Vətəndaş Həmrəyliyi Partiyası

Author: vhpadmin

  • Ermənistan itkin düşmüş 4 minə yaxın azərbaycanlının taleyinə aydınlıq gətirmir

      Azərbaycanın tələb etməsinə baxmayaraq, Ermənistan itkin düşən azərbaycanlılar haqda məlumat verməkdən imtina edir. Əfsuslar olsun ki, beynəlxalq təşkilatlara edilən müraciətlər də nəticəsiz qalır, reaksiyalar gəlmir. Prezident İlham Əliyev də ötən gün bu məsələyə diqqət yönəldib. Dövlət başçısı qeyd edib ki, itkin düşmüş şəxslər faciəsi Ermənistanın Azərbaycana qarşı təcavüzünün ağır fəsadlarından biridir. Ölkə rəhbəri bildirib ki, 4000-dək azərbaycanlı itkin düşmüş şəxs hesab olunur ki, onların arasında mülki şəxslər, o cümlədən uşaqlar və qadınlar da var: “2020-ci il Vətən müharibəsində isə 6 Azərbaycan vətəndaşı itkin düşüb. Torpaqlarımızın işğaldan azad edilməsindən sonra meydana çıxmış yeni faktlar itkin düşmüş azərbaycanlılara qarşı törədilən vəhşiliklərlə bağlı şahidlərin ifadələrini bir daha təsdiq edib. Həmin ərazilərimizdə aşkar olunmuş kütləvi məzarlıqlarda ekshumasiya işlərinin aparılması nəticəsində Ermənistan tərəfindən əsir və girov götürülmüş şəxslərin işgəncələrə, zorakılığa və qeyri-insani rəftara məruz qalaraq qətlə yetirildiyi barədə təkzibedilməz sübutlar toplanılıb”. Prezident əlavə edib ki, müxtəlif vaxtlarda Ermənistanda olan hərbi canilər, komandirlər kütləvi məzarlıqlar barədə məlumatlara sahib olduqlarını bildiriblər: “Buna baxmayaraq, Ermənistan hələ də bu məzarlıqların, o cümlədən Azərbaycanın Milli Qəhrəmanı Natiq Qasımovun qalıqlarının yeri barədə məlumatları verməkdən imtina edir. Ermənistan öz destruktiv mövqeyindən əl çəkməli və beynəlxalq humanitar hüquqdan irəli gələn öhdəliklərini yerinə yetirməlidir”. Xatırladaq ki, separatçı rejimin qalığı Samvel Babayan həyasız təkliflə çıxış edib. Babayan deyib ki, əgər Bakıda həbsdə olan hərbi əsirlər, daha doğrusu, terrorçular azadlığa buraxılarsa, Birinci Qarabağ müharibəsində itkin düşən təxminən 4 min azərbaycanlının harada basdırıldığını söyləyəcəyini bildirib. Ermənistan Baş Qərargah rəisinin keçmiş müşaviri Vladimir Poqosyan bu açıqlamanı İrəvan üçün zərərli adlandırıb və cinayətlərin etiraf olunması kimi şərh edib.

      Vətəndaş Həmrəyliyi Partiyasının sədr müavini Samir Əsədli “Sherg.az“a deyib ki, hərbi əsirlərlə bağlı Azərbaycan öz mövqeyini dəfələrlə səsləndirib. Ekspertin sözlərinə görə, Azərbaycanın bütün hərbi əsirlərin qaytarılması öhdəliyini üzərinə götürdüyü sonuncu sənəd 2020-ci il noyabrın 10-da imzalanıb:  “Həmin günə qədər tutulanların hamısı geri qaytarılıb. Bu tarixdən sonra Qarabağda saxlanılanlar isə hərbi əsir sayılmır. Onlar sərhəd pozucuları, silahlı şəxslərdir və Azərbaycan qanunlarına uyğun olaraq həbsxanalarda cəzalarını çəkirlər. Dəfələrlə müraciət edilməsinə baxmayaraq, Ermənistan itkin düşmüş 4 minə yaxın azərbaycanlının taleyinə aydınlıq gətirmir. İşarələnməmiş minaların və kütləvi məzarlıqların yerləşdiyi ərazilərin dəqiq xəritələrini Azərbaycan tərəfinə təqdim etmir. Bununla da, beynəlxalq hüququn hamılıqla qəbul edilmiş norma və prinsiplərini kobud şəkildə pozur. Bu istiqamətdə mübarizəmiz davam etməli, beynəlxalq təşkilatlar da bu prosesə sövq edilməlidir”.

  • İstanbul Universitetində Xalq şairi Sabir Rüstəmxanlı ilə görüş keçiriləcək

    Türkiyənin İstanbul Universitetində Xalq şairi Sabir Rüstəmxanlı ilə görüş keçiriləcək.

    17 oktyabr 2024-cü il tarixdə İstanbul Universitetinin Ədəbiyyat fakültəsinin kitabxana zalında Xalq şairi Sabir Rüstəmxanlı ilə görüş təşkil olunacaq.

    Şairin həm də Türkiyədə yeni işıq üzü görmüş “Astar” və “Cocukluğa deyen kurşun” adlı kitabları təqdim olunacaq, imza günü keçiriləcəkdir.

    Türk Ədəbiyyatı Vəqfinin təşkilatçılığı ilə keçiriləcək tədbirdə Professor.Dr. Hayati Develi, Prof. Dr. Ramazan Korkmaz, Prof. Dr. Yakub Çelik, Dr. Erol Ülgen , Türk Ədəbiyyatı Vəqfinin başkanı Serhat Kabaklı, Türk Ədəbiyyatı Jurnalının baş redaktoru, kitabların tərcüməçisi İmdat Avşar, Millət vəkili Tənzilə Rüstəmxanlı və başqaları iştirak edəcək, Azərbaycan ədəbiyyatında milli ruhun dirilişi mövzusunda qonaqların və tələbələrin qarşıslnda çıxışlar ediləcək.

  • Bu il sülh müqaviləsinin imzalanması mümkündür -PROQNOZ

    Azərbaycanla Ermənistan arasında sazişin əksər maddələrinin razılaşdırılması ilə bağlı bəyanatlar bunu deməyə əsas verir
     Prezidentin köməkçisi Hikmət Hacıyev İtaliyanın aparıcı mətbu orqanlarından olan “La Repubblica” qəzetinə müsahibəsində Ermənistanla Azərbaycan arasında sülh prosesindən bəhs edib. O, bəzi Qərb ölkələrinin erməni revanşizmini qızışdırdığını bildirib. H.Hacıyev sülhə həmişəkindən daha yaxın olduğumuzu desə də, qarşıda duran maneələri də istisna etməyib. Prezidentin köməkçisinin sözlərinə görə, əsas maneə Azərbaycanın ərazi bütövlüyünü şübhə altına alan Ermənistan konstitusiyasıdır: “Onun preambulası erməni dilində Qarabağın Azərbaycan ərazilərinin Ermənistana “birləşdirilməsi” mənasını verən “Miatsum” sözü yazılan müstəqillik bəyannaməsinə istinad edir. Biz təkcə Ermənistan hökuməti ilə deyil, həm də Azərbaycanda ərazi iddialarından əl çəkərək konstitusiyaya dəyişiklik edilməsi üçün referendum keçirilməsi tələbi ilə səsini ucaltmalı olan erməni xalqı ilə də sülh razılaşması əldə etmək istəyirik”. Hikmət Hacıyev vurğulayıb ki, sülh müqaviləsi kağız parçası deyil: “Ermənistanda heç kimin bir daha Azərbaycana qarşı regionda sülhü təhdid edən revanşizmə əl atmayacağına zəmanət olmalıdır. Ona görə də erməni xalqının revanşizmdən, Qarabağ iddialarından əl çəkdiyi və mümkün sülh müqaviləsini gələcəkdəki Ermənistan hökumətlərinin revizionizmindən qoruyacaq referenduma ehtiyacı var”. H.Hacıyev vurğulayıb ki, Ermənistanın hərbiləşdirilməsi də məsuliyyətli və mütənasib olmalıdır: “İrəvan Fransadan uzaqmənzilli raketlər və artilleriya sistemləri alır və bununla da yenidən Azərbaycan şəhərlərinə hücum edə bilər. Ermənistan üçün ən yaxşı həll yolu Azərbaycanın təhlükəsizliyini təhdid edən hərbi ittifaqlar yox, neytrallıq olardı”. Prezidentin köməkçisi əlavə edib ki, müstəmləkə keçmişi olan bəzi Qərb dövlətlərinin Afrikadakı kimi, Qafqazda da öz siyasətlərinin və intriqalarının təbliği üçün Ermənistandan istifadə etməsi əks effekt verir: “Fransa və onun hökuməti region haqqında tam anlayışa malik deyil və Avropanın da əleyhinə olacaq geosiyasi səhvlərə yol verir. Ermənistanı hərbiləşdirmək və bununla da onun revanşizminə təkan vermək sülhə kömək etmir”.
     Xatırladaq ki, Ermənistanın Baş naziri Nikol Paşinyan BMT tribunasından Bakıya səslənib. Baş nazir sülh sazişinin razılaşdırılmış maddələrini noyabrda baş tutacaq COP29 iqlim konfransına qədər imzalamağı təklif edib. Paşinyan hesab edir ki, bu, sülh prosesinin irəli aparılması üçün stimullaşdırıcı mühit yaratmağa kömək edə bilər.
     
    Vətəndaş Həmrəyliyi Partiyasının sədr müavini Samir Əsədli “Sherg.az”a bildirib ki, ümumiyyətlə, son vaxtlar Azərbaycanla Ermənistan arasında sülh müqaviləsinin bağlanması istiqamətində səylər gücləndirilib. Analitikə görə, Ermənistanın Baş naziri Nikol Paşinyanın BMT Baş Assambleyasındakı son çıxışı, bir sıra beynəlxalq təşkilatların iclaslarında sülh sazişinin əksər maddələrinin razılaşdırılması ilə bağlı bəyanatları ortadadır: 

    “Bununla yanaşı, bir sıra maraqlı qüvvələr Azərbaycan və Ermənistan arasında sülh müqaviləsinin bağlanmasını istəmirlər. Təbii ki, burada başqa məsələlər də var. Xüsusən, Ermənistan konstitusiyasında Azərbaycana qarşı ərazi iddialarının qalması sülhə maneədir. Ermənistan rəsmiləri Azərbaycan Konstitusiyasında onlara qarşı ərazi iddialarının olması ilə bağlı əsassız ittihamlar səsləndirirlər. Halbuki Azərbaycan Konstitusiyasında Ermənistana ərazi iddiaları ilə bağlı heç bir müddəa yoxdur. Konstitusiyamızda qeyd olunub ki, Azərbaycan Respublikası Azərbaycan Xalq Cümhuriyyətinin varisidir. Burada kiməsə ərazi iddiasından söhbət getmir. Bütün bunlara rəğmən, sülh müqaviləsi gec-tez imzalanmalıdır. Əlbəttə, sazişin COP29-a kimi imzalanması yaxşı olardı. Hesab edirəm ki, il bitənədək sülh müzakirələrini yekunlaşdırıb sənədi imzalamaq mümkündür”.

  • VHP üzvləri Zəfər parkını ziyarət etdi – FOTO

    Vətəndaş Həmrəyliyi Partiyası 27 sentyabr-Anım Günü münasibətilə Zəfər parkını ziyarət edib.

    VHP.azxəbər verir ki, VHP sədri, Xalq şairi Sabir Rüstəmxanlı və partiya fəalları parkın girişində xatirə daşının önünə gül dəstəsi qoyub.

    Sabir Rüstəmxanlı Zəfər parkını ziyarət etdi - FOTO

    Sabir Rüstəmxanlı Zəfər parkını ziyarət etdi - FOTO
    Sabir Rüstəmxanlı Zəfər parkını ziyarət etdi - FOTO

  • VHP-32

    Bu gün Vətəndaş Həmrəyliyi Partiyasının (VHP) təsisedilməsindən 32 il ötür. VHP 1992-ci il sentyabrın 26-da ilk qurultayını keçirib. Partiya ciddi ictimai-siyasiqarşıdurmalar, iqtisadi xaos, hakimiyyət uğrundaçəkişmələr və Birinci Qarabağ müharibəsinin kəskinləşdiyidönəmdə vətəndaş həmrəyliyi ideyasının təbliğinə başlayıb. Vətəndaş Həmrəyliyi Partiyasının tarixi Azərbaycanınmüstəqillik tarixi ilə üst-üstə düşür. Partiyanın yaranmasıDövlət Müstəqilliyinin elanından bir il sonraya təsadüf etsədə, bu məqama gətirib çıxaran yol 1988-ci ilin Meydanhərəkatından başlamışdı. Bu mənada VHP-nin yaranması1988-ci ildən başlayaraq ölkəmizdə cərəyan edənhadisələrin yekunu və mövcud olan ictimai-siyasi şəraitinməntiqi nəticəsi idi. Ölkəni bürümüş dərin siyasi, iqtisadi, sosial böhran xalqın qabaqcıl hissəsi olan ziyalıları, tanınmış insanları ciddi şəkildə narahat edirdi. VHP-ninyaranmasına səbəb siyasi təcrübəsizlik, xarici amillərnəticəsində meydana çıxan real vətəndaş qarşıdurmasıtəhlükəsi və Azərbaycanın gələcəyi üçün məsuliyyətduyğusu idi. VHP yarandığı gündən nicat yolumuzunVətəndaş Həmrəyliyində olduğunu bəyan etdi. VHP hazırda seçkili orqanlarda təmsilçiliyi və ictimai nüfuzu iləölkənin aparıcı siyasi partiyalarından biridir. Müstəqillikdönəminin bütün parlament və bələdiyyə seçkilərindəiştirak edib və uğur qazanıb. Vətəndaş HəmrəyliyiPartiyasının bu günə kimi 8 qurultayı keçirilib. Hazırdapartiyanın respublikanın 81 bölgə (şəhər/rayon) vəNaxçıvan muxtar respublika təşkilatı fəaliyyət göstərir.

    Bu gün ölkədə gedən proseslər və siyasi partiyalarınbəyan etdiyi ideoloji sistem VHP-nin 32 il öncə irəlisürdüyü ideologiyanın nə qədər doğru və müasir olduğununümayiş etdirir. Siyasi leksikonumuza VətəndaşHəmrəyliyi ifadəsini məhz VHP gətirmişdir.

    Partiya təşkilatlarında və rəhbərliyində ölkə vətəndaşıolan bütün etnik və azsaylı xalqların nümayəndələri təmsilolunurlar.

    Partiyanın əsas nüvəsini gənclər təşkil edir. Təsisolunduğu ildən parlamentdə təmsil olunan VHP hazırdademokratik qüvvələr düşərgəsində ön sırada dayananpartiyalardan biridir. Azərbaycanın iqtisadi yüksəlişi, ölkəmizdə insan haqlarına, söz azadlığına dəyər veriləndemokratik bir cəmiyyətin qurulması VHP-nin əsas hədəfiolaraq qalır. Nicatımız – Vətəndaş Həmrəyliyindədir!

  • Azərbaycan ABŞ üçün Cənubi Qafqazda ən mühüm tərəfdaşdır

    Azərbaycanın xarici işlər naziri Ceyhun Bayramov ABŞ dövlət katibinin Avropa və Avrasiya məsələləri üzrə köməkçisinin müavini Coşua Hakın rəhbərlik etdiyi nümayəndə heyətini qəbul edib.

    Görüşdə Azərbaycan və ABŞ arasında ikitərəfli və çoxtərəfli əməkdaşlıq məsələləri, habelə postmünaqişə dövründə regional vəziyyət, Azərbaycan və Ermənistan arasında normallaşma prosesinin perspektivləri müzakirə olunub. Azərbaycanın cari ildə ev sahibliyi edəcəyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıqlar çərçivəsində Azərbaycan-ABŞ əməkdaşlığı yüksək qiymətləndirilib. İkitərəfli münasibətlərdə müsbət dinamikanın yaradılması, əməkdaşlıq perspektivlərinin müəyyənləşdirilməsi istiqamətində səylərə baxmayaraq, bəzi ABŞ rəsmilərinin qərəzli fikirlərinin ikitərəfli münasibətlərə mənfi təsir etdiyi diqqətə çatdırılıb.

    “Yeni Müsavat” yazır ki, bu xüsusda 16 sentyabr tarixində Ermənistanın ABŞ-dakı səfirliyində ABŞ Beynəlxalq İnkişaf Agentliyinin administrator müavini İzobel Koulmanın Azərbaycana qarşı açıqlamalarına istinad edilərək, bu kimi çıxışların Azərbaycanın ərazi bütövlüyü və suverenliyinə hörmətsizlik olduğu, ölkəmizin suveren ərazilərində Ermənistan silahlı qüvvələrinin qanunsuz mövcudluğuna son qoymuş antiterror tədbirləri ilə bağlı faktları təhrif etmək məqsədi daşıdığı vurğulanıb. Caşua Hak ötən il də ölkəmizdə olmuş, bəzi vəkillərlə görüşmüşdü. Onun Azərbaycana səfəri ABŞ dövlət katibi Entoni Blinkenin sentyabrın 12-də Ermənistanın baş naziri Nikol Paşinyan və sentyabrın 16-da Azərbaycan Prezidenti İlham Əliyevlə telefon danışıqlarından sonraya təsadüf edir. Sentyabrın 16-da ABŞ Dövlət Departamentinin sözçüsü Metyu Miller bildirib ki, ABŞ hər zaman Ermənistan və Azərbaycanın xarici işlər nazirlərini bir araya gətirmək üçün imkanlar axtarır.

    ABŞ-ın Beynəlxalq İnkişaf Agentliyinin (USAID) inzibatçısının müavini İzobel Koulmanın Ermənistanın ABŞ-dakı səfirliyində keçirilən tədbirdə Azərbaycanı “hücum edərək nəzarəti ələ keçirməkdə” və 100 000-dən çox etnik ermənini öz evlərini tərk etməyə məcbur etməkdə” ittiham edib. Koulman USAİD-in Qarabağdan köçürülən insanlara yardım məqsədilə 18 milyon dollar məbləğində vəsait ayırdığını vurğulayıb. İ.Koulmanın bəyanatları və USAİD-in fəaliyyətləri Ermənistanda separatizm və revanşizmi açıq şəkildə dəstəkləyib. Nazirin də dediyi kimi, ABŞ təmsilçilərinin bu cür bəyanatlar vasitəsilə təşviq etdiyi siyasət də bölgədə sülhün bərqərar olmasına kömək etmir.

    Həmçinin bugünlərdə ABŞ-ın Beynəlxalq İnkişaf Agentliyinin (USAID) Ermənistana beşillik yardım paketinin həcmini iki dəfədən çox 120 milyondan 250 milyon dollara qədər artıracağı ilə bağlı məlumatlar gündəmdədir. Ermənistan Nazirlər Kabinetinin yaydığı xəbərə görə, maliyyə yardımı “demokratik proseslər, regional əməkdaşlıq, fəlakət risklərinin idarə edilməsi, kibertəhlükəsizlik, ərzaq və enerji təhlükəsizliyi” və digər sahələrə yönəldiləcək. Azərbaycan xalqı bu xəbərə təəccüblənmədi. Səbəb isə Qərbin Azərbaycana münasibətdə son otuz ildən artıq davam edən ən “ağır mirası” – ikili standartlar siyasətidir. Qərb siyasi institutları sırasında yer alan USAİD heç vaxt Ermənistanın Azərbaycana təcavüzünü pisləməyib, bir milyondan çox qaçqının öz torpaqlarına qayıtması üçün səy göstərməyib.

    Məsələn, 1991-ci ildən USAİD Azərbaycana dəstək proqramlarına 450 milyon dollardan çox sərmayə qoyub. Habelə iqtisadi sahəyə əlavə 20 milyon dollardan çox vəsait ayırıb. 1992-ci ildən bəri isə USAİD Gürcüstana 1,8 milyard dollardan çox yardım göstərib. Hazırda 35 layihə üzrə fəaliyyət davam edir. Ermənistana isə 1992-ci ildən bəri USAİD tərəfindən təxminən 3,3 milyard dollar sərmayə yatırılıb. Hazırda 22 layihə üzrə dəstək davam edir. Eyni zamanda USAİD 2024-cü maliyyə ilində öz xoşları ilə Qarabağdan könüllü şəkildə köçən ermənilər üçün 7 milyon dollardan çox humanitar yardım edib. Bununla da ABŞ-ın 2020-ci ilin sentyabrından bəri Qarabağla bağlı cavab tədbirlərini dəstəkləmək üçün ümumi maliyyə yardımı 31 milyon dollara çatıb.

    Əlavə olaraq, ABŞ Dünya Bankının Ermənistan üçün Qlobal Güzəştli Maliyyələşdirmə Fonduna 5 milyon dollar ayırıb. Bundan əlavə, ABŞ Beynəlxalq Maliyyə Korporasiyası kənd təsərrüfatı və sahibkarlığa dəstək üçün 50 milyon dollar kredit ayırıb. Xüsusi vurğulamaq lazımdır ki, Samanta Pauer USAİD-ə milli təhlükəsizlik sektorundan gələn ilk şəxsdir. Onun həbsdə olan separatçı Ruben Vardanyanla birgə layihələri olub. Bu həqiqətlərlə yanaşı, USAİD nümayəndəsinin səfirlikdəki çıxışı səbri daşıran son damla oldu və bu təşkilatın maskasını tam yırtdı.

    Vətəndaş Həmrəyliyi Partiyası Mərkəzi İcra Aparatının rəhbəri Samir Əsədlinin qənaətinə görə, ermənilərə bu qədər həyasız dəstəyin verilməsi ABŞ-Azərbaycan münasibətlərinə mənfi təsir edir. Partiya rəsmisinin fikrincə, Azərbaycan ABŞ üçün Cənubi Qafqazda ən mühüm tərəfdaşdır, lakin Vaşinqtonun, ona bağlı təşkilatların davranışları əlaqələrə zərər vurur: “Ermənistanın əzizlənməsi Rusiyaya görədir. Bu siyasət uzun müddət davam edəcək. ABŞ Ermənistanda təsir imkanlarını artırdıqca bu dəstək güclənəcək. İntəhası, Vaşinqtonun yanlışı Azərbaycana qarşı Qarabağla bağlı ittihamların olmasıdır. Yəni erməniləri qucaqlayıb ruslardan ayırmaq istəyirsənsə, bunu bizə qarşı ədalətsizliyə yol verərək etməməlisən. Ancaq görürük ki, hələ də Qarabağa “hücumdan” danışırlar, dinc erməni əhalisinin guya zorla çıxarıldığını bildirirlər. Bu yalan təbliğat maşını dayandırılmalıdır”. VHP funksioneri hesab edir ki, ABŞ-la bu məsələlərdə açıq şəkildə danışmaq lazımdır: “Qərbin niyyəti erməniləri Qarabağa qaytarmaqdır. Elə Rusiyanın da bu arzusu var. Hətta İran da bu istəyini gizlətmir. Bir-birinə düşmən kəsilən dövlətlər ermənilərin qayıdışında həmrəydirlər. Ancaq ittihamlar uğursuzdur. BMT və digər beynəlxalq təsisatlar heç bir etnik təmizləmə faktı aşkarlaya bilməyiblər”.

    Emil SALAMOĞLU,
    “Yeni Müsavat” 

  • VHP Türk Şəhidliyini ziyarət etdi

    Bu gün Bakının işğaldan azad olunmasının 106-cı ildönümü münasibətilə Vətəndaş Həmrəyliyi Partiyasının (VHP) üzvləri Şəhidlər Xiyabanında Türk Şəhidliyini ziyarət edib. Partiya üzvləri abidə önünə gül dəstələri qoyub, şəhidlərin ruhunu sayğı ilə yad edilib. VHP Mərkəzi İcra Aparatının rəhbəri Samir Əsədli çıxış edərək 1918-ci il 15 sentyabrda Bakının azad olunmasının tarixi əhəmiyyətindən bəhs edib.

  • Türk birliyi Avropa modeli formasında öz əksini tapmalıdır

    Xəbər verdiyimiz kiçi, Türk Dünyası Ortaq Əlifba Komissiyasının Bakıda üçüncü iclası keçirilib.

    Bakıvaxtı.az-ın məlumatına görə, Türk Akademiyasının prezidenti Şahin Mustafayev Komissiyanın ancaq Türk dünyası üçün əlifba yaradılması layihəsi ilə məşğul olduğunu bildirib:

    “Əsas məqsədimiz ortaq əlifba yaratmaqdır. Türk dünyasının dövlət başçıları bizdən hazır əlifba gözləyirlər. Nəticələri yekunlaşdırmaq üçün cəmi iki günümüz var”.

    Ş.Mustafayevin sözlərinə görə, türk ölkələri və xalqları vahid əlifbaya keçid məsələsində artıq ciddi akademik irəliləyiş əldə ediblər, lakin siyasi qərarların qəbulu müəyyən vaxt apara bilər.

    Vətəndaş Həmrəyliyi Partiyasının sədr müavini Samir Əsədli Bakıvaxtı.az-a deyib ki, VHP və partiya sədri Sabir Rüstəmxanlı ortaq türk əlifbasının qəbul olunmasının ilk təşəbbüskarlarındandır və bununla bağlı müxtəlif təkliflərlə, layihələrlə çıxış edib.

    Onun sözlərinə görə, VHP sədri həm Azərbaycan parlamentində, həm də Türkiyə, Qazaxıstan, Özbəkistan səfərlərində, Rusiyanın tərkibində olan muxtar türk respublikalarına gedişində bu məsələni daim gündəmə gətirib:

    “Biz ortaq türk əlifbasının qəbul və təsdiq olunmasının tərəfdarıyıq. Ortaq türk əlifbası türk ölkələrini bir-birinə daha çox yaxınlaşdıracaq. Ortaq əlifba tətbiq olunandan sonra ortaq dil məsələsinin həlli də asanlaşacaq. Türk dövlətləri iqtisadi-siyasi-mədəni əlaqələrlə yanaşı, dil baxımından da bir-birinə yaxınlaşmalıdır. Çünki ortaq danışıq dili olmalı, vahid dil forması tətbiq edilməlidir ki, türk dünyası ilə əlaqələr genişlənsin”.

    Müsahibimiz bildirib ki, Türk birliyi sözdə yox, əməldə olmalı və Avropa modeli formasında öz əksini tapmalıdır. Bunun üçün gərəkən addımlar atılmalıdır:

    “Ortaq türk əlifbası ilk növbədə dilçi-alimlərin, mütəxəssislərin işidir. Təbii ki, bu həm də siyasi qərardır. Elə etməliyik ki, əlifba işlək vəziyyətdə olsun və istifadə edilsin”.

    Həmsöhbətimiz vurğulayıb ki, ortaq türk əlifbası hansı formada qəbul olunacaqsa, bütün türk respublikalarının orta məktəblərində, ilk siniflərində tədris edilməlidir:

    “Türk dünyasının əlaqələri sadəcə liderlər səviyəyəsində yox, xalqlar, cəmiyyətin bir-birinə açılımı səviyyəsində olmalıdır. Birliyimizin daim olması üçün bu, çox vacib məqamdır. Avropa modelindəki kimi türk respublikaları arasında da sərhəd və gömrük-keçid məntəqələri də tədricən aradan qaldırımalıdır. İnsanlar türk dünyasında sərbəst gəzib-dolaşmaq imkanı əldə etməli, istədikləri türk respublikasında yaşaya, işləyə, təhsil ala bilməlidir”.

    Aydın Baxış

  • “Zatulin Azərbaycanın ərazi bütövlüyünə bir daha hörmətsizlik etsə, bu dəfə başqa şəkildə danışmaq lazım gələcək”.

    Azərbaycanın Rusiyadakı səfiri Polad Bülbüloğlu Rusiya Dövlət Dumasının MDB işləri üzrə komitəsinin sədr müavini Konstantin Zatulinin hazırda mövcud olmayan, ötən ilin sentyabrında keçirilən antiterror tədbirləri ilə darmadağın edilmiş qondarma “DQR”in “müstəqillik günü” münasibəti ilə erməni xalqını “təbrik” edən təxribatçı videomüraciət yayması ilə bağlı Rusiya Dövlət Dumasının sədri Vyaçeslav Volodinə məktub göndərib.

    Bülbüloğlu vurğulayıb ki, müraciətində K.Zatulin guya “Rusiyada biganə qalmayan insanların” adından çıxış edərək, erməni cəmiyyətində revanşist qüvvələrə, separatçılara dəstək verərək, artıq başa çatmış münaqişəni canlandırmağa təhrik edir. “Daha ağırlaşdırıcı fakt odur ki, o, müraciətində separatçı rejimin keçmiş rəhbərləri və digər terrorçulara istinad edir. Onların əllərinin günahsız azərbaycanlıların qanına bulaşdığını unutmaq olmaz. Açıq şəkildə Zatulin Ermənistan tərəfindən ”persona non-qrata” elan edilmiş bir şəxs kimi, Rusiyada geniş yayılmış ekspansionist baxışları və narrativləri təbliğ edir, erməni milliyyətli himayədarlarının siyasi sifarişlərini yerinə yetirir və Azərbaycanın ərazi bütövlüyü və suverenliyinə qarşı təxribatçı fəaliyyət göstərir. Bu kimi davranışların əvvəllərdə də dəfələrlə həyata keçirildiyini vurğulamaq lazımdır”, – məktubda bildirilir.

    Səfir habelə qeyd edib ki, Azərbaycanın və Rusiyanın arasında möhkəmlənən müttəfiqlik münasibətləri fonunda, xüsusilə Prezident Vladimir Putinin keçən ay Azərbaycana dövlət səfəri zamanı tərəflər yüksək əməkdaşlıq səviyyəsini təsdiqləyiblər, həmçinin, Rusiya dövlət başçısı Cənubi Qafqaz bölgəsində uzunmüddətli sülh, təhlükəsizlik və sabitliyin təmin edilməsinə töhfə vermək istəyini ifadə edib: “Bu müsbət fon üzərində ‘”Yedinaya Rossiya” partiyasının üzvü olan bir şəxsin ölkəsinin rəsmi mövqeyinə qarşı çıxması, onun təkcə dövlət başçısının fikrini qəbul etmədiyini deyil, həm də hörmət etmədiyini göstərir. Bu, heç də təəccüblü deyil, çünki həmin şəxs 2023-cü ilin iyununda verdiyi müsahibədə “Rusiya öz məqsədlərinə nail ola bilməyib” demişdi. Təəssüf ki, Azərbaycan tərəfinin dəfələrlə Rusiya rəsmi orqanlarına müraciətinə baxmayaraq, Zatulinin müttəfiqlik münasibətlərini pozan və təxribatçı fəaliyyət göstərən hərəkətlərinə qarşı heç bir təsirli tədbir görülməyib. Bu, Milli Məclisin deputatları və Azərbaycan cəmiyyətində ciddi narahatlıq yaradır, Azərbaycanın Rusiyadakı diaspor təşkilatlarını narahat edir və iki ölkə arasında parlamentlərarası əməkdaşlığa mənfi təsir göstərir. Bu səbəbdən, hörmətli Vyaçeslav Viktoroviç, sizdən rəsmi mövqeyə uyğun olaraq prinsipial yanaşma göstərməyinizi və Konstantin Zatulin tərəfindən gələcəkdə bu cür təxribatçı fəaliyyətlərin qarşısını almaq üçün mümkün olan hər şeyi etməyinizi xahiş edirəm”.

    Əlbəttə, bu, yalnız səfir Polad Bülbüloğlunun yox, Azərbaycan dövlətinin mövqeyidir. Odur ki, sual yaranır: səfirin müraciətinə cavab nə olacaq? Rusiya Putinin sədri olduğu hakim partiyanın üzvü Zatulini heç olmasa bu dəfə cəzalandıracaqmı? Necə – vəzifədən götürülməklə, töhmətlə, mandatı əlindən alınmaqla, yoxsa?.. Xatırladaq ki, Rusiyadakı erməni lobbisinin bəslədiyi bu yaramaz Azərbaycanın da “qara siyahısı”ndadır.

    Vətəndaş Həmrəyliyi Partiyasının Mərkəzi İcra Aparatının rəhbəri Samir Əsədli səfir P. Bülbüloğlunun etiraz məktubu göndərməsini düzgün addım hesab edir. Onun fikrincə, Azərbaycandan belə hörmətsizlik olsaydı, indi Kreml səs-küy salmışdı. S.Əsədli hesab edir ki, Zatulin erməni diasporunun təsiri altındadır və onlara qulluq edir: “Azərbaycanda hakim partiyanın parlamentdə olan heç bir üzvü Rusiyaya qarşı belə qərəzli danışmayıb. Zatulin isə hər çıxışında təhqirlər yağdırır, ittihamlar irəli sürür. Bu dəfə isə həddi aşaraq uydurma bir respublika ilə bağlı təbrik ünvanlayır. Onun təbriki ermənilərin heç də ürəyinə su səpə bilməz, çünki belə sözlər təsəlli də deyil. Hazırda Araik və digər separatçı liderlərin istintaqı yekunlaşıb, məhkəmə başlanacaq, digər canilər qaçıb İrəvanda gün keçirirlər, dinc əhaliyə gəlincə, Bakının tələbi hər kəsə aydındır – vətəndaşlığı qəbul etmək. Zatulin Azərbaycanın ərazi bütövlüyünə bir daha hörmətsizlik etsə, bu dəfə başqa şəkildə danışmaq lazım gələcək”.

    VHP funksioneri Rusiyadakı Azərbaycan diaspor təşkilatlarının daha aktiv işləməli olduqlarını düşünür: “Ermənilər Rusiyada fəaldırlar və hazırda diplomatik mübarizə gedir. Bizim təşkilatlar Zatulin kimilərin cavabını verməlidirlər. Rusiya dövləti özü müttəfiqliyin qaydalarına uyğun hərəkət etməyi başqalarına tövsiyə edir, indi buyursunlar, Zatulinə töhmət versinlər. Təbii ki, onun mandatının əlindən alınacağını gözləmək olmaz. Bunu etməyəcəklər. Yəni çıxışlarına görə bu addımı atmazlar. Lakin Zatulinə spiker Volodin tərəfindən açıq xəbərdarlıq olunmalıdır. Bu müştəbeh, təxribatçı və qudurğan deputat kimdir ki, Qarabağda mövcud olmayan, bir sutkaya darmadağın edilmiş keçmiş xunta rejimi haqqında danışır, hələ bir ”bayram təbriki” göndərir? Əgər ermənilər Qarabağı öz torpaqları saysaydılar, çıxıb getməzdilər. Sadəcə, Zatulin həmişəki kimi ermənilərdən aldığı rüşvətin əvəzini ödəyir. Azərbaycan məsələ qaldırmalı, ona cinayət işi açılması üçün iddia irəli sürməlidir”.

    Emil SALAMOĞLU,
    “Yeni Müsavat”

  • Vətəndaş Həmrəyliyi Partiyasının BƏYANATI

    Vətəndaş Həmrəyliyi Partiyası Azərbaycan parlamentarizmi tarixində bütün seçkilərində iştirak etmiş və hər bir seçkidə uğura nail olmuşdur. Seçkidən-seçkiyə öz təcrübəsini daha da artıran Partiya VII çağırış Azərbaycan Respublikasının Mili Məclisinə seçkilərdə də aktivliyi ilə fərqlənmişdir.

    VHP-nin seçkilərə qatılan 17 namizədi qatılan Partiyamız demokratik seçki mühiti, təşviqat üçün yaradılmış münbit şərait mühitində rahat və sərbəst təbliğatını aparmışdır. Namizədlər təkcə MSK tərəfindən onlar üçün ayrılmış qapalı və açıq məkanlarda deyil, hər bir yaşayış məntəqəsində, kəndlərdə, qəsəbələrdə, məhəllələrdə maneəsiz təbliğat-təşviqat işi aparmış, nəticədə böyük uğur qazanmışdır.
    Bu müddət ərzində partiya rəhbərliyi, namizədlər ATƏT-in Demokratik Təsisatlar və İnsan Haqları Bürosunun Azərbaycandakı parlament seçkilərini izləyən uzunmüddətli müşahidə missiyasının, ATƏT Parlament Asambleyasının seçki müşahidə missiyasının üzvləri, ölkəmizdə fəaliyyət göstərən bir çox səfirliklərin nümayəndələri ilə görüşmüş, onlarla seçki mühitini müzakirə etmiş və namizədlərin təşviqat kampaniyası ilə bağlı onları məlumatlandırmışdır.
    1 sentyabr tarixində 125 seçki dairəsindən 51-də seçkini canlı izləyən müşahidəçilərimizin rəyləri, həm də partiyanın qərargahından yüzlərlə seçki məntqəsində quraşdırılan kameraların izlənilməsi onu deməyə əsas verir ki, VII çağırış Milli Məclisə seçkilər təhlükəsiz, demokratik və şəffaf keçirilmişdir. İlkin nəticələrə əsasən Partiyamızın 17 namizədindən 3-ü qalib gələrək seçki marafonunu uğurla başa vurmuşdur.
    Seçki prosesində namizədlərimizə qarşı digər namizəd və nümayəndələrinin baş verən hansısa təxribat cəhdləri olsa da, müşahidəçilərimiz və səlahiyyətli nümayəndələrimiz tərəfindən seçkini pozmaq cəhdlərinin qarşısı alınmışdır. Gerçəkdə 1 sentyabr seçkilərində əhalinin rahat şəkildə və istədiyi namizədə səs verməsinə şərait yaradılmış, onların seçiminə təsir göstərilməmişdir. Vətəndaş Həmrəyliyi Partiyası seçkinin ilkin nəticələrinə əsasən uğur qazanan bütün namizədləri ürəkdən təbrik edir və onlara fəaliyyətində uğurlar arzulayır.