Vətəndaş Həmrəyliyi Partiyası

Category: Gündəm

  • “Avropa Birliyinin modelinə uyğun Türk Birliyi qurulmalı, ərazi bütövlüyünə, istiqlalına qarşı olan təhdidlərə qarşı birgə hərbi, siyasi cavab verilməlidir”

    Bu gün Vətəndaş Həmrəyliyi Partiyasının mərkəzi qərargahında 15 sentyabr Bakının işğaldan azad olunmasının 102-ci ildönümü münasibəti ilə tədbir keçirilib. “Bölgədəki siyasi durum və Azərbaycan-Türkiyə münasibətlərinin prespektivləri” mövzusunda keçirilən tədbirdə ölkənin millət vəkilləri, siyasi partiya sədrləri və ictimai xadimlər qatıblar.

    Türkiyə və Azərbaycanın istiqlalı yolunda şəhid olanların ruhunu bir dəqiqəliki sükutla yad etdikdən sonra tədbiri açan VHP sədri, millət vəkili Sabir Rüstəmxanlı dünyanın hazırki siyasi gedişatı və Türk Dünyasının qarşısında duran məqsədlər haqda danışıb: “XXI əsr dünyaya yeni qaydalar gətirdi. Bu yalnız pandemiya və onun nəticələri ilə bağlı deyil. Əslində 2001-ci ilin 11 sentyabrında baş verən məlum olaylar dünyada yeni siyasi düzənin qurulmasına başlanğıc oldu. Böyük güclər geopolitik maraqlarını təmin etmək üçün açıq ən müxtəlif bəhanələrlə yeni işğalçılıq siyasətinə başladı. 20 ilə yaxındır davam edən bu gedişat Asiya qitəsini müharibə meydanına çevirib. Dünya yenidən bölüşdürülür, dünyanın siyası xəritəsi yenidən cızılır. 100 il öncə də eyni proses Azərbaycan və bütövlükdə Türk Dünyasının böyük itkiləri ilə başa çatdı. Azərbaycan dövlət müstəqilliyini və tarixi ərazilərinin böyük hissəsini itirdi, Türkiyə Osmanlı imperatorluğunun məğlub durumu ilə barışmağa məcbur oldu, Orta Asiya türkləri bütövlükdə Rusiya əsarəti altına düşdü. Bu ağır nəticələrin bir hissəsini yalnız 100 il sonra aradan qaldırmaq mümkün oldu. İndi keçmişdən dərs götürmək, yeni səhvlərə yol verməmək üçün daha düzgün inkişaf yolu seçmək lazımdır.

    Yüz il öncə Nuru paşanın Azərbaycandan başqa Güney Azərbaycanda da savaşı, hətta sovet əsarəti altında belə, sadə Azərbaycan insanının bütün maddi imkanlarını Atatürk Cumhuriyyətinə fəda etməsi o dövrün böyüklərinin siyasi iradəsi idi. Eyni zamanda Şərqin ilk Cumhuriyyəti olan Azərbaycan Xalq Cumhuriyyəti yolunda canından keçən Osmanlı əsgərləri və Atatürk Cumhuriyyətinin qurulması üçün könüllü döyüşən Azərbaycan türkləri “Bir millət , iki dövlət” həqiqətinin real təzahürü idi. O zaman siyasi reallıqlar ideoloji qurtuluş arzusunu gerçəkləşdirməyə imkan vermədi. Bu gün isə dünyanın geopolitik diqtəsi daha sərt, bizim imkanlarımız isə daha genişdir. Artıq dünyaya “ Bir millət, iki dövlət ” yerinə “Türk birliyi!” ideasını həyata keçirmək zamanıdır. Bu Azərbaycanın siyasi qüvvələrinin və bütün Azərbaycan xalqının istəyidir.”

    Daha sonra çıxış edən millət vəkili Fazil Mustafa 15 sentyabr olayının tariximizdə müstəsna bir gün olduğunu və bu tarixin Türkiyə Azərbaycan qardaşlıq münasibətlərinin tarixi təsdiqi olduğunu bildirdi. Millət vəkili bu gün hər iki dövlətin tarixi ənənələrini davam etdirir.

    Tədbirə telefonla Türkiyədən İYİ partiya başqanı Meral Akşener də qatılaraq iştirakçıları salalamladı. Meral xanım Türkiyə və Azərbaycanın həm dövlət, həm də xalq olaraq hər zaman bir birinə dəstək olduğunu və bu birliyin bundan sonra dahada güclənəcəyinə inandığını bildirdi.

    Tədbirə telefonla həmçinin Türkiyədən MHP başqan yardımçısı Atilla Kaya və Türk Dünyası Qazeteçilər Federasiyonunun başqan yardımçısı Türer Yener də qatılaraq Türkiyə-Azərbaycan münasibətlərinin inkişafının zamanın tələbi olduğunu bildirdi.

    Azərbaycan Milli Elmlər Akademiyasının əməkdaşı, filosof  alim Yasəmən Qaraqoyunlu çıxışında  Türk dünyasının birləşməsi ideyasının nəzəri əsaslarının XX əsrin əvvəllərində ortaya çıxdığını, və bunun nəzəri əsaslarının hazırlandığını bidirdi: “Son yüz ildə Türk dünyasında yetişmiş fikir və siyasət adamları Türk birliyini iki model şəklində təsəvvür etmişlər. Bütün Türk xalqlarının vahid dövlət çatısı altında birləşməsi. Vahid Türk milləti və dövləti ideyasını dəstəkləyənlərin lideri Ənvər Paşa, Əli Bəy Hüseynzadə, Ə. Topçubaşov olmuşlar. Müstəqul türk dövlətlərinin konfederativ birliyi ideyasını isə M.Ə.Rəsulzadə, Atatürk dəstəkləmişlər. O zamandan bu zamana türk dünyası böyük yol keçmişdir və indiki reallığa uyğun olaraq Türk dünyasının birliyinin Avropa Birliyi modelinə uyğun qurulması daha çox dəstəklənməkdədir. Türk birliyi qurularsa Türk dünasını təhdid edən bir sıra dövlətlərə qarşı vahid təhlükəsizlik doktrini və politikası izlənə bilər. Hazırda türk dünyasına qarşı dörd təhdid vardır. Amerika və İzrailin Türkiyə ilə Suriya sərhədləri arasında tampon kürdüstan dövləti qurma projesi və bu bölgədə 150 minlik silahlı kürd dəstələrinin Türkiyəyə qarşı vuruşması. Bu bölgədə Kürdüstan yaratmaqda əsas məqsəd Türkiyə ilə Ərəb dünyasının quru əlaqələrini kəsmək və müsəlman dünyasını parçalamaqdır. Türkiyə burada 35 km lik təhlükəsizlik zolağı yaratsa belə ABD-İzrail blokunun Yeni dünya düzəni adl altında Türkiyəni bölmək siyasəti hələ də gündəmdədir. Düşünürəm ki, Türkiyə və Azərbaycan birləşmiş orduları həm də İraq və Suriyada yaşayan toplam beş milyon türk soydaşlarımızı qorumalıdır. İraq və Suriya türkmanlarına sahib durmalıyıq və o coğrafiyalarda siyasi statuslarının olmasına çalışmalıyıq. Suriya və İraq Türkmanları Türk dünyasını Ərəb dünyası ilə bağlayan strateji din və kültür körpüsüdür. Türkiyənin Ərəbistana uzantılarıdır.

    Erməni təhdidləri və işğalları. Qarabağın işğaldan azad olunması problemi. Türkiyə ilə Azərbaycan arasındakı tampon erməni dövləti Türkiyənin Azərbaycana, Azərbaycan araçılığı ilə Türküstana yayılmasının qarşısını almaq məqsədilə Rusiyanın yaratdığı bir projedir. Ermənistan Azərbaycan torpaqları üzərində qurulub və Türkiyənin Şərqi Anadolu bölgəsini də işğal edib Ermənistana qatmağı hədəf alıb. Türkiyə və Azərbaycanın erməni işğallarına qarşı vahid hərbi siyasi strateji doktrini olmalıdır. Türk dünyası erməni təhdidlərindən qurtulmalıdır”.

    Tədbirdə həmçinin Ədalət Partiyasından Sədr müavini Elxan Şükürlü, Vətəndaş İnkişaf Partiyasının sədri Əli Əliyev, Xalq Partiyasının sədri Pənah Hüseyn, Azad Demokratlar Partiyasının sədri Sülhəddin Əkbər, Klassik Xalq Cəbhəsi Partiyasının sədri Mirmahmud Mirəlioğlu, ADP sədri Sərdar Cəlaloğlu, DAK İdarə Heyətinin üzvü Adil Minbaşı, Ümid Partiyasının sədr müavini Rüfət Muradlı çıxış etmişdir. Çıxışlarda Azərbaycan-Türkiyə münasibətlərinin hərbi ittifaqa qədər yüksəlməsinin, Türk dövlətlərinin iqtisadsi-siyasi-hərbi birliyinə nail olunmasının vacibliyi vurğulanıb.

    Azərbaycan siyasətçilərindən Türk Birliyinə çağırış – BƏYANAT

    Vətəndaş Həmrəyliyi Partiyasının mərkəzi qərargahında 15 sentyabr Bakının işğaldan azad olunmasının 102-ci ildönümü münasibəti ilə siyasi partiyaların, ziyalıların iştirakı ilə keçirilən həmçinin Türkiyədən partiya liderlərinin telefonla qatıldığı tədbirdə iştirakçılar Türkiyə ilə Azərbaycanın vahid ordusunun qurulmasını, həmçinin Türkiyə və Azərbaycanın konfederativ birlikdə birləşməsini təklif etmişlər. Konfransın sonunda bəyanat qəbul olunmuşdur. Bəyanatda deyilir: 1918-ci il sentyabrın 15-də Bakının “Qafqaz” İslam Ordusu tərəfindən azad olunması, şübhəsiz ki, Azərbaycan-Türkiyə dostluğu və qardaşlığı zəminində müstəsna əhəmiyyət daşıyan böyük hadisədir. 70 illik sovet hakimiyyəti dönəmində bu hadisənin məqsədyönlü təhrifinə baxmayaraq, Azərbaycan xalqı türk əsgərinin həmin vaxtdakı qəhrəmanlığını bu illər ərazində heç vaxt unutmayıb, onu qəlbində yaşadıb.
    Bir əsr öncə Azərbaycan və Osmanlı türkləri dünya imperalizminin qarşısında çiyin-çiyinə duraraq, öz istiqlallarını qəbul etdirməyi bacardılar və bu, bizim xalqlarımızın birliyini bütün dünyaya göstərən önəmli hadisə oldu. Komandan Nuru Paşanın rəhbərliyi ilə “Qafqaz” Türk-İslam Ordusunun Bakını azad etməsinin illər ötdükcə Azərbaycanın müstəqillik tarixində nə qədər böyük rol oynadığı daha aydın dərk edilir. Əgər bu Ordu köməyəimizə gəlməsəydi, şühəsiz ki, bu gün paytaxt Bakı da Dərbənd kimi, bir rus şəhərinə çevrilər, Azərbaycan dövləti indiki sərhədləri daxilində mövcud ola bilməzdi. Bakıya gələn ordunun qəhrəmanlığı, tariximizdəki, bütövlüyümüzdəki rolu və Azərbaycanın bugünkü sərhədlər içərisində dövlət qurmasında oynadığı mühüm rol heç vaxt unudulmayacaqdır. 102 il əvvəl olduğu kimi, bu gün də oxşar çətinlik içərisindəyik: Azərbaycan dövlətinin beynəlxalq hüquqla tanınan əraziləri arxasında böyük güclərin durduğu Ermənistan tərəfindən işğal edilib və biz yenə də bu güclərin məkrli planlarına qarşı savaşda qardaş Türkiyə dövlətini yanımızda görürük; eyni şəkildə, 100 il öncə Osmanlı dövlətini bölüb parçalayan güclər bu gün başqa çətirlər, adlar altında Türkiyə Cümhuriyyətinin qalan ərazilərini də parçalamağa, hər vasitə ilə onun inkişafının qarşısını almağa çalışırlar və Azərbaycan xalqı da qardaş ölkəyə qarşı imperalist güclərin bu hücumları qarşısında Türkiyənin yanındadır. Həm ərazilərimizə göz dikmiş və inkişafımızı istəməyən ortaq düşmənlərimizin varlığı, bu düşmənlərin açıq təhdidləri, həm ölkələrimiz qarşısında duran hədəflər, milli mraqlarımızın eyniliyi, həm də yeni geosiyasi reallıqlar Azərbaycan-Türkiyə münasibətlərini daha yeni müstəviyə çıxarmağı bizdən tələb edir.
    Biz, bu bəyanatı imzalayan siyasi təşkilatlar və şəxslər mövcud reallıqlardan çıxış edərək, hər iki ölkə arasındakı münasibətlərin yeni və daha etibarlı müstəviyə çıxarılması üçün ən qısa zamanda aşağıdakı addımların atılmasını zəruri sayırıq:
    – Ermənistan tərəfindən Azərbaycan ərazilərinin işğalının və işğal olunmuş ərazilərimizdə terrorçu-separatçı bir rejimin fəaliyyət göstərməsinin təkcə Azərbaycan Respublikasının deyil, həm də Türkiyə Cümhuriyyətinin maraq və mənafelərinə real və açıq təhdid yaratdığını əsas götürərək, Azərbaycan Respublikası ilə Türkiyə Cümhuriyyəti arasında strateji hərbi müttəfiqlik Sazişi imzalanmalıdır;
    – Bu Saziş əsasında hər iki ölkənin ərzisində qarşılıqlı şəkildə hərbi bazaların yerləşdirilməsinə və hətta birgə, vahid komandanlığa tabe hərbi qüvvələrin yaradılmasına nail olunmalıdır;
    – Azərbaycan-Türkiyə hərbi ittifaqının digər Türk cumhuriyyətlərinin də birliyinə təkan verməsi və genişləndirilməsi üçün digər Türk respublikalarıyla danışıqlar intensivləşdirilməli və son nəticədə, Avropa Birliyinin modelinə uyğun Türk Birliyinin yaradılmasına nail olunmalıdır;
    – Bu hərbi, siyasi, iqtisadi və mədəni Birliyin yaradılmasının zəruruliyini ölkələrə çatdırmaq üçün Türkiyə, Azərbaycan və digər Türk cumhuriyyətlərinin siyasi təşkilatları, mətbuatı, fikir adamları arasında qarşılıqlı sabit əlaqələrin və ictimai rəyi hazırlama mexanizmlərinin qurulması və gücləndirilməsinə çalışılmalıdır.

     

     

  • Sabir Rüstəmxanlıdan Tofiq Yaqubluya dəstək: “Məhkəmənin hökmü ədalətsizdir!”

    Siyasi fəal, Qarabağ qazisi Tofiq Yaqublunun həbsi cəmiyyətdə ciddi etirazlara səbəb olub. Ölkənin bir çox tanınmış ziyalısı, siyasi liderlər məsələyə münasibət bildirərək Tofiq Yaqublunun azadlığını istəyiblər.
    VHP sədri, Millət vəkili Sabir Rüstəmxanlı açıqlamasında bildirib ki, Azərbaycanın azadlığı yolunda mübarizə aparan, Qarabağ uğurunda vuruşan, vətəni qoruyan hər kəsə diqqət və həssaslıqla yanaşılmalıdır. Tofiq Yaqubluya sərt cəza verilməsi təəssüf doğurur: “Tofiq bəyin keçdiyi həyat yolu, mübarizəsi, dövlətə və vətənə bağlılığı onun haqda hökm çıxararkən nəzərə alınmalıydı. Belə xırda bir insidentə görə Tofiq bəy kimi insanı bir neçə il azadlıqdan məhrum etmək ədalətsiz hökmdür”.
    Deputat eyni zamanda hökmdən sonra baş verənlərdən təəssüf hissi keçirdiyini bildirib: “Artıq neçə gündür ki, Tofiq aclıq edir. Qarabağ döyüşlərində sağlamlığını itirən bir insan bu gün ölüm aclığı keçirir və səhhəti ciddi şəkildə pisləşib. Əlbəttə, üzücü bir haldır. İşin bu yerə gəlib çatmasına imkan verilməməliydi…İnanıram ki, ictimai rəy nəzərə alınacaq və Tofiq bəy azadlığa buraxılacaqdır…”
    Sabir Rüstəmxanlı eyni zamanda məhkəmə hökmləri zamanı qanunun yumşaq üzünün unudulmamasının da vacibliyini bildirib: “Bəzən xırda bir olaya görə elə sərt cəzalar kəsilir ki… Axı hər cəzanın arxasında bir insan taleyi dayanır. Bu məqamlar nəzərə alınmalıdır. Həbsxanaları niyə doldururuq? Dünyada qəbul olunan qaydalar var. Bir çox əməllərin cəzası cərimə ola, maddi tərəfdən qarşılığı ödənilə bilər”.

  • Sabir Rüstəmxanlı Baş Nazirə müraciət etdi: “Güneyli tələbələrə dəstək tarixi borcumuzdur”

    Vətəndaş Həmrəyliyi Partiyasının sədri, millət vəkili Sabir Rüstəmxanlı Güney Azərbaycandan olan tələbələrin problemlərinin həlli ilə bağlı Azərbaycan Respublikasının Baş Naziri Əli Əsədova müraciət edib. Müraciətdə millət vəkili Güney Azərbaycandan olan tələbələrin Azərbaycan Respublikasında ali təhsil almasının əhəmiyyətinə diqqət ayıraraq Dünya azərbaycanlılarının ortaq mədəniyyəti ilə bağlı təhsilin yalnız Azərbaycan Respublakasında mövcudluğunu bildirib: “Güney Azərbaycandan olan gənclərimiz ali təhsil almaq üçün Azərbaycana üz tutur. Onların Azərbaycan univetsitetlərində təhsil alması sadəcə öyrənmək məqsədi daşımır, həm də mədəniyyətimizi qorumaq üçündür. Nəzərə alsaq ki, Güney Azərbaycanlılar yaşadıqları ölkədə öz dil, musiqi, tarix və ədəbiyyatları haqqında akademik təhsil ala bilmirlər, buna imkanları yoxdur, bu məsələnin necə həyati əhəmiyyət kəsb etdiyi daha da aydın olur”.

    Sabir Rüstəmxanlı Baş Nazirə müraciətində Güneydən olan tələbə soydaşlarımızın problemlərini göstərərək Azərbaycan Respublikasının Güney Azərbaycanlı tələbələr üçün ali təhsil şərtlərinə güzəşt edilməsinin vacibliyini bildirib: “Son illərdə Azərbaycan universitetlərində təhsil alan Güney Azərbaycanlı tələbələrin bir çoxu təhsillərini yarımçıq qoyaraq geri dönürlər. Bunun da əsas səbəbi İranda iqtisadi vəziyyətin pisləşməsi və İran valyutasının dəyərdən düşməsi nəticısində təhsil haqlarını ödəyə bilməmələridir. Azərbaycan Respubkilasında təhsil alan güneyli tələbələrin problemlərinə dövlət səviyyəsində diqqət göstərilməli və onlar təhsil haqlarından azad edilməlidirlər. Bu xalqımızın gələcəyi ilə bağlıə çox böyük milli məsələdir və bu işə dövlətimizin dəstəyi bizim tarixi borcumuzdur”.

  • VHP-dən hakimiyyətə çağırış: “Milli həmrəylik üçün siyasi məhbus problemini birdəfəlik həll edilməlidir”

    Azərbaycanın içində olduğu hərbi münaqışə ilə bağlı son yaşananlar bir daha göstərdi ki, dövlət olaraq milli birlikdən başqa uğur yolumuz yoxdur. Buna görə ölkə vətəndaşlarına münasibətdə heç bir fərqə, siyasi ayrı-seçkiliyə yol verməmək, qarşıda duran milli hədəflərə nail olanadək bütün intiriqaları bir kənara qoymaq dövlət müstəqilliyimizin uğur və qurtuluşunun əsas şərtlərindəndir….

    Vətəndaş Həmrəyliyi Partiyası olaraq özünü “söyüş müxalifəti” kimi tanıdan qüvvələri qətiyyətlə pisləməklə yanaşı, qondarma ittihamlara məruz qalan müxalifət təmsilçilərinin həbsini də həmişə qınamışıq. Qarabağ qazisi, ömrünün böyük bir hissəsini Azərbaycanın müdafiəsi və ərazı bütövlüyü işinə həsr edən Tofiq Yaqublunun həbsi bu məsələdə əsəblri bir daha tarıma çəkdi, iştimİyyətin narazılığına səbəb oldu. Ümumiyyətlə, insanlara qarşı cəza vasitəsi kimi ancaq həbs qəti imkan tədbirinin seçilməsi düzgün deyil. Xüsusi hallar nəzərə alınıb qanunun imkan verdiyi diğər qərarlar çıxarmaq olar. Bu həm dövlətin humanizminin göstəricisi, həm də siyasi münasibətlərin mülayimləşməsi üçün vacibdiir.
    Hakimiyyətin cəmiyyətlə, demokratik təşkilatlarla, siyasi partiyalarla və beynəlxalq təşkilatlarla dialoq yoluna üstünlük verdiyi indiki şəraitdə hər şeydən öncə ölkədə milli həmrəyliyə nail olmaq üçün bütün vasitələrdən istifadə edilməli, o cümlədən siyasi məhbus məsələsinə aydınlıq gətirilməli və son qoymalıdır. Ölkə rəhbərliyi tərəfindən son illərdə ardıcıl olaraq əfv fərmanları verilir, amnistiyalar təqdir olunur. Amma bütün bunlar sözü gedən problemi bütövlüklə həll etməyib. Vətəndaş Həmrəyliyi Partiyası hakimiyyəti bütün daxili və xarici siyasi şərtləri nəzərə alaraq milli həmrəyliyin əngəllənməsinə səbəb olan siyasi məhbus problemini birdəfəlik həll etməyə çağırır.

  • VHP-dən təhsil tələbi: dərslər açılsın

    Vətəndaş Həmrəyliyi Partiyasının dərslərin başlanması ilə bağlı bəyanatı.

    Sənəddə deyilir: “Pandemiya tələblərindən irəli gələn şərtlər cəmiyyətin bir çox sahələrində ciddi itkilər və geriləmə yaşatdı. Azərbaycan hökumətinin gördüyü tədbirlər əlbəttə ki, təqdirəlayiqdir. Amma Bu sırada təhsil sistemi xüsusilə diqqət çəkir. Məlum olduğu kimi mart ayının 3-dən Azərbaycanda dərslər dayandırılıb müvafiq qurumların son açıqlamalarında da ümidverici məqamlar yoxdur. Son qərara əsasən məktəbəqədər və icma əsaslı məktəblərin fəaliyyəti oktyabrın 1-də başlanacaq və bu səviyyə üzrə dərslərin həftədə 2 gün keçiriləcək. Sentyabrın 15-dən isə ibtidai siniflər dərsə başlayacaq və I sinif şagirdlərinin həftədə 3, digər sinif şagirdlərinin isə aktiv xəstələrin sayı çox olarsa, 2 dəfə gəlməsi qərarlaşılıb. V-IX siniflərdə isə sentyabrın 15-dən dərslər onlayn qaydada başlayacaq və 1 oktyabr tarixindən V-IX siniflərin məktəbə əyani şəkildə gəlməsi planlaşdırılır.
    Əlbəttə pandemiya təhlükəsi və bundan insanların qorunması vacibdir. Amma bütün dünyada tüğyan edən COVİD-19 yoluxmasının şərtləri altında cəmiyyətin mühüm sahələrinin fəaliyyətini tam bərpa edilməsinin yolları da mütləq tapılmalıdır. Əksər ölkələr bu istiqamətdə ciddi nəticələr əldə edeiblər və bu səbəbdən ənənəvi təhsilin davam etdirilməsinə başlanıb. Azərbaycanın bu prosesdən kənarda qalması təəssüf doğurur.
    Əslində Təhsil Nazirliyinin və Operativ Qərargahın təhsillə bağlı son qərarı subyektiv ümumiləşmə əsasında verilib. Bu il ibtidai siniflərdə təhsil alan 650 min uşaq dərsə gedəcək. Bu qrupun 257 min nəfəri epidemioloji vəziyyət gərgin olduğu Bakı, Sumqayıt və Abşeron ərazisinə düşür. Yəni ibtidai sinif şagirdlərinin yarıdan çoxu ümumiyyətlə karantin elan olunmayan bölgədə yaşayır. Ölkədə ümumilikdə fəaliyyət göstərən 4439 məktəbdən cəmi 182-də 1500 və ya daha çox şagird təhsil alır, digər məktəblərdə şagird sayları əsasən aşağıdır. Ümumiyyətlə, 53 faiz və yaxud 2335 məktəbdə şagird sayı 200 nəfərdən azdır. Digər 47 faiz və ya 2104 məktəbdə isə şagird sayı 200 nəfərdən çoxdur. Yəni ümumilikdə şagird sıxlığı ilə bağlı ölkə səviyyəsində elə də ciddi problem mövcud deyil. Ölkə üzrə cəmi 338 sinifdə şagird sayı 40-dan yuxarıdır ki, bu siniflərdə şagirdlərin 2-yə və ya 3-ə bölünməsini etmək olardı. Şagird sayının 30 nəfərdən az olduğu siniflər təxminən 93,3 faiz təşkil edir. Hətta bəzi kənd məktəbləri var ki, şagird sayı 100-ü keçmir. Yəni, ümumilikdə şagird sıxlığı bir çox siniflərdə problem deyil. Belə bir statistika qarşısında bütün ölkə boyunca təhsilin məhdudlaşdırılması yalnız bacarıqsızlığın göstəricisidir. Alternativ olaraq distant təhsilin təklif edilməsi isə ikinci qeyri-peşəkarlıq əlamətidir. Düzdür, distant təhsil çox məşhurlaşıb, faydalıdır, müasir təhsil sisteminə keçiddə böyük rol oynayır. Amma bu, ənənəvi təhsilin yerini vermir. Şagirdlərin məktəb və müəllimlərlə ünsiyyətdə olmamasının onların formalaşmasında mənfi iz buraxacağı şübhəsizdir. Digər bir tərəfdən şagird sayının az olduğu, karantin elan olunmayan bölgələrdə internet və televiziya imkanlarının məhdudluğu etiraf olunmalıdır. Bütün bunlar təhsil və məktəblərin açılması ilə bağlı qərara yenidən baxılmasını zəruri edir. Sonu görünməyən pandemiyanın qarşısında acizlik göstərib yeni şəraitdə əvvəlki həyat tərzinin qurulması üçün addımlar atılmasa bunun nəticələri ağır olacaq. Bir sıra dövlətlərdə universitet və orta məktəblər yenilənir, onların hamısı müəyyən hədlərlə fəaliyyət göstərir. Şagird və tələbələr bir-birindən şəffaf şüşələrlə ayrılırlar ki, təmasda olmasınlar. İndiki şəraitdə qısa müddətdə bu mühiti yaradaraq dərslərin bərpasına nail olmaq olar.
    Vətəndaş Həmrəyliyi Partiyası Təhsil Nazirliyini və Operativ Qərargahı təhsilin önəmini əsas tutaraq ənənəvi əyani təhsil sistemini bərpa etmək üçün gərəkən tədbirləri görməyə çağırır”.

  • Zamanın və milli taleyin tələbi – Sabir Rüstəmxanlının yazısı

    Sabir Rüstəmxanlı

    Vətəndaş Həmrəyliyi Partiyasının sədri, Millət Vəkili

    Avropa Birliyinin qarşısında Türk Birliyinin yaranması ehtimalının yalnız xəyal olmadığı indi çoxlarına bəllidir

    1987-ci ildə Türkiyəyə ilk səfərimdə “Türkiyə” qəzetində dərc olunmuş bir yazımın başlığı belə idi: “Türkiyə üzünü Doğuya çevirməlidir”. Bu fikir Türkiyənin Avropa Birliyinə girməyə çox ümidli olduğu və bunu yeganə inkişaf yolu saydığı vaxtda səslənsə və “Türkiyə” qəzetinin müxbirinə manjetə çıxarılmalı olan yeni bir ifadə kimi görünsə də əslində, Azərbaycan ziyaıları üçün yeni istək deyildi. Türkiyə-Azərbaycan münasibətlərinin yaxşılaşması əsrlər boyu ağlı kəsən hər bir türk insanını düşündürmüş və bunu Azərbaycanın ərazi bütövlüyünün, mənəvi dəyərlərinin, milli varlığının qorunma yollarından biri saymışlar. Hətta böyük Mirzə Fətəli Axundzadə  də Azərbaycanda əlifba islahatını Türkiyə ilə və bütün türk xalqları ilə paralel aparmaq istəyirdi. O dövrdən başlayaraq Azərbaycanın demək olar ki, bütün böyük aydınları mətbuatımızın, ədəbiyyatımızın, ədəbi dilimizin elə bir yolla inkişafını arzulamışlar ki, bu yol aradakı sərhədlərə və müxtəlif siyasi quruluşlara baxmayaraq kök etibarı ilə bir olan Azərbaycan və Türkiyə türklərinin daha da yaxınlaşmasına gətirib çıxarsın. Əlibəy Hüseynzadənin də, Məhəmməd Hadidin də, Əhməd Ağaoğlunun da, Hüseyn Cavidin də ədəbi, ictimai, siyasi fəaliyyəti buna xidmət edirdi. Azərbaycan Xalq Cümhuriyyətinin qurulub möhkəmləməsində Türk-İslam ordusunun xidməti də ayrıca qeyd olunmalıdır.

    İllərin Turan sevdası

    Bizim nəsil bu ənənənin yavaş-yavaş bərpa olunan xatirələri üstündə böyüyüb. Üstəlik ikinci və üçüncü minilliklərin qovşağında dünyada gedən proseslər, böyük güclərin, böyük iddiaların dünyanı yenidən bölüşdürmək cəhdləri, müasir görünsə də mahiyyəti köhnə olan, dəbdəbəli başlıqlar altında çürük işğalçı meylləri hər kəsi öz gələcəyi haqqında dərindən düşünməyə məcbur edir. Bütün bunlar Azərbaycan ziyalılarının sonu olmayan qayğısıdır. Çünki son iki tüz ildə dünyanın heç bir xalqı bizim yaşadığımız faciələrə bənzər faciə yaşamayıb; parçalanmalar, köçürülmələr, soyqırımları, inkarçılıq siyasəti, milli varlığın danılması, adının və tarxinin saxtalaşdırılması qədər sayı-hesabı olmayan qansız müharibələr görməyib. Paralel olaraq həmin güclər əsrlər boyu Osmanlı imperatorluğunu, sonra da Türkiyə Cümhuriyyətini çökdürüb məhv etməyə çalşıblar. “Türk düşmənçiliyi” adlandırıla bilən məkrli siyasət bu gün də şəbəkələşmiş bir şəkildə davam etdirilir. Azərbaycanın və Türkiyənin gələcəyini düşünərkən bütün bunlar nəzərə alınmalıdır. Hələ min il əvvəl fars şairi Firdovsi özündən 1500 il öncə bizim yaşadığımız bölgədə uzun müddət davam etmiş İran-Turan savaşlarını qələmə almışdır. Bu gün İran Farsistan-Persiya anlayışının qarşılığı kimi səsləndirilən bir dövlətdir, Turan sözü dilə gətirilərkən isə yer yerindən oynayır ki, bu panturanizmdir, zərərlidir, millətçiliklikdir. Üç min ilə yaxın davam edən İran-Turan qarşıdurması İranda bu gün də açıq-aşkar türkləri yox etmək, əritmək siyasəti şəklində davam etdirilir. Şimal qonşularımızın son üç yüz il ərzində apardıqları antitürk siyasəti də bundan çox fərqlənmir. Azərbaycanın çağdaş durumu belədir.  Qərbin dəbdəbəli maskalar altında yürütdüyü Səlib müharibəsini də bura əlavə edəndə türk varlığının necə ağır bir şəraitdə yaşadığını görmək çətin deyil. Ona görə də bu gün Azərbaycanda ictimai fikrin mərkəzində dayanan Türkiyə-Azərbaycan münasibətləri, iki qardaş dövlət arasında hərbi ittifaqın möhkəmləndirilməsi, Azərbaycanda Türkiyənin hərbi bazasının yerləşdirilməsi məsələsinə yalnız Azərbaycan və Türkiyənin taleyüklü problemi kimi yox, həm də Türtk dünyasının gələcəyini müəyyənləşdirən bir şərt kimi baxılmalıdır.

    22 il öncə-1998-ci ilin 27 mayında  “Vətəndaş Həmrəyliyi” qəzetində  yazmışdım: “Qafqaz və Kiçik Asiya dünyanın əsəb nöqtələrindən, bütün yolların və damarların keçdiyi yerlərdəndir. Ən qədim sivilizasıyaların və dövlətlərin yüksək ideyaların doğulduğu bu bölgə həm də uzun münaqişələrin və toqquşmaların şahidi omuşdur. İran-Yunan, İran-Turan, Ərəb-Əcəm, Türk-Rum, Şərq-Qərb, müsəlman-xristian qarşıdurmaları yüzilləri, bəzən minilləri aşıb keçən fırtınaları ilə bu bölgəni tarix boyu çalxalandırmış, altını üstünə çevirmiş, təkcə sərkərədləri və hökmdarları yox, bütöv xalqları qaldırıb endirmiş, bəzilərini böyütmüş, bəzilərini yerli-dibli yox etmiş, özünü ölməz sayanların külünü göyə sovurmuş, Allahlıq ideyası olanların heç qəbrini də saxlamamışdır. Türklər bu bölgənin qüdrətli xalqı olmaqla həmin tarixin həm yaradıcılarından, həm də ən çox qurban verənlərindəndir. … Onlar Avrasiyanın taleyində həmişə həlledici rol oynamışlar. Azərbaycan türklərin ən qədim yurdlarından olmaqla həm də Türk dünyasının mərkəz məkanıdır. Orta Asiya ilə kiçik Asiyanın arasındadır, körpüdür, bağdır. … Avropa Birliyinin qarşısında Türk Birliyinin yaranması ehtimalının yalnız xəyal olmadığı indi çoxlarına bəllidir”.

    Biz bütövlükdə Türk dünyasanın belə bir birliyinin yaranması uğrunda uzun illərdir mübarizə aparırıq. Lakin indi bu ideya artıq bütün xalqın istəyinə və tarixin, milli taleyin tələbin,ə ölüm-dirim məsələsi olan çevrilib.

     Böyük bir coğrafi arealda aparılılan imperalist siyasətin əsas qurbanı Türk millətidir!

    XXI əsr dünyaya yeni qaydalar gətirdi. Bu yalnız pandemiya və onun nəticələri ilə bağlı deyil. Əslində 2001-ci ilin 11 sentyabrında  baş verən məlum olaylar dünyada yeni siyasi düzənin qurulmasına başlanğıc oldu. Böyük güclər geopolitik maraqlarını təmin etmək üçün açıq ən müxtəlif bəhanələrlə yeni işğalçılıq siyasətinə başladı. 20 ilə yaxındır davam edən bu gedişat Asiya qitəsini müharibə meydanına çevirib. Dünya yenidən bölüşdürülür, dünyanın siyası xəritəsi yenidən çızılır. 100 il öncə də eyni proses Azərbaycan və bütövlükdə Türk Dünyasının böyük itkiləri ilə başa çatdı. Azərbaycan dövlət müstəqilliyini və tarixi ərazilərinin böyük hissəsini itirdi, Türkiyə Osmanlı imperatorluğunun məğlub durumu ilə barışmağa məcbur oldu, Orta Asiya türkləri bütövlükdə Rusiya əsarəti altına düşdü.  Bu ağır nəticələrin bir hissəsini yalnız 100 il sonra aradan qaldırmaq  mümkün oldu. İndi keçmişdən dərs götürmək, yeni səhvlərə yol verməmək üçün daha düzgün inkişaf yolu seçmək lazımdır.

    Bu gün dünya böyük güclər-ABŞ, Avropa Birliyi, Rusiya, Çin tərəfindən bölüşdürülməkdə və istismar olunmaqdadır. Yeni planların qurulduğu, müharibələrlə maraqların təmin olunduğu bütün qaynar nöqtələrdə yenə də əzilən daha çox Türk millətidir. Türkiyə “arxalı köpək” qismində terror təhdidi, qondarma soyqırım ittihamı ilə üz-üzə, Azərbaycan erməni işğalçılarının hərbi təcavüzünə məruz qalmış durumda, Güney Azərbaycanda milyonlarla soydaşımız ana dili haqqından belə məhrum edilmiş, İraq və Suriyada türkman eli məhv edilir, Çində uyğurlara qarşı açıq genosid aparılır, Orta Asiya  türk cumhuriyyətləri ruslaşdırma siyasətinin basqısı altında… Bir sözlə, Anadoludan Uzaq Şərqə, Qara Dənizdən Sakit Okeanadək böyük bir coğrafi arealda aparılılan imperalist siyasətin əsas qurbanı Türk millətidir!

    Tarixin orta çağında eyni coğrafi ərazidə Türklərin şəriksiz hakimiyyəti zamanı digər millətlərin haqlarının qorunması, dini-mədəni məqamlara toxunulmaması reallıqdır. Dünyaya xalqlar, millətlər, insanlar arasında nizam, harmoniya yaratmaq üçün gəldiklərinə həmişə ürəkdən inanan türklər dünyanı öz iradələrinə tabe etməyə çalışmaqdan daha çox, zamanm sosial-siyasi xarakterini müəyyənləşdirməyə, qlobal proseslərin arxasınca deyil, önündə getməyə cəhd etmişlər. Türklər əsrlər, hətta min illər boyu dünyanm müxtəlif xalqları ilə sülh şəraitində yaşamış, qurduqlan nəhəng imperiyalarda bütün millətlərə yer vermiş, dünyanın vaxtaşırı pozulan harmoniyasını bərpa etmək üçün böyük ideologiyalar yaratmışlar. Onlar heç bir xalqın tarixi ilə müqayisəyə gəlməyən möhtəşəm tarixlərində dünya mədəniyyətinə heç bir xalqda müşahidə olunmayan bir səviyyədə maraq göstərmişlər. Bunu bilən imperalist güclər öz maraqlarını təmin etmək üçün qitədə ilk növbədə Türk  nüfuzunu hədəf alıblar. Yalnız Türklərin bölgədə sıradan çıxarılması məlum planlara yol aça bilər və bu gün qitənin qədim xalqları olan ərəblərin, farsların, hindlilərin istismarına yol aça bilər. Buna görə də ən böyük zərbə hədəfi yenə də Türklər.   Çıxış yolu haqda geniş müzakirə açmağa, təhlillər aparmağa gərək yox. “Güc birlikdədir” hikməti indiki hal üçün daha kəsərli və aktualdır.

     Bu birliyi  gerçəkləşdirməmək ən azından tarixi cinayətdir

    Dəyişən dünya dəyişik problеmlərlə qarşı-qarşıya olduğu kimi Türk dünyası da bu baxımdan problеmlər girdabındadır. Türk dünyasının bu gün ən böyük siyasi gücü olan Türkiyə Cumhuriyyəti  onun bir əyalətinin iqtisadi potensialında olmayan Ermənistanın qondarma iddiaları qarşısında aciz durumda, Azərbaycan ərazisinin 20 faizini həmin Ermənistana uduzmuş halda , digər Türk Cumhuriyyətləri dünyanın siyasi xəritəsində nöqtə kimi belə görünməyən Ermənistanın lobbi və siyasi himayədarlarının təsiri altında… Ən böyük güvəncimiz olan Türkiyənin qarşısına “qondarma erməni soyqırımı” arqumenti qoydular, Azərbaycan Milli Azadlıq Hərəkatı  demokratiya yolunu tutdu , əvəzində özünü demokrat adlandıran Avropa XX əsrin insanlıq utancı olan Xocalı soyqırımına göz yumaraq Azərbaycana başqa dərslər keçmək iddiasına qalxdı, Orta Asiya Cumhuriyyətləri isə rus, fars, çin, ingilis ideologiyalarının müharibə meydanına çevrilib böyük bir coğrafiyada yaşayan bir millətin bir vahid siyasi gücə sahib olması indi daha zəruri və qaçılmazdır. 1600 il öncə Roma Papasının diz çökməsi ilə onu və imperiyasını əvf edən Atillanın, başı Əmir Teymura qarışdırılaraq  Avropadan geri dönən Bəyazidin, rus imperiyasının hiyləsinə aldanan Rəsulzadənin və nəhayət, “bir gün sovetlər dağılacaq və bizim orda yaşayan soydaşlarımız müstəqil dövlət quracaq , biz o günə hazır olmalıyıq” deyən Atatürkün davamçıları olaraq üzərimizə düşən missiyanı gələcək nəslə ötürmədən gerçəkləşdirməliyik. Bunun üçün isə ilk atılacaq addım Azərbaycan və Türkiyənin  siyasi, iqtisadi və hərbi birliyidir. Belə bir ittifaq Asiya qitəsində barışın qarantı olan Turan və ya Türk birliyinin əsası olacaq. Söhbət dövlətlərin öz müstəqilliyini itirməsindən , yaxud himayə altına düşməsindən getmir.  Dəfələrlə demişik, heç bir milli , dini və tarixi birliyi olmayan, yaxın yüzillikdə  bir-birinə qarşı müharibələr aparan Avropa dövlətləri bu gün bir birlik altında birləşə biliblər. Hətta heç bir tarixi ideoloji əsası olmayan bayraq və pul vahidi yaradılıb, bir dil hamıya zorən qəbul elətdirilib. Sözügedən Türk siyasi ittifaqı üçün Avropa Birliyi, hərbi əməkdaşlığı üçün NATO formatı var. Asiya qitəsinin böyük bir hissəsində ata yurdu olaraq Türklərin ay-ulduz ortaq bayraq simvolu, ortaq dövlətçilik ənənəsi, ortaq dili varkən bu birliyi  gerçəkləşdirməmək ən azından tarixi cinayətdir.

    Türkdilli dövlətlərin qarşılıqlı inteqrasiyası üçün ilkin olaraq mədəni birlik yaradıldı. 1990-cı illərin əvvəlində yaradılan TÜRKSOY türk xalqlarının mədəni birliyini müdafiə edən və onun inkişafını təmin edən təşkilatdır. Onun ardınca isə  Türkdilli Ölkələrin Parlament Assambleyası (TÜRKPA) yaradıldı. Bütün bu prosesin sürətlənməsi üçün isə Türkiyə-Azərbaycan əlaqələrinin siyasi-iqtisadi-hərbi konfederasiyaya çevrilməsi vacibdir. Bu gün həm Azərbaycanın, həm də Türkiyənin geopolitik durumu, bölgədə gedən proseslər də əslində bunu diktə edir. Eyni zamanda həm Türkiyə, həm də Azərbaycan ictimaiyyəti belə bir ittifaqa psixoloji baxımdan hazırdır. Hər iki qardaş ölkə referendumla xalqın dəstəyini alıb gərəkən hüquqi işləmləri həyata keçirib arzulanan ittifaqı gerçəkləşdirməlidir.

    Son olaylar dünya siyasətində yalqız, təkbaşına yürüməyin mümkünsüzlüyünü göstərir. Ermənistanla  müharibə şəraitində olan Azərbaycan Tovuz rayonunda baş vermiş hərbi təxribatda gerçəkliyi bir daha görmüş oldu. İşğalçı Ermənistanı Sloveniya belə silahla təhciz edir, bu silahlar Gürcüstandan keçirilir, Rusiya təcavüzkara açıqdan açığa hərbi-siyasi dəstək verir və s. Bütün baş verənlərin fonunda Azərbaycan Türk əsgərinin bölgəyə gəlişindən başqa bir dayaq görmədi. Eynən 100 il öncə olduğu kimi yenə də Azərbaycan istiqlalının yanında Türkiyə var. O zaman da ən azı Azərbayca və Türkiyənin bir dövlət  halında olması fikirləri səslənirdi. Həm Azərbaycanın Cumhuriyyət, indiki Türkiyənin isə Osmanlı adı altında imperiya quruluşunda olması, həm də geopolitik siyasi şərtlər bunu mümkünsüz etmişdi.  Amma dünyanın siyasi güclərinin başında duran böyük qüvvələrə qarşı  “İnsanlara hürriyyət, millətlərə istiqlal” , “yurdda sülh, cahanda sülh”  amalı ilə çıxan və “dildə, işdə və fikirdə birlik”  deyən insanlar böyük hədəfə doğru yürüşü davam etdirdilər. Nuru paşanın Azərbaycandan başqa Güney Azərbaycanda da savaşı , hətta Sovet əsarəti altında belə , sadə Azərbaycan insanının bütün maddi imkanlarını Atatürk Cumhuriyyətinə fəda etməsi o dövrün böyüklərinin siyasi iradəsi idi. Eyni zamanda Şərqin ilk Cumhuriyyəti olan Azərbaycan Xalq Cumhuriyyəti yolunda  canından keçən Osmanlı əsgərləri və Atatürk Cumhuriyyətinin qurulması üçün könüllü döyüşən Azərbaycan türkləri “Bir millət , iki dövlət” həqiqətinin real təzahürü idi.  O zaman siyasi reallıqlar ideoloji qurtuluş arzusunu gerçəkləşdirməyə imkan vermədi. Bu gün isə  dünyanın geopolitik diqtəsi daha sərt, bizim imkanlarımız isə daha genişdir. Artıq dünyaya “ Bir millət, iki dövlət ” yerinə “Türk birliyi!” ideasını həyata keçirmək zamanıdır. Bu Azərbaycanın siyasi qüvvələrinin və bütün Azərbaycan xalqının istəyidir.

     

  • “Tariximizdən bixəbər mütəxəssis milli dövlətçiliyimizə xidmət edə bilməz”

    Ali təhsil müəssisələrində “Azərbaycan tarixi” fənninin saatının azaldılması tarixçi alimlərin etirazına səbəb olub. Belə ki, bir qrup tarixçisi Təhsil Nazirliyinə müraciət ünvanlayaraq bu qurumun ali məktəblərdə “Azərbaycan tarixi” dərslərinin ixtisar edilməsinə yönəlmiş siyasətini yenidən nəzərdən keçirməsini tələb edib.
    Dominant.az-a məsələylə bağlı danışan Vətəndaş Həmrəyliyi Partiyası (VHP) Mərkəzi İcra Aparatının rəhbəri Samir Əsədli deyib ki, ali məktəblərin tədris proqramında Azərbaycan tarixinə münasibət təəssüf doğurur: “Azərbaycan tarixinin sovet dönəmindən qalan problemləri, yanlış yanaşmalar, düzgün olmayan qarşıdurmalar tam aradan qalxmadan ali təhsil müəssisələrində “Azərbaycan tarixi” fənninin tədrisinin azaldılması başqa bir problem yaradır. Unutmayaq ki, istənilən sahə üzrə yetişdirilən mütəxəssis, ilk növbədə, bu millətə bağlılığı ilə faydalı ola bilər. Spartakı sevib Babəki bilməyən, Eynşteyndən danışıb Tusini tanımayan, Bethoveni dinləyib Üzeyir bəyi duymayan ən mükəmməl mütəxəssis belə, milli dövlətçiliyə xidmət edə bilməz”.
    “Ali məktəblərdə “Azərbaycan tarixi”nin “Müasir Azərbaycan dövlətçiliyi tarixi” kursu ilə əvəz edilməsi xüsusilə yanlışdır. Bu, təhsilin siyasiləşdirilməsi, kadrların milliləşdirilməsindən daha çox qrup siyasi maraqları yönündə yetişdirilməsini göstərir”, – deyə S.Əsədli vurğulayıb.
    Qeyd edək ki, 2020-2021-ci illər üçün tədris planında “Azərbaycan tarixi” fənninin dərs saatlarının Tarix fakültələrində 315 saatdan 210 saata, qeyri-tarix fakültələrində 120 saatdan 60 saata qədər azaldılması nəzərdə tutulur.

  • Samir Əsədli: “Əslində Azərbaycan torpaqlarının işğal faktının arxasındakı real güc elə Rusiyadır”

    Rusiyanın Ermənistanı silahlandırması barədə üzə çıxan son faktlar Azərbaycan tərəfdə hiddət doğurub. Şimal qonşumuzun ölkəmizə qarşı növbəti xəyanətinə ən sərt təpkilər gəlməkdə davam edir. Amma ölkə müxalifətinin bu məsələ ilə bağlı hələ ki, bir bəyanatına belə rast gəlməmişik.

    Samir Əsədli: “Son məlumatlar siyasi şok sayıla bilməz”

    VHP İcra Aparatının rəhbəri Samir Əsədli: “Rusiyanın Ermənistana silah göndərməsi haqda son məlumatlar siyasi şok sayıla bilməz. Kremlin mövqeyi bəllidir və Qarabağ münaqişəsi başlayandan Rusiya işğalçını açıq şəkildə müdafiə edib. Əslində Azərbaycan torpaqlarının işğal faktının arxasındakı real güc elə Rusiyadır. Ermənistan nə hərbi, nə də siyasi baxımdan bu işğalı gerçəkləşdirmək gücündə deyil. Ortada Rusiyanın imperialist siyasəti var və postsovet məkanında Gürcüstan, Ukrayna, Moldova timsalında da bu görünür. Qarabağ da Abxaziya, Krım, Dnestryanı ərazi kimi Rusiya təcavüzünün örnəyidir. Azərbaycan cəmiyyəti iqtidar və müxalifət olaraq bu məqamı açıq ifadə etməlidir. Eyni zamanda bu həqiqəti də dünyaya çatdırmalıyıq”.

    Fuad Əliyev: “Rusiyanın işğalçı ölkəyə silah göndərməsi…”

    ALDP rəhbəri Fuad Əliyev: “Rusiyanın Ermənistana silah göndərməsi həm KTMT üzvü olduğuna, həm də ikitərəfli müqaviləyə əsasən verilir. Nə hakimiyyətin, nə də müxalifətin buna qarşı bir bəyanatı bu günə qədər qarşıma çıxmayıb. Bunu deyəndə deyirlər ki, Rusiya Azərbaycana da silah satır. Necə ki, Serbiya Ermənistana silah satandan sonra bu ölkənin nümayəndələri belə bir bəyanat verdilər ki, biz sizə də silah satırıq. Amma beynəlxalq hüquqa görə, hərbi münaqişə olan ölkələrə rəsmi silah satışı qadağandır”.

    Cavanşir ABBASLI,
    “Yeni Müsavat”

  • “Belə islahat, idarəçilik olmaz” – Sabir Rüstəmxanlıdan etiraz

    “Azərbaycanın bölgələrində islahat adı altında gedən və xalqa məntiqi mənası kifayət qədər aydın olmayan bir məsələ həm millət vəkillərini, həm də camaatı narahat edir. Məsələn, deyək ki, mənim doğulduğum Yardımlı rayonunun İşıq İdarəsini Lənkərana, Qaz və Mədəniyyət idarələrini Masallıya, Əmlak Komitəsinin bölməsini Cəlilabada, Təhsil Şöbəsini digər rayona veriblər. Deməli, Yardımlının idarələri müxtəlif 3 rayonda yerləşdirilib. İndi Məşğulluq İdarəsini də belə etmək istəyirlər. İstəyirlər ki, məşğulluğu Regional Bölgə İdarələrinə versinlər”.
    Respekt.az xəbər verir ki, bu fikirləri “BakuPost”a Xalq şairi, millət vəkili Sabir Rüstəmxanlı deyib.
    Millət vəkili qeyd edib ki, bir rayon 3-4 istiqamətdən idarə olunmamalıdır:
    “Eyni rayonun daxili idarəçilik sahələri – təhsil, mədəniyyət, əmlak və kommunal məsələləri hərəsi bir rayona verilir. Təsəvvür edin ki, bir şəxs rayondan çıxır və o həmin gün həm işıq məsələsinə, həm də əmlak işinə baxmalıdır. Əvvəlcə getməlidir Lənkərana, ordan Cəlilabada. Belə idarəçilik olmaz. Bu adamlar yollarda qalırlar. Məşğulluq elədir ki, bir adamın ehtiyacı var, iş axtarır və Məşğulluq İdarəsinə gedir. Orda maraqlanır, ona uyğun iş tapıla bilər, ya yox. Həmin şəxs 2 rayon – 100 km o tərəfə getməlidir ki, ona cavab desinlər. Yoxdursa, deyirlər get, başqa vaxt gəl. Yenə eyni proses. Bunu necə təsəvvür etmək olar? Bir rayondan başqasına get-gəl, amma bir nəticəsi də olmasın. Ötən gün Milli Məclisdə çıxışımda da bu problemi səsləndirdim. Həmkarlarım da məni dəstəklədilər”.
    Deputat ölkəmizdə aparılan islahatların tərəfdarı olduqlarını vurğulayıb:
    “Rayonların ümumi quruluşunda müəyyən dəyişikliklər də ola bilər. Amma olacaqsa, bu şərh edilməlidir. Azərbaycanda vaxtılə Sovet dönəmində buna bənzər hadisələr olub. Rayonlar birləşib, təzədən ayrılıblar, yəni özünü doğrultmayıb. Bu xalqa izah olunmalıdır. Dağ rayonlarına qarşı etinasız münasibət var. Rayonlar digər rayonu qəbul etmək istəmir. Bir adam gedib görüşmək istəyir, deyirlər ki, dağlıdır, gözləsin. Belə şey olmaz. Rayonlara hörmət ilə yanaşmaq lazımdır. Bunun statusu dəyişməyibsə, idarələləri də dəyişməməlidir”.

  • Sabir Rüstəmxanlı: “Məmurarın münasibəti əhalinin dövlətə münasibətinə təsir göstərir”

    Milli Məclisdə “Məşğulluq haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanunun layihəsi birinci oxunuşda müzakirəyə çıxarılıb.

    Deputat Sabir Rüstəmxanlı çıxış edərkən dedi ki, təqdim olunan qanun layihələri xalqın maraqlarının nəzərə alınması baxımından təqdir olunmalıdır. “Amma biz daha çox sənədlərin necə yerinə yetirilməsi ilə maraqlanmalıyıq. Mən hər dəfə deputat seçildiyim rayondan 5-6 məktub alıram, yazırlar ki, 3, ya 4 uşağım var, dövlətdən heç bir yardım almıram. Odur ki, əhalinin ehtiyacı olan insanların dəqiq qeydiyyatı aparılmalıdır. Təqdim olunan sənədlərdə bürokratik əngəllər aradan qaldırılır, mütərəqqi, işin xeyrinə olan addımlar atılıb. Amma yenə də əhalinin müəyyən qismi diqqətdən kənarda qalacaq. Yerlərdəki idarələrdə çalışanların ümumi səviyyəsindən çox şey asılıdır. Təklif edirəm ki, işsiz insanların dəqiq qeydiyyatı aparılsın”.

    S.Rüstəmxanlı daha sonra qanun layihəsinin adına irad tutdu: “Özünüməşğulluq nədir, bilmirəm, yəqin özü-özünə iş tapır”. Daha sonra o, qanunundakı mürəkkəb cümlələri oxumağa başladı: “Hansı dildən alınıb, mən başa düşmürəm. Sadə, aydın dildə yazmaq lazımdır, camaat üçün aydın olsun”.

    S.Rüstəmxanlı iclasda xalqın küçələrə çıxması ilə bağlı səslənən fikirlərə də münasibət bildirdi. “O insanlar ordunu və dövlətə dəstək üçün çıxmışdılar”-S.Rüstəmxanlı bildirdi. Amma çıxış üçün ayrılan vaxt bitdiyi üçün fikrini tamamlaya bilmədi.

    E.Paşasoy,

    Musavat.com