Vətəndaş Həmrəyliyi Partiyası

Category: Xəbər

  • VHP rayon təşkilatları Qarabağdakı gərginliyi müzakirə edib

    Vətəndaş Həmrəyliyi Partiyasının Sumqayıt şəhər, Ağstafa rayon, Qaradağ rayon və Goranboy rayon təşkilatlarının Məclis toplantıları keçirilib. Toplantılarda təşkilati məsələlər, ölkədə baş verən ictimai siyasi olaylar, qarşıdan gələn 17 noyabr Milli Dirçəliş günü və son vaxtlar Qarabağ və cəbhə xətdində baş verənlər müzakirə edilib.

    VHP Ağstafa Rayon Təşkilatının sədri Dürdanə Həsənova, Qaradağ Rayon Təşkilatının sədri Bakir Əsədli, Sumqayıt şəhər təşkilatının sədri Elmar Sadıqlı və Goranboy rayon təşkilatının sədri Zaur Məmmədli çıxışlarında ölkədə və dünyada baş verən olaylardan danışıblar. Son günlər cəbhə boyu ərazilərdə və Qarabağda erməni separatçılarının təxribatları kəskin şəkildə pislənilib . Bu təxribatların məqsədli şəkildə edildiyi, bölgədə sülhün və davamlı əminamanlığın yaradılmasını istəməyənlərin etdikləri vurğulanıb. Həmçinin rus “sülhməramlılarının” bu təxribatlara bilərəkdən cavab vermədiyi, məqsədlərinin burda daima kök salmaq olduğu bildirilib. Qeyd olunub ki, bu bölgədə heç bir dövlətin sülh yaratma missiyası olmamalıdır. Yalnız BMT-in mandat verdiyi qüvvələr bölgəyə gəlməlidirlər. Əgər Rusiya burda qalırsa bölgəyə Türkiyə ordusu da gəlməlidir.
    Toplantılarda son vaxtlar Qarabağın dağlıq bölgəsində baş verənlər həm Ermənistan, həm də Rusiya tərəfindən 10 noyabr üçtərəfli anlaşmasının kobud şəkildə pozulması demək olduğu bildirilib. Ermənistan separatçı rejimlə əlaqələrini saxlamaqla, Rusiya isə Laçın koridorundan qanunsuz gediş-gəlişə imkan yaratmaqla sazişin şərtlərini pozur. Azərbaycan ordusunun döyüşlə azad etdiyi və sonradan boşaldılan bölgələrdən başqa, Xankəndi, Əsgəran, Xocalı və digər ərazilər də Azərbaycan Respublikasının qanuni ərazisidir. Burada dövlətimizin suveren hüquqları bərpa olunmalıdır. Əfsuslar olsun ki, Rusiya sülhməramlıları öz hərəkətləri ilə bu prinsipləri ayaqlar altına alır. Bölgədə rus hərbi birləşmələrinin yerləşməsinə ilk gündən etirazlar edilir. Çünki rus silahlılarının say tərkibi və forması sülhməramlı missiyasından kənara çıxıb.Ümumiyyətlə, Rusiyanın imperiya maraqları hamımıza bəllidir. Moskvanın Abxaziya və Krımda heç bir beynəlxalq normalara sığmayan hərəkətləri uzaq tarixdə baş verməyib. Kreml rus əsgərinin ayağı dəyən yeri “özününküləşdirmək” siyasətindən əl çəkmir. VHP üzvlərinin belə bir fikri qəti ifadə olunub ki, Rus “sülhməramlılarının” Şuşa ətrafında Azərbaycan hərbçilərinə qarşı planlaşdırılmış silahlı terror aktı həyata keçirmiş şəxsi terroristlərə təhvil verməsi onları bu cinayətdə iştirakçı etdi. Terror dəhlizinə” çevrilmiş “Laçın dəhlizi” dərhal Azərbaycan tərəfindən nəzarətə götürülməlidir!

  • Samir Əsədli: “Büdcədən ayrılan vəsait partiyalar üçün yetərli olmur”

    Milli Məclisdə büdcə müzakirələri zamanı siyasi partiyalara ayrılan vəsaitlə bağlı məsələ qaldırılıb. Parlamentin Hüquq siyasəti və dövlət quruculuğu komitəsinin sədri müavini, Bütöv Azərbaycan Xalq Cəbhəsi Partiyasının sədri Qüdrət Həsənquliyev bildirib ki, siyasi partiyalara ayrılan vəsait çox ədalətsiz bölüşdürülür. Onun sözlərinə görə, vəsait daha çox hakim partiyaya çatır. Deputat əlavə edib ki, dövlət büdcəsindən ayrılan vəsait partiyaların deputatlarının sayına görə partiyalar arasında bölüşdürülür: 
    “Əslində, azlıqda olan partiyalara daha çox vəsait ayrılmalıdır. Eyni zamanda dövlət büdcəsində QHT üçün nəzərdə tutulan vəsaitlərin də artırılmasına ehtiyac var”. Məlumat üçün bildirək ki, siyasi partiyalara maliyyə yardımının göstərilməsi üçün 2021-ci ilin dövlət büdcəsində ümumilikdə 4 milyon manat vəsait nəzərdə tutulub. VI çağırış Milli Məclisdə 11 siyasi partiya təmsil olunur. 125 deputatın 70 nəfəri hakim YAP-ın, 3 nəfər isə Vətəndaş Həmrəyliyi Partiyasının üzvüdür. Digər prtiyalar isə parlamentdə bir nəfərlə təmsil olunurlar. VHP Milli Məclisdə 3 deputatla təmsil olunduğuna görə, ən çox vəsaiti alan müxalifət partiyası sayılır.
     
    Millət vəkili Qüdrət Həsənquliyevin qaldırdığı məsələ barədə “Şərq”ə danışan Vətəndaş Həmrəyliyi Partiyasının sədr müavini Samir Əsədli deyib ki, dövlət büdcəsindən partiyalara ayrılan maliyyənin miqdarı ilə vəsaitin parlamentdə təmsilçilik sayına görə müəyyənləşməsi ayrı-ayrı məsələlərdir. Samir Əsədlinin fikrincə, parlamentdə daha çox yer alan partiyaya daha artıq vəsait ayrılması normal prinsipdir: 
    “Maddi bölgünün güc və imkanlara uyğun müəyyənləşməsi qəbul olunmuş dəyərdir. O başqa məsələdir ki, ayrılan vəsait partiyalar üçün yetərli olmur. Partiyanın normal fəaliyyəti, mərkəzi aparatının və bölgə təşkilatlarının saxlanması daha çox məbləğ tələb edir. Vətəndaş Həmrəyliyi Partiyası olaraq ayrılan vəsaitin xərclənməsini şəffaf şəkildə həyata keçiririk və bunun açıq hesabatı verilir. VHP-də Mərkəzi Aparatda çalışan şəxslərə əməkhaqqı da ödənilir. Həmçinin, partiyanın təbliğat-təşviqat işlərinin aparılması üçün texniki məsələlərə xərclər ayrılır. Bir daha qeyd edirəm ki, məbləğ yetərli deyil, bütün ehtiyaclar ödənilmir. Amma mən həm də o fikirdəyəm ki, ölkədə siyasi sistem o dərəcədə demokratikləşməlidir ki, partiyalara iş adamları və sahibkarlar da meyillənməli, onların imkanlarından da istifadə olunmalıdır”.

  • VHP bölgələrdə 17 noyabr Milli Dirçəliş gününü qeyd edib

    17 noyabr Milli Dirçəliş günü ilə bağlı Vətəndaş Həmrəyliyi Partiyasının (VHP) Tovuz, Qusar, Ağsu və Kürdəmir Rayon Təşkilatları yığıncaq keçiriblər.
    Təşkilatların Məclis toplantılarında 17 noyabr Milli Dirçəliş Gününün əhəmiyyəti və yaxın tariximiz üçün fəlsəfəsi haqda danışılıb.
    VHP Qusar rayon təşkilatının iclasında 1988-ci il noyabrın 17-də Azadlıq meydanında başlayan xalq etirazının səbəbləri və o zamankı şəraitlə bağlı müzakirələr açılıb.
    Çıxış edən təşkilat sədrinin müavini Əlisafa Məmmədov bildirib ki, Milli Dirçəliş Günü Azərbaycan tarixinin ən parlaq hadisələrindəndir. Qeyd olunub ki, bu hərəkat elə bir hadisədir ki, bütün bayramlardan yüksəkdə durmalıdır. Azərbaycanın müasir tarixi üçün hər şey məhz 17 noyabrda başladı. O zaman Qarabağın Ermənistana birləşdirilməsi yönündə separatçı hərəkat başlamışdı və Mixail Qorbaçov Qarabağı rüşvətlə ermənilərə vermişdi. Əgər bu hərəkat olmasaydı, Qarabağ sakit şəkildə ermənilərə veriləcəkdi. Məhz xalqımızın birliyi və həmrəyliyi ilə Qarabağ torpaqlarının böyük hissəsi bu gün azad edilib.
    Yığıncaqda Qusar Rayon Təşkilatı təşkilatın mərhum sədri, xalq hərəkatının öncüllərindən və Qusarda liderlərindən olan Həsənbala Məmmədovun xatirəsini anılıb. Həsənbala Məmmədovun xatirəsinin hər zaman əziz olacağı və yaddaşlarda yaşayacağını bildirilib. Hərəkat vaxtı, ondan sonrakı illərdə də Həsənbala Məmmədovun insanların hüquqları, təhsil alması və bölgədə marifçilik ideyalarının yayılmasında xidmətləri vurğulanıb. Qeyd olunub ki, həm siyasətçi, həm də müəllim kimi Qusar üçün, bölgə və Azərbaycanın azadlığı üçün Həsənbala Məmmədov mücadilə aparırdı. İstəyi o idi ki, xalqı firavan yaşasın, gənclər, xüsusən qız uşaqları təhsil alsın.
    Sonda Qusar Rayon Təşkilatının Məclisi növbəti konfransa kimi təşkilatın sədr əvəzi vəzifəsini Əlisafa Məmmədova həvalə edib.

    Tovuz Rayon Təşkilatının iclasında təşkilat sədri Nəsimi Tovuzlu bildirib ki, o günlərdə qeyri-adi bir milli birlik nümayiş etdirildi: “Meydanda milyonlarla insan olduğu günlərdə, minlərlə insan gecələr tonqal başında meydanda qaldığı günlərdə xalq meydanı yedirtdi, içirtdi, hər yerdən kömək gəldi. Belə bir qeyri-adi milli birlik nümayiş etdirildi. Ona görə həmin günlərin əhəmiyyəti çox böyükdür. 1989-cu ildı yenə də ilin sonunda AXC-nin fəaliyyəti, müxtəlif şüarları, tələbləri Moskvanı yenə yerindən oynatdı, 20 Yanvarda qırmızı ordu Bakıya daxil oldu. 20 Yanvar qırğınından sonra SSRİ-nin dağılması qaçılmaz idi. Bundan sonra müstəqil Azərbaycan dövləti yarandı, 1918-ci ildəki Cümhuriyyəti bərpa etdik. 1988-ci ildəki Meydan hadisələrindən 1991-ci ilə qədər yol gəldik. Bu hərəkat SSRİ-nin dağılmasını sürətləndirdi və biz müstəqilliyimizi elan etdik. Bu səbəbdən Milli Dirçəliş Günü tarixi əhəmiyyəti olan bir gündür”.

    VHP Kürdəmir Rayon Təşkilatının yığıncağında isə təşkilatın sədri Əliqulu Cəfərli çıxışında Qarabağ uğrunda aparılan vətən savaşı növbəti dəfə bizə həmin milli birliyi və ruhu yaşatdı: “32 il sonra II Qarabağ savaşı zamanı yaranan milli birlik də göstərdi ki, həmin xalqdır, həmin milli ruh və iradədir, həmin gözəllikdir. Ötən 30 ildə hərbi məğlubiyyət millətimizin psixologiyasına zərbə vursa da, gənclərimizin içində bir ümidsizlik yaratsa da, bu savaş hər şeyi yerinə qaytardı. Çünki qeyd etdiklərimizin səbəbi də müharibədə torpaqlarımızı itirməyimiz, 1 milyon qaçqın və məcburi köçkünün taleyi idi. Vətən savaşında xalq birləşdi, öz torpağını xilas etmək üçün qalxdı. Bu onu göstərdi ki, millətin ruhu və iradə öz yerindədir. Müharibəni müasir silahlarla yanaşı, Azərbaycan əsgərinin qəhrəmanlığı, döyüş ruhu, əzmi və iradəsi uddu. Ordumuz bizi qələbəyə və Azərbaycanın ərazi bütövlüyünə qovuşdurdu”.

    VHP Ağsu Rayon Təşkilatının sədri Tahir Əzimov bildirdi ki, Xalq Hərəkatı möhtəşəm bir tarix idi. Xalqımızın azadlıq, müstəqillik və ədalət hisslərinə uyğun hərəkat idi. Meydan hərəkatı daha çox Qarabağ məsələsinə görə başlamışdı və sonradan böyük xalq kütləsinin cəmləşməsi ilə azadlıq hərəkatına çevirldi. Meydan Hərəkatının əsas liderlərindən biri Sabir Rüstəmxanlıdır və biz bu gün də onun liderliyi ilə Vətəndaş Həmrəyliyi Partiyasında fəaliyyət göstəririk.
    Meydan tarixdə bir zirvə idi. O zirvəni Millətimiz əldə etdi. Meydan hərəkatı millətin birliyini göstərdi. Tariximizdə ən şərəfli tarixlərdən biri idi. Bu günkü qələbəmiz də Xalq Hərəkatında olan birliyimizin bir nümunəsi idi.

    Sonda təşkilatların Məclis toplantılarında bir sıra təşkilati məsələlərə baxılıb. VHP-yə Tovuz, Qusar, Ağsu və Kürdəmirdən üzv olmaq üçün müraciət edən şəxslər üzvlüyə qəbul edilib.

  • Samir Əsədli: “Paşinyan sülhə getmək yolundan çəkilməyəcək”

    Hər ölkədə müxalifətin işi hakimiyyəti tənqid etmək, ona qarşı sivil yollarla mübarizədir

    2020-ci il 10 noyabr üçtərəfli Bəyannaməsində nəzərdə tutulan məsələlər həyata keçirildikcə Ermənistandakı revanşist qüvvələr hökumətə daha güclü təzyiq göstərməyə çalışırlar. Erməni mediası həmin qüvvələrin çağırışı ilə dünən Respublika meydanında keçirilən etiraz aksiyası zamanı gərginlik yaşandığını bildirib.

    “Nikol satqındır” şüarını səsləndirən bir qrup iştirakçı hərəkəti dayandırmağa cəhd göstərsə də, polis onları yolun hərəkət hissəsindən sıxışdırıb çıxarmaqla yanaşı, hökumət binasına çox yaxınlaşmağa da imkan verməyib. Nəticədə basabas və əlbəyaxa çəkişmə yaranıb. Dünən Ermənistan parlamentindəki “Ayastan” müxalif fraksiyasının deputatı Qeqam Manukyan öz “Facebook” səhifəsində “Qarşıdurma üçün səhər saat 11:00-da Respublika meydanına gəlin. Kim gələcək? Gözləyirik. Bu gün hakimiyyət Gorus-Qafan yolunun Azərbaycanın nəzarəti altında olduğunu rəsmi şəkildə bəyan etdi. Hələ üstəlik də hökumətin üzvü bu gün Sünikə getdi və dolama yolun tikintisinin başa çatdığını açıqladı, düşmən isə dərhal trassı bağladı. Dözəcəyik? Bunun cavabını kim verəcək? Hökumət? Səhər hökumətin növbəti iclası olacaq və bizim sual vermək hüququmuz var. Biz hökumətdən cavab tələb edəcəyik” çağırışını edib. Manukyan bu müraciəti Ermənistanın Təhlükəsizlik Şurasının katibi Armen Qriqoryanın gecəyarısı Azərbaycanın Qafan-Gorus yolunda nəzarət-buraxılış məntəqəsi quracağı barədə verdiyi bəyanatdan sonra paylaşıb. Bir müddət əvvəl keçirilən mitinqdə isə Manukyanın üzvü olduğu “Ayastan” blokunun rəhbəri, Ermənistanın keçmiş prezidenti Robert Koçaryan ya seçkilər, ya da ki, barikadalar yolu ilə hakimiyyəti devirməsinin bir neçə həftənin işi olduğunu deyib.

    Mövzu ilə bağlı VHP-nin Mərkəzi İcra Aparatının rəhbəri Samir Əsədli deyib ki, Azərbaycanla normal, ağla, siyasi reallığa söykənən münasibətlər gündəmə gələndə hər zaman Ermənistan siyasi düşərgəsində gərginlik yaranır:

    “Diqqət edin, bir neçə gün öncə Ermənistan mətbuatında Azərbaycanla Ermənistan arasında tezliklə sülh müqaviləsinin imzalanacağına dair sensasiyalı məlumat yayıldı. Həmin məlumat Ermənistanın əksər KİV-i tərəfindən tirajlandı. Sonra isə Kremlə yaxın “RİA Novosti”nin də təsdiqlədiyi həmin məlumatda deyilirdi ki, noyabrın 9-da, ya da 10-da Azərbaycan Prezidenti İlham Əliyev və Ermənistanın Baş naziri Nikol Paşinyan Moskvada görüşəcək və Vladimir Putinin iştirakı ilə iki hissədən ibarət sülh müqaviləsi imzalayacaqlar. Rusiyanın vasitəçiliyi ilə imzalanacağı gözlənilən yeni sənədlərin təfərrüatı haqda hələ dəqiq bilgilər olmasa da, erməni müxalifəti mitinqlərə qərar verdi. Bəlkə də düşünmək olar ki, qeyri-adi heç nə baş vermir. Hər ölkədə müxalifətin işi hakimiyyəti tənqid etmək, ona qarşı sivil yollarla mübarizədir. Ermənistanın ikinci prezidenti Robert Koçaryanın rəhbərlik etdiyi müxalif “Hayastan” bloku mitinq qərarını belə izah edir ki, hakimiyyət erməni xalqının və dövlətçiliyin maraqlarına xidmət etmir. Müxalifət bloku hazırkı hakimiyyətin Ermənistanın yeni ərazilərini Azərbaycana verəcəyindən narahat olduqlarını qeyd edir. Ancaq hesab edirəm ki, Paşinyan sülhə getmək yolundan çəkilməyəcək”.

  • Doğum günü şəhid olan qəhrəman

    Bu gün İkinci Qarabağ Savaşı Şəhidi Nicat Höccət oğlu Qasımzadənin anım günüdür. Vətəndaş Həmrəyliyi Partiyası (VHP) Biləsuvar üzvləri şəhidin ailəsini və məzarını ziyarət ediblər.

    Nicat Qasımzadə 2000-ci il noyabrın 10-da Biləsuvar rayonunun Zəhmətabad kəndində anadan olub. 2007-2018-ci illərdə Ə.Rəhmətov adına Zəhmətabad kənd tam orta məktəbində təhsil alıb. Nicat Qasımzadə 2019-2020-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Azərbaycan Ordusunun kiçik çavuşu olan Nicat Qasımzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Hadrut qəsəbəsinin, Füzulinin və Şuşanın azadlığı uğrunda gedən döyüşlərdə savaşıb. Nicat Qasımzadə noyabrın 9-da Şuşa döyüşləri zamanı şəhid olub. 12 noyabr 2020-ci il tarixində Biləsuvar rayonunun Zəhmətabad kəndində dəfn olunub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün ölümündən sonra “Vətən uğrunda”, “Xocavəndin azad olunmasına görə”, “Füzulinin azad olunmasına görə”, “Şuşanın azad olunmasına görə” və “Cəsur döyüşçü” medalları ilə təltif edildi.

     Şəhidin məzarı başında çıxış edən dayısı İlham Ağayev Nicat barədə danışıb. O, bildirib ki, Nicat ailədə vətənpərvər ruhda böyüyüb:”Vətənini, dövlətini və millətini canından artıq sevirdi. Milli Qəhramanımız Mübariz İbrahimov şəhid olandan sonra hərbçi olacağını deyirdi. Mübariz İbrahimovun qəhramanlıq səlnaməsini həyat fəlsəfəsinə çevirmişdi. Atası zəhmətlə, halal böyütmüşdü Nicatı. Məktəbi bitirdikdən sonra imtahan verərək Tovuz Dövlət Sosial İqtisadi kollecinə qəbul olub. Kollecdə oxumaq istəməyib. Məqsədi əsgərliyi bitirib, Azərbaycan Dövlət Rəssamlıq Akademiyasına daxil olmaq olub. 2019-cu il yanvarın 3-də hərbi xidmətə yola düşüb. 3 ay müddətinə Goranboyda N saylı hərbi hissədə xidmət edib. Bundan sonra Ağdama göndərilib. Xidməti dövründə seçilən əsgər olub. Ağdamda 3 ay artilleriya manqa komandiri olub. Yüksək atıcılıq qabiliyyətinə yiyələnən Nicat pulemyot atıcısı olub. Xidmətinin bitməsinə 2 ay qalmış kiçik çavuş rütbəsi alıb.

    Xidmətdən yenicə qayıtsa da, sentyabrın 27-dən başlayan Vətən Müharibəsinə qatılıb. Füzuli, Cəbrayıl, Şuşa uğrunda gedən savaşda düşmənə qan uddurub.

    İkinci Qarabağ Savaşı başlanan kimi sevinirdi, deyirdi torpaqlarımızı yağılardan azad edəcəyik. Şuşanı, Laçını, Kəlbəcəri və işğalda olan torpaqları azad edəcəyik. Nicat Şuşada şəhid oldu, şəhidlik məqamına orda yetişdi. Xəyalları torpaqları azad görmək idi, Şuşanı azad görmək idi Azad gördü, bu gün ruhu şaddır. Vətən azad olduqca onlar da daima yaşayacaq, ruhları şad olacaq”.

    Daha sonra VHP Ali Məclisinin üzvü, Millət Vəkili Fəzail İbrahimlinin köməkçisi Faiq Ağayev çıxış edərək Vətən Müharibəsindən danışıb , 44 gün ərzində igidlərimizin qəhramanlıq tarixindən söz açıb: “44 günlük savaşda ordumuz böyük uğur göstərib, bizi xəcalətdən azad ediblər. 30 illik düşmən işğalında olan torpaqları azad etməklə ölkəmizin qüdrətini, böyüklüyünü göstəriblər. Nicat da həmin qəhramanlardan, Şuşa fatehlərindəndir. Nicat noyabrın 9-dan 10-na keçən gecə müharibənin bitməsinə saatlar qalmış, ad günündə, Şuşada ürəyindən aldığı qəlpə yarası ilə şəhid olub. O, 44 günlük döyüş müddətində düşmənin 30-a yaxın canlı qüvvəsini, texnikasını məhv edib. Yaralı döyüş yoldaşlarını meydandan çıxarıb, sıldırım qayalıqlarla Şuşaya dırmanmasında yaxından yardımçı olub.Biz onlara, onların qəhramanlıq şücaətlərinə borcluyuq. Bu gün də onlar qarşısında baş əyirik, ruhları şad olsun”.

    VHP Biləsuvar rayon təşkilatının sədri Məharət Ağayev çıxışında bildirib ki, Mübariz İbrahimov kimi oğullar yetişdirmiş Biləsuvar qəhramanlar diyarıdır: “Milli Qəhraman Mübariz İbrahimovun qəhramanlıq salnaməsindən sonra biləsuvarlı gənclər orduda xidmət etməyi amal seçdilər özlərinə. Onlardan biri də Nicat idi. İkinci Qarabağ Savaşında gənclərimizin qəhramanlığını gördük. Bütün qoşun növlərimizdə gənclərimizşücaətlə döyüşdülər. Biz bu günkü qələbəmizi onlara, şəhidlərimizə, qazilərimizə borcluyuq”.

    Şəhidin atası Höccət Qasımov bildirdi ki, Nicat vətən qarşısında borcunu yerinə yetirərkən şəhid olub: “Nicat əsgərliyini başa vurub gələndə çox sevindik, elə bildik bir dəfəlik evimizə qayıtdı. Sevincimiz uzun çəkmədi. Heç 3 ay tamam olmamış 21 sentyabr 2020-ci ildə qismən səfərbərliklə 2-ci Qarabağ müharibəsində iştirak etmək üçün çağrıldı. Füzuli, Cəbrayıl, Şuşa uğrunda gedən döyüşlərdə iştirak edib. Nicat hələ kiçik yaşlarından qəhrəmanlıq göstərmiş şəhidlərə baxaraq böyüyüb. Özü də onlar kimi olacağına söz verib. Rəbbim özünü də şəhidlik mərtəbəsinə ucaltdı. Nicat noyabrın 9-dan 10-na keçən gecə müharibənin bitməsinə saatlar, bəlkə də saniyələr qala ad günündə Şuşada ürəyindən aldığı qəlpə yarası ilə şəhid olub. Noyabrın 10-u şəhid olsa da, bu xəbər bizə 12-si səhər çatdırıldı. Xəbəri eşidəndə dünyamız başımıza uçdu. Anası onunla sonuncu dəfə noyabrın 3-ü danışmışdı. Elə deyirdi ki, narahat olmayın, hər şey yaxşıdır. Orada onunla vuruşan dostları deyirdi ki, Nicat bizi neçə dəfə ölümdən xilas edib. Məkanın cənnət olsun, övladım”.

     

     

     

  • VHP-çilər Zəfər günün qeyd ediblər

    Xalqımız çox əlamətdar tarixi günləri yaşayır. İşğal altında olan torpaqlarımızın erməni faşistlərindən azad edilməsi üçün ötən il sentyabrın 27-də başlanan və 44 gün davam edən Vətən müharibəsində Azərbaycan Ordusunun qazandığı şanlı Qələbədən bizi düz bir il ayırır. 8 Noyabr – Zəfər Günü respublikanın hər yerində yüksək bayram əhvali-ruhiyyəsi ilə qeyd edilir.
    Zəfər Günü münasibətilə ölkə miqyasında keçirilən tədbirlərdə VHP partiya olaraq aktiv iştirak edib.

    Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı Neftçalada keçirilən möhtəşəm bayram tədbirinə qatılıb.
    Tədbirdə S.Rüstəmxanlı qalib xalq olmağın sonsuz sevinc və qürurunu yaşayan Azərbaycan xalqını və onun avanqard qüvvəsi olan çoxminli neftçalılarə Zəfər günü münasibəti ilə təbrik edib, onların ön və arxa cəbhədə göstərdikləri hünər yolundan söz açıb: “Bu gün Azərbaycan xalqının Zəfər Günüdür. Qürur duyulacaq bir gündür. 30 ilə yaxındır bu günü həsrətlə gözləyirdik. Bu həsrətə Azərbaycan Ordusu son qoydu.Qalib Azərbaycan xalqı bir yumruğa çevrilərək bütün dünyaya öz gücünü, mətinliyini, mübarizliyini nümayiş etdirdi. Şəhidlərin ruhu qarşısında baş əyir, qazilərimizə Tanrıdan şəfa diləyirik”.

  • Lalə Şövkət-70

    Azərbaycan ictimai-siyasi həyatında özünəməxsus, təkrarolunmaz mövqeyə sahib olan Lalə Şövkət Hacıyevanın 70 yaşı tamam olur. Bu münasibətlə Vətəndaş Həmrəyliyi Partiyası Lalə xanımı təbrik edib. Təbrikdə deyilir:
    ” Əziz Lalə xanım, Sizi doğum gününüz münasibətilə səmimi qəlbdən təbrik edirik.
    Sizin yüksək intellektiniz, zəngin siyasi təcrübəniz, keçdiyiniz parlaq və nümunəvi siyasi yol istənilən siyasətçi üçün etalon ola bilər. Yüksək mənəvi keyfiyyətlərə əsaslanan fəaliyyətiniz Sizə Azərbaycanın ən yeni tarixində xüsusi yer qazandırıb. Siz Azərbaycam qadınının tarixən formalaşan cəsarət, mübarizlik və ləyaqət dəyərlərini siyasətə gətirərək “olduğunuz kimi görünmüş, göründüyünüz kimi olmusunuz”.
    Hörmətli Lalə xanım!
    Sizi bir daha yubileyiniz münasibəti ilə səmimiyyətlə təbrik edir, Şəxsinizə uzun ömür, can sağlığı arzulayı, həyat idealınız olan bütöv, qüdrətli, demokratik Azərbaycan quruculuğuna yönəlik mübarizənizdə uğurlar diləyirik.

  • Biləsuvarda Milli Qəhrəman Mübariz İbrahimov adına məktəb liseydə Zəfər günü qeyd olunub

    Biləsuvar rayonunda Milli Qəhrəman Mübariz İbrahimov adına məktəb liseydə Zəfər günü qeyd olunub.
    Tədbirdə Milli Məclisin vitse-spikeri  Fəzail İbrahimli, Biləsuvar Rayon İcra Hakimiyyətinin başcısı Faiq Qürbətov, Mərkəzi Bankın sədri Elman Rüstəmov və rayon ictimayyətinin nümayəndələri iştirak edib.
    Tədbir iştirakçıları rayon şəhidlər xiyabanını ziyarət ediblər. Daha sonra məktəb liseydə tədbir davam edib. Tədbirdə çıxış edən Milli Məclisin vitse spikeri Fəzail İbrahimli çıxışında qeyd edib ki,  Mübariz İbrahimov göstərdiyi əvəzolunmaz  şücaəti ilə Azərbaycan gəncliyinin qəhrəmanlıq ruhunu yeniləyib: “Vətən Müharibəsində əldə etdiyimiz tarixi qələbədə Mübariz məktəbinin rolu əvəzsizdir.Müharibədə vətən oğulları Mübarizin göstərdiyi qəhrəmanlıqdan güc alaraq, misilsiz qəhrəmanlıqları sayəsində düşməni torpaqlarımızdan qovdu.” 44 günlük şanlı savaş XXI əsrin müharibəsi oldu. Yüksək hərb texnologiyaları ilə aparılan bu haqq savaşı bir daha göstərdi ki, xalqımızın indiki və gələcək nəsilləri içərisindən sarsılmaz mənəvi və vətənpərvərlik ruhlu savadlı mütəxəssislər, o cümlədən də ən son texnoloji biliklərə malik ağıllı hərbçilər yetişdirilməlidir. Bütün bunlar isə şübhəsiz ki, Biləsuvar Lisey kompleksi kimi müasir və güclü təhsil ocaqlarından başlayır.”
    Tədbir Lisey Kompleksinin binasında yerləşən elm, texnologiya, mühəndislik, incəsənət və riyaziyyat (STEAM) mərkəzinin qonaqlara təqdim edilməsilə davam etmişdir. Burada II Qarabağ müharibəsi qazisi olan lisey əməkdaşlarının iştirakı ilə “Zəfər tarixi” adlı açıq dərs, “Dəmir Yumruq” şahmat turniri, həmçinin “110 kitab” layihəsi üzrə Vətən müharibəsindən bəhs edən hekayənin müzakirəsi təşkil olunmuşdur.
    Daha sonra Liseydə çalışan Vətən müharibəsi iştirakçılarına hədiyyələr təqdim edildi. Şəhid ailələrinə ərzaq yardımları paylanıldı. Biləsuvar və Cəbrayıl rayonlarından olan şəhid ailələri ilə görüş keçirildi.

     

  • Şəhid Orxan Cümşüdov anılıb

    Bu gün İkinci Qarabağ Savaşı şəhidi Orxan Cümşüdovun anım günüdür. Vətəndaş Həmrəyliyi Partiyası (VHP) Goranboy Rayon Təşkilatının üzvlər şəhidin məzarını ziyarət ediblər.

    Şəhid Cümşüdov Orxan Elxan oğlu 1993-cü il sentyabrın 1-də Goranboy rayonunun Tap Qaraqoyunlu kəndində anadan olub. 2015-ci ildə Gəncə Dövlət Universitetinin Menecment ixtisası üzrə məzunu olub.

    Azərbaycan Ordusunun əsgəri olan Orxan Cümşüdov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin və Şuşanın azadlığı uğrunda gedən döyüşlərdə savaşıb. Orxan Cümşüdov noyabrın 4-də Xocavənd istiqamətində düşmən üzərinə hücuma kecərkən şəhid olub. Goranboy rayonunda dəfn olunub.

    Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün ölümündən sonra “Vətən uğrunda” və  “Füzulinin azad olunmasına görə”medalı ilə təltif edilib.

    Azərbaycan Ordusunun 44 günlük Vətən müharibəsində qazandığı şanlı Qələbədən danışan VHP Goranboy Rayon Təşkilatının sədri Zaur Məmmədli həmin zəfərdə payı olan Orxan kimi qəhrəman oğullarımızla illər keçsə belə hər zaman qürur duyulacağını dilə gətirib. Vətən müharibəsində Şəhidlik zirvəsinə yüksələn Orxanın təkcə goranboyluların, doğma el-obasının deyil, bütöv Azərbaycanın övladı olduğunu söyləyib.  Zaur Məmmədli əlavə bildirib ki, Orxanı yaxşı tanıyırdı. Bir kənddə böyüyüblər. Orxan çox vənənpərvər, elin, obanın qeyrətini çəkən gənc idi. O, 44 günlük savaşda əldə etdiyimiz tarixi Zəfərin müəllifi olan şanlı Azərbaycan Ordusuna, şəhidlərimizə, qazilərimizə borclu və minnətdar olduğumuzu qeyd edib.

     

  • Neftçalada İkinci Qarabağ Şəhidləri anılıb

    Bu gün İkinci Qarabağ Savaşı şəhidləri, baş leytenant Mahmud Təhmasib oğlu Məlikov, Əsgər Mehman Xudaşükür oğlu Əliyev və Əsgər Mais Şakir oğlu Səfərovun anım günləri keçirilib. Vətəndaş Həmrəyliyi Partiyası (VHP) Neftçala Rayon Təşkilatının üzvləri şəhidlərin məzarlarını ziyarət ediblər.

    VHP Neftçala Rayon Təşkilatının sədri, Millət Vəkili Sabir Rüstəmxanlının köməkçisi Fərman Hüseynov Vətən Müharibəsinin başlanma tarixindən, müharibə zamanı Ordumuzun və Azərbaycan Xalqının qəhramanlığından danışıb. Bildirib ki, İkinci Qarabağ Savaşı bir qəhramanlıq, şücaət və vətən sevgisi salnaməsidir. Həmin salnaməsini şəhidlərimiz qanlarıyla yazdılar. Canlarını Vətən torpağına qurban verməklə bu torpaqların müqəddəsliyinə, heç kimə verilməyəcəyinə əminlik nümayiş etdirdilər. Biz Azərbaycan Xalq Cümhuriyyətini xalq olaraq müqəddəs amallar üzərində qurduq, Cümhuriyyət qurucuları canlarını verdilər bu yolda. İstiqlalımızı ikinci dəfə bərpa etməklə yenidən Vətən uğrunda can verdik. Qarabağı işğaldan azad etməklə oğullarımız canlarını fəda etdilər. Biz bu ölkəni canımız, qanımız və oğullarımızın qəhrəmanlığı hesabına qurmuşuq.

    Tədbirdə çıxış edən yazıçı-publisist Ələkbər Zahidov bildirib ki, 44 günlük savaşda Azərbaycan xalqı bir yumruğa dönərək, “Torpaq uğrunda ölən varsa vətəndir” amalını təsdiqlədilər. On minlərlə gənc İkinci Qarabağ savaşında erməni işğalçılarına qarşı mübarizə aparmaq üçün könüllü müraciət edərək cəbhəyə yollanmaq istəklərini ortaya qoydular. Arxa cəbhədə olanlar həmrəylik göstərərək öz əməlləri ilə ön cəbhədə vuruşanlara əllərindən gələn köməyi əsirgəmədilər, hər cür maddi və mənəvi dəstək verməyə hazır olduqlarını göstərdilər, ölkədə hər kəs milli birlik nümayiş etdirdi. Bütün bunlar bir daha onu göstərdi ki, siyasi, dini, sosial mövqeyindən asılı olmayaraq vətənin ümumi maraqları, Azərbaycan xalqının birliyi hər bir vətəndaş üçün bütün arzu və istəklərdən öndə dayanır.  Azərbaycan xalqı öz əzmi ilə bütün dünyaya, sözün həqiqi mənasında, birlik və həmrəyliyini, vətənpərvərliyini nümayiş etdirdi.