Category: Arxiv

Demokratiyaya Yardım Fondu İctimai Birliyinin təşkilatçılığı ilə keçirilən “10 qəpik” kampaniyası davam edir. Bu barədə məlumatı “Yeni Müsavat”a Vətəndaş Həmrəyliyi Partiyası Gənclər Təşkilatının sədri Pünhan İmamlı verib. Onun sözlərinə görə, elan olunan ünvanlarda ianələrin toplanması bayram günlərində də davam etdirilib: “Biz eyni zamanda haqsız yerə həbs olunan fəallarla bağlı da müdafiə kampaniyası aparırıq. Aksiyalarda cərimələnənlər bağlı keçirilən “10 qəpik” kampaniyasına cəmiyyətin marağı həddindən artıq böyükdür”.

P.İmamlının sözlərinə görə, eyni zamanda onlar İctimai Palatanın may ayında keçirməyi planlaşdırılan aksiyaya da hazırlıq görürlər: “Gənclər təşkilatları ilə tez-tez toplaşıb fikir mübadiləsi aparırıq. Eyni zamanda İctimai Palatanın may ayında keçirəcəyi aksiyaya hazırlıq görürük”.

Qeyd edək ki, sonuncu dəfə belə xeyriyyə kampaniyasını İctimai Palata keçirib. Müsavat Partiyasında keçirilən kampaniyada müxalifətçilərlə yanaşı, ayrı-ayrı QHT rəhbərləri, hüquq müdafiəçiləri, siyasi partiyaların rayon təşkilatlarının sədrləri iştirak edərək topladıqları ianələri yardım fonduna təqdim ediblər.
Bundan əvvəl isə “Əsgər ölümlərinə son!”, “İsmayıllıya dəstək” aksiyalarında cərimələnən fəalların cərimələrinin ödənilməsi məqsədilə keçirilən “5 qəpik” kampaniyasında minlərlə insan iştirak etmişdi.

Bu gün sonuncu – İlaxır çərşənbədir. Bu çərşənbəyə xalq arasında İlaxır çərşənbə ilə yanaşı, “Yer çərşənbəsi” və ya “Torpaq çərşənbəsi” də deyirlər. İnanclara görə “Torpaq çərşənbəsi”ndə torpaq artıq əkinə hazır olur və ona toxum səpmək olar. 

İlaxır çərşənbə 4 çərşənbənin mərasim, ayin, etiqad, oyun və şənliklərlə ən zəngin olanıdır. Bu vaxt əvvəlki çərşənbələrdə icra olunan bütün ayin və mərasimlər daha şən, böyük xalq şənlikləri kimi təkrar qeyd olunur. Mərasim sübh tezdən suya tapınma ayini ilə başlayır. İnsanlar su kənarına gedir, su üstünə atlanır, dərdini, arzusunu axar suya deyir və ondan imdad diləyirlər.

Bütün günü davam edən mərasim axşam şənlikləri ilə daha da gurlaşır. Bu axşam üzərlik yandırılır, tonqallar alovlanır, tonqal üstündən tullanılır, bacalardan torbalar sallanır, qurşaq atılır, qulaq falları qurulur. Subaylar qonşu evlərin qapısının arxasında gizlənərək ilk eşitdikləri sözə uyğun təzə ildə onları gözləyən hadisələri öncədən bilməyə çalışırlar. Bu səbəbdəndir ki, həmin günün axşamı yalnız yaxşı sözlər danışılması adət hesab olunur. 

Bayram günü ən çox görülən işlərdən biri də müxtəlif fallardır. Bu fallara adətən gənc qızlar baxırlar. 

Duzlu kökə yemək. Axır çərşənbə axşamı duzlu kökə yeyib yatırlar, su içmirlər. Gecə yuxuda (susuzluqdan) su görünür: içməyə kimsə su verir. Guya, həmin su verən adam yuxu görənin qismətidir.

Cavan qızlar bir yerə yığışıb bir qaba su tökürlər. Əllərindəki üzükləri çıxarıb saçlarına salırlar. Niyyət tutub üzüyü suyun üstündən keçirirlər. Üzük fırlanmağa başlayır və qabın divarlarına dəyir. Üzük neçə dəfə qaba dəyirsə, sayırsan. Demək o yaşda da gəlin gedəcəksən.

Axır çərşənbə gecəsi ürəyində niyyət tut yat. Gecə yarısı yuxudan dur və şamı yandır. Şamı götürüb güzgüyə yaxınlaş. Güzgüdə gələcək qismətini görəcəksən. Amma gərək qorxmayasan. Qorxsan bu niyyətin baş tutmaz.

Ilin axır çərşənbə axşamı ana uşaqlarının başından tük qırır və axar suya atır. Bir qab həmin yerdən su götürür və uşaqlarının üstünə çiləyirsən. Guya ki, bu su təmizlik, sağlamlıq, paklıq gətirir. Həmin ili uşaqlar xəstələnmir.

Qız sakit, heç kimlə danışmadan ləyənə su tökür. Əlinə bir böyük güzgü alır. Həmin güzgüdə aya baxır. Sevdiyi oğlanın şəklini qız görərsə bu onun xeyrinədir. Demək, təzə il onun üçün uğurlu olur, mətləbi həyata keçir. Bütün bu vaxt qız danışarsa, fal düz çıxmaz.

İlaxır çərşənbəniz mübarək!

VHP sədri, millət vəkili Sabir Rüstəmxanlı partiya sədrinin müşaviri Yusif Salmansoyu 62 yaşı münasibəti ilə təbrik edib. Təbrikdə deyilir:

“Əziz Yusif bəy!

Yusif Salmansoy adı Azərbaycan cəmiyyətinə Milli Azadlıq Hərəkatının ilk günlərindən, 1988-ci ildən bəllidir. Həmin dövrdə Azərbaycanın ən böyük və qaynar şəhərlərindən olan Sumqayıtda əhalinin iradəsinin ifadə olunması və milli azadlıq ideyalarının təbliğində Sizin adınız xüsusilə çəkilirdi. Bakıda tədbirlərin, görüşlərin keçirilməsinə maneələr yaradılanda, insanlarla təmaslarımız Sumqayıtda həyata keçirilirdi və bu tədbirlərin təşəbbüskarlarından, zəhmətini çəkənlərdən, bütün təzyiqlərə və təqiblərə baxmayaraq, sinəsini qabağa verənlərdən biri olaraq xidmətləriniz tükənməzdir.

Azərbaycan Xalq Cəbhəsinin Sumqayıtda təsis olunmasında əməyiniz və uzun müddət AXC Sumqayıt təşkilatına rəhbərliyiniz azadlıq mübarizəmizin hədəfinə çatmasında önəmli rol oynayan amillərdən biridir.

Milli Azadlıq Hərəkatına qoşulan və Azərbaycanın müstəqilliyi uğrunda mübarizəyə qalxan insanlar arzularına çatdıqdan sonra növbəti hədəfi müəyyənləşdirdilər: Azərbaycanda sivil vətəndaş cəmiyyəti, azad, şəffaf seçki mühiti, demokratik sistem yaratmaq. Bu mübarizə azadlıq mübarizəsindən daha uzun prosesdir və daimi müqavimət, mübarizə, həmçinin əzmkarlıq, iradə, səbir və ləyaqət istəyir.

Çox şadam ki, Siz Azərbaycanın demokratikləşməsi uğrunda aparılan mübarizədə varsınız və bu mücadilənizi VHP sıralarında davam etdirirsiniz. Sizin VHP Siyasi Şurasının üzvü  və VHP sədrinin müşaviri kimi gördüyünüz işlər, təşkilatçılıq qabiliyyətiniz bu mübarizəyə verilən böyük töhfədir.

Əziz Yusif bəy!

Bu gün Sizin 62 yaşınız tamam olur və bu yaşınızda belə gənclik enerjisi, qətiyyəti və ruhu ilə ölkəmizin firavanlığı uğrunda çalışmalarınız ürəyinizdə yaşatdığınız Vətən sevgisinin görüntüsüdür. Sizi ad gününüz münasibəti ilə təbrik edir, bu sevginin daimi olmasını, mübarizənizin hədəfə çatmasını arzulayıram.

Xoş arzularla,

Sabir Rüstəmxanlı” 

Bu gün Ermənistan Silahlı Qüvvələrinin Xocavənd rayonunun Qaradağlı kəndini işğal etməsindən 21 il ötür. APA-nın məlumatına görə, erməni hərbi birləşmələri Rusiya Silahlı Qüvvələrinin Xankəndidə dislokasiya olunan 366-cı motoatıcı alayının hərbi texnikasının və canlı qüvvəsinin dəstəyi ilə 1992-ci il fevralın 15-dən başlayaraq azərbaycanlılar yaşayan Qaradağlı kəndinə hücum edib. İki gün çəkən ağır döyüşdən sonra mühasirəni yaran ermənilər fevralın 17-də kəndi işğalı ediblər.
 
İşğal zamanı kənd tamamilə dağıdılıb, dinc, əliyalın əhaliyə, günahsız uşaqlara, qadınlara və qocalara amansızcasına divan tutulub. Faciə nəticəsində Qaradağlıdan girov götürülən 117 kənd sakinindən 80-ə yaxını xüsusi amansızlıqla qətlə yetirilib, 6 nəfər itkin düşüb, 9 nəfərin isə şahid ifadələrinə əsasən, əsir götürüldüyü sübut olunub.

Şahid ifadələrinə görə, əsir götürülən azərbaycanlıların 43 nəfəri Xankəndinin 2 kilometrliyində güllələnib. Sonra isə onlardan bəzilərinin başları kəsilib.
 
Qaradağlı indi də işğal altındadır.

Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı İraq parlamentinin deputatı, parlamentin Sadr Qrupunun Türkmən təmsilçisi Əkrəm Fevzi Tərzioğlu ilə görüşüb.

Görüşdə Azərbaycan-İraq əlaqələri, İraqdakı türkmən əhalinin vəziyyəti və onların hüquqları ilə bağlı məsələlər müzakirə edilib.

Müzakirədə həmçinin VHP ilə Sadr Qrupunun əlaqələrinin genişləndirilməsi də müzakirə edilib.

Görüşdə VHP Siyasi Şurasının üzvü Samir Əsədli və Ali Məclisin üzvü Niyaz Qubadov da iştirak ediblər.

Qeyd edək ki, Sadr Qrupu İraq parlamentində 40 millət vəkili və İraq hökumətində 8 nazir ilə təmsil olunur.

VHP sədri, millət vəkili Sabir Rüstəmxanlı partiyanın Siyasi Şura üzvü Şuşa rayon təşkilatının sədri Ofeliya Rəşidqızını yubileyi münasibəti ilə təbrik edib. Təbrikdə deyilir:

“Əziz Ofeliya xanım!

Harda işləməsindən, kim olmasından asılı olmayaraq, xanım ilk növbədə xanımdır, anadır. Ananın yaşı soruşulmaz, çünki cənnət onların ayaqları altındadır, cənnətin olduğu yerdə isə vaxt və zaman məfhumu yoxdur, insanlıq var, əməllər var, xeyirxahlıqlar var.

Ona görə də sizin bu yubiley yaşınızı təbrik edərkən ilk növbədə etdikləriniz, əməlləriniz göz önünə gəlir və bunları saymaqla bitməz.

Siz Azərbaycanın ən dilbər güşəsində – Şuşa şəhərində anadan olmusuz. Min təəssüflər olsun ki, artıq neçə illərdir əziz günləri Şuşasız qarşılayırsız. İnsanı anasız qoymaq bir günahsa, ananı anasız qoymaq min günahdır. Vətən anadır və işğalçı düşmənlərimiz illərdir analarımızı öz Anasına həsrət qoyub. Bu nisgil sizin də, bizim də ürəyimizdə silinməz iz buraxıb. İnanıram ki, yurdumuz azad olacaq, o torpaq anaları, balaları yenə qoynuna alacaq; ancaq Yurdun illərlə əsirlikdə qalması bizi heç vaxt tərk etməyəcək…

Azərbaycan anası siyasi taleyinə o qədər də həssas yanaşmır. Buna görə də Sizin kimi anaların ictima-siyasi fəaliyyəti bir nümunədir. Bilirəm ki, Sizin ən böyük hədəfiniz Vətənin bütövlüyüdür və bu baxımdan Vətəndaş Həmrəyliyi Partiyasını seçməyiniz də təsadüfü deyil. Yurdun bütövlüyü də, dərdlərimizin əlacı da vətəndaş həmrəyliyindən başlayır. Biz həmrəy olduqca, milli birliyimiz var ikən tarixi milli qürurumuzu qaytara və Azad, Bütöv, Sivil Azərbaycanın vətəndaşı ola bilərik.

 

Əziz Ofeliya xanım!

Sizi yubileyiniz münasibəti ilə təbrik edir, can sağlığı, xoşbəxtlik arzulayıram. Sizin üçün ən böyük arzumuz növbəti ad günlərinizi doğma dədə-baba torpağınızda qarşılamağınız, nisgildən qurtarmağınızdır.

 

Xoş arzularla, Sabir Rüstəmxanlı

VHP sədri, millət vəkili

Bu gün VHP mərkəzi qərargahında Siyasi Şuranın toplantısı keçirildi. SŞ-nın müzakirəsinə ölkədəki ictimai-siyasi vəziyyət və VHP-nin prezident seçkilərində iştirakı, qurultaya hazırlıq, təşkilati məsələlər daxil edilmişdi.

Ümumi müzakirələrdən sonra Siyasi Şura üzvlərinin yekdil razılığı ilə VHP-nin prezident seçkilərində iştirakı barədə qərar qəbul olundu. Seçkilərdə iştirakın forması isə iyun ayına nəzərdə tutulan VHP-nin Ümumrespublika konfransının müzakirəsinə tövsiyyə olundu.

VHP-nin növbəti qurultayına hazırlıq və rayon təşkilatlarının konfransının keçirilməsi məsədilə 7 nəfərdən ibarət Təşkilat Komitəsi yaradıldı.

VHP sədri Sabir Rüstəmxanlı 21 fevralın Ana Dili günü olduğunu vurğuladı və dövlət dilinin qorunması vacibliyindən və atılan addımlardan danışdı.

Sonda partiyaya qəbulla bağlı SŞ-ya edilən 19 müraciətə müsbət cavab verildi.

 

VHP Mətbuat və İnformasiya Xidməti  

Vətəndaş Həmrəyliyi Partiyasının sədri, millət vəkili Sabir Rüstəmxanlı VHP Mərkəzi Nəzarət-Təftiş Komissiyasının (MNTK) sədri Felmar Ələkbərovu ad günü münasibəti ilə təbrik edib. Təbrikdə deyilir:

 

«Əziz Felmar bəy!

63  yaşa şərəfli bir ömür yolu keçərək gəlmək, əlinin zəhməti, intellekti ilə ad çıxarmaq, eldə-obada xeyirxah adam kimi tanınmaq, halal yaşamaq hər insana nəsib olan tale deyil. Siz doğulduğunuz Ağdamın Mahrızlı kəndindən yeniyetmə ikən Bakıya gəlib, tələbə həyatına qədəm qoyduğunuz ilk gündən zəhmətə alışmısınız, Neft və Kimya İnstitutunda oxuya-oxuya fəhlə işləmisiniz, halallığın, alın açıqlığının şərəfini yaşamısınız.

Müdriklərdən biri deyir ki, bir insanı tanımaq üçün ona vəzifə vermək lazımdır. Siz Bakı Şin Zovodunun direktoru səviyyəsinə yüksələndə belə öz ləyaqətinizi hər şeydən uca tutmusunuz, saf, şəffaf həyatınıza kölgə salacaq heç bir hərəkət etməmisiniz.

Sizin necə bir vətənpərvər, millətini, xalqını sevən insan olmağınız Məmməd Əmin Rəsulzadənin heykəlini Azərbaycanda ilk dəfə olaraq Bakı Şin Zavodunun həyətində ucaltdırmağınızla yazdığınız şərəfli tərcümeyi-halınızda əks olunub. 1990-cı ilin ilk aylarında Sovet liderinin – Leninin heykəlini uçurub, yerinə Rəsulzadənin heykəlini ucaltmağınız həm cəsarətli addım idi, həm də xarakterinizin göstəricisiydi. Siz heç zaman vəzifənin qulu olmadınız, hər hansı vəzifəni milli mənafeyə, vətənə, dövlətə, millətə xidmət vasitəsi saydınız.

Sizin 1994-cü ildə vəzifədən getməyiniz də təsadüfü deyil. Çünki vəzifəni millətə xidmət vasitəsi sayan sizin kimi insanlar yüksək postlarda qalmağı və millətdən başqa kiməsə qul olmağı öz ləyaqətlərinə sığışdırmırlar.

Əziz Felmar bəy!

Ad gününüzü təbrik edirəm və sizin – ölkəmizin demokratikləşməsi, insan haqları və vətəndaş quruculuğu yolunda mübarizəni VHP sıralarında aparmağınızdan, sıralarımızda olmağınızdan çox məmnun olduğumu nəzərinizə çatdırıram. Çünki bu yaşınızda da gənclik enerjisi və böyük ruh yüksəkliyi ilə mübarizəni davam etdirməyiniz, gənclərə nümunə olmağınız sizin necə insan, necə vətəndaş olduğunuzun bir daha göstəricisidir.

Sizə uzun ömür arzulayır və ölkəmizin firavanlığı, övladlarımızın xoşbəxtliyi naminə apardığınız mübarizədə uğurlar diləyirəm.

 

 Hörmətlə,

Sabir Rüstəmxanlı,

VHP sədri, millət vəkili

 

Azərbaycan ədəbiyyatında adı qranitdən tökülmüş çox yazarlar var. Hamısı da  məhz həyatdan köçdükdən sonra klassik hesab olunublar. Amma öz sağlığında həm modernist, postmodernist, həm də klassik hesab olunan bir ad daha cəlbedicidir. Sabir Rüstəmxanlı adı! Bir dəfə şairin yaradıcılığını analiz edərkən sonda “Sabir Rüstəmxanlı müasir Azərbaycan ədəbiyyatının patriarxıdır!” nəticəsini hasil etdim. Bu fikir əvvəlcə birmənalı qarşılanmadı. Amma sonra çoxları eyni fikri etiraf elədi. Azərbaycanda eyni qədər  gözəl poeziya, həm publisistika, həm də proza nümunələri yarada bilən ikinci bir yazar yoxdur. Digər yazarlarımız bir sahədə yüksək səviyyəli əsərlər yarada bildiyi halda digər sahədə eyni səviyyəli əsər təqdim edə bilməyiblər. Bu çox çətindir deyə. Buna görə də Sabir bəyin təkcə “Xalq şairi” fəxri adı ilə təltif edilməsi tam görünmür. “Göy tanrı”, “Ölüm zirvəsi”, “Difai fədailəri”, “Xətai yurdu” və “Sunami” romanlarından sonra Sabir bəyin həm də Xalq yazıçısı fəxri adını haqq etdiyini düşünürsən. Təəssüf ki, bizdə bir yazara yalnız  bir ədəbi sahə üzrə fəxri ad verilir. Ona da təəssüf ki, Azərbaycanda publisistika sahəsi üzrə ali fəxri ad təsis edilməyib. Halbuki müasir publisistika bir çox məqamlarda poeziya və prozadan daha çox önə çıxa bilir. Hazırda da ədəbi əsər oxucusundan daha çox publisistik yazıların oxucuları var. Mən Sabir Rüstəmxanlını özüm üçün “Ömür kitabı” ilə kəşf etdim. Sonra onun sinəsi Azərbaycan eşqi ilə döyünən çox gözəl şair, daha sonra isə mükəmməl nasir olduğuna əmin oldum. Oxucuları Sabir bəyin “Sunami” romanının sehrindən tamam qurtulmamış, “Əbədi sevda” adlı yeni şeir kitabı ilə qarşılaşdılar. Kitabın tərtibat işlərinə görə “Təhsil-Nəşriyyat- Poliqrafiya” müəssisəsini alqışlamağa dəyər; çox nəfis və yüksək peşəkarlıqla nəşr olunmuşdur. Kitabı oxuyub qurtardıqdan sonra ilk təəssüratım bu oldu ki,“Əbədi sevda” kitabını dəqiq və tam şərh etməklə daha qalın kitablar yaranar. Kitabın hər bölməsi ayrıca bir kitab qədər dəyərlidir. Bölmələrdən  seçmə şeirlərə nəzərən kitab barəsində mükəmməl rəy ifadə etmək çox çətindir.

        “İçimdəki dərd ağacı” bölməsində “Özümə” adlı şeir şairin kimliyinin obrazını yaradır.

                                       Fikri Tanrı yanında

                                       Sözü el amanında,

                                       Ürək dəyirmanında

                                       Kədər üyüdən adam.

        Onu şəxsən tanıyanlar üçün digər şeirlərində əslində Sabir bəyin öz həyatı  misralanır, poetik ifadələrlə təqdim olunur. Şair bu kitaba ayrıca bir ad qoymaq istərdisə onu “Manifest” adlandırması daha dolğun olardı; Sabir Rüstəmxanlının həyat manifesti! Bütünlüklə Vətənə sevgidən  yoğrulmuş, azadlıq mübarizəsində bərkimiş bir şairin şərəfli həyatı. “Torpağı ot deyil, kişi göyərdən Vətən”  üçün “Gərək biz bacaraq qurban verməyi”  deyir şair və “İçindəki dərd ağacına”  söykənir. “Sevincimin nə zamansa ildırımtək vuracağı içimdəki dərd ağacı”  boyda ürək daşıyan şair bir başqa şeirində azadlıq uğrunda şəhid olan hər kəsə ağı deyir, onun dərdini özünküləşdirir. 1990-cı ilin yanvar şəhidlərinə həsr etdiyi misralar daha kövrəkdir.

                          Elə dünən

                          Ilk sevginə doğru yol gedirdin,

                          Ömründə bircə dəfə vəfasız çıxdın –

                          Getdin…sevgilinin yox,

                          Ölümün görüşünə …

      Azərbaycan müstəqillik qazandıqdan sonra milli azadlıq mücadiləsinin indi də  hər kəsin öz içində davam etməli olduğunu önə çəkən şair insan ləyaqətinin daha uca tutulmalı olduğunu vurğulayır. “Hər şeydən daha uca Vətən sevgisidir” deyir.

                       Rütbəsiz yaşamaq olar dünyada,

                       Vətənsiz yaşamaq yaşamaq deyil!

       Qəlbi hər zaman Azərbaycanın ərazi Bütövlüyünə həsrətlə döyünən Sabir Rüstəmxanlı bu kitabında da Cənubi Azərbaycan və Təbriz məhəbbətini nəzmə çəkir, qoca Təbrizi Bakı kimi ayağa qalxmağa çağırır.

                       Qüdrətinə şəkk eləyə bilmədim,

                       Qoca Ərkə ərk eləyə bilmədim,

                       Nə yatırsan, dərk eləyə bilmədim.

                       Ey dünyanı yola salan, Təbrizim,

                       Ey karvandan dala qalan, Təbrizim.

        Cənubi Azərbaycanın paytaxtı sayılan şəhərə digər şairlərimizin yazdığı şeirlərdən fərqli olaraq Sabir bəyin Təbriz poetikasında nisgildən, üzüntüdən və pessimizmdən daha çox mübarizə ruhu, qələbə əzmi və gələcəyə nikbin ümidlər hakimdir. “Məqsədin hara, mənzilin də ora”  deyimi Sabir Rüstəmxanlının  həyat yoludur. Heç nahaq deyil ki, o indi həm də amacı Şimalla Cənubu birləşdirmək olan  Dünya Azərbaycanlıları Konqresinin sədridir. Sabir bəyin bütövlük ideyaları türkçülükdən yoğrulmuşdur. Onun publisistikası  ictimai- siyasi xarakterli şeirlərinə də öz təsirini əsirgəmir və oxucu bir şeirində bir qəzetlik mətləb yükünü anlayır, qəbul edir. Düşmən əsarətində olan torpaqlarımız qarşısında şair özünü xəcalətli sanır və “O torpaq bizləri götürməyəcək!” deyir. Sabir bəyin  namərdliyə, ədalətsizliyə, ləyaqətsizliyə, əclaflığa, rəzilliyə qarşı hayqırtısı təkcə bir şairin deyil, həm də başıpapaqlı hər bir türk kişisinin zəhmidir, hökmüdür.

                                   Peşəsi diz çöküb yalvarmaq olan

                                   Kişi mərhəmətsiz ölsə yaxşıdır.

                                   Əcnəbi payına göz dikən xalqın

                                   Payı Əzrayıldan gəlsə yaxşıdır!

      İnsanlıq adına, türkün böyüklüyünə və soydaşlıq mənsubiyyətinə yaraşmayan naqislikliklərə qarşı şairin qəzəbi və nifrəti kitabdakı şeirlərin bir çoxunun əsas qayəsini təşkil edir. “Qiyamət”, “Fürsət”,”Yasaq”  şeirlərində sanki Sabir bəyin düyünlənmiş yumruqları havanı yarır, misralar happy wheels demo ağzından vulkan kimi püskürür. Amma “Anam”, “Tanrıyla görüş”,”Atam yadıma düşür”, “Ayla üz-üzə”, “Tanrının gözü”,”Bacılarım”, “Anamdan ayrılarkən” adlı şeirlərində şair həlimləşir, titrəyir, çənəsi əsir, sanki səsi pıçıltıya çevrilir.  Kitabın “Sevgimə toxunma” adlı bölməsində biz tamam başqa bir Sabirlə qarşılaşırıq. Buradakı şeirlərində o sinəsi insanlıq, övladlıq, aşiqlik, ərlik, atalıq sevgisi ilə çağlayan bir lirik şairdir. “Gəlmə”,”Səni düşünürəm”, “Səadət”, “Sənin gözlərinlə”, “Səs”,”Sən gələndən”,  ”Qış ovqatı” və “Yaz-payız arası” silsiləsindən olan şeirlər xüsusilə diqqəti cəlb edir, oxucunu duyğulandırır. “Dostların qəlbimdə ucalan yeri” bölümündə şairin aşiq ruhu dünyasını dəyişmiş dostlar, millətin böyük və nurlu simaları barəsində xatirələr, ağılar, mərsiyələr pıçıldayır.

                                    Sızlayır qarşıda payız yelləri,

                                    Sanmasın yenidən doğulacaqdır.

                                    Tufandan yorulmuş dərya kimidir

                                    Özü öz içində boğulacaqdır.

       “Təklik”  bölümündə şair  yüz yaşlı müdrik qoca qədər dərin fəlsəfi duyğulara qapılır, həyat, insan, ölüm  barədə minilliklərə söykənən misralar doğur.

                                   Nə keçmiş, nə gələcək, ömür keçdi an kimi,

                                   Səssizlik örtür məni, qranit yorğan kimi!

        “Qoşmalar, gəraylılar” bölümündə isə Sabir Rüstəmxanlı əlində telli saz tutmuş aşıq kimi meydan sulayır, gözəl deyimlərilə ruhu oxşayır. Bir kitabda bu qədər rəngarəng ampluada çıxış edə bilən şairin bir dünya yüklü təfəkkür və qəlb sahibi olması bir daha aydınlaşır.  Günümüzün acı həqiqətidir, şair var ki, cəmiyyətin normalarına, adət-ənənələrə, tabulara qarşı şoular yapmaqla, televizor ekranlarında məskunlaşmaqla və ya şairlər var ki, yalnız iqtidara və ya müxalifətə yarınmaqla, şair də var ki, şeirlərinə mahnılar yazdırmaqla məşhurlaşır. Sabir Rüstəmxanlı bunların heç birinə uyğun  şair deyil. Amma onun məşhurluq çəkisi qeyd etdiyim yollarla tanınan şairlərin cəm halında hamısından daha ağır gələr. Çünki onun məşhurluğu milyonlarca insanın toplaşdığı ümumxalq  mitinqlərindən, Milli Məclis tribunalarından, dünya tele-ekranlarından və onlarca  ağır çəkili kitabından vəsiqə alır. Sözləri Sabir Rüstəmxanlıya məxsus olan çox az mahnıya rast gəlmişəm. Eldar Mansurovun və Gülər Həsənovun bəstəsində. Təkcə ona görə yox ki, daha çox zövqsüzlüyə xidmət edən əksər müasir mahnılara  onun şeirlərinin dərin məna yükü uyğun deyil, məncə ona görə ki, hər bəstəkarın  Sabir Rüstəmxanlının sözlərinə mahnı bəstələməsinə hünəri çatmır. Hər kəs türkiyəli sənətçi Əhməd Şəfəq olmaz ki! Ona yalnız sinəsi özü qədər müstəqillik, azadlıq, türkçülük atəşi ilə yanan sənətçilər yanaşa bilər. Həm də ona görə ki, Sabir bəyin şeirlərinin öz musiqisi, öz mahnısı var. Barış Manço kimi, Azərin kimi, Araz Gursəs kimi müğənnilər onun şeirlərini götürüb, bir elə əlavə bəstəyə ehtiyac bilmədən, gözəl bir mahnı kimi rahatca oxuya bilərlər.           

                                               “Vətənim yaralı, elim yaralı,

                                                Ürəyim yaralı, əlim yaralı.

                                                Qaçqınam, köçkünəm –

                                                Halımı sorma!

                                                Sıx məni köksünə -halımı sorma!

       Sabir bəyin kitaba daxil etdiyi “Dünya ovcumdadır” və “Poemalar” bölümü ayrıca və geniş diqqət, yozum və şərhlər tələb edən gözəl misralarla zəngindir. Bu bölmələrdəki şeirlər yaşanmış gerçək həyatdan və bir yolçunun çiyninə  atdığı xurcun dolusu ürfandan qidalanır. Bu səbəbdən Sabir bəyin kitabını birnəfəsə və qısa zaman ərzində oxuyub bitirmək mümkün və doğru deyil. Oxuduqca “Əbədi sevda” adlı şeirinin ruhunun bütün səhifələrdə dolaşdığının şahidi olursan. Bu şeir  haqlı olaraq kitabın adı səviyyəsinə qaldırılmışdır. “Əbədi sevda” şeiri  Sabir Rüstəmxanlının öz şəxsində hər bir Azərbaycan türkünün dəqiq həyat amalını kodlaşdırır. “İcazəli cəngavər, qalstuklu qoyunlar mənim ruhumu duymaz!” deyən şair türk ruhunu anlamaqdan ötrü elmli, savadlı olmağı, gənclik və ya ahıl yaşı da əsas tutmur. Bəs o nədir? Onu haram nütfədən  doğulan, haram tikə yeyən, “bir çiçəyin mehrinə sıxılıb ağlamayan”  kəslər anlamaz. Göy`lərə bağlanmayan, sərhədsiz düşünə bilməyən, Çindən Qobustanacan yazılı daşların toz basmış güzgüsünü silib həqiqi tarixi görə və Ərgənəkon  eşqindən yeni günlər  doğa bilməyənlər bir şairin – bir türk oğlu türkün böyük ruhunu duya bilməz.

                                   Altaydan Balkanlara

                                   Tanrıdan Savalana,

                                    uzanan tarix yolu

                                    qopuz simləri kimi

                                    hələ kökdən düşməyib,

                                    biz göylərdən gəlsək də,

                                    yolu mən ağartmışam,

                                    yollar göydən düşməyib.

      Azərbaycan müstəqillik qazandıqdan sonra  ortaya atılmış etnik separatçılar, geriyə dönmək iddiasında olan kommunistlər, demokrat, islahatçı, qlobalist maskası taxmış, faşist təfəkkürlü  qullar, Azərbaycanın müstəqilliyindən bəhrələnməkdə olan “hədiyyə cocuqlar”ı  bu boyük yolu  duya bilməz. Tanrıya qədər yol çəkmək  arzusunda olan böyük ruh  daşıyıcıları olan insanlar əbədi sevda aşiqləridir. Sabir Rüstəmxanlı  onlardan biri, bizim üçün öndə gedənidir. Öndə gedən şəxslərin nurundan yollar işıqlanar, ziyası gələcək günlərə, illərə qədər çatar.

 

                                                                                                  Hafiz Mirzə

                                                                                           www.hafizmirza.com

Bu gün saat 15:00-da VHP-nin mərkəzi qərargahında ABŞ-ın Azərbaycandakı səfirliyinin birinci katibi Rocer C.Riqaud VHP sədri, millət vəkili Sabir Rüstəmxanlı ilə görüşdü.

Görüşdə seçki ilində Azərbaycandakı və bölgədəki vəziyyət, ictimai-siyasi proseslərdə Vətəndaş Həmrəyliyi Partiyasının mövqeyi müzakirə olundu. Sabir Rüstəmxanlı yenicə qayıtdığı Almaniya səfəri və Dünya Azərbaycanlıları Konqresinin fəaliyyəti, həmçinin Gülüstan müqaviləsinin 200 ilinin tamam olduğu bu ildə hələ də azərbaycanlıların bölünmüş xalq statusu almaması, Güney Azərbaycan, İraq türklərinin durumu, DAK-ın qarşısına qoyduğu məqsədlər və s. haqqında ətraflı məlumat verdi.

 

VHP Mətbuat və İnformasiya Xidməti