Blog

Vətəndəş Həmrəyliyi Partiyasının (VHP) sədri, millət vəkili Sabir Rüstəmxanlı haqqında gəzən söz-söhbətlərə aydınlıq gətirib. Türkiyədən yenicə qayıdan partiya sədri onun Milli Şuranın prezidentliyə vahid namizədi olması ilə bağlı irəli sürülən təklifə və buna qarşı çıxan eks-spiker Rəsul Quliyevə cavab verib.

VHP sədri Modern.az-a bildirib ki, bir il bundan öncə ona Milli Şuranın vahid namizədi olmaq təklifi gəlsəydi, buna razılaşa bilərdi:

“Seçkiyə cəmi iki ay qalıb. Bu müddətdə Milli Şura öz namizədi ətrafında müzakirələr aparır. Müxtəlif  variantlar deyilir. Bunlar qeyri-ciddi məsələlərdir. Doğurdan da hakimiyyətə gəlmək istəyən adamlar, iqtidarı udmaq istəyən qüvvələr bu işi əvvəldən görə bilərdilər. Çox ciddi çalışmaq lazım idi. Seçkiyə iki ay qalmış biz nala-mıxa vururuqsa, bununla heç nəyə nail olmaq, qələbə qazanmaq mümkün olmayacaq.

Bir il əvvəl, il yarım əvvəl mənə təklif olunsaydı köhnə dostlarımın, həmkarlarımın ürəkdən məni dəstəklədiklərini bilsəydim, onda bir qərar verə bilərdim.

İndi bu barədə danışmaq yersizdir. Milli Şuranın fəaliyyətini izləyirəm”-deyə S.Rüstəmxanlı bildirib.

Qeyd edək ki, VHP-nin Milli Şuradakı təmsilçisi Samir Əsədli Sabir Rüstəmxanlının müxalifətin vahid namizədi olmasına dair təklif irəli sürüb. Təklif Milli Şurada birmənalı qarşılanmayıb. Milli Məclisin eks-spikeri Rəsul Quliyev Modern.az-a açıqlamasında S.Rüstəmxanlının namizədliyinə qarşı çıxaraq bunu qəbulolunmaz hesab edib.

Anar RÜSTƏMOV

modern.az
 

Vətəndaş Həmrəyliyi Partiyasının (VHP) Diasporla İş üzrə Şöbəsinin müdiri Real Cəfərli Güney Azərbaycanda ötən həftə ərzində baş vermiş hadisələrlə bağlı məlumat verib.

Real Cəfərli bildirib ki, fars şovinist rejimi milli fəalların hüquqlarını pozmaqda davam edir: “İyulun 13-də Təbriz şəhərinin mərkəzi həbsxanasında aclıq aksiyasına başlamış Yeni GAMOH təşkilatının üzvləri – doktor Lətif Həsəni, Yuruş (Ayət) Mehrəlibəyli, Mahmud Fəzli, Savalan (Səccad) Radmehr və Behbud Quluzadə öz mübarizələrini davam etdirirlər. Milli fəallar barələrində çıxarılmış ümumilikdə 45 illik hökmü ədalətsiz hesab edərək artıq 17 gündür aclıq aksiyası keçirirlər. Ancaq fars şovinist rejimi onların tələbləri yerinə yetirmək əvəzinə iyulun 20-də Təbriz şəhərinin mərkəzi həbsxanasından Tehran şəhərinin Evin həbsxanasına, daha sonra isə Kərəc şəhərinin Rəcayişəhr həbsxanasın köçürüb. Güney Azərbaycanın Təbriz, Mərənd və digər şəhərlərində onların azadlığa buraxılması üçün bildirişlər yayılıb, divarlara şüarlar yazılıb, eyni zamanda imzatoplama kampaniyası başladılıb”.

VHP-nin Diasporla İş üzrə Şöbəsinin müdiri deyib ki, İran islam inqilab məhkəmələrinin ədalətsiz hökmləri səngimir: “Ötən həftə AMEA-nın Nizami adına Ədəbiyyat İnstitutunun elmi işçisi, Şəhriyarşünas, araşdırmaçı-alim Xalidə Xalidlə birgə və sonra həbs edilmiş azərbaycanlı fəallara hökm oxunub. Hökmə əsasən, 2 azərbaycanlı fəal – İlqar Müəzzinzadə və Məhəmməd (Oxtay) Rəşidi ümumilikdə 31 ay azadlıqdan məhrum ediliblər. İ. Müəzzinzadəyə bir yerə toplaşmaqla milli təhlükəsizliyə xələl vurmağa cəhd göstərmək ittihamına görə 2 il, hakimiyyət əleyhinə təbliğat aparmaq ittihamına görə isə 91 gün həbs cəzası verilib. Məhəmməd Rəşidi isə eyni ittihamlara əsasən 91 gün və 1 ay həbs cəzasına məhkum edilib. Digər azərbaycanlı fəallar – aşıq İsa Qaraxanlu və Əmir Hadiyan isə bütün ittihamlar üzrə bəraət alıblar. Təbriz İnqilab Məhkəməsi azərbaycanlı fəalları X. Xalidlə əlaqə qurduqlarına, Azərbaycan türkcəsində kitab yaydıqlarına və İran İnformasiya, Təhlükəsizlik və Kəşfiyyat Nazirliyinin (ETTELAAT) təqdimatına görə bu şəkildə cəzalandırıb. Məhəmməd Rəşidi aprelin 30-da, İlqar Müəzzinzadə isə mayın 8-də həbs edilib. Məhəmməd Rəşidi 56 gün saxlanıldıqdan sonra 150 milyon tümən zəmanətlə azadlığa buraxılsa da, ancaq İlqar Müəzzinzadə tutulduğu gündən həbsdədir. Təbriz İnqilab Məhkəməsinin üçüncü şöbəsi tanınmış azərbaycanlı bəstəkar Həsən Dəmirçini 6 ay azadlıqdan məhrum edib: “Azərbaycanlı bəstəkar Azərbaycan türklərinin problemləri ilə bağlı keçirilən iclaslarda iştirak etmək, İran dövlətinin icazəsi olmadan Qaradağ zəlzələsindən zərər çəkmiş insanlara köməklik göstərmək və ianə toplamaq, musiqi kursları təşkil etmək, Azərbaycan musiqisini tədris etmək, ölkə daxilində və xaricindəki istiqlalçı (“separatçı”) qüvvələrlə əlaqədə olmaq və həbsxanadan çıxan azərbaycanlı siyasi məhbusların qarşılanma mərasiminə getməkdə günahlandırılıb. Hakim Həmid Purbağır İran İslam Cəza Qanununun 500-cü maddəsini əsas götürərək 60-dan çox yaşı olan azərbaycanlı fəala belə bir cəza verib. Ancaq bu ittihamlara görə həmin maddənin tətbiqi mümkün deyil. Təbriz İnqilab Məhkəməsinin üçüncü şöbəsi həmçinin azərbaycanlı siyasi fəal Arəş Məhəmmədiyə də 6 ay həbs cəzası verib. Solçu tələbə fəal hakimiyyət əleyhinə təbliğat aparmaqda günahlandırılıb. A. Məhəmmədi hazırda Təbriz şəhərinin mərkəzi həbsxanasının maliyyə bölümündə saxlanılır”.

Real Cəfərli vurğulayıb ki, Güney Azərbaycanda həbslər, qeyri-qanuni sorğu-suala çəkilmək də davam edir: “Belə ki, daha çox azərbaycanlıların milli-mədəni hüquqları mövzusunda türk dilində səsləndirdiyi tənqidi şeirləri ilə tanınan Əli Cabbari tutulub. Azərbaycanlı şair İran İnformasiya, Təhlükəsizlik və Kəşfiyyat Nazirliyinin (Təbriz) şöbəsinə çağırılmasını səbəbini aydınlaşdırmaq üçün müraciət edərkən həbsə alınaraq Təbriz şəhərinin mərkəzi həbsxanasına salınıb. Əli Cabbari isə öz şeirlərində “pantürkizm” və “separatçılıq” kimi ittihamlardan əsasən azərbaycanlı fəallara qarşı təzyiq üçün ortaya atılan bəhanələr kimi bəhs edir. Bundan əlavə, milli fəallar Yədulla (Elman) Dəşti, Əli Hidayəti və Ramin Rzayi ifadə vermək üçün avqustun 3, 4 və 5-də Soyuqbulaq İnqilab Məhkəməsinə çağırılıb. Onlar hakimiyyət əleyhinə təbliğat aparmaqda və müxalif qruplarla əməkdaşlıqda günahlandırılırlar. Həmçinin 5 nəfər məhbus yoldaşı ilə birlikdə heç bir dəlil olmadan və saxta ittihamlarla Tehranın Evin həbsxanasının 240-cı bölümünün təkadamlıq kamerasına salınan azərbaycanlı jurnalist Səid Mətinpur zindanın 350-cı bəndinə geri qaytarılıb. Eyni zamanda bu il iyunun 12-də həbs olunmuş və 40 günə yaxın ETTELAAT-ın Təbriz şəhərindəki təcridxanasında təkadamlıq kamerada saxlanılmış azərbaycanlı fəallar Bəhram Axuni və Nasir Kazımpur Təbriz şəhərinin mərkəzi həbsxanasına köçürülüblər. Onlarla birlikdə tutulmuş Məcid Səfidani isə hazırda ETTELAAT-ın Təbriz şəhərindəki təcridxanasında saxlanılır. Bundan əlavə, azərbaycanlı tələbə fəal Mehdi Həmidi Şəfiq iyulun 22-də Təbriz şəhərinin mərkəzi həbsxanasından ETTELAAT-ın Təbriz şəhərindəki təcridxanasına köçürülüb.

VHP-nin Diasporla İş üzrə Şöbəsinin müdiri bildirib ki, Urmiya gölündəki ekoloji fəlakətlə bağlı da həyacan təbili çalınmaqdadır: “Belə ki, Urmiya gölündəki ekoloji fəlakət hövzənin ətrafında yerləşən 7 şəhər böyük təhlükəylə üzləşib. İranın Şərqi Azərbaycan vilayətinin Kənd Təsərrüfatı İdarəsinin rəhbəri Məsud Məhəmmədian Urmiya gölünün qurumasının hövzənin ətrafında yerləşən 7 şəhərin artezian quyularına ciddi təsir göstərdiyini və quyuların suyunun şorlaşmasının artmasına gətirib çıxardığını söyləyib. Onun sözlərinə görə, hazırda Urmiya gölü hövzəsi ətrafındakı 600 min hektardan çox əkin və bağ sahəsi ekoloji fəlakətin mənfi təsiri ilə qarşı-qarşıyadır və ciddi ziyan görməkdədir. Eyni zamanda artezian quyularında da duzluluğun miqdarı getdikcə artır. Bundan əlavə, İran parlamentinin 10 nəfər deputatı da Urmiya gölü ilə bağlı ölkə prezidenti Mahmud Əhmədinejada məktub yazıb. Deputatlar İran parlamentinin 90-cı komissiyasına da eyni məzmunlu müraciət ediblər. Məktubda Urmiya gölü ətrafında duz tufanları başladığı qeyd olunub və ölkə rəsmilərindən Urmiya gölünü ekoloji fəlakətdən xilas etmək üçün təcili addımlar atmaq tələb olunub. Məktubu Təbriz, Ərdəbil, Urmiya, Tehran, Abadan və Qum şəhərlərini İran parlamentində təmsil edən deputatlar imzalayıblar. İran rejimi zahirən addımlar atdığını göstərmək üçün iyulun 27-də Araz çayının suyunun Urmiya gölünə axıdılması layihəsinin icrasına başlayıb. Layihə Araz çayının suyunun Culfa, Mərənd, Şəbüstər və Təbriz şəhərlərinin çöllərinə, ümumilikdə 15 min hektar əraziyə axıdılmasını özündə ehtiva edir. Ümumilikdə, 22 şəhər və 286 kənd içməli su ilə təchiz olunacaq”.

Bu açıqlamanı APA-ya Milli Şuranın (MŞ) üzvü, Vətəndaş Həmrəyliyi Partiyası Ali Məclisinin sədri Rafiq Manaflı verib..

R. Manaflı Müsavat Məclisinin partiya başqanı İsa Qəmbərin prezidentliyə namizədliyini qüvvədə saxlamasına da münasibət bildirib. O, Milli Şura üzvlərinin İsa Qəmbəri bu mövqeyinə görə sıxışdırmasını düzgün hesab etməyib: “Çünki İsa Qəmbər müxalifətin vahid namizədi olaraq Rüstəm İbrahimbəyovun namizədliyini birmənalı şəkildə dəstəkləyib. Amma o, əvvəlcədən seçkiləri boykotun qəti əleyhdarı olduğunu bəyan edib. İsa Qəmbərin prezidentliyə namizədliyini geri götürməməsi o demək deyil ki, Rüstəm İbrahimbəyovun namizədliyinin əleyhinədir və yaxud onun namizədliyinin qeydə alınmasına hansısa maneə yaratmağa çalışır. Bu belə başa düşülməməlidir. İsa Qəmbərin günahı yoxdur ki, bu gün Milli Şura Rüstəm İbrahimbəyovun prezident seçilməsi istiqamətində hər hansı fəaliyyət göstərmək iqtidarında deyil.  Bu baxımdan hesab edirəm ki, Müsavat Partiyasının mövqeyinə normal yanaşmaq lazımdır. İsa Qəmbəri bu mövqeyinə görə sıxışdırmaq lazım deyil”.

R. Manaflı qeyd edib ki, Milli Şuranın vahid namizədinin qeydə alınması uğrunda bütün mexanizmlərdən istifadə etməlidir, amma bu proses seçkiləri boykotla nəticələnməməlidir: “Seçkilərə 2 ay vaxt qalıb. Müxalifət daha da fəal olmalıdır. Lakin indi Milli Şuranın prezident seçkiləri ilə bağlı fəaliyyətində ətalət görünür. Mili Şura daha fəal olmalı və müxalifət heç bir halda bu seçkilərdən kənarda qalmamalıdır”.

Vətəndaş Həmrəyliyi Partiyasının sədri, millət vəkili Sabir Rüstəmxanlı Milli Şuranın ehtiyat namizədi ola bilər.
Belə bir tələblə VHP-nin Milli Şurada təmsil olunan qrupu qurumun növbəti sessiyasında çıxış edəcək. Bu barədə AzNews.az-a daxil olan məlumatda bildirilir ki, VHP MŞ-in sədri Rüstəm İbrahimbəyovun Rusiya vətəndaşlığının ləğvi məsələsinin uzanması halında qurumun yeni vahid namizədinin müəyyənləşdirilməsi ilə bağlı Müsavat başqanı İsa Qəmbərin irəli sürdüyü təkliflə böyük ölçüdə razıdır. Ancaq partiya nümayəndələri bu şəxsin sədrləri Sabir Rüstəmxanlı olması təklifi ilə Milli Şuranın sessiyasına müraciət etməyi planlayır.

Daxil olan məlumatda o da bildirilir ki, Milli Şuranın vahid namizədi R.İbrahimbəyovun namizədliklə bağlı problemi həll olunmazsa və MŞ seçkiyə alternativ namizədlə getməzsə, S.Rüstəmxanlı özü də müstəqil şəkildə happy wheels demo VHP-nin namizədi kimi prezident seçkilərində namizədliyini irəli sürəcək.

VHP-nin Təşkilat Şöbəsinin sədri və qurumu Milli Şurada da təmsil edən Samir Əsədli AzNews.az-a açıqlamasında xəbəri təkzib etməyib. O bildirib ki, VHP Milli Şuranın seçkilərə R.İbrahimbəyovla getməsinin tərəfdarıdır, ancaq bu baş verməyəcəyi halda ehtiyat namizəd variantı ilə razıdır.
Belə olduğu təqdirdə isə Milli Şuradakı VHP-çilərin öz sədrlərini namizəd kimi göstərəcəklər.

S.Əsədli deyib ki, Milli Şuranın növbəti sessiyasında bu məsələ ilə bağlı VHP-nin qurumdakı nümayəndələri adından təklif irəli sürmək barədə düşünürlər. S.Əsədli onu əlavə edib ki, MŞ prezident seçkilərinə özünün namizədi ilə getməsə, böyük ehtimalla, VHP sədri S.Rüstəmxanlının namizədliyini irəli sürəcək və seçkilərdə müstəqil formada iştirak edəcək.

Anar
AzNews.az

“Milli Şuranın vahid namizədi Rüstəm İbrahimbəyovun ikili vətəndaşlıqla bağlı problemi avqustun 15-ə kimi həll edilməsə, VHP-çilər partiya sədri Sabir Rüstəmxanlının namizədliyini irəli sürə bilər”.

Bu açıqlamanı APA-ya Milli Şuranın üzvü, Vətəndaş Həmrəyliyi Partiyasının (VHP) Təşkilat məsələləri şöbəsinin müdiri Samir Əsədli verib.

S.Əsədli deyib ki, hazırda Milli Şuranın vahid namizədi Rüstəm İbrahimbəyovun Rusiya vətəndaşlığından nə vaxt çıxarılacağı dəqiq məlum deyil və bunun həll edilməyəcəyi təqdirdə, VHP sədri Sabir Rüstəmxanlının Milli Şuranın vahid namizədi kimi irəli sürülməsi istisna deyil: “Rüstəm İbrahimbəyovun ikili vətəndaşlıqla bağlı problemi avqustun 15-nə kimi həll edilməsə, Mili Şurada təmsil olunan VHP-çilər partiya sədri Sabir Rüstəmxanlının namizədliyini irəli sürə bilər. Bu istisna deyil”.

      VHP bu münasibətlə tanınmış siyasi xadim və görkəmli alim Hacıbaba Əzimova təbrik məktubu imzalamışdır 

      Azərbaycan tarixşünaslıq elmində öz imzasını qoyan görkəmli alim, milli mənlik şüurunun formalaşmasında xüsusi rolu olan böyük ziyalı, xalqın birliyi, müstəqilliyi uğrunda ilk gündən savaşa qatılan əsl vətəndaş, Azərbaycanın Müstəqillik Aktının əsas  müəlliflərindən biri və bu gün də cəmiyyətimizdə demokratik dəyərlərin bərqərar olması yolunda yorulmadan çalışan taınmış siyasi xadim Hacıbaba Əzimovun keçdiyi həyat yolu bugünkü gənclik üçün əsl nümunə sayıla bilər. O, ustad pedaqoq kimi Azərbaycanın böyük maarifçilik ənənələrini davam etdirərək hələ sovet dövrü gəncliyinin qəlbində azadlıq, müstəqillik, bütövlük rüşeyimlərini əkən əsl xalq maarifçi ziyalılarından biridir. Onun mühazirələrini dinləyərək auditoriyalardan həyata atılan bütöv bir nəsil bu gün ölkəmizin işıqlı sabahı uğrunda gedən mübarizənin ön cərgələrində addımlayır. Onun tərcümeyi-halı bu günkü gənclik üçün də bir məktəb sayılmalıdır.

Professor H.Əzimov 1938-ci il avqustun 1-də Lənkəran şəhərində anadan olmuş, 1955-ci ildə Lənkəran şəhər 3 saylı orta məktəbini, 1960-cı ildə Azərbaycan Dövlət Universitetinin Tarix fakültəsini bitirmişdir. Elmi fəaliyyətinə AMEA Tarix İnstitunda başlamış (1960-1969-cu illər), sonra Pedaqoji Universitetdə baş elmi işçi-doktorant, dosent, professor, Siyasi Tarix Kafedrasının müdiri-professoru (1985-1991-ci illər) vəzifələrində çalışmışdır. 1966-cı ildə namizədlik, 1981-ci ildə isə doktorluq dissertasiyaları müdafiə etmişdir. 

       Prof.H.Əzimov 1991-1992-ci illərdə Bakı Dövlət Universiteti Lənkəran filialının təşkilatçısı və direktoru, 1992-1997-ci illərdə Lənkəran Dövlət Universitetinin (LDU-nun) qurucusu və ilk rektoru olmuşdur. Onun fədakar əməyi və yüksək təşkilatçılıgı sayəsində çox qısa bir vaxt ərzində Lənkəran Dövlət Universiteti  respublikada ən nümunəvi ali tədris mərkəzlərindən birinə çevrilmiş, LDU-da həyata keçirilən düzgün kadr siyasəti, yaranmış saf rəhbərlik-müəllim-tələbə münasibətləri, yüksək səviyyədə keçirilən elmi-mədəni tədbirlər sayəsində o zaman Lənkəranda və bütün bölgədə çox müsbət milli-mənəvi, ictimai-siyasi mühit bərqərar olmuşdur.

Bu illərdə böyük təşkilatçılıq işi ilə yanaşı, H.Əzimov məhsuldar elmi fəaliyyətini də uğurla davam etdirmişdir. O, respublikada və xarici ölkələrdə çap edilmiş 10-dan artıq kitabın, 100-dən çox digər samballı əsərlərin müəllifidir. O, beynəlxalq və respublika əhəmiyyətli bir sıra fundamental tədqiqatların, 10 cildlik Azərbaycan Sovet Ensiklopediyasının tarix bölməsinin, bir sıra tədris vəsaitlərinin müəlliflərindən biridir.  Onun elmi əsərləri beynəlxalq və respublika elmi mərkəzləri tərəfindən dəfələrlə yüksək dəyərləndirilib, 1982, 1984, 1987-ci illərdə çap edilmiş kitabları tarix elminin ən mühüm nailiyyətləri hesab edilir. Elmi əsərlərində Rusiyadakı inqilablar dövründə Azərbaycan xalqının demokratik və milli-azadlıq hərakatı tarixinin bir sıra mürəkkəb problemləri ilk dəfə olaraq dərindən və hərtərəfli araşdırılıb ictimaiyyətə çatdırılmışdır.

        Prof. H.Əzimovun “Azərbaycan tarixində “ag ləkələr” (1989) adlı əsəri Azərbaycan xalqının ictimai-siyasi və istiqlal mübarizəsi tarixinin düzgün və yeni konsepsiyada işıqlandırıldıgı ilk nümunələrdəndir. O, 1990-ci ilin “20  yanvar” faciəsindən dərhal sonra, mətbuatda sərt hərbi senzura tətbiq edilməsinə baxmayaraq, yanvarın 31-də “Bakinskiy Raboçiy” qəzetində çap etdirdiyi “Azərbaycan tarixi.1918-1920-ci illər. Yeni təfəkkür aynasında “ag ləkələr” adlı iri həcmli məqaləsində vaxtilə Androniklərin, Şaumyanların Türkiyə və Azərbaycanın dinc əhalisinə qarşı törətdikləri amansız qətliamları dürüst faktlarla göstərməklə və xalqımıza qarşı bu genosid siyasətin SSRİ rəhbərliyi tərəfindən yanvarın 20-də Bakıda və bir sıra rayonlarda təkrarən həyata keçirildiyini, lakin bütün bunların Azərbaycan xalqının milli azadlıq hərəkatının qarşısını ala bilməyəcəyini bəyan etməklə əil ziyalı qeyrəti və  vətəndaşlıq mövqeyi nümayiş etdirmiş və bununla da o vaxt dərin kədər və hüzn içərisində olan xalqımıza böyük mənəvi dəstək olmuşdur.

        Prof.H.Əzimov uzun illər ərzində bir sıra beynəlxalq və respublika Elmi Şuralarının, ixtisaslaşdırılmış dissertasiya Müdafiə Şuralarının üzvü, LDU yanında ixtisaslaşdırılmış Müdafiə Şurasının sədri olaraq ölkəmizdə gənc alimlərin hazırlanmasına böyük töhfələr vermiş, 50 nəfərdən artıq şəxs onun elmi rəhbərliyi, rəyi və elmi məsləhətçiliyi ilə doktorluq və namizədlik dissertasiyası müdafiə etmişdir.

        Ölkənin ictimai-siyasi həyatında fəal iştirak etdiyinə və xalq arasında böyük nüfuzuna görə  H.Əzimov 1990-cı ildə Azərbaycan Respublikasının xalq deputatı, 1991-ci ildə isə cəmi 51 nəfərdən ibarət ilk professional parlamentin – Milli Məclisin üzvü seçilmişdir. O, Azərbaycanın dövlət müstəqilliyi naminə fədakarcasına mücadilə aparan Müstəqil Azərbaycan Deputat Blokunun (“Demblok”un) üzvü olmuş, gözlənilən hər cür təqib və repressiyalara baxmayaraq, hələ 1991-ci il martın 7-də Ali Sovetdə SSRİ-nin saxlanması ilə baglı respublikada referendum keçirilməsinin əleyhinə, Azərbaycanın dövlət müstəqilliyinə səs vermiş cəmi 43 nəfər istiqlalçı deputatdan biri, 1991- ci il oktyabrın 18-də Ali Sovetdə qəbul edilən Azərbaycan Respublikasının dövlət müstəqilliyi haqqında Konstitusiya Aktını hazılayan deputat komissiyasının sədri, Konstitusiya Aktının əsas müəllifi və məruzəçisi olmuş, Azərbaycan Respublikasının ilk Milli Məclisinin deputatı oldugu müddətdə (1991-1995-ci illər) ölkənin dövlət müstəqilliyinin möhkəmlənməsində, dövlət atributlarının və qanunvericilik bazasının hazırlanıb qəbul edilməsində fəal iştirak etmişdir.

        O, 1992-ci ildən Vahid Azərbaycan Milli Birlik Partiyasının (VAMBP) sədri olaraq respublikamızın ərazi bütövlüyünü, xalqımızın milli birliyini qorumaq və etnik separatçılıq meyillərinin qarşısını almaq sahəsində böyük işlər görmüş və onun rəhbərlik etdiyi VAMBP  1993-cü ilin iyun- avqust aylarında  Lənkəranda Ə.Hümbətov başda olmaqla “Talış Muğan Respublikası” adlı qondarma qurum elan etmiş separatçı dəstənin ifşa və darmadağın edilməsində  mühüm rol oynamışdır.

        Prof. H.Əzimov son 15 il ərzində fəaliyyət göstərmiş Seçki İslahatı və Demokratik Seçkilər Uğrunda Hərəkatın, Demokratiya Uğrunda Hərəkatın, Konstitusion Seçki Blokunun, Demokratik Azərbaycan Blokunun Sədrlər Şurasının üzvü, Milli Müqavimət Hərəkatının və Ziyalılar Məclisinin İdarə Heyətinin üzvü, 28 siyası partiyanı özündə birləşdirən Birləşmiş Müxalifət Hərəkatının koordinatoru və təşkilat komissiyasının sədri, Azərbaycan Naminə Hərəkatın (ANH) İdarə Heyətinin sədri, son vaxtlarda isə İstiqlalçı Deputatlar Məclisinin və Demokratik Qüvvələrin Milli Şurasının təsisçilərindən biri olaraq ölkədə milli demokratik qüvvələrin konsolidasiyası, cəmiyyətin demokratikləşməsi, ölkədə xalqımızın ali mənafeyinə  müvafiq  demokratik islahatlar aparılması, insan hüquqlarının qorunması, azad və ədalətli seçkilər yolu ilə legitim hakimiyyətin formalaşması uğrunda aparılan mücadilədə fəal iştirak etmiş və etməkdədir. O, həm ümumdemokratik hərəkatların təsisçilərindən biri, həm də VAMBP-nin sədri olaraq Azərbaycanın ərazi bütövlüyünün bərpası, Ermənistan – Azərbaycan münaqişəsinin ədalətli həlli ilə bağlı ümummilli proqram xarakterli sənədlər paketi hazırlayıb respublika rəhbərliyinə, beynəlxalq təşkilatlara, siyasi və ictimai qurumlara təqdim etmiş, dəfələrlə ermənipərəst mövqedən çıxış edən xarici dairələrin Qarabağ problemi ilə bağlı saxta və qərəzli təkliflərinin təslimçi mahiyyəti haqqında bəyanatlar vermişdir.

         Prof. H.Əzimov gördüyü dəyərli işlərlə,  Vətənə təmənnasız xidmətləri ilə xalqımızın böyük hörmət və etimadını qazanmışdır. Onun keçdiyi mənalı həyat yolu və fəaliyyəti  həmişə öz əqidədaşları,  yetirmələri olan çoxsaylı alimlər, müəllimlər və gənclər üçün örnək olmuş və olmaqdadır. Görkəmli alimi, tanınmış siysi xadimi anadan olmasının 75 illiyi münasibətilə səmimi- qəlbdən təbrik edir, ona uğrunda mübarizə apardığı böyük ideallara çatmasını arzu edirik.

Hörmətlə:

Sabir Rüstəmxanlı və

Vətəndaş Həmrəyliyi Partiyasının Siyasi Şurası  

Məlum Olduğu kimi 9 il azadlıqdan məhrum etmiş Yeni GAMOH (Güney Azərbaycan Milli Oyanış Hərəkatı) fəalları Lətif Həsəni, Ayət Mehrəlibəyli, Şəhram Radmehr, Mahmud Fəzli və Behbud Quluzadə iyulun 13-dən məhkəmənin barələrində ədalətsiz hökmünə etiraz olaraq aclıq aksiyasına başlayıb. Onların sağlamlıq vəziyyəti olduqca ağırdır, ancaq haqlı istəklərinə nail olmaq üçün aclıq aksiyasına davam edirlər.  

Vətəndaş Həmrəyliyi Partiyasının sədri, Dünya Azərbaycanlıları Konqresinin (DAK) həmsədri, millət vəkili Sabir Rüstəmxanlı həbsxanada aclıq aksiyasını davam etdirən Yeni GAMOH fəallarına aclıq aksiyasını dayandırmaları ilə bağlı müraciət edib. Müraciətdə deyilir: «Siz həbsxanada olduğunuz halda ruhən azad olduğunuzu, aclıq aksiyanızla mənəvi zənginliyinizi, rejimin ən ağır basqıları altında əqidənizdən, milli davadan dönməməyinizlə iradənizi və böyüklüyünüzü bütün dünyaya sübut etdiniz. Həmçinin fars rejimi, sizin həbsxanada aclıq aksiyası ilə etdiyiniz tələbləri yerinə yetirməyə heç bir meyl göstərməməklə öz qəddar, amansız sifətini bir daha nümayiş etdirdi. Qollarınızda qandal olduğu halda belə siz qalib gəldiniz. Əziz qardaşlarım! Bizi qarşıda böyük və şərəfli bir mübarizə yolu gözləyir. Sizin kimi fədakar hərəkatçılar hələ gələcək mübarizəmizdə millətimizə çox lazımdır. Haqq uğrunda aparılan mücadilə mütləq qalib gələcək. Gələcək mübarizədə iştirak etmək və həmin qalibiyyəti görmək ən çox sizin haqqınızdır. Bütün bunları və 20 günlük aclıq aksiyanızın artıq beynəlxalq aləmə kifayət qədər səs saldığını və müxtəlif reaksiyalara səbəb olduğunu nəzərə alaraq sizi aclıq aksiyasını dayandırmağa çağırıram».

Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlının bir müddət öncə hazırda həbsdə olan gənc fəal Zaur Qurbanlını zaminə götürmək üçün etdiyi müraciətə Baş Prokurorun birinci müavini, ikinci dərəcəli dövlət ədliyyə müşaviri Rüstəm Usubovun imzası ilə cavab verilib.

R.Usubov cavab məktubunda bildirir ki, Zaur Qurbanlının uzun müddət irsi talassemiya və böyrək çatışmazlığı kimi xəstəliklərdən əziyyət çəkdiyi, istintaq təcridxanasında saxlanılmasının xəstəliyinə mənfi təsir etdiyi və onun həbsdə saxlanılmasının qeyri-mümkünlüyü barədə müraciətinizi aydınlaşdırmaq üçün məhkəmə-tibb ekspertizası təyin edilmiş və ekspertizanın icrası Səhiyyə Nazirliyinin Məhkəmə-Tibb Ekspertizası və Pataloji Anatomiya Birliyinə tapşırılmışdır. Ekspertizanın nəticələrindən asılı olaraq, Zaur Qurbanlının barəsində həbs qətimkan tədbirinin qüvvədə qalıb-qalmayacağı və şəxsi zaminliyinizə verilməsi imkanları nəzərdən keçiriləcəkdir.

VHP Mətbuat Xidməti

“Varlıq” jurnalı zamanın ehtiyacından doğulan bir məcmuə oldu. XX yuzilliyin əvvəllərində hakimiyyətə gələn Rza şahın paniranist siyasəti bu ölkədə yaşayan xalqların milli mənliyini unutdurmağa yönəlmişdi. Həmin dövrlərdə Güney azərbaycanlıların da milli mənsubiyyətinin təkzib edilməsi, azərilərin fars mənşəli olması barədə iddialar irəli sürülürdü. “1309-cu ildə İran şahının sərəcamına əsasən İranın bütün əyalət və vilayətlərində tədris və təhsilin fars dilində aparılması məcburi oldu və digər dillərdəki təhsil qeyri-qanuni sayılmağa başladı.” (8. s.14) Millətə öz milli kimliyini unutdurmaq üçün hətta bu dövrlərdə azərbaycanca və digər dillərdə olan coğrafi adların dəyişdirilməsi üçün də plan gerçəkləşdirilmişdi.  “Fərhəngestani – İran” 1314-cü ildən 1319-cu ilin sonunadək 130 səhifəlik bir siyahı hazırlayaraq  həmin siyahı üzrə türk və digər yerli xalqların dilində olan coğrafi adların dəyişdirilməsi nəzərdə tutmuşdu. (9. 17)  İran tarixini araşdıran müəlliflərdən biri yazır: “53 illik pəhləvi xanədanı dövründə Pişəvərinin rəhbərlik etdiyi demokratik firqənin Aərbaycanda hakimiyyətdə olduğu bir iilik dövrü istisna etməklə, türk dilində kitab nəşri demək olar ki, qadağan olub və hətta farsca çıxan kitablarda da türk dili, tarixi və mədəniyyətindən bəhs edən müəlliflər mühakimə olunublar”. (10, 21)

1945-46-cı və 1951-53-cü illərdə şah rejiminin aərbaycanlılara qarşı apardığı cismani və mənəvi soyqırımlar nəticəsiz ötüşməmişdi. Azərbaycan dili, mədəniyyəti, ədəbiyyatı tarixi  kitablardan, tədris müəssisələrindən qovulub, ailə-məişət çərçivəsinə salınmışdı. 1970-ci illərin sonuna qədərki dövrdə bu ölkədə demək olar ki, azərbaycanca danışmaq cinayət bərabər tutulurdu. 1978-79-cu illırər islam inqilabı bu bu məhdudiyyətləri nisbətən də olsa aradan qaldırdı. Açıq gözlü Azərbaycan ziyalıları bu fürsətdən istifadən edərək millətə özünü tanıtmaqda yardımçı olmağı qərarlaşdırdılar. 1979-cu il İran islam inqilabından sonra Cavad Heyətin rəhbərliyi ilə  professor Həmid Nitqi, Məhəmmədəli Fərzanə, Həsən Məcidzadə Savalan, Kərim Məşrutəçi (Sönməz), Mənzuri Xamneyi, Səməd Sərdarniya, Qulamhüseyn Beqdeli ilə birlikdə Tehranda “Varlıq” (jurnal)ını təsis edirlər. Jurnal Cavad Heyətin özünün qeyd etdiyi kimi islam inqilabı ilə yaşıdır. Alim bununla bağlı yazır: “Varlıq” dərgisi 33 ildir müntəzəm şəkildə çap olunur. Bu dərgi İranda İslam inqilabı ilə yaşıddır. Çünki ondan əvvəl şah zamanında bizim ana dilimizdə Azərbaycan türkcəsində jurnal çıxartmağa icazə verilmirdi. İslam inqilabından sonra bizə nisbi dil azadlığı verildi ki, biz ondan faydalandıq və mən bir neçə azərbaycanlı dostumla bərabər jurnal çıxarmağa qərar verdik. Amma bu jurnalın siyasi tərəfi olmayacaqdı, çünki siyasi tərəfi olsa, ya hökumətin sözçüsü kimi nəşr olunmalı idi, ya da bağlanmalı idi. Halbuki bizim məqsədimiz xalqımıza dilini, ədəbiyyatını, tarixini öyrətməkdən ibarət idi. Xüsusilə İranda ana dilində məktəb olmadığı üçün “Varlıq” o vəzifəni də öhdəsinə götürdü. Biz ilk başda iş bölümü yaptıq, mən ədəbiyyat tariximizi, dilimizin tarixini silsilə məqalələrlə yazmağa başladım. Bu minvalla biz hər ayda bir, sonra iki sonra isə üç ayda bir dərgini çıxartdıq. Amma dərginin nəşr olunma araları artdıqca həcmi da artdı. Daha sonra mənim müəllifi olduğum silsilə məqalələri bir yerə toplayıb kitab şəklində çap elədik. Eyni zamanda dərgidə Türk dünyasına , Şimalı Azərbaycan, Türkiyə, Türkistan haqqında da məqalələr də yazılır. Bu yazılar bir növ müdafiə vəzifəsini yerinə yetirir. Çünki İranda şovinist zümrə buranın Azərbaycan olduğunu qəbul etmir və deyir ki, Azərbaycan Ələtə qədərdir. Biz bunlarla mücadilə aparırıq və yazdığımız məqalələrlə onlara cavab veririk. Azərbaycan Dərbəndə qədərdir. Hətta mən bir məqaləmdə qeyd etmişəm ki, Şimalı Azərbaycanda yaşayan azərbaycanlılar bizdən daha çox azərbaycanlıdırlar, çünki bizim üç hüüviyyətimiz var;(yəni,mənsubiyyətimiz) biri iranlı, ikincisi türk, üçüncüsü isə azərbaycanlı olmağımızdır. Şimali azərbaycanlıların isə bir hüviyyəti var , o da azərbaycanlı olmalarıdır. Ona görə də kimsənin haqqı yoxdur, bu hüviyyəti onlardan almağa. Hər millət özü- öz adını təyin edər, başqası ona ad qoya bilməz. İranda belə polemik məqalələri şovinistlərin oxuya bilməsi üçün farsca yazırdım. Hətta sonra “Varlıq”da çıxan məqalələrdən 60 –ını seçib kitab şəklində nəşr etdik.Bir hissəsi farsca idi, onu da çevirdik. Beləcə “Varlıq” indi də davam edir, dilimizi, ədəbiyyatımızı , kimliyimizi tanıtdırır, müdafiə edir. (11)

Jurnal üzərinə hər hansı bir siyasi missiya götürməsə də, 80-ci illərin ikinci yarısından İranda başlanan milli –demokratik düşüncənin əsas ilhamvericisi olmuşdur.  “Varlıq” ilk növbədə İranda ilk Azərbaycandilli məktəb kimi xarakterizə olunmalıdır. Dil qanunlarından, əlifbadan başlamış ədəbiyyat, tarix, türk coğrafiyasına qədər bütün məsələləri ehtiva edən “Varlıq” bu gün onlarca yeni azərbaycandilli jurnal və qəzetin banisidir.

                                            İbrahim Quliyev

AMEA-nın Məhəmməd Fizuli adına əlyazmalar institunin elmi işçisi

Bu gün Vətəndaş Həmrəyliyi Partiyası (VHP) Şirvan Şəhər Təşkilatı Məclisinin toplantısı keçirildi.
Toplantıda şəhər təşkilatının konfransına hazırlıq, ictimai-siyasi vəziyyət, təşkilatın fəaliyyəti müzakirə edildi.
Şəhər təşkilatının sədri Aqil Vəliyev, NTK üzvü İdris Xurşudov, Ağsaqqallar Şurasının sədri Qəzənfər Məmmədov, RT sədrinin müavini Allahverdi Babayev, Qadınlar Şurasının sədri Ayrac Atamoğlanova və Gənclər Təşkilatının sədri Həlimə Rzalı çıxış ediblər. Natiqlər şəhər təşkilatının fəaliyyəti, bölgədəki ictimai-siyasi vəziyyət barədə danışıblar.

VHP Ali Məclisinin sədri Rafiq Manafli ölkədəki ictimai-siyasi vəziyyət, Milli Şuranın fəaliyyəti, qarşıdan gələn prezident seçkiləri, müxalifətin vəzifələri, vahid namizəd, İctimai Palatanın fəaliyyətindən danışıb.
Təşkilat Şöbəsinin müdiri Samir Əsədli partiyanın fəaliyyəti, qurultaya hazırlıq və təşkilati işlər barədə ətraflı məlumat verib.

Sonda özək təşkilatlarının ümumi yığıncaqları çağrılıb, şəhər təşkilatının konfransının vaxtı və nümayəndəlik kvotası müəyyən edilib.