Category: Arxiv

Dünya Azərbaycanlıları Konqresinin həmsədri, xalq şairi, millət vəkili Sabir Rüstəmxanlı Avropada fəaliyyət göstərən İran müxalifət təşkilatlarının dəvəti ilə avqustun 12-də Fransaya səfər edib.

 Sabir Rüstəmxanlı avqustun 13-də Parisin ən gözəl tarixi salonlarından birində 2 min nəfərdən artıq müsəlman üçün verilən iftar mərasimində çıxış edib. Yerli nümayəndələrdən əlavə Əfqanıstan, İran, İraq, Suriya, Livan, İordaniya, Fələstin, Küveyt, Misir, Tunis, Liviya, Mərakeş və başqa İslam ölkələri parlament deputatları, səfir və diplomatlarının, eləcə də bir sıra tanınmış mətbuat orqanı təmsilçilərinin qatıldığı bu mərasimdə millət vəkili Sabir Rüstəmxanlı iştirakçıları Dünya Azərbaycanlıları Konqresi və Azərbaycan müsəlmanları adından Ramazan ayı münasibətilə təbrik edib, bu müqəddəs günlərin onlara xeyir-bərəkət və bütün insanlara əmin-amanlıq gətirməsini arzuladığını bildirib.

 Bölgədəki və İslam aləmindəki durumdan bəhs edən Sabir Rüstəmxanlı «islam» və «terror» anlayışlarının qarşılaşdırılmasından, İslamın siyasiləşməsindən və bu yolla müsəlman aləmində böyük insan tələfatına yol açan aqressiyalardan, İslamı bir din olaraq gözdənsalma cəhdlərindən narahatlığını dilə gətirib. Bu baxımdan əlaqələrin gücləndirilməsi, İslam dəyərlərinin qorunması, tanıdılması və təbliğində vahid mövqenin əhəmiyyətini tədbir iştirakçılarının diqqətinə çatdırıb. Azərbaycanın 20 faiz ərazisini işğal edən Ermənistana münasibətdə və Dağlıq Qarabağ probleminin ədalətli həllində beynəlxalq hüququn işə düşməməsini, bir milyondan artıq qaçqın-köçkünün dərdini qeyd edən S.Rüstəmxanlı bu işğalın aradan qaldırılmasında müsəlman ölkələrinin və təşkilatlarının fəallıq göstərməsinin vacibliyini söyləyib: «Təəssüf ki, bir sıra İslam ölkələri problemin mahiyyətini bilmir və ya özlərini seyrçi kimi aparırlar. Azərbaycan İslam ölkələrinə göstərdiyi diqqət və qayğıya adekvat cavab gözləsə də, çox zaman biz bu qarşılığı almırıq» – deyən natiq eyni zamanda bəzi İslam ölkələrinin hətta işğalçıya yardım etdiyini diqqətə çatdırıb: «Beynəlxalq hüquq normalarını pozan, Azərbaycan ərazisini işğal edən, bir milyondan artıq müsəlmanı qaçqın salan, onminlərlə azərbaycanlı müsəlmana qarşı soyqırım həyata keçirən Ermənistana İran İslam Respublikasının yardım göstərməsi, İran rəsmilərinin Azərbaycana münasibətdə məsuliyyətsiz və heç bir ölçüyə sığmayan, dövlətçiliyi təhdid edən açıqlamaları İslam vəhdətinə zərbə və ümumilikdə İslam dünyasına xəyanətdir».

 Parisdə yaşayan, iftar məclisində iştirak edən Asiya, Avropa və Afrika əsilli müsəlmanlar Sabir Rüstəmxanlının çıxışını maraqla qarşılayıb və dəstək fikirlərini bildiriblər.

 Daha sonra Sabir Rüstəmxanlının Əfqanıstan, İraq, İordaniya, Mərakeş və digər ölkələrdən gələn deputat və diplomatlarla geniştərkibli görüşü keçirilib.

VHP dairə və məntəqə seçki komissiyalarının formalaşmasında iştirakdan imtina etməyə hazırlaşır.

 Bu barədə məlumatı VHP təşkilat şöbəsinin müdiri Samir Əsədli verib. Onun sözlərinə görə, Seçki Məcəlləsinin tələblərinin kobud surətdə pozulması və Dairə Seçki Komissiyalarında baş verən özbaşnalıqlar VHP-ni bu addımı atmağa təhrik edir: «Artıq bir aya yaxındır ki, Seçki Məcəlləsinə uyğun olaraq Dairə Seçki Komissiyalarının təşkili prosesi gedir. Ancaq parlament azlığına məxsus yerlərin qanunsuz olaraq hakim partiya tərəfindən mənimsənilməsi o həddə çatıb ki, DSK-larda iştirak mənasını itirib. Belə ki, onsuz da DSK-lardakı özbaşnalıqlara müxalifətin müdaxilə imkanları minimumdan da aşağı səviyyədə idi. Hazırda bu təsiri tamamilə sıfra endirihlər».

 YAP-dan sonra parlamentdə ən çox deputatla təmsil olunmasına baxmayaraq, DSK-lardakı təmsilçilikdə VHP-nin ciddi ədalətsizliklərlə qarşılaşdığını bildirən Samir Əsədlinin sözlərinə görə, DSK-nın müxalifətdən olan katiblərinin seçilməsində Prezident Aparatından və yerli icra hakimiyyətindən gələn sifarişlər əsas rol oynayıb: «Nəticədə hakim partiya parlament azlığına məxsus katib yerlərinə iqtidaryönlü müxalifəti təmsil edən şəxsləri təyin edib. Problem isə ondadır ki, iqtidaryönlü müxalifətdən katib «seçilən» şəxslərin əksəriyyəti təmsil olunduqları partiyanı heç tanımırlar. Onlar hamısı YAP-çılardır».

 Ədalətsizliyin hazırda Məntəqə Seçki Komissiyalarında davam etdiyini söyləyən Samir Əsədli bu qanunsuzluğa etiraz əlaməti olaraq VHP-nin seçki komissiyalarının formalaşmasında iştirakdan imtina edə biləcəyini söylədi: «Siyasi Şura üzvləri bununla bağlı müraciət ediblər və gələn həftə fövqəladə toplantının keçirilməsi nəzərdə tutulur. Əlbəttə, Siyasi Şuranın nə qərar verəcəyini əvvəlcədən demək mümkün deyil. Ancaq deyə bilərəm ki, ədalətsizliklərə etiraz olaraq DSK və MnSK-ların formalaşmasından imtina hazırda VHP-də ciddi müzakirə mövzusudur və bu, təbii ki, SŞ-nın qərarına təsir edəcək».

Vətəndaş Həmrəyliyi Partiyasının qusar rayon təşkilatının növbəti, 5-ci konfransı keçirilib. Konfransda rayon təşkilatının özəklərindən seçilmiş nümayəndələr, həmçinin VHP mərkəzi aparatından təşkilat şöbəsinin müdiri Samir Əsədli və Gənclər Təşkilatının sədri Emil Bağırov iştirak ediblər. “Qafqazinfo”nun məlumatına görə, konfransda təşkilat sədri Həsənbala Məmmədovun hesabat məruzəsi dinlənilib.

Sosial ədalətsizlik, korrupsiya düşmən dəyirmanına su tökməkdir

Sabir Rüstəmxanlı: «Xalq özü əsl müxalifətdir və bu müxalifətlə hesablaşmaq vacibdir».

Bu gün VHP mərkəzi qərargahında Füzuli rayon təşkilatının növbəti konfransı keçirildi. Konfranda partiya sədri Sabir Rüstəmxanlı, Ali Məclisin sədri Rafiq Manaflı, MNTK sədri Felmar Ələkbərli iştirak edirdi.

Tədbiri giriş sözü ilə açan VHP təşkilat şöbəsinin müdiri Samir Əsədli bildirdi ki, Füzuli rayon təşkilatı partiyanın 81 rayon təşkilatı içərisində ən aktivlərindən biridir: «Təəssüf ki, rayon işğal altında olduğundan sakinlər kimi, təşkilat da bir neçə yerdə fəaliyyət göstərməyə məhkumdur. Özək təşkilatlarının bir hissəsi Horadizdə, bir hissəsi isə Bakının müxtəlif rayonlarında fəaliyyət göstərir».

Hesabat məruzəsiylə təşkilatın sədr əvəzi Yavər Həsənov və NTK sədri Qurban Namazəliyev çıxış etdi.

Daha sonra VHP sədri Sabir Rüstəmxanlı konfrans iştirakçılarını salamladı və partiyanın sosial-siyasi həyatdakı yeri barədə açıqlama verdi. Partiya sədri həmçinin VHP-nin mövqeyi haqda deyilənlərə də aydınlıq gətirdi: «Azərbaycanın taleyüklü məsələlərində əsas çətinlik, bizi hədəfdən yayındıran məsələ vətəndaş həmrəyliyinin olmamasıdır. Yerləşdiyimiz coğrafi mövqe və şərait elədir ki, biz yalnız vətəndaş həmrəyliyi ilə hədəflərimizə çata bilərik». Daxili didişmələri, barışmazlığı tənqid edən Sabir Rüstəmxanlı bir-birini qəbul etməmək kimi ziyanlı vərdişlərin düşmən dəyirmanına su tökmək olduğunu söylədi: «Əslində, sosial ədalətsizlik, korrupsiya və rüşvət, daxili siyasi didişmələr, siyasi rəqiblərin bir-birini qəbul etməməsi və bir-birinə düşmən kimi baxması ilə dövlətçiliyə xəyanət eyni anlam daşıyır. Çünki bunların Azərbaycandha olmasını yalnız düşmənlər, ermənilər arzulaya bilər».

S.Rüstəmxanlı «müxalifətin olmaması» ilə bağlı fikirlərə də toxundu: «Müxalifət yoxdursa, deməli, demokratiya, söz azadlığı, sivil toplum da yoxdur. Əslində, xalq özü əsl müxalifətdir, ayrı-ayrı siyasi partiyalara güvənməmək isə başqa mövzudur. Bu müxalifətlə – xalqla hesablaşmaq vacibdir».

Çıxışlardan sonra təşkilati məsələlərə baxıldı. Gizli səsvermə ilə Qurban Namazəliyev rayon təşkilatının yeni sədri seçildi.

Eyni zamanda, 21 nəfərdən ibarət məclis və 3 nəfər NTK üzvü müəyyənləşdirildi. NTK-nın iclasında Şərqiyyə Orucova sədr seçildi. Məclisin iclasında isə 9 nəfər Şura üzvü və 5 nəfər müavin seçildi.

Mərкəzi Sеçкi Mоmissiyаsının 19 iyul 2011-ci il tаriхli iclаsındа  Dаirə Sеçкi Коmissiyаlаrının tərкibi təsdiqlənib

Çinin cənubunda Sinszyan Uyğur Muxtar Respublikasında etnik uyğurlar və han çinlilər arasında qanlı toqquşmalar davam edir.

Uyğur fəalları deyirlər ki, onların qəzəbini Çin repressiyası coşdurur. Pekin isə uyğurları seperatizmdə, terrorşuluqda ittiham edir və zorakılığın alması üçün sərt kütləvi təhlükəsizlik tədbirlərinə əl atıb.

«ÇİN HAKİMİYYƏTİ HƏLƏ DƏ İNSANLARI HƏBS EDİR»

Uyğur müsəlmanlarının sürgün edilmiş lideri Rabiya Kadeer AzadlıqRadiosuna verdiyi müsahibəsində Sinszyandakı vəziyyəti təhlil edib. O, «son zamanlar Sinszyanda zorakılıq hadisələri artıb. Bu qədər qan tökülməsinə nə səbəb olub və bütün bu hadisələrin bir-biri ilə əlaqəsi varmı?» sualına belə cavab verib:

«Bəli, bütün hadisələrin bir-biri ilə əlaqəsi var. 2009-cu ildə iyulun 5-də regional paytaxt Urumçidə han çinləri ilə uyğurlar arasında baş verən iğtişaşlar zamanı 10 minə yaxın adam həbs olundu. 4-5 min adam itkin düşdü, 4-5 min adam öldürüldü.  Fikrimcə, indiki qarşıdurmalara ölənlərin yaxınları qatılıb».

Rabiya Kadeerin sözlərinə görə, Çin hakimiyyəti hələ də adamları həbs edir, onların sayı 70 minə çatıb: «İtkin düşənlərin də sayı artıb. Hakimiyyət uyğurların evinə polis göndərir. Kişiləri sorğu-sual edirlər, onlara işgəncə verirlər ki, iyulun 5-dəki hadisılərlə əlaqələri varmı, bu hadisələrdə iştirak ediblərmi? Ona görə də biz deyirik ki, hadisələr iyulun 5-dən başlayıb. Fikrimcə, Çin uyğurların öldürülməsini dayandıracaq, amma uyğurlar dayanmayacaq. Çin öz siyasətini dəyişənə qədər. Ya azad olacaqlar, ya da öləcəklər».
 

«HADİSƏLƏRİ TERRORÇULUĞA BAĞLAYAN HAKİMİYYƏT YALAN DANIŞIR»

Rabiya Kadeer Çinin bu iğtişaşların arxasında Pakistan hərbçiləri tərəfindən öyrədilmiş müsəlman extremistlərinin durması ilə bağlı iddialarını rədd edir, deyir ki, bu, yalandır: «Hərkəs, Çin hökuməti də, uyğurlar da, çinlilər də, jurnalistlər də bunun  yalan olduğunu bilir». Onun sözlərinə görə, zorakılıqda əli olan adamlara işgəncə verildiyi faktdır və görünür, Çin 5-6 adamı məcbur edib ki, islamçı və Pakistan terrorçuları ilə əlaqələri olduğunu  söyləsin: «Onlar hadisələri saxtalaşdırmağı bilirlər. Mənə qarşı da bu medotdan yararlandılar, «etiraf» etdirdilər, sonra da bu «etiraf» əsasında məni sürgünə göndərdilər».

Rabiya Kadeerin fikrincə, qarşıdurmaların arası kəsilməyəcək. O deyir ki, Çin qarşıdurmalarda terrorizm izi axtarır və bu bəhanə ilə də uyğurları öldürəcək. Amma belə olarsa Çin böyük səhvə yol vermiş olacaq. Rabiya Kadeerin sözlərinə görə, uyğurlar hər yerdə ayağa qalxır və bu davam eləsə, qazaxlar, monqollar da qalxacaq. Çində yaşayan qazaxların bir etnik qrup kimi güncə sıxışdırıldığını söyləyən xanım Kadeer əlavə edir ki, uyğurların savaşı azadlıq uğrundadır, bunu terrozim adlandımaq səhvdir:

«Bu savaş uyğurlarla hökumət arasındadır. İkinci dünya müharibəsində Yaponiya Çinin bir hissəsini işğal etdi, çinliləri öldürdü. Çin də cavabsız qalmadı. İndi Çinin hərəkətini terrorizmmi adlandırmalıyıq? Uyğurlar indi eyni vəziyyətdədilər».

«UYĞURLARLA BƏRABƏRHÜQUQLU DAVRANILMALIDIR»

Rabiya Kadeer Çin hökumətinə məktub yazıb qan tökülməsinin dayandırılmasını, dialoqa getməyi, uyğurlara bərabərhüquqlu və insani rəftar göstərməyi, həbs edilənlərin dərhal azadlığa buraxılımasını istəyib. Amma cavab alıb ki, onlar milli separatçıların və terrorçuların liderini dinləmək niyyətində deyillər:

«Amma hələ də ümid edirəm ki, Çin hakimiyyəti özündə güc tapıb həbs olunmuş uyğurları sərbəst buraxacaq, onlarla yaxşı rəftar edəcək, bərabər hüquqları olduğunu tanıyacaq. Ona da ümid edirəm ki, uyğurların müsadirə edilmiş torpaqlarını vaxt itirmədən özlərinə qaytaracaqlar. Yurd-yuvalarından qovulmuş uyğurlara evlərinə qayıtmağa izacə verəcəklər».

Rabiya Kadeer deyir ki, bu problemlər həll olunandan sonra uyğurlar müstəqilliklə bağlı suallara cavab tapa və bu məsələni də beynəlxalq normalara, uyğurların arzularına uyğun həll edə bilərlər.

• 11 uşaq anası olan Rabiya Kadeer 1976-cı ildə Çində bir camaşırxana açıb işlətməklə pul qazanmağa başlamışdı. 1990-cı illərin ortalarında isə o, artıq Çində böyük ticarət mərkəzinə sahib olan ölkənin beş ən varlı adamından biri idi. Sincan əyalətində uyğurların hüquqları uğrunda mübarizə aparması onu az qala hər şeydən məhrum edib. İlk dəfə 1997-ci ildə Sincanın Yining şəhərində nümayişçilərə divan tutulmasına görə Pekini tənqid edən Kadeeri hakimiyyətin hədəfinə çevrildi. Bundan dərhal sonra parlamentdəki yerini itirdi, ölkədən çıxmasına qadağa qoyuldu. 1999-cu ildə ABŞ konqresmenləri ilə görüşüb uyğurların hüquqlarının pozulması barədə məlumat verməyə cəhd etdiyinə görə həbs olundu. 2000-ci ildə dövlət sirrini yaymaq ittihamı ilə azadlıqdan məhrum olundu. 2005-ci ildə səhhətinə görə azadlığa çıxandan sonra ABŞ-a sığındı. Rabiya Kadeer 2006-cı ildə Amerika Uyğurları Assosiasiyasının və Dünya Uyğur Konqresinin prezidenti seçilib. Bundan dərhal sonra onun Çində yaşayan oğlunu vergi pozuntuları ittihamı ilə həbs ediblər.

Media Mərkəzində Azərbaycanın “Şərq tərəfdaşlığı” ölkələri viza rejiminin müqayisəli təhlilinin təqdimatı keçirilib. Sənədi  miqrasiya sahəsində ekspert, Azərbaycan Miqrasiya Mərkəzinin rəhbəri Əlövsət Əliyev hazırlayıb.

Sənəd Azərbaycan Avrointeqrasiya üzrə Milli İctimai Komitəsinin (AAMİK) Azərbaycan Açıq Cəmiyyət İnstitutunun (Soros Fondu) dəstəyilə həyata keçirdiyi layihə çərçivəsində hazırlanıb.

Layihənin işçi qrupunun rəhbəri Yaşar Cəfərli qeyd edib ki, proqramda məqsəd Azərbaycanın Aİ ölkələri ilə viza rejiminin sadələşdirilməsi işinə yardım göstərməkdir.

Ə.Əliyevin sözlərinə görə, Aİ ilə viza rejiminin sadələşdirilməsi üçün Azərbaycanın sərhədlərinin təhlükəsizliyini möhkəmləndirmək, bu sahədə idarəçiliyi təkmilləşdirmək, miqrasiya proseslərini tənzimləmək və readmissiya haqqında sazişi imzalamaq lazımdr.   Readmissiya haqqında saziş sadələşdirilmiş viza rejiminin tətbiqində əsas elementdir.  

Bu məsələdə Azərbaycan “Şərq tərəfdaşlığı” proqramının digər iştirakçılarından – Ukrayna, Gürcüstan və Moldovadan geri qalır.

Readmissiya başqa ölkələrdə qeyri-leqal miqrant kimi olan vətəndaşların qaytarılması ilə bağlı dövlətlərin üzərinə öhdəlik qoyur. Bundan əlavə, dövlət Azərbaycan vasitəsilə Avropaya gedən əcnəbiləri də qaytarmalıdır.

Eyni zamanda ölkə vətəndaşları sadələşdirilmiş viza rejimindən üstünlüklər əldə edəcəklər. Belə ki, Şengey zonası ölkələrinə vizanın qiyməti 60 avrodan 35 avroya  kimi azaldılacaq. Qalma müddəti isə yarım il ərzində 90 günədək təşkil edəcək.

Sadələşdirilmiş rejim müraciətə 10 gün ərzində baxılmasını və sənədlərin siyahısının azaldılmasını (bank hesabı, daşınmaz əmlak haqqında və s. məlumatlar olmadan) nəzərdə tutur.

Sadələşdirilmiş rejim Azərbaycana turist axınının artmasına səbəb olacaq.  Belə ki,  2010-cu ildə Azərbaycana 1 mln. 400 min əcnəbi gəlib. Onların yarısı İran və Gürcüstan vətəndaşlarıdır. Readmissiya haqqında sazişə malik olan Gürcüstana təkcə Avropadan 1 mln. nəfər gəlib.

Əliyev readmisiya haqqında dövlət strategiyasının hazırlanması üzərində işin sürətləndirilməsini və Aİ ölkələri ilə sadələşdirilmiş viza rejiminin tətbiqini zəruri hesab edir.

Azərbaycan milli kimliyi uğrunda dinc mübarizə aparan urmiyalı fəal Məhsa Mehdili tutulub. “Media forum” saytının məlumatına görə, İran Kəşfiyyat Nazirliyinin (ETTELAAT) Urmiya şöbəsinin əməkdaşları Məhsa Medilini avqustun 21-də atasının mənzilindən aparıblar.

Azərbaycanlı fəalın konkret nədə günahlandırıldığı və hazırda harada saxlandığı bilinmir.

Ötən əsrin 80-ci illərinin sonlarında başlanan xalq azadlıq hərəkatının liderlərindən biri olan Əbülfəz Elçibəy (Əliyev) 24 iyun 1938-ci ildə Naxçıvanda anadan olub.
Bakı Dövlət Universitetinin Şərqşünaslıq fakültəsini bitirib.
 O, Xalq Cəbhəsinin sədri kimi 1992-ci il iyunun 7-də Azərbaycanın prezidenti seçilib.
1993-cü ilin iyununda baş vermiş qiyam nəticəsində Bakını tərk edərək anadan olduğu Naxçıvanın Kələki kəndinə gedib, 4 il 4 ay orada yaşayıb.
Uzun zaman əziyyət çəkdiyi xəstəlikdən sonra 2000-ci il 22 avqust tarixində Türkiyənin paytaxtı Ankarada vəfat edib, daha sonra I Fəxri xiyabanda dəfn olunub.

  Əbülfəz Elçibəy haqqında geniş məlumatı bu linkdən oxuyun.
   

    http://az.wikipedia.org/wiki/Əbülfəz_Elçibəy

Bu gün saat 11:00-da Vətəndaş Həmrəyliyi Partiyasının mərkəzi qərargahında Amerika Birləşmiş Ştatlarının ölkəmizdəki səfirliyinin ikinci katibi cənab Rayan T.Kembel VHP sədri Sabir Rüstəmxanlı və Azəri-Türk Qadınlar Birliyinin rəhbəri Tənzilə Rüstəmxanlı ilə görüş keçirdi.

Görüşdə əsasən bölgədəki vəziyyət, Azərbaycanın öz qonşuları – Rusiya, İran, Gürcüstan, xüsusilə Türkiyə ilə münasibətləri, iqtisadi-siyasi və mədəni-mənəvi əlaqələri müzakirə olundu. Türkiyədə baş verən son proseslər, ordu komandanlarının istefası və bu istefaya Azərbaycan ictimai fikrinin reaksiyası görüşün əsas danışıq mövzusunu təşkil etdi.