Vətəndaş Həmrəyliyi Partiyası

Category: Açıqlama

  • Fəzail İbrahimli: “Ordumuz ermənilərin növbəti məkrli oyununu iflasa uğratmaqla, başlarında çatlatdı”

    “Ermənistan ordusunun avqustun 23-də Azərbayanın Goranboy istiqamətində həyata keçirdiyi təxribat təsadüfi hadisə deyildi. Bu növbəti məkrli və hiyləgər oyunların reallaşmasına xidmət edirdi. Ancaq Azərbaycan ordusu hər dəfə olduğu kimi, bu dəfə də ermənilərin oyununu pozaraq, öz başlarında çatlatdı”.

    Bunu “Ölkə.Az”a açıqlamasında  Milli Məclisin Sədr müavini Fəzail İbrahimli deyib.

    Vitse-spikerin sözlərinə görə, bu hadisələrin gedişinə, hansı zamanda baş verdiyinə diqqət yetirsək, o zaman aşağıdakı  məqamları üzə çıxara bilərik. “Birincisi, Ermənistan müdafiə naziri Davit Tanoyanın “Armiya-2020” hərbi-texniki forumda iştirak etmək üçün Moskvaya səfəri zamanı baş verməsi də təsadüfi xarakter daşımır. Məqsəd də ondan  ibarət olub ki,  baş verən hadisələrə görə  forumda səsinin tonunu qaldıraraq Azərbaycanı ittiham etsin.Amma alınmadı. Uğursuzluğa düçar oldular.

    İkincisi isə bu Ermənistan tərəfinin indiyədək davamlı olaraq həyata keçirdiyi təxribatların davamıdır”.

    Vitse-spiker hesab edir ki, Ermənistan hakimiyyətinin son zamanlarda davamlı olaraq istər daxili və xarici siyasətində, istərsə də  Qarabağ məsələsində yürütdüyü siyasətdə məğlubiyyətə uğraması və bunun nəticəsində cəmiyyətdə pis vəziyyətə düşməsi ilə barışa bilmir. “Çünki hər  dəfə məğlubiyyətə uğramaqla indiki hakimiyyət həm hakimiyyətlərinin zəifləməsinə, həm ölkədə ictimai-siyasi vəziyyətin gərginləşməsinə və nəticə etibarı ilə  xalqın bu hakimiyyətin üzərinə qalxmasına rəvac verir.  Lakin atılan hər addım  onları daha da uçuruma yuvarlayır.  Artıq Ermənistanın Azərbaycana qarşı işğalçılıq siyasəti və bu istiqamətdə həyata keçirilən  təxribat  uğursuzluğa düçar olur. Bunun da səbəbi  Azərbaycanın güclənməsi, ordusunun qüdrətli  və ayıq-sayıq olmasıdır. Ermənistan artıq anlamalıdır ki, Azərbaycan 90-cı illərin Azərbaycanı deyil. Bu gün Azərbaycan ordusu Ermənistanın isətnilən hərkətinin qarşısını almağa qadirdir.  Azərbaycan ordusu bunu  son illərdə bir neçə dəfə sübut edib.

    Məsələn götürək 2016-cı il Aprel döyüşlərini. Həmin döyüşlərdə ermənilərin 20 ildən artıq müddətdə  formalaşdırdığı Dağlıq Qarabağ  əbədi və əzəli bizimdir  ideologiyaya son qoyularaq, darmadağın edildi. Onlarda belə bir fikir formalaşmışdı ki, artıq torpaqlar alınıb və kimsə onu geri ala bilməz. Azərbaycan da bununla razılaşıb. Məsələnin qalır bircə beynəlxalq səviyyədə həllinə… Amma Aprel döyüşləri bu  fikri tamamilə də alt-üst etdi. Erməni xalqı Dağlıq Qarabağ kartı üzərində hakimiyyətə gələn “Qarabağ” klanını hakimiyyətdən silib-süpürüb atdı.  “Qarabağ” klanını hakimiyyətdən uzaqlaşdıran Paşinyan xalqa yağlı vədlər verdi və xalq da ondan vədlərinin yerinə yetirilməsini tələb edir. O da bunu bacarmır. Xalqın istədiyini xalqa verə bilmir. Ona görə də çətin duruma düşən Paçinyan vəziyyətdən yeganı çıxış yolu kimi Azərbaycanla vəziyyəti gərginləşdirməklə diqqəti yayındırıb, hakimiyyətinin müddətini uzatmağa çalışır. Lakin bu da çox çəkməyəcək. Bunun bir çox səbəbi var. Bunlardan biri də ondan ibarətdir ki, Paşinyanın üzləşdiyi durum özündən əvvəlki hakimiyyətlərin  vəziyyətindən fərqlidir. Əgər Paşinyandan öncəki  dövlət başçılarının bir çoxunun yürütdüyü siyasət birmənalı Rusiyayönümlü olduğundan tamamilə fərqli idi. Onların Ermənistanda bütün siyasi  fəaliyyətlərinin nizamlanmasını və idarə olunmasını Moskva müəyyən edirdi.

    Paşinyan isə  sələflərindən fərqli olaraq üzdə özünü Rusiyanın dostu aparsa da, reallıqda belə deyil. Moskva da bunu yaxşı bilir.  Avropaya meyilli olsa da, Avropa onu qəbul etmir. Onun yürütdüyü siyasət,  xalqla münasibəti və  diktartor yönümlü fəaliyyəti Avropa standartlarına uyğun gəlmədiyindən dəstək vermirlər. Digər ciddi məqamlardan biri isə ondan ibarətdir ki,    Rusiyameyilli erməni lobbisi Paşinyanı Rusiyaya, Ameriakmeyilli erməni lobbisi isə ABŞ-ın təsir dairəsinə salmaq istiqamətində fəaliyyət göstərir.

    Təsəvvür edin Ermənistan hakimiyyətinin üzləşdiyi vəziyyət Krılovun “Balıq, ördək və xərçəng” təmsilinə bənzəyir. Rusiya, ABŞ, Avropa Ermənistanı hərəsi bir yana çəkir, onlar da qalıb pis vəziyyətdə. Nə edəcəklərini bilmədiklərindən, başlarını itirmiş vəziyyətdədirlər. Odur ki, belə bir vəziyyətdə hansısa addım atıb uğur qazanmaq istəyir. Ancaq alınmır. Bax, Goranboy istiqamətində həyata keçirilən təxribat da  bu məqsədlərə xidmət edirdi. Amma bu da iflasa uğradı”.

    Millət vəkili onu da əlavə edib ki, ermənilərin bu təxribatı eyni zanda  onların bir xalq olaraq  genində formalaşan terrorçuluq xislətindən irəli gələn məsələdir: “Ermənistan bu  dövlt səviyyəsində həyata keçirdiyi terror siyasətini hərbi geyim altında davam etdirməkdədir. Lakin onunlaırn bu  terrorçuluğa söykənən siyasəti 2016-cı ilin Aprelində, 2020-ci ilin iyulun 12-də olduğu kimi qarşısı layiqincə alındı.  Baş verən hadisələrədn çıxarılan nəticə ondan ibarətdir ki, Azərbaycan  sərhədləri kifayət qədər güclü qorunur. Ordu öz yerindədir, Müdafiə Naziri öz işinə vicdanla yanaşır.  Dövlət bşaçısının onların qarşısında qoyduğu tapşırığı, o cümlədən millət qarşısındakı məsuliyyətini dərk edir. Ən əsası isə milli addımlarla yoğrulan  fəaliyyət göstərir. Ona görə də ermənilərin  diversiya cəhdləri boşa çıxır. Ermənistanın Ombudsmanı A. Tatoyanın əsir düşən kəşfiyyat komandiri baş leytenant Qurgin Alberyanın dəyişdirilməsi ilə bağlı təkliflər irəli sürməsi, onun ermənilər üçün nə qədər əhəmiyyətli olduğunu sübut edir. Azərbaycam tərəfi də beynəlxalq hüququn  bütün normalarına uyğun hərəkət edəcək.Son olaraq bir daha onu  qeyd edim ki, bu ordumuzun ayıq-sayıqlığını nümayiş etdirdi. Odur ki, Ermənistan nə qədər gec deyil, sülhə razı olub, işğalçılıq siyasətinə son versin.  Əgər Ermənistan işğalçılıq siyasətinə son verərsə, üzləşdiyi ən ciddi problemləri qısa zamanda həll etmiş olacaq. Ölkədə normal həyatı bərpa etmək istiqamətində  real addımlar ata biləcək. Əks təqdirdə Ermənistanı daha ciddi faciələr gözləyir”.

    Mürtəza
    Ölkə.Az

  • Sabir Rüstəmxanlı: “Siyavuş Novruzov istefa verməsəydi, başqa problemlər də çıxacaqdı”

    Siyavuş Novruzov YAP-ın İcra katibinin müavini vəzifəsindən istefa verdi. Qeyd edək Siyavuş Novruzov karantin qaydalarını pozaraq xanımı, Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva ilə birlikdə Ramiz Mehdiyevin kürəkəni, eks-deputat İlham Əliyevin qızının Novxanıdakı bağ evində təşkil edilmiş toyunda iştirak edib. Siyavuş Novruzov və onun xanımı Səbinə Əliyeva hər ikisi 400 manat məbləğində cərimə olunub. Siyavuş Novruzov dünən “Facebook”dakı rəsmi səhifəsində Ramiz Mehdiyevin onu aldatması ilə bağlı fikirlər səsləndirib.

    Siyavuş Novrizovun istefası ilə bağlı fikirlərini KONKRET.az-la bölüşən deputat Sabir Rüstəmxanlı bildirib ki, bir saat olar xəbər tutdum ki, Siyavuş Novruzov İcra katibinin müavini vəzifəsindən istefa verib: “O, YAP-ın rəhbər vəzifəsində təmsil olunurdu. Mənə elə gəlir ki, Siyavuş Novruzovun bu addımı düzgündür. Məlum toy məsələsi bilirsiniz ki, son bir neçə gündə çox müzakirə olundu. Siyavuş Novruzov istefa verməsəydi, başqa problemlər də çıxacaqdı.

    Sabah kimdənsə qanunlara riayət etməsini tələb edilən zaman bu məsələ yenə ortaya atılacaqdı. Ona görə də Siyavuş Novruzov çox ciddi və nümunəvi addım atdı. Həyatda səhvlər də, yalnışlıqlar da, diqqətsizliklər də, təsadüflər də ola bilir. Belə hallarda hər kəs tutduğu vəzifəyə, təmsil elədiyi partiyaya, xalqa, dövlətə, qanunlara hörmət etməlidir. Məncə, Siyavuş Novruzov istefa verməklə doğru addım atdı. Bir çox vəzifədə olub böyük yalnışlıqlar edən insanlara nümunə oldu. Elə insanlar var ki, yüksək vəzifədədədir. Böyük yalnışlıqlara yol versələrdə, problemləri ilə müzakirə obyektinə çevrilsələr də, yenə də həmin vəzifədə otururlar. Düşünürəm ki, Siyavuş Novruzov təmsil etdiyi partiyaya uyğun düzgün addım atdı”.

    Nərgiz Mirzəyeva,

    KONKRET.az

  • Sabir Rüstəmxanlı: “Bu çətin vəziyyətdə cəsarət edib, bu addım atıblarsa bunun mütləq cəzası olmalı idi”

    Sabir Rüstəmxanlı
    Sabir Rüstəmxanlı

    “Əgər, ölkə rəhbərliyi səviyyəsində bu xəstəliklə ( koronavirus pandemiyası-red) bağlı Ümumdünya Səhiyyə Təşkilatının tövsiyyələri nəzərə alınıbsa, hər bir ailə, hər kəs öz adından, sanından, şöhrətindən asılı olmayaraq qanun tələblərinə uymalıdır”

    Bunu, “Turan” Agentliyinə açıqlamasında Millət vəkili Sabir Rüstəmxanlı deyib. O, karantin rejimi zamanı, avqustun 18-də Milli Elmlər Akademiyasının (AMEA) prezidenti Ramiz Mehdiyevin kürəkəni, keçmiş deputat İlham Əliyevin qızına toy keçirməsini dəyərləndirərkən həmin sözləri söyləyib.

    “Ona görə də hər kəs qanuna uymalıdır. Biri güclüdür, ya da birinin imkanı var, qabağa düşürsə və heç nəyi nəzərə almırsa, mən buna normal baxmıram”.

    S.Rüstəmxanlı Abşeron Rayon Məhkəməsinin İlham Əliyev və onun qudası Rövşən Mustafayevin 15 sutka müddətinə inzibati qaydada həbs edilməsi ilə bağlı qərarına gəldikdə isə bildirib ki, hazırda belə hərəkətlər edən şəxslər buna hazır olmalıdır:

    “Bu çətin vəziyyətdə cəsarət edib, bu addım atıblarsa bunun mütləq cəzası olmalı idi. 5 sutka və ya 15 sutka fərqi yoxdur. Bu cəzadır və cəza mütləq olmalı idi. O cəza yerdə qalan vətəndaşlara da bir işarədir ki, burada kimin qohumu və ya yaxını olursan ol, heç kəsə güzəşt olmayacaq”.

    Turan İ.A

  • Bakı və Ankaranın dünyaya mesajı- Sabir Rüstəmxanlı

    Ermənistan sadəcə Azərbaycanı deyil, Türkiyəni də təhdid edir.

    Bunu Vətəndaş Həmrəyliyi Partiyasının sədri, Millət vəkili Sabir Rüstəmxanlı “Anadolu” agentliyinə açıqlamasında deyib.

    O bildirib ki, ermənilər bütün dünyada Türkiyə əleyhinə təbliğatlar aparırlar:

    “Türkiyənin ərazi bütövlüyünü tanımırlar və ölkənin şərq hissəsinin onlara aid olduğunu iddia edirlər. Bütün bunları nəzərə alsaq, Türkiyə ilə Azərbaycanın birlikdə hərəkət etməkdən başqa yolu yoxdur”.

    Deputat Türkiyə ordusunun Azərbaycandakı təlimlərini 1918-ci ildə Qafqaz İslam Ordusunun ölkəmizə gəlişi ilə müqayisə etdiyini vurğulayıb:

    “Türkiyə və Azərbaycan arasındakı təlimlər həm hərbi cəhətdən, həm də qardaşlığımızın bir nişanəsi kimi mənəvi əhəmiyyət daşıyır. Eyni zamanda böyük siyasi mənası var. Bu, dünyaya bir mesajdır”.

  • Müxalifətin sərt karantin hazırlıqları – “Bu bəlanı yalnız birlikdə adlaya bilərik…”

    İyunun 21-dən başlayaraq gələn ayın 5-dək ölkədə koronavirusla əlaqədar sərt karantin rejimi tətbiq olunacaq.

    Musavat.com bildirir ki, verilən qərardan sonra sosial şəbəkələrdə ikitirəlik yaranıb.

    Bir qisim bu qərarı doğru saysa da, digər tərəf əleyhinə çıxış edir. Ölkənin müxalif camiəsi daha çox sərt karantinin əleyhinədir. Doğrudur, qərarı təqdir edənlər də az deyil.

    Düşərgənin yarım aylıq müddətə necə hazırlaşması ilə maraqlandıq.

    VHP İcra Aparatının Samir Əsədli çatışmazlıqların olduğunu söyləyib: 

    “Əvvəldən Vətəndaş Həmrəyliyi Partiyası olaraq pandemiya şərtlərinin, bundan irəli gələn qadağaların vətəndaşların sağlamlığı üçün edildiyini bildirmişik. Eyni zamanda bu qadağaların, karantin şərtlərinin həyata keçirilməsi zamanı yol verilən çatışmazlıqları da qeyd etmişik. İlk karantin dönəmində 190 manat sosial yardımla bağlı ortaya çıxmış problemlər və narazılıqlar bəllidir. Təəssüf ki, bununla bağlı bütün problemlər aradan qaldırılmadı. Daha sonra həftəsonu elan edilən sərt karantin günlərində, hətta paytaxtın bir çox yerlərində vətəndaşlarımız su problemi ilə üzləşdilər. Polislə baş vermiş qarşıdurma da bu günlərin olayı kimi yadda qaldı. Bütün bu hallar və sadalamadığımız bir çox məqamlar dövlət qurumlarının karantin şəraitində fövqəladə fəaliyyətə hazırlıqlı olmadığını göstərdi. Proseslər və son yoluxma statistikası onu göstərir ki, aprel ayında elan olunan karantin vaxtından əvvəl və xeyli sürətlə yumşaldı. Müvafiq qurumlar vəziyyəti düzgün analiz etməli və buna uyğun qərarlar verməli idi. Düzdür, həmin karantin dönəmi vətəndaşlarımız üçün çətin idi, amma uzunmüddətli ağır xəstəlik faktlarındansa, daha bir müddət karantinə dözmək daha yaxşı seçim idi. Bütün bu problemlər var və onlar mütləq aradan qaldırılmalıdır. Partiyanın karantin dövründə fəaliyyətinə gəldikdə isə ötən təcrübədən yenidən istifadə edəcəyik. Partiyanın rəhbər şəxslərinin və rayon təşkilatlarının əlaqələndirilməsi onlayn yolla həyata keçiriləcək. Ötən karantin dövründən bununla bağlı hazırlıqlarımız var”.

    ALDP rəhbəri Fuad Əliyev qərarı düzgün sayır:

    “Operativ Qərargah məlumat verir ki, hər gün 300 nəfərdən çox vətəndaş xəstələnir. Sağalan insanların sayı heç 300-ə çatmır. Fərq çox böyükdür. Ümumiyyətlə, hesab edirəm ki, iki ay karantin rejimini davam etdirmək lazım idi. Bununla bağlı karantin rejimi yumşaldılarkən öz fikrimi demişdim. Davam etsəydilər, indi belə nəticə olmazdı. Bir də hər şey, həqiqətən, vətəndaşlarımızdan asılıdır. Karantin rejiminin qaydalarını pozmaq olmaz. Tibbi maska taxmaq, sosial məsafə saxlamaq lazımdır. Lazım olmayanda evdən çıxmaq olmaz. Hamılıqla bu qaydalara riayət etsək, onda karantin rejimi ləğv olunacaq”.

    AMİP-in sədr əvəzi Arzuxan Əlizadə bildirib ki, karantin rejiminin sərtləşdirilməsi ilə bağlı verilmiş qərar günümüzün reallığından irəli gəlir:

    “Real vəziyyət isə budur ki, iyun ayının 1-dən etibarən insanlarımızın virusa gündəlik yoluxma sayında kəskin artım müşahidə olunur və belə davam edərsə, vəziyyətin nəzarətdən çıxma ehtimalı yüksəkdir. Artıq mütəxəssislər də bununla bağlı həyəcan təbili çalırlar. Yaranmış hazırkı vəziyyətlə bağlı fikrim bundan ibarətdir ki, pandemiyanın ilk günlərindən qabaqlayıcı addımlar atılsa da, karantin rejiminin yumşaldılması ilə bağlı verilmiş qərar bir qədər də ertələnməli idi. Amma buna baxmayaraq, bir daha əvvəlki mövqeyimizdən çıxış etməyi tərcih edirəm. Mövqeyimiz isə belədir ki, koronavirusla mübarizə təkcə hakimiyyətin və ya dövlət strukturlarının üzərinə düşən vəzifə deyil. Dövlət qurumları bununla bağlı nə qədər birbaşa məsuliyyət daşısalar da, bu qorxunc virusla mübarizə həm də hər bir vətəndaşın bilavasitə vəzifəsidir. Biz də cəmiyyətin tərkib hissəsi olan siyasi partiya olaraq üzv və tərəfdarlarımıza, həmçinin ictimaiyyətə qadağaları anlayışla qəbul etməyi, karantin rejiminin tələblərinə ciddi riayət etməyi tövsiyə edirik. Unutmamalıyıq ki, biz cəmiyyət olaraq yalnız birlikdə bu bəladan qurtula bilərik. Eyni zamanda Azərbaycan hökumətini sərt karantin rejiminin tətbiqi ilə əlaqədar ziyan görən kommersiya qurumlarına, iş adamlarına, ciddi maddi sıxıntı yaşayan sıravi vətəndaşlarımıza dəstək olmağa çağırırıq”.

    Cavanşir ABBASLI,
    “Yeni Müsavat”

  • VHP: qadağalar təhlükəsizliyimiz üçündür

    Bu gün dünyamızın əsas dərdi koronovirus epidemiyası və bundan qorunmadır. Böyük dövlətlər belə vətəndaşlarının sağlamlığını qorumaqda acizdir. Bu baxımdan Azərbaycan son günlərədək epidemiyanın yayılmasının qarşısının alınmasında uğurlu nəticələr əldə etmişdi. Hökumətin pandemiyanın ilk günlərindən qəbul etdiyi qərarlar və karantin rejiminin tətbiqi nəticəsində vəziyyəti nəzarət altında saxlamaq mümkün olmuşdur. Məhz bu səbəbdən karantin rejimindən mərhələli çıxmaq planı həyata keçirilməsinə artıq başlanılmışdır. Lakin vətəndaşların əksəriyyətinin son zamanlar karantin rejiminə əməl etməməsinə görə, yoluxanlar və sağalanların sayı arasında ciddi fərq yarandığı səbəbindən, karantin rejiminin yenidən sərtləşdirilməsi barədə təklif hazırlanmışdır.

    Həftə sonları tam qapanma vətəndaşların sağlamlığını qorumaq məqsədini daşıyır. Qapanmanın həftənin 2 gününü əhatə etməsi heç bir təşviş yaratmamalıdır. Ölkədə kifayət qədər ərzaq ehtiyatının olması, həmçinin maskaların və tibbi spirtin Azərbaycan Respublikasında istehsalının təşkili vətəndaşlarımızın heç bir narahatçılığın olmamasına xidmət edir.

    Eyni zamanda vətəndaşlar da bu məsələdə xüsusi diqqət və fəallıq göstərməlidir. Dövlətimizin ən yüksək məqamlarında pandemiya şərtlərinə göstərilən ciddi münasibət nəzərə alınmalıdır.

    Hər bir vətəndaş öz şəxsi məsuliyyətini hiss etməli, Operativ Qərargahın tələb və tövsiyələrinə riayət etməldir.

    VHP deputat qrupu bir daha ölkə ictimaiyyətinə müraciət edərək durumun ciddiliyini qəbul etməyi, bütün qadağalara təhlükəsizlik tədbirləri kimi əməl etməyə çağırır.

    VHP Mətbuat Xidməti

  • “Parlament müxalifəti”n haqqında qanun birmənalı qarşılanmır – Fikirlər haçalandı

    Milli Məclisin dünən keçirilən plenar iclasında millət vəkili, Sosial Tədqiqatlar Mərkəzinin rəhbəri Zahid Oruc parlament komitələrinin rəhbərliyində digər partiyaların təmsilçiliyi məsələsindən danışıb.
    Deputat bəyan edib ki, bu amil digər siyasi qüvvələrin məsuliyyətini artırır. Onları inkişaf etməyə, strukturlaşmağa, parlamentin həyatında daha aktiv iştiraka imkan verir: “Bütün bunları nəzərə alaraq, “Parlament müxalifəti” haqqında ayrıca qanun qəbul olunmasını təklif edirik.
    Orada müxalif parlament üzvlərinin növbədənkənar söz hüququ, hökumət siyasətinə alternativ qanun layihələri irəli sürmələrinə dair müddəalar yer ala bilər”.
    Zahid Orucun “Parlament müxalifəti” təklifini şərh edən siyasilər birmənalı fikir səsləndirməyiblər. Deputatın təklifinə dəstək verənlərlə yanaşı, ayrıca qanuna ehtiyac olmadığını düşünənlər də var.
    Vətəndaş Həmrəyliyi Partiyasının Mərkəzi İcra Aparatının rəhbəri Samir Əsədli “Şərq”ə bildirib ki, müxalifətin inkişafı, parlament və ölkə həyatında fəal iştirakı iqtidar üçün də, dövlət üçün də faydalı və zəruridir:
    “Müxalif partiyaların parlamentdə komissiyalarda təmsil olunması təqdirəlayiqdir. Amma parlament müxalifəti haqda ayrıca qanunun qəbul olunması bir qədər normal deyil.
    Qanunlar müxalifətə və ya fərdlərə görə deyil, ümumən dövlət və vətəndaşlar üçün qəbul edilməlidir. Müxalifət ayrı zümrə deyil ki, onun üçün ayrıca qanun olsun. Sadəcə müxalifətin fikirlərinə hörmət etmək, tənqiddən nəticə çıxarıb, əməl etmək kifayətdir. Bunun üçün xüsusi qanun niyə olmalıdır? Parlament hansısa qrupun, bir partiyanın deyil. Milli Məclis xalqın, vətəndaşındır və seçici istədiyini seçib ora göndərmək hüququna malikdir”.

    BAXCP sədrinin müşaviri Azər Qasımov “Şərq”ə deyib ki, idarəetmə və qanunverici orqanlarda digər partiyaların təmsil olunması çox aktual və vacib məsələdir. A.Qasımov vurğulayıb ki, intellektli insanların potensialından istifadə etmək dövlətin mənafeyi baxımından çox vacib məsələdir:
    “Dövlətin mənafeyi bu potensialı tam şəkildə istifadə etməyi vacib edir. Bu baxımdan istər hakimiyyətyönlü, istər müxalif, istərsə də bitərəf olan potensiallı insanların dövlət idarəçiliyinə cəlb edilməsi belə insanların ölkənin gələcək inkişafında rol oynamasına kömək edər. Eyni zamanda bu şəxslər hakimiyyətlə birlikdə idarəçiliyin məsuliyyətini bölüşərlər. Bu sahədə təcrübə toplayarlar. Hakimiyyətin yeni seçilmiş parlamentə digər partiyalardan olan deputatları da cəlb etməsi dövlətçilik maraqlarına uyğundur.
    Belə şəraitdə formalaşan parlament müxtəlif fikirlərin diskusiyasından doğan yeni fikirlərlə daha aktiv və məhsuldar fəaliyyət göstərəcək. Prinsipial məsələlərdə cəld və operativ qərarlar verən orqana çevriləcək.
    Bu baxımdan Zahid Orucun “Parlament müxalifəti” haqqında ayrıca qanun qəbul olunması təklifini normal qəbul edirəm. Müxalifətin parlamentdəki vəzifəsi məlumdur. Hazırlanan qanunların effektivliyini artırmaq üçün alternativ fikir, alternativ qanun layihələri irəli sürmək, təklif vermək. Ayrıca qanun layihəsinin hazırlanması müxalifətin verdiyi təkliflərin effektivliyini artırmaq üçün hüquqi baza yaradacaq”.

  • “Şimaldan, cənubdan, şərqdən və qərbdən uzanan iti caynaqlar və məsud baxışlar bizi kifayət qədər məsuliyyətli olmağa çağırır”.

    “Şimaldan, cənubdan, şərqdən və qərbdən uzanan iti caynaqlar və məsud baxışlar bizi kifayət qədər məsuliyyətli olmağa çağırır”.
    BakuPost.az xəbər verir ki, bunu Milli Məclisin Sədrinin müavini Fəzail İbrahimli parlamentin bu gün keçirilən plenar iclasında deyib. Onun sözlərinə görə, kifayət qədər düşmənlərimiz var:
    “Belə bir məqamda bizim özümüzdən başqa bir-birimizə söykənib, əl-ələ verib bu çətin məqamlarda ən çətin vəziyyətdən çıxmaq yolu birliyimizdədir. Burada yeni seçilən deputatlar var. Təbii ki, düşüncələrində və fikirlərində səhvlərə yol verə bilər. Bizim kifayət qədər təcrübəli deputatlarımız da var. Müəyyən məsələlər var ki, o məsələlərdə çox diqqətli olmalıyıq. Burada deyilən hər bir söz dünya ictimaiyyətinə çatır və qarşı tərəfə bir mesajdır. Ona görə də hər bir sözümüzü ölçüb-biçməliyik. Millətimiz, dövlətimiz, sərhədimiz və hərbimiz haqqında danışanda yüz ölçüb, bir biçmək lazımdır”.

  • “İndiki toyların bəziləri bizim tarixən formalaşmış toy ənənələrimizə bir parodiyadır”.

    Millət vəkili toy adətlərimizi darmadağın etdi: “Bu, qudurğanlıqdır!”

    “İndiki toyların bəziləri bizim tarixən formalaşmış toy ənənələrimizə bir parodiyadır”.

    Bu sözləri millət vəkili, Xalq şairi Sabir Rüstəmxanlı İTV-də yayımlanan “Sabaha saxlamayaq” verilişində pandemiya dövrünün toyu necə olmalıdır mövzusunda danışarkən bildirib.

    “Şadlıq evlərinin bir mafiyası var. Deyir, 150 manata yemək verirəm. Mən qonağıma belə yemək vermək istəmirəm. 50 manat mənə bəs edir. Onda da deyir, burda toy keçirə bilməzsən. Bu qudurğanlıqdır”.

    S.Rüstəmxanlı Bakı toylarından da danışıb:

    “Bakı toyları yadıma düşür. Hətta bir dəfə dedim ki, qayıtmalıyıq Bakı toylarına. Yoxsa bugünkü toylarda 5 saat otur, aşırı dərəcədə yemək, içmək, heç kim bir-birini dinləmir, gurultu da bir yandan, bu nə toydu? Toy olar, ailə, dost, tanış gələr, oynayar. Əvvəllər ağsaqqallar söz deyərdilər, indi daha söz demək də yoxdur. Ancaq o vaxtlar Bakı toyları çox sadə keçirilirdi. İndiki toyların axırında toy sahibi borclu çıxır. Millət özü üçün belə faciə yaradar?”

  • Müxalifət video-müşavirələr keçirirmi?

    Koronavirusla əlaqədar ölkədə dövlət qurumlarının, əksər siyasi təşkilatların iclasları onlayn sistemdə keçirilir. Son olaraq, prezident İlham Əliyevin sədrliyi ilə ilin birinci rübünün sosial-iqtisadi yekunlarına həsr olunan videokonfrans şəklində müşavirənin keçirilməsi bir çox məsələləri aktuallaşdırıb.

    Bəs Azərbaycan müxalifəti necə, video-müşavirələr keçirirmi? Koordinasiya partiyalarda nə cür təşkil olunur?

    VHP Mərkəzi İcra Aparatının rəhbəri Samir Əsədli də onlayn qaydada fəaliyyətlərini davam etdirdiklərini söylədi: “Karantin dövründə Vətəndaş Həmrəyliyi Partiyasının fəaliyyəti onlayn qaydada həyata keçirilir. Partiya rəhbərliyi öz aralarında və rayon təşkilatları ilə mütəmadi olaraq telefon bağlantısı yaradılır, məsləhətləşmələr aparılır, müvafiq tapşırıqlar verilir. Bu müddət ərzində partiyanın Mərkəzi İcra Aparatının onlayn qaydada videogörüntülü iclası keçirilib. Nizamnaməyə görə, Siyasi Şuranın keçirilmə müddəti hələ keçməyib. Əgər zərurət olarsa, Siyasi Şuranın da onlayn qaydada videogörüntülü iclası keçirilə bilər. Bundan başqa gündəlik olaraq partiyanın şöbə müdirləri, departament və xidmət rəhbərləri ilə telefon əlaqəsi saxlanılır. Həmçinin rayon təşkilatları ilə əlaqələr zamanı üzvlərin sağlıq durumu, sosial problemləri haqda maraqlanılır”.

    ALDP sədri Fuad Əliyev: “Biz karantin rejiminin demək olar ki, birinci günündən iclasları onlayn şəkildə keçiririk. İlk növbədə Sədr Aparatının iclasları həftədə iki dəfə, partiyanın Rəyasət Heyətinin iclasları isə iki həftədən bir təşkil olunur. Koordinasiya köməkçim vasitəsilə həyata keçirilir. Bizim vatshapp, həm də skupe-də qrupumuz var. Hamı evdə olduğuna görə bir vaxt seçmişik. Həmin vaxtda hamı iclasa gətirilir”.

    AĞ Partiya başqanının birinci müavini Əhəd Məmmədli: “AĞ Partiya video-müşavirələr edir. Zoom, skupe, vatshapp vasitələri ilə daim görüşlər keçirilir. Video-görüntülü toplantılar da təşkil olunur. Partiya qrupları var. Onların vasitəsilə partiya daxili koordinasiya həyata keçirilir”.

    AMİP katibi Əli Orucov partiyanın fəaliyyətində müəyyən dəyişikliklərin olunduğunu qeyd etdi: “Koronovirus pandemiyası ilə bağlı Azərbaycanda tətbiq olunan xüsusi karantin rejiminin şərtlərinə uyğun olaraq AMİP-in fəaliyyətində də müəyyən dəyişikliklər olundu. Partiyanın müvafiq qurumları və rayon təşkilatları ilə əlaqələr telefon və internet üzərindən qurulur. Siyasi şura və mərkəzi aparat iclasları onlaynla keçirilir Müzakirələrimizi onlayn vasitəsilə aparırıq. Eyni zamanda, müntəzəm telefon bağlantıları qururuq. Başlıcası insanların və üzvlərimizin sağlamlıqlarını qorunması və təhlükəsizliyidir. Yaşlı silahdaşlarımızla tez-tez əlaqə saxlayırıq. Ehtiyaclarını öyrənirik. Zərurət duyulduqda yardımçı olmağa çalırıq. Yeri gəlmişkən, çox təəssüf olsun ki, bəziləri yardımlaşmanın və ayrı-ayrı şəxslərə etdiyi köməyi gözə soxmağa, bundan reklam və şəxsi məqsədləri üçün istifadə etməkdədir. Bu, heç də xoş deyil. İndiki cəmiyyətin özündə və insanlardakı psixoloji durum daha sayğılı, daha həssas yanaşma tələb edir. Bəzən psixoloji dəstək və diqqət insanlarda daha çox təsəlli yaradır. Ümid edirəm ki, bu koronovirus pandemiyasından yaxın müddətdə və az itki ilə çıxa biləcəyik. Partiya da əvvəlki kimi normal fəaliyyətinə qayıdacaq”.

    KXCP-nin idarə heyətinin üzvü Xəzər Teyyublu bunları dedi: “Partiyanın idarə heyətinin iclasları onlayn qaydada keçirilir. İnternet üzərindən koordinasiya şəklində partiya rəhbərliyi tərəfindən idarəetmə əlaqələri qurulur. Həftədə bir dəfə bu əlaqə saxlanılır”.

    Cavanşir Abbaslı,
    Musavat.com