Category: Arxiv

VHP Gənclər Təşkilatının yeni sədri Pünhan İmamlı: «Hakimiyyətin gənclər siyasəti ancaq onu dəstəkləyən, analoqsuz inkişaf nağıllarına qulaq asan gənclər üçündür»

Vətəndaş Həmrəyliyi Partiyasının (VHP) Gənclər Təşkilatına yeni sədr seçilib – Pünhan İmamlı. Onunla görüşüb yeni sədr kimi, görmək istədiyi işlər, qarşıdakı planları barədə söhbətləşdik. VHP Gənclər Təşkilatının demokratik düşərgənin bütün tədbirlərində, o cümlədən forumlarda, etiraz aksiyalarında, fləşmoblarda yaxından iştirak etdiyini, Azərbaycanda baş verən qanunsuzluqlara, özbaşınalıqlara qarşı barışmaz mövqe nümayiş etdirdiyini deyən Pünhan İmamlının sözlərinə görə, onun sədrliyi dövründə də əsas fəaliyyət istiqaməti bu yöndə olacaq: “Azərbaycanda fəaliyyət göstərən digər partiyaların gənclər təşkilatları, həmçinin müxalifyönlü, müstəqil gənclər təşkilatlarıyla birlikdə mübarizəmizi davam etdirəcəyik. Bizi tək-tək məğlub edə bilərlər, amma birlikdə olsaq, öz gücümüzü göstərəcəyik. Ona görə də VHP Gənclər Təşkilatı olaraq, Azərbaycanda dəyişiklik istəyən bütün gənclərin bir olması, bir ideya uğrunda mübarizə aparmasının tərəfdarıyıq”.
VHP bir tərəfdən Ictimai Palatada, yəni, müxalifət koalisiyasında təmsil olunur, həm də bu partiyanın hakimiyyətlə müəyyən yaxınlığı iddia olunur. Bununla belə, VHP-çi gənclər müxalif mövqedən çıxış edirlər. Bu amilin VHP Gənclər Təşkilatının fəaliyyətinə təsirilə bağlı suala cavab olaraq, Pünhan İmamlı deyir ki, VHP müxalif partiyadır: “Insanlarda belə bir fikir formalaşıb ki, əgər hansısa müxalifət partiyası Milli Məclisdə təmsil olunursa, deməli, həmin partiya YAP-ın mövqeyini dəstəkləyir. Amma bu, tamamilə yanlış fikirdir. VHP müxalif partiyadır və onun hakim partiya ilə heç bir yaxınlığı yoxdur”.
Pünhan İmamlı həm hakimiyyətin, həm də müxalifətin gənclər siyasətilə bağlı fikirlərini bölüşərək deyir ki, hakimiyyətin gənclər siyasəti ancaq onu dəstəkləyən gənclər üçün nəzərdə tutulub: “Analoqsuz inkişaf nağıllarına qulaq asıb, sonda göydən üç alma əvəzinə qızıl küpəsinin düşəcəyinə inanan gənclər hakimiyyətin gənclər siyasətindən bəhrələnirlər. Mövcud rejimlə barışmayan və bu rejimə qarşı mübarizə aparan gənclər isə bu siyasətdən tamamilə kənarda qalırlar. Müxalifətin gənclər siyasəti isə siyasi baxışından asılı olmayaraq, bütün gənclər üçün nəzərdə tutulub və ümid edirik ki, bu siyasəti tezliklə həyata keçirmək mümkün olacaq”.
Yeni sədr bizimlə söhbətində demokratik düşərgədə təmsil olunan gənclərin mübarizəsinin perspektivindən də danışdı. Onun sözlərinə görə, demokratik düşərgədə kifayət qədər savadlı və istedadlı gənclər var və onlar öz mübarizələrində yeni metodlardan istifadə edirlər: “Bu, çox yaxşı haldır. Bu gəncliyin bir parçası olan VHP Gənclər Təşkilatının gəncləri demokratik düşərgədə mübarizə aparan gənclərin mübarizəsinin perspektivini yüksək qiymətləndirir və bu yolda gənclərə uğurlar arzulayır”.

Azadlıq qəzeti

Bu gün Bakı Ağır Cinayətlər Məhkəməsində Təhsil Nazirliyinin keçmiş əməkdaşı, tanınmış şair Əli Kərimin oğlu Orxan Kərimovun xəstəliyi ilə əlaqədar barəsində seçilmiş həbs-qəti imkan tədbirinin dəyişdirilməsi vəsatətinə baxılıb. Orxan Kərimovun qardaşı Paşa Kərimovun ANS-ə verdiyi məlumata görə, proses zamanı onun səhhəti pisləşib və huşunu itirib. Dərhal prosesdə fasilə elan olunub və məhkəməyə “Təcili yardım” çağırılıb, Orxan Kərimova tibbi yardım göstərilib. 

Fasilədən sonra proses davam edib və hakimlər vəsatətin təmin olunmamasına qərar verib. Paşa Kərimovun sözlərinə görə, Orxan Kərimov məhkəmədən təcridxanaya aparılıb. 

Orxan Kərimovun vəziyyəti ilə bağlı tanınmış ziyalılar isə prezidentə müraciət etmək qərarına gəlib. Konkret olaraq xalq yazıçısı Anar və xalq şairi Sabir Rüstəmxanlı Orxan Kərimovla bağlı ölkə prezidentinə müraciət ediblər. Müraciətdə Orxan Kərimovun səhhətində yaranan problemlərdən narahatlıq ifadə olunur və onun ürək əməliyyatını ixtisaslaşdırılmış klinikada həyata keçirilməsi üçün zaminə buraxılması xahiş olunur. 

ANS-ə müsahibəsində Sabir Rüstəmxanlı müraciətə cavab gözlədiklərini deyib: “Mənim də bir Əli Kərim sevən insan kimi onun oğlu haqqında narahatçılıq keçirməyim, ən azı məhkəmə orqanlarına onun kimyliyini xatırlatmağım vacibdir. Biz Orxan Kərimovun günahkar olmadığını iddia eləmirik və yaxud ona məhkəmədə hər hansı güzəşt olunmasını belə tələb etmirik. Hərçənd bu insanlara bir az daha həssas yanaşmaq mümkündür. Biz Orxan Kərimovun ürək xəstəsi olduğunu bilirik. Həbsdən əvvəl ürək əməliyyatı keçirib, damarlarında problem var və yatdığı yerdə onun xəstəliyi təsdiq olunur. Sadəcə, xahiş edirik məhkəmə prosesində onun müalicəsinə şərait yaradılsın”. 

Orxan Kərimovun işi baxılması üçün hazırda Ali Məhkəmədədir. Məhkəmə orqanından isə məsələ ilə bağlı heç bir açıqlama verilmədi. Xatırladaq ki, Orxan Kərimov rüşvət almaqda ittiham olunaraq ötən il həbs olunub. Həbsxanada onun ürəyinin tac damarlarında ağır fəsadlar yaranıb. Orxan Kərimovun ailə üzvləri onun xəstəliyinə görə zaminə buraxılması haqqında müraciətə müsbət cavab veriləcəyinə ümid etdiklərini bildirib. 

Əziz Bəxtiyar Hacıyev!

Sizi 30 yaşınızın tamam olması münasibətilə səmimi qəlbdən təbrik edir, sizə can sağlığı, fəaliyyətinizdə uğurlar arzulayırıq.

Bir neçə il bundan əvvəl «Bəxtiyar Hacıyev» adı Azərbaycan cəmiyyətinə bəlli deyildi, baxmayaraq ki, siz dünyanın ən mötəbər universitetlərinin birində təhsil almışdınız və intellektli gənclərdən sayılırdınız. Ancaq Azərbaycanda həmin təhsilə yiyələnən gənclər az deyil. Sizin fərqlənməyinizin, adınızın dillər əzbəri olmasının və sevilməyinizin səbəbi öz intellekt və savadınızı ölkəmizdə demokratiyanın, insan haqlarının, vətəndaş cəmiyyətinin qurulmasına həsr etməyiniz, bütün çətinliklərə rəğmən, bu yoldan çəkinməməyiniz və demokratik dəyərlərə olan bağlılığınızdır.

Siz – insanların hüquq bərabərliyi, azad və demokratik cəmiyyətdə yaşaması üçün təkcə çalışmırsınız, həm də bu sizin həyat tərziniz, yaşam fəlsəfənizdir. Şəxsiyyətinizə olan böyük hörmətin də kökündə bu dayanır. Bu gün hər addımbaşı haqsızlıq, hüquqsuzluq, ədalətsizliklə qarşılaşan Azərbaycan insanı sizin adınızı ehtiramla çəkir, çünki bəşəri dəyərlər, haqq və ədalət mücahidisiniz. Sizin ləqayətli mübarizəniz böyük əksəriyyət üçün bir örnək, nümunədir.

Biz gənclər sıralarımızda sizin kimi intellektli, səviyyəli, mübariz, heç bir çətinliyi boyun əyməyən, idealları uğrunda gözünü qırpmadan son ana qədər döyüşməyi və sınmamağı bacaran soydaşımız, əqidə yoldaşımız və qardaşımızın olmasıyla qürur duyuruq.

Mübarizə könülsüz, həyat inamsız olmaz. Sizin sidq-ürəklə, canınız-qanınızla mübarizə aparmağınız dəyərlərimizin aliliyinə olan inamımızda həm də bir güvənc, istinad yeridir.

Əziz qardaşımız!

Bu əziz gününüzü birlikdə keçirə bilməsək də, bizi yanınızda, özünü bizim ön cərgələrimizdə hiss etməyinizi xahiş edirik. Bilin ki, Azərbaycanın mübariz gəncliyi sizin mübarizə yolunuzda həmişə yanınızda olacaq.

Əziz Bəxtiyar!

Bir daha sizi ad gününüz münasibəti ilə təbrik edir, sizə can sağlığı, uğurlar arzulayırıq. İnanırıq ki, növbəti ad günlərinizi demokratik və hüquqi Azərbaycanda keçirmək bizim qismətimiz olacaq.

Tanrı haqq işinizə yardımçı olsun!

 

Sizə dərin hörmət hissilə, silahdaşlarınız adından:

Vətəndaş Həmrəyliyi Partiyası (VHP)

Gənclər Təşkilatının Məclis üzvləri

Konfransın işində müxalifət liderləri də iştirak etdi

Vətəndaş Həmrəyliyi Partiyası (VHP) Gənclər Təşkilatının IX Konfransı keçirlib. Konfransda VHP sədri Sabir Rüstəmxanlı, Müsavat başqanı İsa Qəmbər, DAK Daimi Şurasının sədri Əjdər Tağızadə, politoloqƏrəstun Oruclu, VHP Ali Məclisinin sədriRafiq Manaflı, Hollandiya Liberal-Demokrat Partiyasının üzvü İsa Yusifli, AXCP, Müsavat, ADP, AMİP, KXCP-nin gənclər təşkilatlarının nümayəndələri, NİDA, Azad Gənclik, Müsbət Dəyişiklik, Dalğa, Avropa Hərəkatı, İdeya Gənclər klubu, Gənclər Klubu İB-nin, BAGT-nin və digər təşkilatların nümayəndələri iştirak ediblər.

Konfransa hazırlıq üzrə təşkilat komitəsinin sədri Nicat Kamal konfrans öncəsi görülən işlərlə bağlı məlumat verib. Təşkilat sədri Emil Bağırov və Nəzarət-Təftiş Qrupunun sədri Xalid Hadiyevin hesabat məruzələrindən sonra söz qonaqlara verilib.

VHP sədri Sabir Rüstəmxanlı konfransın işinə uğurlarla sözə başlayıb: «Bu tədbirdə iştirak edən Hərəkat dostum İsa Qəmbərlə bizim gəncliyimiz meydanlarda, Azərbaycanın azadlığı uğrunda mübarizələrdə keçib. Həmin dövrdə Azərbaycan gəncliyi birləşərək öz sözünü dedi və ölkənin müstəqilliyinə nail oldu. İndiki gənclik isə ölkənin inkişafı, demokratikləşməsi prosesinə qatılıb və biz gənclərin bu fəallığından razıyıq. Millətin hərəkətverici qüvvəsi gənclikdir və nə qədər ki, gənclik öz taleyinə biganə olmayacaq, ölkə də demokratik dəyərlərə bir o qədər sahib çıxacaq, güclü və qüdrətli olacaq».

Müsavat Başqanı İsa Qəmbər də müxtəlif qurumlarda təmsil olunan gənclərin əməkdaşlığını və fəallığını yüksək qiymətləndirdiyini bildirib: «VHP-çi gəncləri təbrik edirəm. Əlbəttə ki, siz özünüzdən əvvəlki nəslin mübarizə tarixini də unutmamalısınız. Bəziləri müxtəlif sözlər deyirlər. Ancaq bilməlisiniz ki, sizlərə bu şəraiti yaradanlar, məsələn, Sabir Rüstəmxanlı həm xalqımızın böyük şairi, həm də Hərəkat liderlərindən biri kimi böyük vətəndaşdır. Bu nümunələr sizin fəaliyyətinizi stimullaşdırmalıdır».

DAK Daimi Şurasının sədri Əjdər Tağızadə də çıxış edərək VHP-çi gəncləri konfransları münasibəti ilə təbrik edib. Onlara fəaliyyətlərində uğurlar diləyib.

Politoloq Ərəstun Oruclu da konfransın işindən və gənclərin fəallığından razılığını bildirib və Azərbaycanın demokratiya hərəkatında əsas ağırlığın gənclərin çiynində olduğunu söyləyib. Ramin Hacılı, Səxavət Soltanlı, Zaur Qurbanlı, İsa Yusifli, Zaur Əkbər, Ruslan İzzətli, Azər Aydın və digərləri də VHP-çi gəncləri təbrik ediblər, konfransın işinə uğurlar arzulayıblar.

Konfransın ikinci hissəsində təşkilatın seçkili orqanlarına seçkilər keçirilib. Təşkilat sədrliyi uğrunda Baba Qamətli, Namiq Əhmədli və Pünhan İmamlı mübarizə aparıblar. Böyük səs çoxluğu ilə Pünhan İmamlı sədr seçilib. Həmçinin Gənclər Təşkilatının Məclis üzvlüyünə qeydə alınan 23 namizəddən 17-si Məclis üzvü seçilib. Nəzarət-Təftiş Qrupuna qeydə alınan 5 namizəddən 3-ü üzv seçilib.

Məclisin ilk toplantısı da keçirilib. Təşkilatın Şura üzvlüyünə 9 nəfər seçilib. Təşkilat sədrinin təqdimatı ilə Nicat Kamal birinci müavin, Baba Qamətli təşkilati işlər, Namiq Əhmədov siyasi məsələlər, Sevinc Məmmədova beynəlxalq məsələlər, Pərviz Həsənov mətbuatla iş, Salman Hüseynov ideoloji işlər üzrə müavin seçiliblər.

Nəzarət-Təftiş Qrupunun iclasında isə Vüsal Mehdiyev sədr seçilib.

 

Martın 7-də araşdırmaçı-jurnalist Xədicə İsmayılın ev ünvanına təhdid və şantaj xarakterli məktub göndərilib. Məktubda intim xarakterli şəkillər və hədələr yer alıb. Ona özünü yığışdırmasa, rüsvay olacağını yazıblar.

Xədicə İsmayıla indiyə qədər ən yüksək səviyyədə korrupsiya ilə bağlı faktlar üzə çıxarıb, hakimiyyət mənsublarının ofşor bizneslərinin gizlinləri açıb, birbaşa hakim ailəyə aidiyyatı olan şirkətlərlə bağlı rəsmi orqanlara sorğular göndərib.  Bu günə qədər hakimiyyətə yaxın KİV-lərdə jurnalistlə bağlı şantaj və böhtan xarakterli məqalələr, xəbərlər yayılıb.

“Azadlıq” radiosunun əməkdaşı Xədicə İsmayılın şantajla hədələnməsi hakim qüvvələrin jurnalisti susdurmaq cəhdidir. Azərbaycan iqtidarı Xədicə İsmayılovanı şantaj edən şəxsləri müəyyənləşdirib onları məsuliyyətə cəlb etməlidir.

Biz, VHP Gənclər Təşkilatı olaraq Xədicə İsmayıla edilən təzyiqləri və onun əxlaqı dəyərlərə uyğun olmaya surətdə, çox eybəcər formada şantaj edilməsini pisləyir, jurnalistin həyatına olacaq təhlükənin məsuliyyətini hakimiyyətin daşıyacağını və insanların şəxsi həyatının toxunulmaz olduğunu bildiririk. 

Vətəndaş Həmrəyliyi Partiyasının (VHP) Bakı, Sumqayıt şəhərləri, Abşeron rayonu və məcburi köçkün rayon təşkilatları sədrlərinin iştirakı ilə müşavirə keçirilib. VHP-nin təşkilat şöbəsinin müdiri Samir Əsədlinin APA-ya verdiyi məlumata görə, müşavirədə partiyadaxili məsələlər, təşkilatlanma işləri, İctimai Palatanın 22 aprel mitinqinə hazırlıq və ölkədəki ictimai-siyasi proseslər müzakirə olunub.

Müşavirədə VHP Ali Məclisinin sədri Rafiq Manaflı məruzə ilə çıxış edib. 

Vətəndaş Həmrəyliyi Partiyasının mərkəzi qərargahında Ali Məclis sədri Rafiq Manaflının sədrliyi ilə Bakı və məcburi köçkün rayonları təşkilatlarının genişləndirilmiş müçavirəsi keçirilib.

Toplantıda partiyanın təşkilatlanması, yerli təşkilatların təklifləri və iradları müzakirə olunub. Qərara alınıb ki, təkliflər ümumiləşdirilsin və növbəti müzakirədən sonra onların tətbiqinə başlanılsın.

Görüşdə həmçinin VHP-nin qarşıdan gələn 20 illik yubileyi, gənclərin 17 mart və İctimai Palatanın 8 aprel mitinqi, VHP-nin rayon təşkilatlarının İP-in yerli şöbələri ilə əməkdaşlığı məsələləri ətrafında da fikir mübadiləsi aparılıb.

Yığıncaqda VHP Siyasi Şurasının üzvləri Samir Əsədli, Arif İsmayılbəyli və Ofelya Rəşidqızı da iştirak ediblər.

                                                                                                                                                          

VHP Mətbuat Xidməti 

Oksford Universiteti Azərbaycanın xalq şairi, millət vəkili Sabir Rüstəmxanlıya dəvət göndərib. Dəvətdə S.Rüstəmxanlının mayın əvvəllərində Oksford Universitetində keçiriləcək «Şeir axşamı»nda iştirakı arzu edilir.

Xalq şairi artıq dəvəti qəbul edib və mayın əvvəllərində S.Rüstəmxanlı Londona səfər edəcək. Səfər çərçivəsində millət vəkilinin Londondakı «Azərbaycan Evi»ndə görüşü də nəzərdə tutulur.

 

VHP Mətbuat Xidməti 

Sabir Rüstəmxanlı: “Dövlət müstəqilliyini bərpa eləməyin özü təzədən dövlət qurmağa bərabər bir işdir”

Azərbaycanın dövlət müstəqilliyinin bərpası haqqında Konstitusiya Aktının qəbul olunduğu gün – 18 oktyabr istirahət günü elan olunacaq. Bu, Azərbaycan Nazirlər Kabineti, Azərbaycan Həmkarlar İttifaqları Konfederasiyası və Azərbaycan Sahibkarlar (İşəgötürənlər) Təşkilatları Milli Konfederasiyası arasında imzalanmış 2012-2013-cü illər üçün Baş Kollektiv Sazişdə nəzərdə tutulur.

Nazirlər Kabinetindən verilən məlumata görə, sazişin “Sosial müdafiənin gücləndirilməsi istiqamətləri” hissəsində bildirilir ki, sənədi imzalayan tərəflər müstəqillik gününün (18 oktyabr) də iş günü hesab edilməyən bayram günü kimi qeyd edilməsinə və bununla əlaqədar Əmək Məcəlləsinin 105-ci maddəsinin 2-ci hissəsində dəyişiklik edilməsinə nail olunması üçün tədbirlər görəcəklər. Qeyd edək ki, 1991-ci il oktyabrın 18-də Azərbaycan Ali Soveti dövlət müstəqilliyinin bərpası haqqında Konstitusiya Aktını qəbul edib. 1992-2006-cı illərdə 18 oktyabr Azərbaycanda qeyri-iş günü hesab edilib. 2006-cı il dekabrın 8-də isə Milli Məclis Əmək Məcəlləsinə dəyişiklik edib. Həmin dəyişikliyə əsasən, 18 oktyabr – Müstəqillik Günü, 12 noyabr – Konstitusiya Günü, 17 noyabr – Milli Dirçəliş Günü bayram kimi qalsalar da, istirahət günü kimi qeyd edilmir. 
İstiqlalçı deputat, sabiq təhsil naziri Firudin Cəlilov Müstəqillik Gününün yenidən istirahət günü elan edilməsini müsbət qarşılayır: “Həmin günün iş günü olması iqtidarın Azərbaycanın müstəqilliyinə, azadlığına olan münasibəti idi. Axır ki, indi ağılları başlarına gəldi. Əgər həmin günü qeyri-iş günü elan etməsəydilər, bu, gələcəkdə mütləq ediləcəkdi. Çünki 18 oktyabr bizim xalqın, ölkəmizin müstəqillik günüdür. Bunu necə ola bilər ki, qeyd etməyəsən?! Çox absurd bir durum yaranmışdı. Heç xalqa, dövlətə aidiyyəti olmayan günləri qeyd edirdilər, amma Müstəqillik Günü kənarda qalmışdı. Azərbaycan xalqının ən önəmli sayılan iki bayramı var- Novruz və Müstəqillik Günü. Hər iki bayram da yüksək səviyyədə qeyd edilməlidir”. 
Müstəqillik aktına qol çəkən digər istiqlalçı deputat Tahir Kərimli də xəbəri eşidib, çox sevindiyini bildirdi: “Bir qədər də rahatlıq tapdım. Bu, tək bizim keçmişimizə deyil, həm də gələcəyimizə aid bir məsələdir. Bu, mənim ümidimi də artırdı. Gürcüstan prezidenti Mixail Saakaşvili də bu məsələyə toxunmuşdu. Onun açıqlamasından sonra yenidən belə bir niyyətin olmasını alqışlayıram”. 
Müstəqillik Aktında imzası olan deputat Sabir Rüstəmxanlı da bildirdi ki, 18 oktyabrın yenidən qeyri-iş günü kimi qeyd edilməsi doğru addım olar: “Hesab edirəm ki, 18 oktyabr bizim tariximizin ən parlaq günlərindən biridir. SSRİ kimi bir imperiyadan qopmaq, dövlət müstəqilliyini bərpa eləməyin özü təzədən dövlət qurmağa bərabər bir işdir”. S.Rüstəmxanlı eyni zamanda hesab edir ki, 18 oktyabr günündə xidməti olan adamların zəhməti 1918-ci ildə Azərbaycan Xalq Cümhuriyyətini quranların xidmətlərindən az deyil: “Onların da tariximizdə, taleyimizdə çox böyük rolu olub, 1991-ci il 18 oktyabrda bu işi görənlərin də. Ona görə də bu günün bayram günü kimi qeyd olunması çox vacibdir”.
İstiqlalçı deputat Mirmahmud Mirəlioğlu isə məsələyə münasibət bildirərkən dedi ki, əvvəl-axır haqq yerini tapmalıdır. Onun fikrincə, 18 oktyabr Azərbaycanın şərəf tarixidir: “Əslində biz burda hüquqi varisliyin bünövrəsini qoymuşuq. Əvvəl bu gün bayram kimi qeyd olunurdu, sonradan ləğv olundu”. M.Mirəlioğlunun sözlərinə görə, 18 oktyabrın yenidən qeyri-iş günü kimi qeyd olunması barədə nəzərdə tutulan qərar Azərbaycan hakimiyyətinin islahata gedən yolundakı addımlarından hesab oluna bilər: “Ara-sıra belə məsələlər olacaq. Bunlar təqdir olunan məsələdir”.

Günay MUSAYEVA

“Yeni Müsavat” qəzeti

2010-cu ildən Azərbaycanın siyasi səhnəsinə çıxan yeni gənclik bu ilin ilk izdihamlı mitinqini keçirdi. Etiraz aksiyası razılaşdırılmış mitinq şəklində baş tutdu və ölkə gəncliyinin aktiv kəsimi bu nümayişdə yüksək səviyyədə iştirak etdi. Aramsız yağan qara, soyuğa, hər cür hava müxalifətinə, mitinq meydanının uzaqlığına baxmayaraq, demokratik düşərgədə birləşən gənclər tarix yazmağı bacardılar.

Hələ 2011-cu ildən etibarən güclənən gənclik hərəkatı 2 aprel mitinqindən sonra Gənclərin Hüquqlarını Müdafiə Komitəsini (GHMK) yaratmışdı. Müxalifət partiyalarının gənclər təşkilatları və o cümlədən müstəqil gənclər qurumları bu komitədə bir araya toplaşıb.

Aksiya yaxşı təşkil olunmuşdu. Mitinqə gələnlərin hərəkətini nizamlayan, jurnalistlər üçün uyğun şərait yaradan ayrı-ayrı fərdlər müəyyənləşdirilmişdi. Tribunada səsgücləndiricilər qaydasındaydı. Ən diqqətçəkən məqamlardan biri hazırlanan plakatların, şüarların rəngarəngliyi idi – “Qalx ayağa Azərbaycan, ümidlərimin üstündə oturmusan!”, “Siyasi məhbuslara azadlıq!”, “Analoqlu təhsil istəyirik!”, “YAP-sız həyat istəyirik!”,  “Təhsildə rüşvətə yox deyirik!”, “Əlinizi xalqın cibindən çəkin”, “Oyun bitdi”, “Yetər artıq, səsimiz boğma”, “Bizə “Eurovision” yox, Qarabağ lazımdır”, və s.

“İstefa” demək qadağandır

GHMK-nin öncədən müəyyənləşdirdiyi taktikaya əsasən martın 17-nə təyin olunan mitinq hakimiyyətlə razılaşdırılmış olmalı idi. Bakı Şəhər İcra Hakimiyyətinin sanksiyası ilə mitinqə Səbayel rayonu, 20-ci yaşayış sahəsindəki sürücülük məktəbinin stadionu ayrılmışdı. Yağan qara, soyuğa baxmayaraq Bibiheybət yaxınlığında yerləşən stadiona minlərlə gənc toplaşdı. Aksiya keçirilən əraziyə xeyli sayda polis qüvvələri də cəlb olunmuşdu. Mülki geyimli naməlum şəxslər arasında çəkiliş aparanlar, tribunada çıxış edənlərin ad-soyadlarını qeydə alanlar, aksiyada provokasiya yaratmağa təşəbbüs göstərənlərə qədər rast gəlmək olardı.
Hətta stadionun arxasındakı yarımçıq tikilinin yuxarı mərtəbəsindən haralarasa “canlı reportaj” verənlər də var idi.

Öncə polis aksiyanı kənarda tamaşa edirdi və heç bir müdaxilə yox idi. Yalnız aksiya ərzində “İstefa” və “Davam edir 37″ şüarı səsləndirəndə polis tədbirin təşkilatçılarına irad tutdu ki, bu ifadələr işlədilməsin. Əsasları da bu oldu ki, gənclərin mitinqlə bağlı müraciətlərində bu şüarlar göstərilməyib. Mitinq təşkilatçıları deyilənə əməl etdilər.

Gənclərdən rejimə ismarış

Aksiyada çıxış edənlər bildirdilər ki, vətəndaşların mülkiyyət hüququnu pozan, 18 ildə Qarabağ problemini həll edə bilməyən hakimiyyət istefaya getməlidir. Yağmurlu hava şəraitinə baxmayaraq, aksiya gələnlərin sayı getdikcə artırdı.

Mitinqi Vətəndaş Həmrəyliyi Partiyası sədrinin gənclər üzrə müşaviri Samir Əsədli aparırdı. O, giriş nitqində hakimiyyətin insan haqlarını boğmasından, ölkədə sərbəst toplaşma azadlığının təmin olunmamasından danışdı: “Buna baxmayaraq Azərbaycanın fəal gəncliyi bu şəraitsiz, şəhərdən kənarda olan meydana yığışıb sözünü deyir. Mübarizəmiz davam edəcək. Vicdan məhbuslarını azad etməyən, insanların evlərini başına uçurub öz hakimiyyətini yıxılan evlər üzərində quran rejimə biz ”yox” deyirik. Ölkə gəncliyi rüşvətsiz təhsil, iş, normal əmək haqqı, firavanlıq istəyir. Mən bu qədər gəncin bu hava şəraitində gələcəyini gözləməzdim. Əslində bu, hələ aktiv gəncliyin bir hissəsidir”.

Müsavat Partiyası Gənclər Təşkilatının sədr müavini Səxavət Soltanlı çıxışında dedi ki, İlham Əliyev hakimiyyətinin siyasi məhbusları azad etməməsi başadüşülən deyil: “Hakimiyyəti bütün vicdan məhbuslarını azad etməyə çağırıram. 18 il ərzində torpaqları işğaldan azad edə bilməyən hakimiyyət istefa verməlidir. Azərbaycan səfalət, zülmət içindədir. Bu gün bu qədər gənc kefindən bura toplaşmayıb. Təhsili, savadı, dünyagörüşü olan gənclərin hüquqları pozulur, onlara şərait yaradılmır. Hakimiyyət düşünür ki, biz stadiona yığışmaqla fəaliyyətimiz məhdudlaşır. Əsla. Bu, sadəcə nümunədir ki, gənclik hakimiyyətdən narazıdır”.

Daha sonra “Dalğa” Gənclər Hərəkatının sədri Xanım Yadigarlı çıxış edib dedi ki, onlar heç bir siyasi partiyanı dəstəkləmirlər, onlar rüşvətsiz təhsil istəyirlər. O, çıxışını “Təhsildə rüşvətə yox!” şüarı ilə bitirdi.

AXCP Gənclər Komitəsinin sədri Əbülfəz Qurbanlı isə dedi ki, Azərbaycan hakimiyyəti gəncləri aldadır. O, onlarla gəncin siyasi məhbus kimi həbsxanalarda, “qul bazarı”nda olduğunu qeyd etdi. Ə.Qurbanlı Azərbaycan gəncliyinin hazırda ölkədəki ədalətsizliyə və haqsızlıqlara qarşı birlik nümayiş etdirməsindən danışdı. O, 17 mart mitinqinin bir başlanğıc olduğunu dedi və qarşıdakı hədəflərdən danışdı.

“Azərbaycan iqtidarı ölkədə daha müxalifətin qalmadığını bəyan edirdi. Bu gün biz sübut etdik ki, müxalifət var, onun mübarizəsi davam edir” – deyə Qurbanlı bildirdi.
Onun çıxışından sonra aksiya iştirakçıları “Azərbaycan!” şüarları səsləndirdilər. Aksiyada dindarların həbs olunması, jurnalistlərin şantaj olunması, onların şəxsi həyatına müdaxilə olunması pisləndi.

İşıqlar kəsildi, dava düşdü və…

ADP gənclər təşkilatının sədri Cəmil Hacıyev sovet banklarında batan əmanətlərin qaytarılması zamanı yol verilən ədalətsizlikdən, gənclərin sosial problemlərindən bəhs etdi. Bildirdi ki, hakimiyyətin 18 ildə bir uğuru da yoxdur: “Gənclik bu gün narazı olmasaydı, bura gəlməzdi. Ölkə problemlər içində boğulur”. 
“NİDA” Gənclər Hərəkatının nümayəndəsi Üzeyir Məmmədli isə Azərbaycan ordusundakı vəziyyətə toxundu və iqtidarın Qarabağ faktından hakimiyyətdə qalmaq üçün istifadə etdiyini vurğuladı.

VHP Gənclər Təşkilatının nümayəndəsi Emil Bağırov da çıxışında hakimiyyətin təhsil siyasətini pislədi.

Bir qədər sonra mitinq keçirilən əraziyə verilən elektrik enerjisi kəsildi. Bu, aksiyaçıların etirazına səbəb oldu. Onlar hakimiyyət əleyhinə şüarlar səsləndirdi. Sonra generator vasitəsilə mikrofonlar işə salındı və çıxışlar, şüarlar davam etdi.

“İnsan Haqları” Klubunun  nümayəndəsi Natiq Cəfərli mitinqin bu ərazidə keçirilməsinin özəlliyindən söz açdı: “Hamı gördü ki, Bakı təkcə “Torqovı”dan ibarət deyil, təkcə mərkəzdəki fəvvarələrlə, bulvara döşənən metlaxlarla bitmir. Gördülər ki, şəhərin mərkəzindən kənara çıxan kimi yollar bərbad gündədir, heç bir yenilik yoxdur. Hakimiyyət öz ailəsinin və yaxınlarının mənafeyinə yox, bütün millətə xidmət etməlidir”.

“Azad Gənçlik” Təşkilatının İdarə Heyəti üzvü Məcid Mərcanlı da çıxışında hakimiyyətin uğursuz siyasətini tənqid etdi.

Sonda “Müsbət Dəyişiklik” Hərəkatı İdarə Heyətinin üzvü Rəşad Həsənov çıxış etdi, “Azad Gənçlik” Təşkilatının sədri Ülvi Həsənli mitinqin qətnaməsini oxudu və mirinq bağlı elan edildi.

“Yeni Müsavat”