Category: Xəbər

Bu gün İkinci Qarabağ Savaşı şəhidi, Azərbaycan Ordusunun zabiti, kapitan Cəlil Cavadovun anım günüdür. Vətəndaş Həmrəyliyi Partiyası (VHP) Lerik rayon təşkilatının üzvləri şəhidin məzarını ziyarət ediblər.

Cəlil Ağaddin oğlu Cavadov 1989-cı il martın 29-da Lerik rayonunun Xəlifəkücə kəndində anadan olub. 1995-2003-cü illərdə Z. Səfərov adına Blaband kənd tam orta məktəbində, 2003-2006-cı illərdə isə Cəmşid Naxçıvanski adına Hərbi Liseydə təhsil alıb. 2006-2010-cu illərdə Heydər Əliyev adına Azərbaycan Ali Hərbi Məкtəbində (AAHM) ali hərbi təhsil alıb.

Azərbaycan Ordusunun kapitanı olan Cəlil Cavadov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzulinin və Xocavəndin azadlığı uğrunda gedən döyüşlərdə savaşıb. Cəlil Cavadov oktyabrın 27-də Xocavənd döyüşləri zamanı şəhid olub. “İgidliyə görə”,”Füzulinin azad olunmasına görə” və “Xocavəndin azad olunmasına görə” medalları ilə təltif edilib.

Şəhidin məzarı başında VHP Lerik Rayon Təşkilatının sədri Həşim Nəsirli İkinci Qarabağ Savaşı və 44 günlük Vətən Müharibəsindən danışıb. Bildirib ki, Azərbaycan Ordusu 30 il işğalda olan Vətən torpaqlarını azad etdi. Ordumuz şərəflə, qeyrətlə döyüşdü və işğalda olan torpaqları azad etdi. Vətən oğulları canı, qanı ilə döyüşdülər. Canlarını vətənə, millətə və dövlətə qurban verdilər. 30 ildir xəcalət içində gəzirdik. Şəhidlərimizin, qazilərimizin və şanlı ordumuzun hesabına başımız ucadır. Düşmənə qalib gəldik və biz bu günkü qələbəni, zəfəri şəhidlərə borcluyuq. Canını fəda edənlərdən biri də Cəlil Cavadov idi. Vətəninə, millətinə və dövlətinə bağlı gənclərdən biri idi. Gözünü qırpmadan da canını fəda etdi. Biz bütün şəhidlərə borcluyuq və ömrümüzün sonuna kimi də bu borcu ödəyə bilmərik.

“Zəngəzur həhlizinin açılışı Azərbaycan-Türkiyə iqtisadi münasibətlərinə müsbət təsir etməklə yanaşı, Ermənistanı da sıxıntıdan çıxaracaq”.

Bu sözləri ölkə başçısı İlham Əliyev və Türkiyə Prezidenti Rəcəb Tayyib Ərdoğanın iştirakı ilə bu gün Füzuli Beynəlxalq Hava Limanının açılışını və eyni zamanda Zəngəzur dəhlizinin təməlinin qoyulmasını dəyərləndirən Vətəndaş Həmrəyliyi Partiyasının sədri, millət vəkili Sabir Rüstəmxanlı İnterpress.az-a açıqlamasında deyib.

Deputat qeyd edib ki, Füzuli Beynəlxalq hava limanın açılması Azərbaycanın tarixində çox mühüm və ciddi bir hadisədir:

“Bu, Qarabağ Savaşından sonra ölkəmizin müharibədə əldə olunan nəticələri möhkəmləndirməsi istiqamətində atdığı addımların real nümunəsidir. Bu gün təkcə Füzuli deyil, Zəngilan və Laçında da hava limanlarının tikintisi iqtisadi əhəmiyyətlə yanaşı, siyasi faydaları da var. Çünki hələ sülh müqaviləsi imzalanmayıb, Ermənistan tərəfinin yeni savaş çağırışları var. Ona görə də Azərbaycan hər cəhətdən hazırlıqlı və möhkəm olmalıdır. Sözügedən ərazilərin dağlıq zona olduğunu nəzərə alsaq, hər cür müdaxilənin qarşısını almağa hazır olmalıyıq.

Ümumilikdə Füzuli Beynəlxalq hava limanın açılışı  8 ay ərzində atılan ilk addımlardan biridir. Bu hava limanının tikintisi ölkəmizin iradəsini və müharibədən sonrakı vəziyyətin əbədi olaraq dəyişilməzliyini nümayiş etdirir. Məlumdur ki, Qarabağ Savaşında Türkiyə Azərbaycana daim mənəvi dəstək olub və müharibənin nəticəsinə həlledici təsir göstərib. Bu fonda Füzuli Beynəlxalq hava limanının açılışında Türkiyə prezidenti Ərdoğanın iştirakı birliyimizin bariz nümunəsidir. Bu, Azərbaycan-Türkiyə münasibətlərinin getdikcə daha çox möhkəmləndiyini göstərir”.

Bugünkü tarixi hadisələrin qonşu ölkələrin  Azərbaycanla münasibətinə də mümkün təsirlərinə toxunan Sabir Rüstəmxanlıya görə, bu proses Cənubi Qafqazda müsbət hadisələrə yol aça bilər:

“Füzuli Beynəlxalq hava limanının açılışı cənub qonşumuz İrana bir mesajdır. Qeyd edim ki,  Rusiya və beynəlxalq aləm Cənubi Qafqazdakı münaqişə ocağının sönməsini istəyir. Ona görə də Rudiyanın ölkəmizə qarşı mövqeyi ardıcıldır. Putinin sonuncu çıxışı bir daha göstərir ki, onların geri addım atmaq niyyəti yoxdur və Minsk Qrupuna heç bir ehtiyac qalmayıb. Hesab edirəm ki, yaxın zamanlarda Rusiyanın dəstəyi ilə Zəngəzur dəhlizi tikilməlidir və bu, olacaq. Dəhlizin açılışı Azərbaycan-Türkiyə iqtisadi münasibətlərinə müsbət təsir etməklə yanaşı, Ermənistanı da sıxıntıdan çıxaracaq. Çünki  Ermənistan Azərbaycan üzərindən Rusiya və Mərkəzi Asiyaya bağlanır. Bir sözlə, mövcud vəziyyətdə tarixi proseslər baş verir”.

Yeni Azərbaycan Partiyasında “Vətən Müharibəsi: “Prezident-Xalq-Ordu birliyinin möhtəşəm rəmzi” mövzusunda dəyirmi masa keçirilib. Dəyirmi masada parlamentdə təmsil olunan siyasi partiya sədrləri, Milli Məclisin komitə sədrləri və deputatlar, ictimaiyyət nümayəndələri iştirak edib.

YAP sədrinin müavini, Mərkəzi Aparatın rəhbəri Tahir Budaqov bildirib ki, Azərbaycanın adının dünya siyasi tarixinə qalib ölkə kimi yazılması, 44 günlük Vətən müharibəsində qazanılan qələbədə milli həmrəylik amilinin müstəsna rolu olub: “İkinci Qarabağ müharibəsi Azərbaycan dövlətinin gücünü, xalqımızın sarsılmaz həmrəyliyini bütün dünyaya göstərdi”. VHP sədri Sabir Rüstəmxanlı “Siyasi dialoq və həmrəylik”, Milli Məclisin İnsan hüquqları komitəsinin sədri Zahid Oruc “Vətən Müharibəsi: xalqımızın haqq və şərəf işi”, ehtiyatda olan polkovnik Şair Ramaldanov “Müqəddəs savaş: cəsurluğun, şücaətin və vətənpərvərliyin təntənəsi”, YAP İdarə Heyətinin üzvü, deputat Hikmət Babaoğlu “Paralel baxış: Vətən müharibəsi və İnformasiya savaşı”, politoloq Eldar Namazov “Vətən müharibəsi və yekun tarixi reallıqlar” mövzusunda məruzələrlə çıxış edib.

Daha sonra Vətən müharibəsində qazanılan qələbədən çıxan nəticələr barədə çıxışlar olub, təkliflər səsləndirilib. Qeyd edək ki, təşkil olunan tədbirin adına və mövzusuna irad ola bilməz. Ancaq biz görürük ki, bu cür tədbirlərin ölkədəki dialoq mühitinə heç bir ciddi təsiri olmur. Yalnız deklarativ xarakter daşıyır. Bir çox hallarda bu cür tədbirlərə heç də bütün partiyalar dəvət edilmir, dəvət olunanların da heç də hamısı iştirak etmir. Parlamentdə təmsil olunan konstruktiv müxalifətin isə bütün müxalif cameənin adından danışması, təmsilçilik etməsi birmənalı qarşılanmır.

Elə sözügedən tədbirdə iştirak edən Vətəndaş Həmrəyliyi Partiyasının sədri Sabir Rüstəmxanlı da çıxışında bu məqama toxunub. O, Qarabağ qələbəsindən 1 il keçdiyini bildirib, qeyd edib ki, Qarabağdakı quruculuq müharibədən öncə başlanmış islahatları unutdurmamalıdır: “Bu gün əhalinin böyük qələbə sevincinə, inamına kölgə salan hallar var. Bu hallar aradan qaldırılmalıdır. Biz qələbədən sonra yeni dövr başlayacağını arzulayırdıq. Müharibədən sonra bu belə idi. Ancaq sonra yenə məmur otaqları xalqın üzünə bağlandı. Prezidentin arxasında dayanmalı olan vəzifəli sahiblərinin çoxu öz məsuliyyətini unudub. Prezidentin ortada tək olduğunu görürük. Yeni kadrların çoxu təcrübəsizdir. Rayon yerlərinə gedənlərə Harvard Universitetindən daha çox “torpaq universiteti”ndə oxumaq lazımdır. Biz düşmənə qalib gəldik, lakin bürokratiyaya, rüşvətə qalib gələ bilməmişik. Görünür, bunun üçün də 44 günlük savaş lazımdır. Məmur boşboğaz təriflərdən, riyakar yaltaqlıqlardan kənarda qalmalıdır. Qul psixologiyası bizim uşaqlarımıza heç nə verə bilməz. Digər tərəfdən, siyasi partiyalar arasında bu birlik qorunmalıdır. Ümummilli məsələlərdə vahid mövqeyin qorunması əsas şərtdir. Dialoq görüntü və toplantı xarakteri daşımamalı, sistemli fəaliyyətə çevrilməlidir. İqtidar və müxalifət arasında şər-böhtan aradan qaldırılmalıdır. Hakimiyyət cəmiyyətlə daha çox təmasda olan müxalifətin qaldırdığı məsələləri diqqətlə dinləməlidir, müxalifətin çıxışlarına daha ciddi yanaşmalıdır. Müxalifət Qarabağ məsələsində, quruculuq prosesində hakimiyyətlə bərabər iştirak etməlidir”.

Bu gün İkinci Qarabağ Savaşı şəhidi Elçin Ələkbər oğlu Əliyevin anım günüdür. Vətəndaş Həmrəyliyi Partiyası (VHP) Neftçala rayon təşkilatının üzvləri şəhidin məzarını ziyarət ediblər.

Elçin Əliyev 15 yanvar 1997-ci ildə Neftçala rayonunun Mikayıllı kəndində anadan olub. 2002-ci ildə Neftçala rayonu Mikayıllı kənd məktəbində 1-ci sinfə daxil olmuş və həmin məktəbin məzunu olmuşdur. 2015-ci il tarixində hərbi xidmətə yollanmışdır. Hərbi xidmətini Tərtər rayonunda etmişdir. 2016-ci ildə baş vermiş Aprel döyüşlərində iştirak etmişdi. Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan Elçin Əliyev 2020-ci il sentyabrın 27-də Azərbaycan və Ermənistan arasında başlanan İkinci Qarabağ müharibəsi zamanı döyüşə qatılır. O, Füzuli, Qubadlı və Zəngilanın azad olunması uğrunda gedən döyüşlərdə iştirak etmişdir. Elçin Əliyev oktyabrın 21-də Qubadlının Sınıq körpü adlı ərazisində gedən döyüşdə qəhrəmancasına şəhid olmuşdur. O, oktyabrın 23-də doğulduğu Neftçala rayonunda dəfn olunmuşdur. Azərbaycanın ərazi bütövlüyünün bərpa edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Elçin Əliyev “Vətən uğrunda” medalı və “Cəsur döyüşçü” medalı ilə təltif edilib.

Şəhidin məzarı başında VHP Neftçala rayon təşkilatının sədri Fərman Hüseynov İkinci Qarabağ savaşı, Ordumuzun 44 gün ərzində göstərdiyi fədakarlıq və Qarabağ savaşı zamanı yazılan şanlı və qürur tarixindən danışıb. Bildirib ki, xalqımızın igid oğulları 44 gün ərzində qızıl tarix yazdılar. Dünya hərb tarixinə silinməz iz buraxdılar.

Yazıçı-publisist Ələkbər Zahidov şəhid Elçin Əliyevin həyat yolundan, keçdiyi döyüşlərdən və qəhramanlığından danışıb. Bildirib ki, Elçin Əliyev aprel döyüşlərinin iştirakçısı olub və İkinci Qarabağ savaşında böyük fədakarlıq və qəhramanlıq göstərən döyüşçülərdən biri olub. Onun xatirəsi hər zaman əziz tutulacaq.

Bu gün İkinci Qarabağ Savaşında “Hadrut Fatehi” kimi tanınan Vətən Müharibəsi Qəhrəmanı Camal İsmayılovun anım günüdür. Vətəndaş Həmrəyliyi Partiyası (VHP) Neftçala rayon təşkilatının üzvləri şəhidin məzarını ziyarət ediblər.

Camal İsmayılov 7 iyul 1984-cü ildə Neftçalaın Həsənabad qəsəbəsində anadan olmuşdur. Orta təhsilini Neftçala şəhərində 1 nömrəli tam orta məktəbində başa vurmuş, 2001-ci ildə hərbi xidmətə yollanmışdır. O, Azərbaycan Silahlı Qüvvələrinin “N” saylı hərbi hissəsində xidmət edən zaman hərbi hissə rəhbərliyinin diqqətini cəlb elədiyinə görə xidmətini Xüsusi Təyinatlı Qüvvələrdə davam eləməsi barədə qərar verilmişdir. 2020-ci il sentyabrın 27-də başlanan Vətən müharibəsində Azərbaycan Xüsusi Təyinatlı Qüvvələrin heyətində Cəbrayıl rayonu, Füzuli rayonu və Qubadlı rayonu istiqamətlərində, həmçinin Ərgünəş dağı və Hadrut qəsəbəsi istiqamətlərində gedən döyüşlərdə savaşmışdır. Ümumi olaraq 24 gün ərzində 30-dan çox yaşayış məntəqəsinin azad edilməsi uğrunda gedən döyüşlərdə olmuşdur. Hadrut döyüşləri zamanı Azərbaycan Xüsusi Təyinatlı Qüvvələrin zabitləri ilə birgə Ermənistan Ordusunun rabitə qovşağına qoşulmuş və erməni hərbçilərinin başqa istiqamətə yönlənməsini təmin etmişdir.

Camal İsmayılovun da daxil olduğu Xüsusi Təyinatlı Qüvvələrin 15 nəfər hərbi qulluqçudan ibarət olan qrupu, həmçinin digər dəstələrdən olan 30 nəfər hərbi qulluqçuları oktyabrın 19-da Qubadlı rayonu istiqamətində ciddi önəmə və strateji əhəmiyyətə sahib olan mövqelər uğrunda döyüşlərə daxil olmuşdular. Qeyri-bərabər döyüşlər nəticəsində Camal İsmayılov və dəstənin bir neçə üzvü şəhid olmuşdur.

Qəhrəman şəhidin anım günündə onun məzarı və doğulduğu qəsəbədə millət vəkili Sabir Rüstəmxanlının dəstəyi ilə yaradılmış Şəhidlər bağındakı büstü ziyarət edilib.

Tədbirdə çıxış edən VHP Neftçala rayon təşkilatının sədri, Milli Məclisin Deputatı Sabir Rüstəmxanlının köməkçisi Fərman Hüseynov şəhidin ömür yolundan danışmışdır. O bildirib ki, İkinci Qarabağ müharibəsi iştirakçısı Camal İsmayılov Füzuli, Cəbrayıl, Zəngilan, Hadrut və Ərgünəş yüksəkliyinin, həmçinin Laçın dəhlizinə nəzarəti təmin edən yüksəkliyin alınmasında xüsusi fədakarlıq göstərir. O, Füzuli uğrunda gedən döyüşlərdə yaralı yoldaşına kömək etmək istəyərkən yaralanır. Yaralandığını isə ailəsindən gizlədən Camal sağaldıqdan sonra yenidən döyüşə yollanır. Rabitə sahəsində mütəxəssis olan hərbçimiz ermənilərin rabitə sisteminə qoşulur. Hadrutu müdafiə edən 1500 nəfərlik erməni briqadasına erməni dilində əmr verir ki, geri çəkilin. Beləcə bir güllə belə atmadan 1500 nəfərlik ermənini zərərsizləşdirir. Digər çıxışçılar Azərbaycan Ordusunun torpaqlarımızın erməni işğalçılarından azad olunmasından və qələbəmizdə Xüsusi Təyinatlı Qüvvəllərin baş giziri şəhid Camal İsmayılov kimi vətənpərvər hərbçilərimizin xüsusi rəşadətindən, döyüş yolundan danışıblar.

Bu gün İkinci Qarabağ Savaşı şəhidi Elşən Aslanovun anım günüdür. Vətəndaş Həmrəyliyi Partiyası (VHP) Qaradağ rayon təşkilatının üzvləri şəhidin məzarını ziyarət ediblər.

Elşən Alxas oğlu Aslanov 29 sentyabr 1999-cu ildə Yardımlı rayonunda anadan olub. Orta təhsilini Bakı şəhəri, Qızıldaş qəsəbəsində yerləşən Azər Namazov adına 180 saylı tam orta məktəbdə almışdır. İkinci Qarabağ müharibəsi zamanı könüllü olaraq xidmət keçmək üçün cəbhəyə yollanmışdır. Gərgin döyüşlər zamanı qəhrəmancasına şəhid olmuşdur. 23 oktyabr 2020-ci il tarixində Cəbrayıl-Qubadlı istiqamətində Vətən uğrunda şəhid olub.

Ölümündən sonra “Vətən uğrunda”, “Xocavəndin azad olunmasına görə” və “Füzulinin azad olunmasına görə” medalıları ilə təltif edilib.

VHP Qaradağ rayon təşkilatının Məclis üzvü və Qızıldaş bələdiyyəsinin üzvü Seymur Əsədli şəhidin məzarı başında çıxış edərək onun həyat yolundan danışıb. Çıxışçı bildirib ki, Elşən qəsəbənin nümunəvi gənclərindən biri olub. İşgüzarlığı, səmimiyyəti və dostluğu ilə hər kəsin sevgisini qazanan biri olub. İkinci Qarabağ Savaşı başlanan kimi döyüşə yollandı. Bu onun Vətən sevgisindən qaynaqlanırdı. Ailədə elə tərbiyə alıb, böyümüşdü. Elşən Qarabağ torpaqlarının düşməndən azad edilməsini istəyirdi, bu sevgi ilə də döyüşə getdi. Şəhid olması ilə Vətəninə, millətinə və dövlətinə sevgisini ifadə etdi.
İkinci Qarabağ Savaşı şəhidləri, qaziləri silinməz, yaddaşlarda əbədi qalacaq döyüş yolu seçdilər. Öz canları, qanları ilə torpaqları yağı düşməndən azad etdilər. Bizim vətəndaşlıq borcumuz onları yadda saxlamaq, ziyarət etməkdir. Tanrı bütün şəhidlərin ruhlarını şad eləsin.