Author: vhpadmin

Bu gün VHP sədri, millət vəkili Sabir Rüstəmxanlı ATƏT-in Bakı ofisinin rəhbəri Koray Tarqayla görüşüb.

ATƏT-in Bakı ofisində baş tutan görüşdə Milli Məclis və qanun yaradıcılığı, qanunların icrası, MM-də müxalifət partiyalarının fəaliyyət imkanları, «Siyasi Partiyalar Haqqında» qanunun təkmilləşməsi və partiyaların dövlət büdcəsindən maliyələşməsi, seçki qanunvericiliyi, KİV-ə münasibət, söz azadlığı, həbsdə olan jurnalistlərin və vicdan məhbuslarının azadlığa buraxılması, ölkədə insan haqlarının durumu və s. məsələlər müzakirə olunub.

Görüşdə Azərbaycanın uluslararası nüfuzunun qorunması baxımından həbsdə olan siyasi fəalların və jurnalistlərin ən qısa müddətdə azadlığa buraxılması yollarının tapılmasının vacibliyi vurğulanıb. Bununla yanaşı, söz azadlığı və jurnalistlərin qorunması baxımından jurnalist peşəkarlığının yüksəldilməsinin zəruriliyi də qeyd edilib.

ATƏT-in Bakı ofisinin rəhbəri Azərbaycanda da siyasi partiyaların dövlət büdcəsindən maliyyələşməsinin vaxtının çatdığını söyləyib. Bu işin reallaşması niyyətiylə Ofisin qabaqcıl ölkələrin təcrübəsinin mənimsənilməsi üçün seminarlar keçirdiyi və Venesiya Komissiyasının öz təkliflərini təqdim etdiyi diqqətə çatdırılıb.

VHP sədri ATƏT-in Bakı ofisinin fəaliyyətini dəyərləndirməklə yanaşı, Ermənistanın işğalçılıq siyasətinə son qoyulması üçün aparılan işləri pisləyib və Minsk Qrupunun öz missiyasını başa vurmadan ölü təşkilata çevrildiyini qeyd edib. Özəlliklə Senatın qəbul etdiyi məlum qanundan sonra Fransanın ATƏT-in Minsk Qrupunda təmsilçilik baxımından mənəvi və hüquqi haqqını itirdiyi bildirilib.

 VHP Mətbuat Xidməti

 Yanvarın 25-dən 31-dək İndoneziyanın Palembanq şəhərində İslam Konfransı Təşkilatı Parlament İttifaqının (İKT Pİ) 7-ci sessiyası keçiriləcək.

 Bu barədə bu gün İKT Pİ-də Azərbaycanı təmsil etmək üçün İndoneziyaya səfərə yolanan VHP sədri, millət vəkili Sabir Rüstəmxanlı məlumat verib. İKT Pİ Siyasi Komitəsinin üzvü olan S.Rüstəmxanlı 7-ci sessiyada mühüm məsələlərin müzakirə olunacağını bildirib: «Parlament İttifaqının tərkibinə daxil olan siyasi, iqtisadi, hüquq, insan haqları, ətraf mühit, sosial, mədəni və s. məsələlər üzrə ixtisaslaşmış komitələr İslam dünyasını narahat edən problemləri müzakirə edəcəklər. Siyasi Komitə Qüds və Fələstin, eləcə də Suriya və Liviyanın işğal olunmuş əraziləri ilə bağlı məsələlərə münasibət bildirəcək. Sudanın xarici müdaxilədən qorunması, Somalidəki vəziyyət, terrorizmə qarşı mübarizənin gücləndirilməsi, İslam ümmətini təhdid edən problemlərin qarşısını almaq məqsədilə həmrəylik və birliyin təşviqi, beynəlxalq maliyyə böhranının İslam ölkələrinə yayılmasına qarşı birgə mübarizə və bu məqsədlə ayrıca komitənin yaradılması da gündəmdədir».

S.Rüstəmxanlının sözlərinə görə, İslam və Qərb parlamentləri arasında dialoqun gücləndirilməsi yollarının da axtarılacağı sessiyada Dağlıq Qarabağ probleminə xüsusi diqqət ayrılacaq: «İslam Konfransı Təşkilatı Dağlıq Qarabağın işğalına həmişə həssaslıq nümayiş etdirib. Bu dəfə də Ermənistanın Azərbaycana qarşı hərbi təcavüzü və Dağlıq Qarabağı işğal etməsi ilə bağlı qətnamə layihəsinin qəbul olunacağı gözlənilir».

“Fransa yalançı tarixə qahmar çıxmaqdansa Əlcəzairdə və digər Afrika ölkələrində törətdiyi soyqırımlara baxsın”

“Fransa “erməni soyqırımı”nı inkar edənlərin cəzalandırılması haqqında qanun qəbul etməklə söz azadlığı və demokratiya kimi dəyərlərə qarşı çıxır.

Bunu Lent.az-a açıqlamasında Azəri-Türk Qadınlar Birliyinin sədri Tənzilə Rüstəmxanlı söyləyib. 

Tənzilə Rüstəmxanlı bildirib ki, Fransa belə addım atmaqla obyektivlik və ədalət prinsipindən nə qədər uzaq olduğunu, türklərə qarşı qərəzli mövqedə durduğunu bir daha sübut edib. Onun sözlərinə görə, bu qanunun qəbulu ilə Fransa Dağlıq Qarabağ probleminin həllində hansı mövqedən çıxış etdiyini, ATƏT-in Minsk Qrupunun həmsədri kimi açıq şəkildə Ermənistanı dəstəklədiyini bir daha göstərib: “Azərbaycan dövləti Fransanın vasitəçilik missiyasından imtina etməli, onun ATƏT-in Minsk Qrupundan və həmsədrlikdən uzaqlaşdırılmasını təmin etməlidir”.

Azəri-Türk Qadınlar Birliyinin sədri vurğulayıb ki, bu qanun inkvizisiya sisteminin qayıtmasına yol verir: “Bu hadisə söz azadlığını prinsiplərinə ziddir. Fransanın yalançı tarixin qalasına çevrilməsinə yol verməyin! Fransa yalançı tarixə qahmar çıxmaqdansa öz tarixinə diqqət yetirib, Əlcəzairdə və digər Afrika ölkələrində törətdiyi soyqırımlara baxsın”.

Vətəndaş Həmrəyliyi Partiyası (VHP) Gənclər Təşkilatının təşəbbüsü ilə gənc yazar, kulis.az portalının baş redaktoru Qan Turalının “Mustafa” romanının ictimai müzakirəsi keçiriləcək.
Sizləridə bu tədbirdə görməkdən məmnun olarıq. 

Müzakirə 23 dekabr 2011-ci il tarixdə, saat 15:00-da VHP-nin Akt Zalında keçiriləcək.
Qan Turalının “Mustafa” romanı (143 səhifə) “Qanun” nəşriyyatında “Ən Yeni Ədəbiyyat” seriyası çərçivəsində nəşr edilib.
Yazar üç il kitabın üzərində işləyib. Roman baş qəhrəmanın adıyla adlandırılan kitab 2000-ci illərin gəncliyinin qarşılaşdığı fərdi və siyasi təbəddülatlardan bəhs edir. Melanxolik ovqatda yazılmış romanın baş qəhrəmanının sevgi və siyasətdən aldığı zərbələr onu həbsxanaya gətirir.

Romanın məzmununu “Mübarizə mütləq, məğlubiyyət labüddür” cümləsi ilə ifadə etmək olar.
Yazıçı roman boyu yalnız Mustafanın başına gəldiyi hadisələri yazmaqla kifayətlənmir, eləcə də onun keçdiyi düşüncələr burulğanı, düşüncə dünyasını da təsvir edir.

Ünvan: 
Vətəndaş Həmrəyliyi Partiyasının Akt Zalı
Bakı şəhəri, Xəqani Rüstəmov küç 1210-cu məhəllə

Pünhan İmamlı 055 485 60 76
Nicat Kamal 055 285 45 30
Murad Əhməd 055 893 79 9

VHP sədri, millət vəkili Sabir Rüstəmxanlı bu gün Türkiyə Cümhuriyyətinə yola düşüb.

Millət vəkili İstambul Həsənyurd Bələdiyyəsinin Xocalı soyqırımına həsr etdiyi tədbirdə, daha sonra isə soyqırımın ildönümü ilə bağlı fevralın 26-da Taksim meydanında «Həpimiz Xocalıyız» şüarı ilə keçiriləcək yürüşdə iştirak edəcək.

Daha sonra, öncədən planlaşdırıldığı kimi, millət vəkili Sabir Rüstəmxanlının Aydın Universitetində, İstambul Universitetində, Türk Dünyası Araşdırmaları Vəqfində və Ankara Qazi Universitetində Xocalı soyqırımı ilə bağlı düzənlənən tədbirlərdə çıxışları nəzərdə tutulur.

VHP Mətbuat Xidməti

Bu gün Vətəndaş Həmrəyliyi Partiyasının (VHP) İctimai Palata üzvləri iclas keçirib.

Partiyanın mətbuat xidmətindən “Qafqazinfo”ya daxil olan məlumata görə, iclasda ictimai-siyasi vəziyyət və partiyanın qarşısında dayanan vəzifələr müzakirə edilib. İclasda VHP-nin Ali Məclisinin sədri Rafiq Manaflının İctimai Palatanın Koordinasiya Şurasına namizədliyi təsdiqlənib.

Sabir Rüstəmxanlı: “Bəlli olur ki, onların Allahdan qorxuları yoxdur”

İranlı axund Məhəmməd Cavad Lənkəraninin yazıçı Rafiq Tağının bıçaqlanmasına və onun ölməsinə sevindiyini bildirməsi birmənalı qarşılanmayıb. Rafiq Tağı son yazılarında İranın siyasətini tənqid etmişdi. Vətəndaş Həmrəyliyi Partiyasının sədri, millət vəkili Sabir Rüstəmxanlı da İranın apardığı siyasəti tənqid edən bəyanatlarla çıxış edən şəxslərdəndir. 2009-cu il yanvarın 9-da Nardaran qəsəbəsində keçirilən mitinq zamanı Hacı Əli Hüseynov və Hacı Hikmət Vəliyev Sabir Rüstəmxanlının öldürülməsilə bağlı fətva vermişdilər. Mitinqdə səslənmiş hədələrlə bağlı Sabunçu Rayon Prokurorluğu tərəfindən Cinayət Məcəlləsinin 134-cü (öldürməklə və ya sağlamlığa ağır zərər vurmaqla hədələmə) maddəsilə başlanan cinayət işi üzrə məhkəmənin qərarı ilə hər iki şəxs 1 il müddətinə azadlıqdan məhrum edilmişdi.

Yaranmış vəziyyətdə həyatına təhlükə hiss edib-etməməsini öyrənmək üçün R.Rüstəmxanlı ilə əlaqə saxladıq. Millət vəkili bildirdi ki, iranlı ayətullahın bəyanatı İslama ziddir: “İran ayətullahının bəyanatından bəlli olur ki, onların Allahdan, dindən, Qurandan qorxuları yoxdur. Atılan addımların çoxu İslama zidd olsa da, hər şeyi ayaqlar altına atıb, fars şovinist rejiminin maraqlarını qorumaq baxımından bütün gözlənilməz addımlar ata bilərlər. Bu, hər kəsi narahat edir. Hələ 1988-ci ildə demişəm ki, mən bu meydana kəfənimi boğazıma dolayıb gedirəm. Həyatımız bu cür keçib. Buna görə də bu, məni narahat eləmir”. Rafiq Tağının qətlə yetirilməsindən və İran ayətullahının bu tipli bəyanatından sonra təhlükəsizlik baxımından hüquq-mühafizə orqanlarına müraciət edib-etməməsinə gəlincə, Sabir Rüstəmxanlı bunları dedi: “Bu məsələ ilə bağlı müraciət etməmişəm və belə bir niyyətim də yoxdur. Bu cür təhlükələrdən çox görmüşəm. Allah bir ömür verib, onu yaşayırıq”.

S.KAZIMLI
“Yeni Müsavar” qəzeti 

Samir Əsədli: “Ona edilən təzyiq VHP-nin bütün üzvlərinə qarşıdır”

Vətəndaş Həmrəyliyi Partiyasının (VHP) mətbuat xidmətinin rəhbəri Anar Niftəliyevin hədələnməsindən bir neçə gün keçsə də, siyasi təşkilat olaraq VHP-nin bu məsələ ilə bağlı rəsmi mövqeyi hələ də açıqlanmayıb. Partiya sədrinin təşkilati işlər üzrə müavini Samir Əsədlini də elə bu və digər məsələlərlə bağlı sorğu-suala tutduq:

– Siyasi partiyalarda ən çox aktivlik seçkilər öncəsi müşahidə edilir. Ancaq bununla yanaşı, siyasi təşkilatlar ilin əvvəlində özlərinin fəaliyyət proqramlarını hazırlayır, onu həyata keçirirlər. Cari fəaliyyət davam etdirilir, rayon təşkilatlarının toplantıları, yığıncaqları keçirilir, eləcə də seçkili orqanların – Siyasi Şuranın, Ali Məclisin tədbirləri mütəmadi olaraq təşkil edilir. Biz qarşıdakı ilə hazırlaşırıq. 2012-ci ildə Vətəndaş Həmrəyliyi Partiyasının 20 illiyi ilə bağlı yubiley tədbiri keçiriləcək. Eyni zamanda partiyamızın növbəti qurultayının da 20 illik yubiley ərəfəsində keçirilməsi nəzərdə tutulub. Yanvardan etibarən hazırlıq işlərinə başlayacağıq. Partiyamızın 79 rayon təşkilatı mövcuddur. İlk olaraq rayon təşkilatlarının konfranslarının keçirilməsi nəzərdə tutulur. Eyni zamanda regionlar üzrə partiyamızın yubileyi ilə bağlı tədbirlərin keçirilməsi nəzərdə tutulub. Təbii ki, işlər plan üzrə davam edir. Vətəndaş Həmrəyliyi Partiyasında bu illər ərzində yetişmiş, partiya məktəbi keçmiş şəxslərin, eləcə də gənclərin təşkilatımızın rəhbəri strukturlarına gətirilməsi nəzərdə tutulur. Artıq bu proses başlayıb. Yanvardan isə hazırlıq işlərinə start veriləcək, konfranslar keçrilicək. Partiyanın iyirmi illiyi ilə bağlı tədbirlər paytaxtda düzənlənəcək, habelə digər böyük şəhərlərdə yubiley mərasimlərinin təşkili planlaşdırılır.

– Adətən, Azərbaycanda fəaliyyət göstərən partiyaların qurultaylarında hər hansı ciddi yeniliklər – rəhbər, nizamnamə dəyişiklikləri baş vermir. Qurultay yetkililəri toplaşaraq köhnə sədri, seçkili orqanları yenidən öz yerlərinə seçib, bununla da işlərini başa vururlar. Vətəndaş Həmrəyliyi Partiyasında da belə olacaq?

– Bizim sonuncu qurultayımızda ciddi dəyişikliklər baş verdi. Nizamnamə demək olar ki, tamamilə yeniləndi. Məramnamə proqramdır, o, hər ilə – siyasi, iqtisadi dəyişikliklərə uyğun dəyişdirilir. Sonuncu qurultayımızda kadr islahatları da baş vermişdi. Siyasi Şurada, Ali Məclisdə, eləcə də digər orqanlarda bir sıra dəyişikliklər baş verdi. Bəzi qurumların tərkibi əsaslı şəkildə dəyişildi. Bir sıra əsaslı dəyişikliklər oldu. Partiyamızın növbəti qurultayında da əsaslı dəyişikliklər olması nəzərdə tutulur. Çox güman ki, partiya sədri öz vəzifəsində olduğu kimi qalsın. Onun özünün də açıqlaması var ki, olar bilər növbəti qurultayda Vətəndaş Həmrəyliyi Partiyasının sədrliyinə namizədliyimi irəli sürməyim.

– Bəli, Sabir bəy belə bir açıqlama vermişdi. Siz partiya funksioneri kimi sədrlə gündəlik ünsiyyətdə olursunuz. Sabir bəyin sədrliyə namizədliyini irəli sürməmək qərarı qüvvədə qalırmı?

– Sabir bəy iyirmi ilə yaxındır ki, Vətəndaş Həmrəyliyi Partiyasına sədrlik edir. Bu illər ərzində partiyanın rəhbər orqanlarında təşkilatı idarə edə biləcək kifayət qədər kadrlar var. İddialı şəxslər də var. Amma təbii ki, Sabir bəy partiyanın qurucusudur, böyüyümüzdür. Buna görə də ona xüsusi ehtiramımız var. Biz çox istərdik ki, Sabir bəy partiyanın sədri kimi qalsın. Növbəti beş ildə də sədr kimi fəaliyyətini davam etdirsin. Amma bu onun şəxsi işidir, yəni namizədliyini verə də bilər, verməyə də…Təbii ki, qurultay ərəfəsində Sabir bəyin sədrliyə namizədliyini irəli sürüb-sürməyəcəyi ilə bağlı rəsmi açıqlama olacaq.

– Bəs prezident seçkilərində iştirak məsələsi nə yerdədir, Sabir Rüstəmxanlı namizədliyini irəli sürəcəkmi?

– Prezident seçkilərinə hələ xeyli müddət var. Hələlik Vətəndaş Həmrəyliyi Partiyasında bununla bağlı hər hansı müzakirələr aparılmayıb. Həmin səbəbdən də indi bununla bağlı açıqlama vermək məqsədəuyğun olmazdı. Təbii ki, qurultay ərəfəsində ali forumun toplantıları bu məsələyə də münasibətlərini ifadə edəcəklər. Ola bilər ki, Sabir bəyin prezidentliyə namizədliyi irəli sürülsün, yaxud digər şəxsin. O da ola bilər ki, müxalifətin hər hansı vahid namizədi olarsa, Vətəndaş Həmrəyliyi Partiyası seçkilərdə onu dəstəkləsin. Təbii ki, bu üç versiyadan hər hansı biri reallaşa bilər.

– VHP parlament seçkilərində ADİP-lə əməkdaşlıq etdi. Bu əməkdaşlıq indi də mövcuddur, yoxsa?

– Biz parlament seçkilərinə Demokratik İslahatlar Partiyası ilə birlikdə qatıldıq. Həmin partiyanın rəhbər orqanlarında çalışan şəxslərlə əlaqələrimiz, ünsiyyətimiz mövcuddur. Orada mənim də dostluq münasibətində olduğum kifayət qədər insan var. Qarşılıqlı əməkdaşlığımız davam edir. İstər rayonlarda, istərsə də mərkəzdə, hər hansı məsələ ortaya çıxdıqda onu birlikdə müzakirə edirik. Müttəfiqliyimiz özünü bu günə kimi saxlayıb. İstər partiya sədrləri, müavinləri, istərsə də digər səviyyələrdə əməkdaşlıq var.

– Vətəndaş Həmrəyliyi Partiyasının mətbuat xidmətinin rəhbəri, tanınmış yazar Anar Niftəliyev (Mahmudoğlu) bir neçə gün bundan əvvəl naməlum şəxslər tərəfindən hədələnib. Bəzi şəxslər onu təhdid edirlər. Amma nədənsə Vətəndaş Həmrəyliyi Partiyası həmin xoşagəlməz halla bağlı mövqeyini bu günə kimi açıqlamayıb.

– Təbii ki, Anar Niftəliyev Vətəndaş Həmrəyliyi Partiyasının mətbuat xidmətinin rəhbəri, mənim VHP-də ən yaxın dostumdur, əqidə yoldaşımdır. Sabir Rüstəmxanlı da bu məsələdən xəbərdardır və müvafiq addımlar atıb. Ancaq Anar özü belə bir təşəbbüsdə bulundu ki, hədələnməsi ilə bağlı hər hansı bəyanat yayılmasın. Lakin partiyanın “Facebook” səhifəsində bununla bağlı mövqeyi açıqlandı. Əvəz Zeynallı və digərləri həbsdədir. Biz onları vicdan məhbusları hesab edirik. Anar Niftəliyevə qarşı olan təhdidlər, hədə-qorxular da xoşagəlməz, yolverilməz haldır. Mətbuat millətin aynasıdır, bu aynanı qırmaq, ləkələmək, jurnalisti hədələmək olmaz. Niftəliyevə qarşı olan təzyiq təkcə Anara deyil, eyni zamanda Vətəndaş Həmrəyliyi Partiyasının bütün üzvlərinə qarşı təzyiqdir. Mən bunu həm də özümə qarşı təzyiq hesab edirəm. Biz partiya olaraq Anarın mühafizəsi təşəbbüsü ilə çıxış etdik, amma o özü bundan imtina etdi. Vətəndaş Həmrəyliyi Partiyasının bəzi üzvləri, mən də daxil olmaqla Anarın mühafizəsində durmağa hazırıq. İstər əvvəllər tutulanlar olsun, istərsə də indi, partiyanın bu məsələ ilə bağlı mövqeyi mənfidir. Biz bunları pisləyirik. Konstitusiyamızda söz, fikir azadlığı mövcuddur. Heç kimi təhqir etmək olmaz. Anar da bununla bağlı müvafiq orqanlara müraciət edib. Amma məlum olur ki, bu məsələnin araşdırılmasını o bölmə bunun, bu bölmə isə onun üzərinə atır. Vətəndaş Həmrəyliyi Partiyası olaraq bunu qəti şəkildə pisləyirik. Jurnalistə qarşı təzyiq, təhqir yolverilməzdir. Təəssüflənirik ki, belə xoşagəlməz hallar baş verir. Aidiyyəti orqanlar dərhal bununla bağlı ölçü götürməlidirlər. Əgər kimsə başqasını hədələyirsə o, cinayətkardır, cinayətkar isə layiqli cəzasını almalıdır.

 Anar Tağıyev

“Gündəlik Bakı” qəzeti

Sabir Rüstəmxanlı: “Rafiq Tağının ölümündən sonra təhlükəsizliyimin təmini dövlətin işidir”

Yazıçı Rafiq Tağının ölümündən sonra iranlı axund Məhəmməd Cavad Lənkəraninin atasının 2006-cı ildə verdiyi fitvanın yerinə yetirilməsinə sevinməsi bu qətlə yeni bir çalar qazandırıb. Çünki dünyanın müxtəlif ölkələrində yaşayan şəxslərin düşüncələrinə görə “İslamın düşməni” elan edilərək ölümə fərman verilməsi yeni fakt deyil.

2009-cu il yanvarın 9-da Nardaran qəsəbəsində keçirilən mitinq zamanı da tanınmış publisist, Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlın öldürülməsi ilə bağlı fitva verilmişdi. Bu barədə fikir səsləndirilənlər sonradan həbs edildi. Rafiq Tağının bıçaqlanaraq öldürülməsindən sonra İrandan səslənən bəyanatlar istər-istəməz Sabir Rüstəmxanlı ilə bağlı verilmiş fitvanı yada salır. Əcəba, VHP sədr özü bu barədə nə düşünür, İran rejiminin sərt tənqidçilərindən olan millət vəkili həyatına hansısa təhlükə hiss edirmi?
VHP qərargahına getməkdə də məqsədimiz Sabir bəylə üzbəüz oturub bu suallara aydınlıq gətirmək idi. Öncə qeyd edək ki, ötən il istifadəyə verilən VHP-nin binasında hələ də bəzi yarımçıq işlər qalır. 6 mərtəbəli binada lift də yoxdur. Pilləkənləri yuxarı qalxdıqca partiya əməkdaşları ilə qarşılaşdıq. Hər hansı xüsusi gərginlik də nəzərə çarpmır. Nəhayət, dördüncü mərtəbədə – Sabir bəyin otağındayıq. Onu da deyək ki, qərargahda bir dənə də olsun kamera gözümüzə dəymədi. Bunun səbəbin Sabir bəydən soruşduqda yarızarafat-yarıciddi dedi ki, kamera quraşdırmağa maddi imkan yoxdur: “Hələ ki, imkanımız yoxdur. Bəlkə gələcəkdə quraşdırdıq”.

– Sabir bəy, bəs mühafizəçiniz var?

– Mənim heç zaman mühafizəçiyə ehtiyac görməmişəm. Ümumiyyətlə, beş-altı mühafizəçi ilə gəzməyi sevmirəm. Bəzən şəhərdə tək gəzirəm. Ancaq son hadisələr məcbur edib ki, gizli həyatdan imtina edək. Mən millət vəkiliyəm. Güman edirəm ki, bu hadisədən sonra təhlükəsizliyimi qorumaq dövlətin işidir. Əvvəlcə, dövlət bu addımı atmalıdır. Eyni zamanda daxilimdəki inamla deyirəm ki, hər kəsin bir taleyi var. Mənim də Allahım var və məni qoruyur. Dəfələrlə ölümdən dönmüşəm və tək Allahım məni qurtarıb. Digər tərəfdən, ətrafımda məni sevən insanlar var və onlara güvənirəm. Hər kəsin öz taleyi var. Şübhəsiz ki, hər kəs özünü qorumalıdır. Ancaq cəmiyyətdə də elə bir şərait olmalıdır ki, kimsə özünə qarşı təhlükə hiss etməsin. Düşünürəm ki, Rafiq Tağının öldürülməsindən sonra hökumət öz vətəndaşlarının taleyi üçün məsuliyyətini artırmalıdır.

– Azərbaycanda İran əleyhinə yazmaq çox təhlükəli mövzuya çevrilir. Sizcə, Rafiq Tağının ölümündən sonra İrandan yazanda daha da ehtiyatlı olmaq lazımdırmı?

– Əvvəla, cəhalət Şərq dünyasında ən böyük düşməni olub. Buna qarşı bizim dahilərimiz də-Mirzə Fətəli Axundov, Həsən bəy Zərdabi, Əli bəy Hüseynzadə və digərləri mübarizə aparıblar. Onların apardığı mübarizə nəticəsində biz Şərqin bataqlığından qopub ilk demokratik respublikanı qura bilmişik. Bu gün Azərbaycanın nə qədər problemləri olsa da, ölkəmiz Avropanın bir parçasıdır. Azərbaycanda dinin də, dövlətin də öz yeri var. Mən indiki vaxtda Allahsız, dinsiz cəmiyyəti təsəvvür edə bilmirəm. Ancaq cəmiyyəti dini qayda-qanunla idarə etmək də heç bir nəticə vermir. Elə İranda da yeni problemlər yaradır. Din qılıncını dövlət öz qınında saxlamalıdır. Ona görə də heç vaxt din dövlətə qarşı çevrilməməlidir. Təəssüf ki, bir çox ölkələrdə hələ də happy wheels demo cəhalət hökm sürür. Dünyanın gözü qarşısında insanlar asılır, daş-qalaq edilir və ya zorakılığa məruz qalır. Mən də bir yazıçı olaraq, hər zaman cəhalətə qarşı mübarizə aparmışam. Ancaq mən yazılarımda islami dəyərlərə qarşı həqarət işlətməmişəm. Konkret olaraq özümə gəlincə, məni heç kim dinə qarşı çıxmaqda ittiham edə bilməz. Mənim İranın indiki rejiminə qarşı mübarizəm var. Mənim dərdim orada yaşayan 35 milyon azərbaycanlının dərdidir. Mən hər zaman İran siyasətini tənqid etmişəm və indi də öz fikirlərimdə qalıram.

– Əsasən sosial şəbəkə və forumlarda “Rafiq Tağıdan sonra növbəti kimdir” deyə sual edirlər. Sizcə bu siyahıda adınız olarsa…

– Vaxtilə ermənilərin də belə bir düşmən siyahısı var idi və mənim də adım həmin siyahıya salınmışdı. Bunlar bəzən cəmiyyətdə xof yaratmaq üçün ortaya atılan addımdır. Biz bu siyahılarla həyata gəlməmişik ki, bununla da dünyadan gedək. Qeyd edim ki, 2009-cu ildə mənə qarşı da hansısa fitvanın verilməsi cəhalətin işi idi. Bunu da Nardaran sakinləri olan iki şəxsin əli ilə etdilər. Mən həmin vaxt Nardarana getdim, kənd camaatı ilə söhbətləşdim. Sadəcə, bu işi nardaranlıların adına çıxmaq istəyirdilər. Nardaranlıların da terrorla məşğul olmaq ənənəsi yoxdur. Ümumiyyətlə, islamı dərk edən insan bu üsula əl atmaz. Tanrının yaratdığı bəndənin ölümünə bir bəndə fitva verə bilməz. Əgər həmin adamlar Rafiq Tağını dinsiz hesab edirlərsə, özləri ondan on qat dinsizdir. Dinə qalsa, mən özümü istənilən ayətullahdan daha çox Allah adamı hesab edirəm. İranın apardığı siyasəti dinlə əlaqələndirmək olmaz.

– Rafiq Tağının öldürülməsində “İran izi ” ən çox səslənən versiyalardandır…

– Rafiq Tağını öldürənlərin kimliyi müəyyənləşməlidir. Onun ölümü Azərbaycan ədəbiyyatı üçün çox ağır itkidir. O, son dərəcə istedadlı, öz üslubu ilə fərqlənən yazıçı idi. Onun ölümünə mən çox təəssüflənirəm. Ancaq indidən bir söz demək olmaz. Vaxtilə Daşnaksütyun Partiyası Qafqazda azərbaycanlılara, 60-cı illərdə Avropada türk diplomatlarına, 1905-1907-ci illərdə rus məmurlarına qarşı terror aktları törədirdi. Kim ermənilərə haqsız deyirdisə, onları aradan götürürdülər. Ancaq bütün bunlar haqqını qarşısını kəsə bilmədi və kəsə də bilməz. Bu gün də İran öz soydaşlarını və millətinin nümayəndələrini müdafiə edənlərin hamısını susdura bilməz.

– Sizcə, bu qətlin üstü açılacaqmı?

– Ola bilsin açılmasın. Təəssüf ki, bu cür qətllər çox gec açılır. Hər halda bu işin arxasında İranın dayandığını demək üçün gərək əldə sübut olsun. Bütün deyilənlər hələ ki, mülahizələrdir. Bəzən zərbə gözlənilməz bir yerdən dəyir. Ancaq Rafiqin ölümü sıradan bir ölüm deyil. İstənilən halda, dünyanın hansı yerində olur-olsun, qətl hadisəsinə sevinmək, xüsusilə də din xadiminin qətlə görə milləti təbrik etməsi İslam dəyərlərinə hörmətsizlikdir.

– Rafiq Tağı anti-islamçılığı təbliğ edirdi, yoxsa ?

– Rafiqi mən hələ onun ilk hekayələri çap edilməmişdən əvvəl tanımışam. Onun yazılarında ifratçılıq olub, amma bu, onun şəxsi fikridir. Bizim aramızda heç zaman ateist və ya dindar olmaqla bağlı söhbət olmayıb. Düzdür, onun bəzi ifadələri ilə razı deyildim. Özünə də demişdim ki, bu şəkildə demək olmaz. Ancaq Rafiq Tağıya Allahsız da demək olmaz. O, cahilliyə qarşı idi. Mənə elə gəlir ki, onun amalı İslam dünyasını layiq olduğu səviyyədə görmək idi.

Günay MUSAYEVA

“Yeni Müsavat”

Anar MAHMUDOĞLU

Rafiq Tağını Bakı şəhər Baş Polis Idarəsinin yaxınlığında hansı “cəsarət sahibi” bıçaqlamışdı? Onu reanimasiyadan niyə tez çıxartdılar? Vəziyyəti ağır kimi dəyərləndirilən xəstə ilə bağlı bütün ictimaiyyət ayaqda olduğu bir məqamda həkimlər Rafiq Tağını niyə nəzarətsiz qoyurdular? Ölümü ilə bağlı bir-birini təkzib edən bu avaragor “ekspertiza rəylərinin” məntiqsizliyini necə izahlamaq olar?

Elmar Hüseynovun qətlində dərhal Təhlükəsizlik Şurasının toplantısını keçirən Ilham Əliyev indi niyə reaksiya vermir? Hüquq-mühafizə orqanları qatilin tapılması üçün niyə operativ istintaq qrupu yaratmayıblar? Niyə “isti izlərlə” qatilin həbsi istiqamətində addımlar atılmır? Hadisədən 6 gün keçib, niyə “şübhəli şəxs qismində” saxlanan yoxdur? Bakı şəhər Baş Polis Idarəsinin böyür-başında min ədəd kamera var. Dayanacaqdan evinə gedən Rafiq Tağının arxasınca qaçanı izləmək çoxmu çətindir? Ümumiyyətlə, bu izləmələr aparılıbmı?
YAP-çı millət vəkili Səyavuş Novruzov utanc gətirəcək bir açıqlama verir, Rafiq Tağının yazılarından xəbəri olmadığını deyir və terrorun Iran dövləti tərəfindən sifariş edilməsi ehtimalını mümkün sayır. Adamın öz savadsızlığını bu qədər görüntüləməkdən utanmadığını ilk dəfədir görürəm. Rafiq Tağı bu xaraba qoyulan məmləkətin ünlü publisistlərindən, çağdaş ədəbiyyatımızın tanınmış isimlərindəndir. Rafiq Tağının yazılarını oxumamaq bir yana, bunu etiraf etməyin özü böyük bir ayıb. Adam, sən ayıbına niyə kor olmursan?
Ehtimallar uydururlar, Iranı gündəmə çıxarırlar. Çünki Rafiq Tağının ölümü ilə bağlı Iranın iki ayətullahı ölüm fətvası veribmiş? Bəs, Milli Təhlükəsizlik Nazirliyi hara baxır? Eldar Mahmudov niyə vaxtında tədbir görməyib? Niyə Rafiq Tağının ətrafında təhlükəsizlik tədbiri həyata keçirilməyib? MTN-in işinin adı nədir? Obyektlərdən haqq yığmaq, jurnalistləri izləmək, redaksiyalara “juçok” yerləşdirmək? Rafiq Tağının Iran mollalarının fətvası səbəbindən aylar sonra öldürülməsini ehtimal olaraq irəli sürmək Eldar Mahmudovu təhqir etməkdir, fars rejiminin Azərbaycanda at oynatması müqabilində əks-kəşfiyatımızın aciz qalması, girinc-giriftar olması deməkdir. Bu təhqiri qəbul edirsinizmi?
Ayətullahlar fətva veribmiş! Bəs, Ramil Usubov niyə Rafiq Tağının təhlükəsizliyini təmin etmək üçün qoruma ayırmayıb? Belə bir təhlükə var idisə, niyə aşağı-yuxarı yüz minlik polisə sahib DIN bircə polisi Rafiq Tağının müdafiəsinə göndərməyib? Polis ancaq bizi şərləmək, həbs etmək, döymək, söymək üçündürmü? 
Ya durub etiraf edin ki, başımız rüşvət yığmağa, korrupsiyaya və azad yazarların axırına çıxmağa qarışdığından, ölkədə meydan sulayan fars, rus, ingilis casuslarından məlumatımız yoxdur və heç kimik, vəzifəmizin öhdəsindən gələ bilmirik, ancaq bir qrup mafiozuq və bu xalqın sərvətlərini talamaqla məşğuluq, ya da açıq şəkildə deyin ki, Rafiq Tağını biz öldürmüşük, məqsədimiz Azərbaycanda fars rejiminin təhlükə törətməyə qadir olduğunu nümayiş etdirməklə demokratiyanı boğmaq istəyimizə haqq qazandırmaqdır; Deyin ki, azad sözü, müstəqil mətbuatı boğmağın yeni formasını tapmışıq: Qərbə göstərəcəyik ki, demokratiya olsa, fars rejimi burada idarəetməyə nüfuz edə bilər, seçkili orqanlarda adamlarını yerləşdirər. Islamçıların həbsi, hicab qadağası, dini ekstremizmlə bağlı “qanuni qadağalar” hamısı Avropanın Islam qorxusuna hesablanmayıbmı?
Rafiq Tağını Azərbaycan hakimiyyəti öldürtdürdü – ölkə daxilində azad yazarların gözünü qırmaq, ölkə xaricində demokratiya təzyiqlərindən yayınmaq üçün! Bu da mənim ehtimalımdır. Hörmətli Ilham Əliyev, sübut edin ki, səhv fikirləşirəm, yanlış düşünürəm! Sübut edə bilərsinizmi?
Bu vaxta qədər öldürülən, bıçaqlanan, şikəst edilən, döyülən hansı jurnalistin qatili, cinayətkarı tapılıb? Bir nümunə varmı ki, ondan yapışıb “sübut” kimi qarşımıza dığırladasınız, susub, səssiz qalaq?
Rafiq Tağının dəfn olunduğu gün Təhlükəsizlik Şurasının iclasını keçirmək və terrora hüquqi-siyasi qiymət vermək, dəfndə rəsmilərin iştirakını təmin etmək əvəzinə “Nizami” kinoteatrında film seyr edən prezident nəyi sübut edə bilər? Ümumiyyətlə, nəsə sübut etməyə, vətəndaşını, seçicilərini vecinə aldığını göstərməyə çalışırmı hörmətli Ilham Əliyev? Seçilibmi ki, seçicilərini də vecinə alsın?
Allahın quruca başsağlığını da rəsmi səviyyədə vermədi Azərbaycan dövləti, iqtidaryönlü qəzetlərdə Rafiq Tağının ölüm xəbəri belə getmədi. Teraktla qətlə yetirilən bir publisistə, yazara qarşı bu qədər eybəcər biganəlik göstərən hakimiyyətmi olar? Terrora dünyanın harasında bu cür “rəsmi” münasibət var?..