Vətəndaş Həmrəyliyi Partiyası

Category: Xəbər

  • VHP-çi gənclər Asiya Partiyalar İttifaqının konfransına qatılıblar

    Asiya Siyasi Partiyaları Beynəlxalq Konfransının (ICAPP) Gənclər Qolunun “COVİD-19 və ondan sonra təhsil və sosial müdafiə mexanizmi” mövzusunda onlayn kobfrans keçirilib. Konfransa Asiyanın 50-yə yaxın ölkəsindən nümayəndələr qatılıb . Bildirək ki, Vətəndaş Həmrəyliyi Partriyası İCAPP yaranan gündən bu qurumun üzvüdür və bu günkü onlayn konfransda da VHP-ni Gənclər Təşkilatının sədri Yusif Xantemirov təmsil edib.

    Konfransda çıxış edən iştirakçılar bildirib ki, demokratiyanın, insan haqlarının, bəşəri sülhün qorunması istiqamətində ICAPP-ın böyük rolunun olması mümkündür. Sabitliyin, əmin-amanlığın, region üçün problemə çevrilən terrorizm və pandemiya kimi bəlaların aradan qaldırılması da ICAPP çərçivəsində müzakirə olunacaq ciddi məsələlərdir.

  • İbtidai sinifdə bu dil tədris olunsun – Millət vəkili

    Türkiyə ilə qardaşlıqdan, birlikdən çox danışılır. Bəlkə də buna ehtiyac yoxdur. Tarix göstərir ki, biz bir yerdə olmağımız labüddir. Bu həm bizə, həm də Türkiyənin maraqlarına uyğundur.

    Axar.az xəbər verir ki, bu sözləri parlamentdə çıxışı zamanı xalq şairi, millət vəkili Sabir Rüstəmxanlı deyib.

    Deputat əlavə edib ki, uzun illərdir türk respublikalarında ortaq dil haqqında müzakirələr gedir:

    “Əslində bu, yanlış yanaşmadır. Heç bir ölkə öz dilini dəyişməz. Söhbət ünsiyyət dilindən gedə bilər. Bu ünsiyyət dili də şübhəsiz ki, 85 milyon əhalisi olan və hər bir türk ölkəsində televiziya kanalları göstərilən Türkiyə Cümhuriyyətinin türkcəsidir. Bəzən deyirlər ki, bizim dilimizi türk dilləri ilə zibillədilər. Hansıki 50 ildir dilimizi rus və ingilis dili zibilləyəndə heç kəs heç nə demir. Amma türk sözləri gələndə bunu deyirlər. Azərbaycanla Türkiyənin yaxınlaşmasına qısqanclıq edirlər. Onlarla sözlər var ki, ortaq şəkildə istifadə etmək, hətta yeni terminlərin işlədilməsi üçün koordinasiya yaratmaq olar. Baxanda görərik ki, onsuz da türk filmlərinə hamı türk kanallarında baxır, heç kim onun tərcümə olunan variantına baxmır”.

    S.Rüstəmxanlı qeyd edib ki, xarici dilləri öyrənirik və bu lazımlıdır:

    “Mənim fikrimcə, əgər bütün türkdilli respublikalar ünsiyyət dilini 5-ci siniflərə qədər keçsə, 10 ildən sonra bütün türk respublikalarının ziyalıları, əhali problemsiz danışmaq imkanı əldə edə bilər. Bu strateji məsələdir. Hər halda Türk Şurası bu məsələyə diqqət edə bilər”.

  • VHP-də Rayon Təşkilatlarına yeni sədr seçilib

    Vətəndaş Həmrəyliyi Partiyasının növbəti qurultayına hazırlıq çərçivəsində Ağdaş, Nəsimi və Binəqədi rayon təşkilatlarının onlayn konfransları keçirilib. Təşkilatların seçkili qurumlarının hesabatları dinlənilib. Yeni rəhbərlik formalaşdırılıb. Ağdaş rayon təşkilatına Yasin Şirinzadə, Nəsimi rayon təşkilatına Dəniz Həsənli, Binəqədi rayon təşkilatına Zakir Kərimov sədr seçiliblər. Həmçinin VHP-nın VIII Qurultayına nümayəndələr seçilib. Yeni sədrlərə uğurlar diləyirik.

  • Tənzilə Rüstəmxanlı “Şöhrət” ordeni ilə təltif edilib

    Tənzilə Rüstəmxanlı “Şöhrət” ordeni ilə təltif edilib. Bu barədə Prezident İlham Əliyev sərəncam imzalayıb.

    Sərəncamla Azərbaycan Respublikasının ictimai həyatında səmərəli fəaliyyətinə görə Tənzilə Yolçu qızı Rüstəmxanlı “Şöhrət” ordeni ilə təltif edilib.
    Tənzilə Rüstəmxanlı 1960-cı il noyabr ayının 28-də Qərbi Azərbaycanın Amasya rayonunun Əzizbəyov kəndinən anadan olub. 1982-ci ildən Azərbaycan Mərkəzi Kooperativlər İttifaqında (Azərittifaq) müxtəlif vəzifələrdə çalışır. Hal-hazırda Azərittifaqda sədrin 1-ci müavinidir.
    Filologiya üzrə fəlsəfə elmləri doktorudur. 1996-ci ildən Azəri Türk Qadınlar Birliyinin sədridir. Dünya Azərbaycanlıların Konqresində sədrin Türk Dünyası üzrə müşaviridir. Bir çox nüfuzlu mükafatlara layiq görülüb.
    2018-ci ildə Azərbaycan diasporunun inkişafı sahəsindəki xidmətlərinə görə “Tərəqqi” medalı ilə təltif edilib.

  • Sabir Rüstəmxanlı: “Kəndlərimizin çoxunda bankomat yoxdur”

    Son günlər mənə bankomatlarla bağlı çoxlu zənglər gəlir. İnsanları narazlı salan narahatlıqlardan biri də bu məsələdir. Kəndlərimizin çoxunda bankomatlar olsa da , onlara pul qoyulmamasıdır.

    Bunu Milli Məclisin bu gün keçirilən plenar iclasında deputat Sabir Rüstəmxanlı deyib:

    “Dövlət əhali üçün pensiyaya pul ayırır, lakin bankomatlardan pulu götürə bilmir .Bu bankomatlar qoyulubsa, onlara pul qoyulmalıdır. İnsanlar növbəyə düzülür, məlum olur ki, pul yoxdur. 20-30 min nəfər sakini olan ərazilərdə heç bankomatlar da yoxdur. Bunun üçün onlar rayon mərkəzinə getməli olurlar. Bu işlər camaatı dövlətdən narazı salır. Buna nəzarət edən yəqin ki, qurumlar var. Bu məsələ araşdırılmalıdır”.

  • Ermənilərlə birgəyaşayış !- “ Kimi “hə” deyir, kimi də “yox” – Fikirlər haçalandı

    Sabir Rüstəmxanlı: “Onlarla yanaşı yaşamağa məhkumuq”
     
    Elman Məmmədov: “Ermənilərlə mehriban yaşamaq mümkün deyil. Ümumiyyətlə, bu, yanlışdır”
     
    Sərdar Cəlaloğlu: “Birgəyaşayışın mümkünsüzlüyünü təbliğ etmək xüsusi bir “tələ”dir – rusların və ermənilərin “tələsi”
    Sosial Tədqiqatlar Mərkəzi (STM) cəmiyyətimizdə böyük maraq doğuran sorğu keçirib. Sorğu sənədlərində Vətən müharibəsinin yekunlarına ictimai münasibət göstərir ki, xalqımız regionda baş verən siyasi reallıqlar və proseslər haqda dolğun  məlumata malikdir. 44 günlük müharibə ilə bağlı müxtəlif nüanslara toxunulmasına baxmayaraq, soruğuda azərbaycanlılarla ermənilərin birgəyaşayışına münasibət maraqlı nəticələrlə yadda qalıb.
    Sorğu zamanı müəyyən edilib ki, əhalinin mühüm bir hissəsi (66.2 faiz) Qarabağın inzibati ərazilərində azərbaycanlılarla ermənilərin birgəyaşayışının heç zaman mümkün olmayacağını, 19.4 faiz  isə bir neçə ildən sonra mümkün ola biləcəyini düşünür. Cəmi 4.8 faiz respondent hesab edir ki, bu, yaxın gələcəkdə mümkündür. Məsələn, Şəki-Zaqatala və Yuxarı Qarabağ əhalisinin 80.0 faizdən çoxu birgəyaşayışın əleyhinə mövqe sərgiləyib. Abşeronda yaşayanların da əhəmiyyətli hissəsi eyni rəyi bölüşür (73.7 faiz).
    Tanınmış ictimaiyyət nümayəndələri də ermənilərlə birgəyaşayışın mümkün olub-olmayacağına dair fikirlərini “Sherg.az”la bölüşüblər.
    Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı düşünür ki, hər iki xalq gec-tez birlikdə yaşamağa məcbur olacaq:
    “Müharibə bitsə də, Ermənistanla sülh müqaviləsi bağlanmayıb. Hələ yaralarımız yenidir, soyqırımılar, ermənilərin türklərə qarşı riyakar təbliğatları unudulmayıb. Hər şey millətimizin yaddaşındadır. Xalqımız ermənilərlə üz-üzə gəlməyə, birgə yaşamağa razı deyil. Düşünürəm ki, haqlıdırlar da. Amma taleyimiz belə gətirib ki, ermənilərlə qonşu olmuşuq. Belə bir deyim var: “Qonşun pisdirsə, köç qurtar”. Lakin biz köçməyə hazırlaşmırıq. Çünki Qarabağ tarixi torpaqlarımızdır. Ermənilərin də tezliklə köçüb gedəcəkləri real deyil. Ona görə də onlarla yanaşı yaşamağa məhkumuq. Bu qonşuluq bizi məcbur edəcək ki, dil tapıb danışaq və yenə əvvəlki münasibətlər bərpa olunsun”.
    Parlament üzvü hesab edir ki, Ermənistan dövlətinin antitürk siyasəti olmasa, sadə ermənilər azərbaycanlılarla mehriban yaşayarlar:
    “Biz vaxt itirmədən Qarabağda, Xocalıda, Xankəndində və digər torpaqlarımızda yerləşməliyik. Sülhməramlılar bölgədədirsə, təminat yaratmalıdırlar ki, iki xalq bir-birinin üstünə qalxmasın. Fikrimcə, yaralarımız sağalmasa da, gec-tez bir yerdə yaşamağımız bizi məcbur edəcək ki, bir-birimizə dözək və birgə yaşayaq”.
    Azərbaycan Demokratik Partiyasının(ADP) sədri Sərdar Cəlaloğlu ermənilər birgəyaşayışın tərəfdarıdır:
    “Nə üçün Azərbaycanda ermənilərlə birgə yaşamaq mümkün olmur? Bunu başa düşə bilmirəm. Ermənilər dövlətimizin nəzarəti altında olandan sonra onlar bizim üçün hansı təhlükəni yarada bilərlər ki? Düzdür, ortada böyük cinayətlər olub, xeyli sayda şəhidlərimiz var. Amma bunları əsas götürərək siyasi məsələlərdə sadəlövhlük etmək olmaz.
    Əslində birgəyaşayışın mümkünsüzlüyünü təbliğ etmək xüsusi bir “tələ”dir-rusların və ermənilərin tələsi. Azərbaycan xalqı arasında belə bir rəy formalaşdırırlar ki, guya birgə yaşayış olmaz. Bu zaman desinlər ki, ya Dağlıq Qarabağ müstəqil olmalıdır, ya da rus qoşunları bölgədə əbədi qalmalıdır ki, iki xalq bir yerdə yaşaya bilmədiyi üçün sülhməramlı missiyasını yerinə yetirsinlər.
    Ona görə də belə yanaşma rusların bölgədə qalmasına xidmət edən ideyalardır. Bəziləri bu ideyanı bilərəkdən dəstəkləyir, bir çoxları isə bilmədən Rusiyanın maraqlarından çıxış edir”.
    Millət vəkili Elman Məmmədov isə ermənilərlə birgəyaşayışın tərəfdarı deyil:
    “Onlar bizi hər zaman düşmən elan edib, bu əqidə və ideologiya ilə tərbiyə olunublar. Ölkəmizdə bəziləri qeyd edir ki, “ermənilərlə mehriban yaşaya bilərik”. Bu, ona bənzəyir ki, “mən səni sevəcəm, sən sevməsən də”. Faşist ideologiyası ilə yaşayan xalq bütün türk dünyasını düşmən hesab edir. Fürsət düşdükcə isə ən qəddar və yaramaz hərəkətlərlə türklərə nifrətini təsdiq edirlər. Belə olduqda necə bir yerdə yaşamaq olar? Ermənilər məğlubiyyətdən sonra da düşmənlik mövqeyindən əl çəkmirlər”.
    E.Məmmədov söyləyib ki, baş verən müsibətlər və soyqırımılardan sonra ermənilərlə mehriban yaşamaq mümkün deyil. Ümumiyyətlə, bu, yanlışdır:
    “Bunu qəbul etmirəm. 44 günlük müharibə və ondan əvvəlki dövrlərdə də deyirdim ki, arzum ermənisiz Qarabağda yaşamaqdır. Belə deməyə haqqım var. Erməni niyə mənim çörəyimi yeyib, suyumu içməli, havamı udmalıdır?. Lakin bu, mənim və məni kimi düşünənlərin istəyindən asılı deyil. Ortada dövlətimizin yürütdüyü siyasət, cənab Prezidentin iradəsi var. Sadəcə vətəndaş mövqeyim belədir: ermənilərlə birgəyaşayışın əleyhinəyəm”.

  • Sabir Rüstəmxanlı: “Siyasi partiyalara ayrılan vəsait artırılmalıdır”

    “Partiyaların qeydə alınması ilə bağlı qanunda dəyişikliklərin edilməsi kifayət qədər mütərəqqi addımdır”.

    APA-nın məlumatına görə, bunu Milli Məclisinn  bu gün keçirilən iclasında deputat Razi Nurullayev deyib.

    Deputat bildirib ki, amma burada bəzi qaranlıq məqamlar var: “Yaxşı olar ki, buna aydınlıq gətirilsin. Məsələn, yeni qeydiyyatdan keçmiş siyasi partiyalara vəsait nə vaxtdan başlayaraq ödəniləcək və s.”.

    Deputat Sabir Rüstəmxanlı isə təklif edib ki, siyasi partiyalara ayrılan vəsait artırılmalıdır: “İkincisi, mən bu iki partiyanın maliyyələşməsinin əleyhinə deyiləm. Amma bu partiyalara üzvlərin sayının artması ilə bağlı hüquqi çərçivə müəyyən edilməlidir”.

    Deputat Tahir Kərimli isə qeyd edib ki, dəyişiklikdə 5 % məsələsi parlamentdə təmsil olunan 2 yeni partiyaya ayrılacaq: “Necə ola biləcək ki, bir partiyada təmsil olunan bir deputat 150 min, digər partiyada təmsil olunan 100 min vəsait alsın. Doğrudur, mən qeydiyyatda olan partiyaların dövlət büdcəsindən maliyyələşməsinin tərəfdarıyam. Amma hazırda qeydiyyatda 52 partiya var. Bütün bunlar ona gətirib çıxarır ki, partiyalara ayrılan vəsait artırılsın. Sabah büdcə müzakirələrində çıxışımda bununla bağlı maliyyə nazirinə müraciət edəcəm. Sabah parlamentdə bitərəflər partiya yaradıb qeydiyyatdan keçə bilər. Bunlar nəzərə alınmalıdır”.

    Vitse-spiker Fəzail İbrahimli Razi Nurullayevə bildirib ki, üzv olduğu siyasi partiyanın dövlət qeydiyyatına alındığı tarixdən sonrakı rübdən başlayaraq vəsaitin verilməsi hesablanacaq: “Tahir Kərimli və Sabir Rüstəmxanlının narahatlığı vəsaitin azalması ilə bağlıdır. Ancaq qanunda bu, aydın göstərilib. Qanunun tətbiqi zamanı yarana biləcək vəsait çatışmazlığı da müəyyənləşib, dövlət büdcəsindən ayrılan əlavə vəait hesabına bu ödəniləcək”.

  • “Ərdoğanı başa düşürsən, amma “Diriliş Ərtoğrulu” başa düşmürsən” – Sabir Rüstəmxanlıdan ETİRAZ

    “Bizim qardaş Türkiyə ilə münasibətlərimizdə, yaxud mədəniyyət sahəsindəki əlaqələrimizdə qəribə və təəccüblü anlaşılmazlıqlar, ziddiyyətlər var”.

    “BakuPost” xəbər verir ki, bu fikri Vətəndaş Həmrəyliyi Partiyasının sədri, Milli Məclisin deputatı, Xalq şairi Sabir Rüstəmxanlı bildirib.
    Millət vəkili qeyd edib ki, Bakıda keçirilən Zəfər qutlamalarında Türkiyə Cümhuriyyətinin Prezidenti cənab Rəcəb Tayyib Ərdoğanın Azadlıq meydanında keçirilən paraddakı parlaq çıxışını bütün Azərbaycan hörmətlə dinlədi və hamı da başdan sona hər şeyi başa düşdü: “Ərdoğan türkcə danışdı. Amma nədənsə, bizim türk filmlərini televiziyalarda nümayiş etdirənlərimiz və onların “milli ideologiya” adına ayrımçılıq yapan böyükləri bu filmləri başa düşmürlər və azərbaycancaya tərcümə edirlər. Bu məntiqlə yanaşsaq gərək Ərdoğanın çıxışını də tərcümə etdirəydik. Ayıbdır, vallah! Türk əsgərini başa düşürsən. Türkiyənin dövlət başçısını başa düşürsən, amma “Diriliş Ərtoğrulu” başa düşmürsən!”

    Sabir Rüstəmxanlının iradına AzTV-dən reaksiya: “Bunu MTRŞ tənzimləyir”

    Azərbaycan Televiziyası məşhur Türkiyə serialı olan “Diriliş/Ərtoğrul”u Azərbaycan dilində dublyajla yayımlaması ilə bağlı iradlara cavab verib.
     
    Televiziyanın Sosial Media və İctimaiyyətlə Əlaqələr Şöbəsindən “BakuPost”a bildirilib ki, xarici filmlərin yayımlanması müvafiq qanunla tənzimlənir: “Bu qanun hətta dil baxımından Azərbaycan dilinə doğma olan, lakin əcnəbi filmlər, seriallar kateqoriyasına aid olanlara da şamil edilir. Qanuna əsasən, filmlər Azərbaycan dilinə tərcümə olunmalı və öz dilimizdə yayımlanmalıdır. Bu məsələni hər hansı kanal və yaxud kanal rəhbərliyi deyil, Milli Televiziya və Radio Şurası tənzimləyir”.

  • Fəzail İbrahimli: “Fransanın içi yanır, göynəyir, çünki Türkiyə və Rusiya onu kənarlaşdırdı, münaqişəni həll etdi”

    “Beynəlxalq hüquq haradadır? Biz 30 ildir, o hüquqa söykəndik, nəticə olmadı. Bizim nəticə 44 günlük gücə söykənir”.

    APA-nın məlumatına görə, bunu Milli Məclisin bu gün keçirilən iclasında MM sədrinin müavini Fəzail İbrahimli deyib.

    Vitse-spiker bildirib ki, Fransa senatorlarının kimliyinə baxılmalıdır: “Onlar Əlcəzairdə qırğınlar törədənlərin, qaradərililəri dənizdə boğanların nəvələridir. Bu, həm də Avropa demokratiyasının sifətini açır. Hələ 107 il əvvəl Əhməd bəy Ağaoğlu yazırdı ki, uğrunda mübarizə apardığımız Avropa demokratiyası Balkan hadisələrindən sonra rəngini dəyişdi. Fransa senatın qərarı Avropa demokratiyasının üzünə tüpürməsidir. Fransanın içi yanır, göynəyir, çünki Türkiyə və Rusiya onu kənarlaşdırdı, münaqişəni həll etdi. Fransa axı ermənilərə söz vermişdi. İndi Azərbaycanla Senat dilində danışmaq olmaz. Azərbaycanla danışığın bir forması var: Haqq ədalət müstəvisində, yalvarışlı və yazıq formada danışıqda, Azərbaycan nəyisə güzəşt edə bilər. Biz 12 aylıq təqvimin 10 ayında Azərbaycana faciələr yaşadan Ermənistan adlı dövlətin başını əzmişik. Bu bizim heysiyyətimizə toxunan məsələdir. Amma bizi bu prosesdə müdafiə edənlər, Türkiyə, ən əsası bizim müdrik rəhbərimiz, qüdrətli ordumuz var. Ona görə də bu qərarlar bizim əhvalımıza təsir etməyəcək”.

  • Fəzail İbrahimli: “Fransa Qarabağ probleminin Ermənistanın xeyrinə həll olunmasını istəyirdi, amma yanıldı”

    “Məhz 28 ildir ki, Fransa və ATƏT-in Minsk qrupunun fəaliyyətsizliyi nəticəsində Ermənistan-Azərbaycan münaqişəsi həll olunmayıb. Ötən 28 il müddətində ancaq bir tezis irəli sürülüb ki, münaqişənin sülh yolu ilə həllindən başqa yolu yoxdur. Ancaq Azərbaycan Prezidenti əməli ilə sübut etdi ki, məsələ sülh yolu ilə həll olunmursa, alternativlərdən istifadə etməklə münaqişəni həll etmək olar və həll etdi də. Bu hərb yolu idi və cənab Prezident dünyaya nümyiş etdirdi”.

    Bunu “Ölkə.Az”a açıqlamasında Milli Məclisin Sədr müavini Fəzail İbrahimli deyib.

    Milli Məclisin Sədr müavininin sözlərinə görə,Fransa  Ermənistan-Azərbaycan münaqişəsinin həllində hər zaman açıq formada işğalçı Ermənistanın mövqeyini birmənalı şəkildə müdafiə edib. “Fransa hökumətinin ümumiyyətlə Türk  və İslam dünyasına münasibətdə  digər Avropa ölkələrindən fərqli mövqe sərgiləməkdədir. Onu deyim ki, Fransa hər zaman  Türkiyənin Avropa Birliyinə daxil olmasına ən ciddi  maneçilik  törədən ölkə olub. Türkiyənin yolunu bağlamağa çalışdılar. Nəticə nə oldu? Avropa Birliyi özü parçalandı. Digər bir məqam Fransa parlamenti uydurma erməni soyrırmını tanıyanları cəzalandırmaq barədə qərar etdi.  Ümumiyyətlə Fransanın tarixi yetərincə ləkələrlə dolu bir ölkədir. Fransa Əlcəzairdə, Vyetnamda, Mərakeşdə, Cibutidə, Çadda, Qabonda, Tunisdə milyonlarla sakini məhv edib. Özünü “insan haqlarının və demokratiyanın vətəni”  sayan Fransa tarixi ilə üzləşməkdən ona görə qorxur ki,  insan haqları və demokratiya ilə bir araya sığmayan bəşəri cinayətlər törədib”- millət vəkili qeyd edib.

    Millət vəkili bildirib ki, biz 44 günlük müharibə zamanı da  Fransanın ədalətsiz və proseslərə qeyri-adekvat münasibət bəslədiyinin şahidi olduq: “Fransa hər vasitə ilə  Azərbaycanın əks-hücum əməliyyatlarının dayandırılmasına çalışırdı. O destruktiv fəaliyyətini üçtərəfli sülh bəyanatından sonra da davam etdirməkdədir. Məhz Fransa və digər ölkələrin sayəsində 28 il idi, münaqişə həll olunmurdu. Onlar istəyirdilər ki, daha 27 il keçsin və məsələ unudulub getsin.  Məsələ ermənilərin xeyrinə həll olunsun. Amma yanıldılar.  Xülyaları baş tutmadı. Azərbaycan Prezidentinin uzaqgörən, müdrik siyasəti nəticəsində həllini tapdı”.

    Millət vəkili hesab edir ki, artıq ATƏT-in Minsk qrupunun fəaliyyətinə ehtiyac qalmayıb. “O artıq bir keçmişdir. Rusiya Prezidenti Vladimir Putin bu  günlərdə bəyan etdi ki, artıq Dağlıq Qarabağ problemi siyasi leksikondan silinib. Türkiyə ilə Rusiya arasındakı  sivil münasibətlər nəticəsində Qarabağ problemi həll olundu. Cənab Prezident də məsələ ilə bağlı mövqeyini bəyan edib. Erməni millətindən olan insan da Azərbaycan vətəndaşlığını qəbul edib yaşamaq istəyirsə, buyursun,  gəlsin. Necə ki, digrə millətlərin nümayəndəsi yaşayır və yaxud da erməni başqa ölkədə hansı statusla yaşayırsa, o cür yaşasın.  Məgər hər ölkədə ermənilərə status verilir. Bir daha qeyd edirəm ki, Azərbaycan vətəndaşı kimi yaşamaq istəyirlərsə gəlsinlər. Odur ki, məsələyə kimlərinsə hansısa formada müdaxiləsi yolverilməzdir və bu ümumiyyətlə qeyri-mümkündür. Nəticə etibarı ilə Fransanın anti-Azərbaycan və Ermənistanı müdafiə etmək cəhdləri heç bir nəticə vermədi. Azərbaycan işğal altında olan torpaqları azad edərək heç bir qüvvənin tarixi ədalətin bərpa olunmasına maneçilik törətmək gücündə olmadığını bütün dünyaya göstərdi.

    Bu gün müxtəlif Avropa dairələrində Azərbaycanın mənfi imicinin formalaşdırılması istiqamətində fəal iş aparan Fransa öz tarixi keçmişinə nəzər salsa, daha məntiqli olar. Fransa əli milyonlarla insanın qanına batmış, ayrı-ayrı xalqlara qarşı soyqırımı törətmiş ölkədir. Bu gün də bir sıra Afrika ölkələrində Fransa sabitliyin pozulması, hakimiyyətlərin devrilməsi, vətəndaş qarşıdurmasının təşkili ilə bağlı ardıcıl siyasət həyata keçirir, bu məqsədlə muzdluların imkanlarından geniş yararlanır. Fransanın legioner konsepsiyasının mərkəzində də muzdlulardan istifadə etmək dayanır.  Fransa  bu hərəkətləri “dəyirman öz işindədir, çax-çax baş ağrıdar” məsəlinə bənzəyir.  Odur ki, dünyada heç bir qüvvə Azərbaycanı tutduğu yoldan döndərə bilməz. Çünki haqq-ədalət Azərbycanladır və biz bunu sübut etdik”.

    Mürtəza

    Ölkə.Az