum quruculuğuna töhvələrinizi verirsiniz.

Sayqılarla,

VHP Mərkəzi İcra Aparatı

Bu gün Novruz bayramı öncəsi qeyd edilən ilaxır çərşənbə – yer çərşənbəsidir. Torpaq çərşənbəsi deyilən bu gün insan yaradılışının əsas maddi əsası olmaq etibarilə bu prosesdə son dərəcə əhəmiyyətli bir mövqeyə malikdir. Torpaq cərşənbəsi torpağın oyanmasının mifik kökləri etibarilə dirilmə, canlanma anlayışı ilə əlaqədardır.

Axır çərşənbədə tonqal qalanması, plov dəmlənməsi, səməni, xonça, qapı pusma, şam yandırma, bayramlaşma, fala baxma və bir çox adət-ənənələr var.

Qədim el adətlərinə və inanclara görə, axır çərşənbədə uşağa beşik düzəldərlər, gün çıxmamış su üstündən hoppanar, tonqal yandırar, kəlin buynuzuna qırmızı bağlarlar.

Bu gündə qorxanların başından su töküb qorxunu alarlar, evdən pul, qonşuya ələk verməzlər. Axır çərşənbə günü şamı yarımçıq söndürməzlər, ailə üzvlərinin sayına görə şam yandırar, evdən od, kibrit, neft, ağartı, un, çörək verməzlər. Axır çərşənbə gecəsi tez yatmazlar, evdə qazan asarlar, vəfat etmiş yaxın adamları yada salarlar, vəfat etmiş yaxın adamların adını çəkib “filankəslərin adına qazan asdım” deyib qazana ət, düyü və s. tökərlər. Axır çərşənbə günü ertədən lampa yandırarlar.

İlin axır çərşənbəsində qızlar bir qaba su tökər, əllərindəki üzükləri çıxarıb saçlarına salırlar. Niyət tutub üzüyü suyun üstündən keçirirlər. Üzük fırlanmağa başlayır və qabın divarlarına dəyir. Üzük neçə dəfə qaba dəyirsə, sayırsan; demək, o yaşda da gəlin gedəcəksən.

Axır çərşənbə gecəsi ürəyində niyət tutub yatmaq lazımdır. Gecə yarısı yuxudan dur və şamı yandır. Şamı götürüb güzgüyə yaxınlaş. Güzgüdə gələcək nişanlını görəcəksən.

İlin axır çərşənbə axşamı ana uşaqlarının başından tük qırır və axar suya atır. Bir qab həmin yerdən su götürür və uşaqlarının üstünə çiləyir. Bu su təmizlik, sağlamlıq, paklıq gətirir. Həmin ili uşaqlar xəstələnmir.

Dünyanın bir çox ölkələrində olduğu kimi, Azərbaycan da bu gün Novruz bayramını qeyd edir.

APA-nın məlumatına görə, Novruz yazın gəlişinin simvolu olan qədim xalq bayramıdır, mənası “Yeni gün”dür.

Novruz Şimal yarımkürəsində astronomik yazın başlandığı, gecə-gündüz bərabərliyi günündə (martın 20-si, 21-i və ya 22-də) keçirilir. Bir sıra xalqlar yaz fəslinin gəlməsini təbiətin canlanması ilə bağlayıb, bu münasibətlə şənliklər keçirib, onu yeni ilin başlanğıcı kimi bayram ediblər.

Qədim zamanlardan başlayaraq İran, Əfqanıstan, Tacikistan, Özbəkistan və bəzi başqa şərq xalqları ilə yanaşı, Azərbaycan türkləri də baharın – yeni ilin gəlişini şənliklərlə qarşılayırlar.

2009-cu il sentyabrın 30-da Novruz UNESCO tərəfindən qeyri-maddi mədəni irs siyahısına daxil edilib, 23 fevral 2010-cu ildə isə BMT martın 21-ni “Beynəlxalq Novruz Günü” elan edib.

Azərbaycanda da bu bayram böyük təntənə ilə qeyd olunur. Bu münasibətlə bütün ölkə ərazisində bayram tədbirləri keçirilir.

Qeyd edək ki, bahar fəsli Azərbaycana bu il martın 20-də saat 20:57-də daxil olur.

Odur ki, martın 20-si Azərbaycanda bayram axşamı, martın 21-i isə bayram günü hesab olunur.

Erməni daşnaklarının bolşeviklərlə birgə azərbaycanlılara qarşı həyata keçirdiyi soyqırımından 96 il ötür.

Azərbaycanın yaxın dostu və müttəfiqi olan Ukraynada baş verən son proseslər bütün dünyada ciddi narazılıqlara səbəb olmuşdur. Ukraynanın suverenliyinə və ərazi bütövlüyünə qarşı yönəlmiş təzyiqlər Avropaya inteqrasiya yolunu seçmiş digər postsovet ölkələri üçün də təhlükə yaradır.

Rusiya silahlı qüvvələrinin Ukraynanın önəmli bölgəsi olan Krımda hərbi-siyasi vəziyyəti gərginləşdirmək cəhdləri yolverilməzdir. Beynəlxalq ictimaiyyət Ukraynanı bölmək, onu yenidən Rusiyanın siyasi himayəsi altına qaytarmaq cəhdlərinə qarşı daha sərt şəkildə müqavimət göstərilməlidir. Çünki bu proses postsovet məkanında yeni yaranmış dövlətlərin müstəqil inkişafının qarşısını almaq üçün  Azərbaycan, Gürcüstan və Moldovada ortaya atılmış separatizmin davamına bənzəyir.

Biz Ukraynanın bölünməsi cəhdlərini qətiyyətlə pisləyir, Ukrayna xalqının Avropaya inteqrasiya seçimini dəstəkləyirik.

Ukrayna ətrafında baş verən hadisələrə, xüsusilə Krımın taleyinə Azərbaycan xalqı səssiz qala bilməz. Ukrayna dövlətinin tərkib hissəsi olan bu muxtar vilayətdə yaşayan Krım tatarları adlandırılan türklər soy kök etibarı ilə Azərbaycanla bağlıdır. Zaman-zaman rus imperalizminin repressiya, deportasiya zülmün yaşayan Krım türklərinin yenidən eyni tale ilə üzləşməsi yolverilməzdir.

VHP Ukraynanın ərazi bütövlüyünü dəstəkləyərək, azadlıq və demokratiya uğrunda haqlı mübarizədə Krım türklərinin və bütövlükdə Ukrayna xalqının qələbəsinə inanır.

Ukrayna böhranı bu ölkənin Konstitusiyasına və beynəlxalq normalara uyğun şəkildə dinc yolla həll edilməlidir.

Dünən XX əsr Azərbaycan-türk ictimai fikrinin ən görkəmli nümayəndələrindən biri, filosof və ədəbiyyat tənqidçisi, uzun müddət alim, həkim, rəssam, şair, tənqidçi, tərcüməçi, müəllim, jurnalist kimi fəaliyyət göstərmiş Əli bəy Hüseynzadənin anadan olmasından 150 il ötdü. Əli bəy Hüseyn oğlu Hüseynzadə 1864-cü il fevralın 24-də Salyanda anadan olub. Atası Tiflis Müsəlman Məktəbinin müəllimlərindən Molla Hüseyn Hüseynzadə, anası Xədicə isə Qafqaz şeyxülislamı Axund Əhməd Hüseynzadənin qızıdır.

Salyandan Tiflisə köçüb buradakı ruhani məktəbində riyaziyyat müəllimi işləyən Molla Hüseyn və Xədicə xanım vəfat edəndə övladlarının – Əli bəyin 6, İsmayılın isə 2 yaşı vardı. 1875-1885-ci illərdə Ə.Hüseynzadə Tiflisə, babası Qafqaz şeyxülislamı Axund Əhməd Səlyaninin yanına gedib və orada gimnaziya tələbəsi olub.

Tiflisdə Şərqin maarifçi-materialist filosofu, dünyəvi elmlərə böyük rəğbət bəsləyən mütəfəkkir M.F.Axundovla babasının məclislərində tanış olan Əli bəy Hüseynzadə təbiət elmlərinə böyük maraq göstərməyə başlayır. Bu həvəs onu 1885-ci ildə Sankt-Peterburq Universitetinin fizika və təbiət fakültəsinə gətirir. Burada dövrün məşhur elm xadimləri – Mendeleyev, Baqner, Menşutkin, Jukovski və başqalarından dərs alan Ə.Hüseynzadə imperiyanın paytaxtında gedən ictimai-siyasi proseslərlə də yaxından tanış olur, “xalqçılar” hərəkatına rəğbət bəsləyir və bir sıra inqilabçı tələbələr kimi, o da Sankt-Peterburqdan uzaqlaşmaq məcburiyyətində qalır.

Ə.Hüseynzadə İstanbula gəlir və burada darülfünunda əsgəri-tibbiyyə fakültəsində oxumaqla dermatoloq (dəri-zöhrəvi xəstəliklər) ixtisası və yüzbaşı hərbi rütbəsi qazanır. 1897-ci ildə o, “Qırmızı ay” heyətinin tərkibində İtaliyaya gedir, üç il sonra geri qayıdır və müsabiqə yolu ilə İstanbul darülfünunda əsgəri-tibb fakültəsində professor köməkçisi işləyir. O, burada da təqib olunur, çünki darülfünun tələbəsi ikən artıq inqilabçı gənc türklər hərəkatına qoşulmuş, “İttihad və tərəqqi” partiyasının ilk özəyini yaradanlardan biri olmuşdu.

Ə.Hüseynzadə tələbəlikdən ayrılıb müstəqil həyata başlayanda artıq yetkin fikir adamı idi. Türkiyədəki təqiblərdən sonra Azərbaycana qayıdan Ə.Hüseynzadə “Kaspi” qəzeti ilə əməkdaşlığa başlayır, publisistik yazılarını dərc etdirir və “Gənc türkçülük nədir?” adlı məqaləsi ilə türk tənzimat hərəkatının mahiyyətini açıqlayır. Ə.Hüseynzadə bu zaman islahatçı ideya adamı kimi də tanınır.

Az sonra o, dövrünün məşhur teoloq alimi, ictimai xadim və publisisti Əhməd bəy Ağaoğlu ilə birlikdə milyonçu Hacı Zeynalabdin Tağıyevin maliyyəsi ilə “Həyat” qəzetinin nəşrinə başlayır. O, ictimai-mədəni mühitə yeni ab-hava gətirir, ümumxalq dünyagörüşünün məntiqi əsaslarını yeni prinsiplərlə zənginləşdirməyə çalışır. Əli bəy Hüseynzadə 1906-cı il noyabrın 1-də Hacı Zeynalabdin Tağıyevin maliyyəsi ilə “Füyuzat” jurnalını nəşr etməyə başlayır. Jurnalda Məhəmməd Hadi, Mirzə Ələkbər Sabir, Hüseyn Cavid, Səid Səlmasi, Abdulla Şaiq, Əhməd Kamal, Əhməd Raiq və başqa müəlliflərin müxtəlif mövzulu yazıları dərc edilirdi. O, “Füyuzat”da məqalələrinin birində yazırdı: “Bizə fədai lazımdır! Türk hissiyyatlı, islam etiqadlı, Avropa (müasir) qiyafəli fədai!”
Bu fikir füyuzatçı mətbuat orqanları tərəfindən təkmilləşdirildi və “Tazə həyat”, “İrşad”, “Yeni füyuzat”, “Həqiqət”, “Tərəqqi”, “İqbal”, “Sədayi-həqq”, “Şəlalə”, “Açıq söz”, “Bəsirət”, “Qurtuluş”, “Dirilik”, “Azərbaycan”, “Övraqi-nəfisə” mətbuat orqanları tərəfindən “Türkləşmək, islamlaşmaq, müasirləşmək” – azərbaycançılıq şəklində formulə edilərək təbliğ olundu.

Azərbaycan Xalq Cümhuriyyəti dövründə dövlət bayrağında üç rənglə (mavi, qırmızı, yaşıl) simvollaşan Azərbaycan vətəndaşının ideya-mənəvi dəyərləri Əli bəy Hüseynzadənin həmin tezisi və füyuzatçıların tarixi xidmətləri ilə bağlıdır.
1911-ci ildə İstanbulda əslən çərkəz olan süvari zabiti Şəmsəddin bəyin qızı Əthiyə xanımla evlənən Əli bəyin üç övladı olub.

Əli bəy Hüseynzadə 1940-cı ildə İstanbulda vəfat edib.

1992-ci il fevralın 25-dən 26-na keçən gecə erməni silahlı dəstələri SSRİ dövründə Xankəndi (Stepanakert) şəhərində yerləşdirilmiş 366-cı motoatıcı alayının zirehli texnikası və hərbi heyətinin köməkliyi ilə Xocalı şəhərini zəbt etdilər. Hücumdan əvvəl, fevralın 25-i axşam çağından şəhər toplardan və ağır zirehli texnikadan şiddətli atəşə tutulmağa başlamışdır. Nəticədə şəhərdə yanğınlar baş vermiş və fevralın 26-ı səhər saat 5 radələrində şəhər tam alova bürünmüşdür. Belə bir vəziyyətdə, erməni əhatəsində olan şəhərdə qalmış təqribən 2500 nəfər əhali yaxınlıqdakı azərbaycanlılar məskunlaşmış Ağdam rayonunun mərkəzinə çatmaq ümidi ilə şəhəri tərk etməyə məcbur olmuşdur. Ancaq bu niyyət baş tutmadı. Şəhəri yerlə yeksan etmiş erməni silahlı dəstələri və motoatıcı alayın hərbiçiləri dinc əhaliyə divan tutdular.

Bu qırğının nəticəsində 613 nəfər həlak olmuşdur, onlardan:
uşaqlar – 63 nəfər;
qadınlar – 106 nəfər;
qocalar – 70 nəfər 8 ailə tamamilə məhv edilmişdir;
25 uşaq hər iki valideyninin itirmişdir;
130 uşaq valideynlərindən birini itirmişdir;

487 nəfər yaralanmışdır, onlardan:
uşaqlar – 76 nəfər;
1275 nəfər əsir götürülmüşdür:
150 nəfər İtkin düşmüşdür:
Dövlətin və əhalinin əmlakına 01.04.1992-ci il tarixinə olan qiymətlərlə 5 mld.rub dəyərində ziyan vurulmuşdur: 

Bu rəqəmlər Ermənistan SSR-in dəstəyi və SSRİ rəhbərliyinin səhlənkarlığı ilə 1988-ci ildə başlamış və Azərbaycan SSR-in tərkib hissəsi olan Dağlıq Qarabağ Muxtar Vilayətinin Ermənistana birləşdirilməsi iddiasının gerçəkləşdirilməsi əsasında yaranmış Ermənistan-Azərbaycan münaqişəsinin ən dəhşətli, qanlı faciəsindən xəbər verir.

 

17 mart 2014-cü il tarixində saat 15:00-da Vətəndaş Həmrəyliyi Partiyası və Dünya Azərbaycanlıları Konqresinin birgə təşkilatçılığı ilə Rusiya Federasiyasının Azərbaycan Respublikasındakı səfirliyinin qarşısında etiraz aksiyası keçiriləcəkdir.

Piket Krım tatarlarına dəstək vermək məqsədilə təşkil ediləcəkdir. Aksiyada Rusiyanın Krıma müdaxiləsini, Ukraynanın ərazi bütövlüyünün pozulmasına yönəlik cəhdləri pisləyən, Ukrayna xalqına və Krım tatarlarına dəstək xarakteri daşıyan şüarlar səsləndiriləcəkdir.

Artıq piketlə bağlı mart ayının 12-də qanuna müvafiq olaraq VHP sədri Sabir Rüstəmxanlı  Bakı Şəhər İcra Hakimiyyətinin başçısı Hacıbala Abutalıbova məktubla müraciət edib.

Vətəndaş Həmrəyliyi Partiyası Gənclər Təşkilatı AXCP üzvlərinin həbsi ilə bağlı bəyanat qəbul edib. Bəyanatda bildirlir ki, fevralın 27-də AXCP-nin bir neçə saat içində 4 fəalının saxlanılması artıq bu şəxslərin təqdim edildiyi kimi, hansısa qeyri-qanuni əməli ilə deyil, siyasi sifarişlə həbs olunmasını təsdiqləyir. Hakimiyyət siyasi fəallara, xüsusilə gənclərə qarşı repressiv təzyiq metodlarından istifadə etməklə, cəmiyyətdə ciddi bir aqressiya mühitini yaradır ki, bu da çox təhlükəlidir. Bir müddət öncə heç siqaret belə çəkməyən VHP-çi gəncin narkotik istifadəçisi kimi həbsi, evində oturan gəncin “polisə müqavimət” adı ilə polis idarəsinə aparılması və incibati cəza verilməsi artıq Azərbaycanda növbəti siyasi təzyiqin başlandığının sübutudur.

VHP gəncləri olaraq hesab edirik ki, dünyada baş verən vətəndaş qarşıdurmaları fonunda hakimiyyətin heç bir nəticə çıxarmadan əvvəlki üsullardan istifadə edərək fəal gənclərə qarşı bu cür total hücumu ölkəmizi təhlükəli bir uçuruma sürükləyir. Vətəndaş cəmiyyəti, qarşılıqlı dialoq, siyasi dözümlülük əvəzinə get-gedə artırılan repressiya nəticə etibarilə ölkəmizdə arzulanmaz proseslərin sürətlənməsinə xidmətdən başqa bir şey deyil.

Biz, VHP gəncləri olaraq, hakimiyyətin gənclərə qarşı bu siyasətini qətiyyətlə pisləyir, bu həbsləri hakimiyyətin öz inzibati resurslarında istifadə edərək müxalif düşüncəli insanlara qarşı repressiyası sayırıq. Həbs olunanların azadlığa buraxılmasını, hakimiyyətin beynəlxaqlq qurumlar qarşısında götürdüyü öhdəlikləri yerinə yetirməyi və Azərbaycan Konstitusiyasına əməl etməyi tələb edirik.