Vətəndaş Həmrəyliyi Partiyası

Blog

  • İrəvanın notası birbaşa Rusiya faktoru ilə əlaqədardır -RƏY

    Ermənistan Rusiyaya nota verib. Rusiyanın İrəvandakı səfiri Sergey Kopırkin Ermənistan Xarici İşlər Nazirliyinə çağırılıb. Buna səbəb isə Rusiyada yayımlanan “Vesti nedeli” proqramı olub. Ermənistan tərəfinin iddiasına görə, proqram zamanı respublikanın ərazi bütövlüyü və suverenliyinə qarşı yönələn fikirlər səsləndirilib. Proqramda yayımlanan süjetdə Zəngəzur dəhlizi terminindən istifadə edilməsinə İrəvan narazılıq edib. Rusiya Xarici İşlər Nazirliyinin rəsmi nümayəndəsi Mariya Zaxarova Ermənistanın Zəngəzur dəhlizinə reaksiyasını anlaşılmaz adlandırıb: “Biz hər zaman İrəvandan Ermənistanın söz azadlığına sadiq olduğunu eşitdik, üstəlik də, hazırkı Ermənistan rəhbərliyi bunu özünün imperativi edib. Bu, birincisi. İkincisi isə bizim rəsmi mövqeyimiz rəsmi İrəvana yaxşı məlumdur. Bu mövqeyin məğzini biz dəfələrlə bəyan etmişik, o cümlədən brifinqlərimizdə…Biz ardıcıl olaraq 2020 və 2021-ci illərdə imzalanmış üçtərəfli bəyanatlar əsasında Cənubi Qafqaz regionunda bütün nəqliyyat və iqtisadi kommunikasiyaların kompleks şəkildə blokdan çıxarılmasından danışırıq. Hər şeydən öncə burada söhbət Rusiya, Azərbaycan və Ermənistan liderlərinin 9 (10) noyabr 2020-ci il üçtərəfli bəyanatdan gedir. Həmin bəyanatda hər şey (o cümlədən Zəngəzur dəhlizi ilə bağlı müddəa – red.) dəqiq şəkildə qeyd olunub. Mən həmin bəyanatın bu hissəsini dəfələrlə səsləndirmişəm, bunu indi bir daha edəcəm”. Rusiya XİN sözçüsü xatırladıb ki, həmin bəyanatda regionda bütün nəqliyyat və iqtisadi kommunikasiyaların açılması, Ermənistan Respublikasının Azərbaycanın qərb rayonları ilə Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verməsi, bu marşrut üzrə nəqliyyat əlaqəsinə nəzarəti Rusiya Federal Təhlükəsizlik Xidmətinin Sərhəd Qoşunları Xidmətinin həyata keçirməli olduğu qeyd edilib.
     
    Vətəndaş Həmrəyliyi Partiyasının sədr müavini Samir Əsədli “Sherg.az”a deyib ki, ümumiyyətlə, son dönəmlərdə Rusiya-Ermənistan münasibətlərinin normal olmadığı bəllidir. Siyasi şərhçi bildirib ki, Nikol Paşinyanın hakimiyyətə gəlişindən, xüsusən 44 günlük müharibədən sonra ikitərəfli əlaqələr pisləşməyə doğru gedib: 
    “Hər gün iki dövlət arasında münasibətlərin pozulmasının şahidi olmaqdayıq. Ermənistanın KTMT və MDB sammitlərində iştirak etməməsi, rus sərhədçilərinin ölkədən çıxarılması və digər neqativ məqamlar iki ölkə arasında ciddi konfliktə səbəb olub. Zəngəzur dəhlizi ilə bağlı Ermənistanın mövqeyi daha birmənalıdır. Yəni İrəvan hökuməti dəfələrlə açıq şəkildə bəyan edib ki, dəhlizə Rusiyanın nəzarət etməsini istəmir. Görünür, İrəvanın notası və sərt reaksiyası da birbaşa Rusiya faktoru ilə əlaqədardır. Bu da daha çox iki ölkə arasındakı məsələdir. Azərbaycanı maraqlandıran əsas məsələ Zəngəzur dəhlizinin açılmasıdır. Paşinyan hökuməti səmimi olaraq Zəngəzur dəhlizinin açılmasını istəyirsə, sadəcə, Rusiyanın nəzarət məsələsinə qarşı çıxırsa, Azərbaycanla əməkdaşlıq etməklə dəhlizin açılması və tam təhlükəsizlik şəraitdə fəaliyyəti istiqamətində çalışmalıdır. Azərbaycan tərəfi Zəngəzur dəhlizinin açılmasında maraqlıdır. Ona görə də ABŞ, Avropa İttifaqı, Rusiya və beynəlxalq təşkilatlarla bu məsələnin müzakirəsini davam etdirir. Ermənistan da bu məsələdə səmimi olmalıdır”.

  • VHP üzvlərinin sayı açıqlandı – Siyahı nazirliyə göndərildi

    Vətəndaş Həmrəyliyi Partiyası yenilənmiş reyster məlumatlarını Ədliyyə Nazirliyinə təqdim edib.
    VHP Mərkəzi İcra Aparatının rəhbəri Samir Əsədli Bakupost.az -a bildirib ki, əvvəlki reyster üçün 8686 nəfər üzvün adlı siyahısı verilıb.
    “Yenilənmiş reyster siyahısında 275 nəfər yeni üzv əlavə edilib. Son altı ayda isə 14 nəfər üzvümüz dünyasını dəyişib, onların da reysterdən çıxarılması üçün məlumatı məktuba əlavə etmişik”, – deyə S.Əsəvdli bildirib.
    VHP-nin 82 rayon, 1 muxtar respublikada 1253 özək təşkilatı fəaliyyət göstərir.
    Qeyd edək ki, “Siyasi partiyalar haqqında” qanuna görə hər il yanvar ayının 15-ə kimi siyasi partiyalar üzvlərin yeni (dəyişiklik) reysterini Ədliyyə nazirliyinə təqdim etməlidirlər.

  • Ermənistanın Avropa İttifaqına qatılmasına çox vaxt lazımdır – ŞƏRH

    Ermənistan hökuməti ölkənin Avropa İttifaqına (Aİ) üzvlüyü prosesinin başlanması ilə bağlı qərar layihəsini təsdiqləyib. Layihə Parlamentin müzakirəsinə göndərilib. Ermənistanın Baş naziri Nikol Paşinyan bəyan edib ki, Parlamentin müvafiq qanunu qəbul edib-etməyəcəyindən asılı olmayaraq, ölkənin sözügedən qurumun üzvlüyü ilə bağlı son qərarı ümumxalq referendumunda verilməlidir. 
    Ermənistan xarici işlər naziri Ararat Mirzoyan bildirib ki, Ermənistanın Aİ-yə üzvlük prosesinin başlanması ilə bağlı qanun layihəsi vətəndaş təşəbbüsü kimi parlamentin müzakirəsinə çıxarılıb, indi hökumət buna müsbət mövqe bildirməyi təklif edir. Mirzoyan qeyd edib ki, son illərdə Ermənistan və Aİ arasında kifayət qədər intensiv və dinamik əlaqələr var, bunlar müxtəlif, eləcə də təhlükəsizlik sektorunu əhatə edir: “Aİ Ermənistanın iqtisadi dayanıqlığının gücləndirilməsinə dəstək verməyə hazır olduğunu da bildirib. Baş nazirin da bəyan elədiyi kimi, Ermənistan Aİ-nin mümkün hesab etdiyi qədər ona yaxın olmağa hazırdır”. Xatırladaq ki, ötən ilin son aylarında Ermənistanda avropayönlü siyasi partiyalar Aİ-yə üzvlük prosesinə dərhal başlamaq üçün imza toplamışdılar.
    Vətəndaş Həmrəyliyi Partiyasının sədr müavini Samir Əsədli “Sherg.az”a deyib ki, Avropa İttifaqına üzvlüyün əsas şərtlərindən biri münaqişə və müharibə vəziyyətinin olmamasıdır. Siyasi şərhçi qeyd edib ki, Azərbaycan və Ermənistan arasında sərhədlərin müəyyənləşməsi, delimitasiya və demarkasiya prosesi başa çatmayıb və sülh müqaviləsi imzalanmayıb:

    “İnanmıram ki, bu proses yekunlaşmadan Ermənistanı Avropa İttifaqına üzv qəbul etsinlər. Ermənistan Azərbaycanla sülh sazişi imzaladıqdan və sərhədlər dəqiqləşəndən sonra bu prosesdə məsafə qət edilə bilər. Əks təqdirdə bu məsələnin həlli inandırıcı görünmür. Əgər Ermənistanın Qərbə inteqrasiya siyasəti səmimidirsə, İrəvan öz qonşuları ilə normal əməkdaşlıq etmək niyyətindədirsə, ilk növbədə ərazi iddialarından vaz keçməlidir. Ermənistanın sadəcə Azərbaycana deyil, Türkiyə və Gürcüstana da ərazi iddiaları var. Konstitusiyada qonşu dövlətlərin ərazilərinə iddialar qalmaqdadır. Ermənistan birinci növbədə referendum keçirərək Konstitusiyasını dəyişməli, qonşu dövlətlərin ərazi bütövlüyünü tanımalıdır. Ən əsası isə Azərbaycanla sülh müqaviləsini bağlamalıdır. Bu məsələlər həllini tapmadan Ermənistanın Aİ üzvlüyünə qəbul edilməsi həmin problemlərin Aİ səviyyəsinə qaldırılmasıdır ki, bunun baş verəcəyinə inanmıram. Aydın məsələdir ki, Ermənistanın Aİ-yə üzv olmasına ən çox çalışan Fransa Prezidenti E.Makrondur. Makron buna nail olmaq istəyirsə, birtərəfli qaydada Ermənistanı müdafiə etmək əvəzinə İrəvanı Bakı ilə sülh sazişini imzalamağa sövq etməlidir”.

  • İrəvan sülhdə maraqlı olduğunu desə də, addımlarında bunu görə bilmirik

    “Stratfor”un hesabatına görə, İrəvanın Vaşinqtondan dəstək almaq cəhdləri puça çıxacaq, lakin regionun alovlanma potensialı və Bakının hərbi üstünlüyü qalır

    “Ermənistan və Azərbaycan sülh danışıqlarında öz mövqelərini möhkəmləndirmək üçün xaricdən dəstək axtardıqları üçün Cənubi Qafqaz geosiyasi təsir uğrunda döyüş meydanı olaraq qalacaq”. Belə bir iddia ilə ABŞ-nin “Stratfor” kəşfiyyat-analitik mərkəzi çıxış edib. 

    “Ermənistan və Azərbaycan, çox güman ki, sülh sazişinə doğru irəliləməyə davam edəcək, lakin Ermənistanda konstitusiya dəyişiklikləri, sərhədlərin tam demarkasiyası və tranzit əlaqələrinin açılması ilə bağlı fikir ayrılıqları ehtimal ki, 2025-ci ildə sülh sazişinin bağlanmasına mane olacaq. Bu məsələlərin bəziləri sonrakı razılaşma üçün təxirə salına bilər, lakin razılıq əldə olunana qədər Bakı danışıqlarda hərbi üstünlüyündən təsir kimi istifadə etdiyinə görə regionda alovlanma potensialı davam edəcək”, – mərkəz bildirib.

    “Stratfor” analitikləri ABŞ-ın Ermənistana dəstək verməyəcəyini vurğulayıblar: “Tramp administrasiyası Rusiya, İran və Çinin regional təsirini tarazlaşdırmaq üçün Bakı ilə güclü münasibətləri prioritet hesab edir, ona görə də Ermənistanın ABŞ-dan güclü dəstək almaq cəhdləri puça çıxacaq. Əvəzində Ermənistan Fransadan gələn hərbi texnikaya arxalanacaq və Avropa Birliyi ilə ticarətin artırılmasına can atacaq. Ermənistan Qərblə artan bu siyasi və müdafiə əlaqələrindən istifadə edərək, sülh danışıqlarında Bakının ən güclü tələbinə, yəni Ermənistanın cənubundan tranzit keçməsinə (Zəngəzur dəhlizi – red.) qarşı çıxmağa çalışacaq”.

    Həmçinin qeyd edilir ki, Ermənistan və Azərbaycan Moskva ilə münasibətlərində ehtiyatlı davranmağa çalışacaq. Hər iki ölkə Rusiyanın regiondakı təsirini tamamilə itirməkdən çəkinir və birbaşa qarşıdurmadan yayınacaq. “Stratfor”un proqnozuna görə, Cənubi Qafqazdakı vəziyyət 2025-ci ildə də mürəkkəb olaraq qalacaq. Regionda güclər balansı, hərbi eskalasiya riski və xarici təsirlər davamlı olaraq gündəmdə qalacaq. Nəzərə almaq lazımdır ki, “Stratfor” ABŞ-ın kölgə kəşfiyyatı sayılır. O zaman bu proqnozu da ABŞ kəşfiyyatının sızdırdığı məlumatlar kimi dəyərləndirmək yerinə düşər. Regionla bağlı hesabatda xüsusi diqqət çəkən nüans “razılıq əldə olunana qədər Bakı danışıqlarda hərbi üstünlüyündən təsir kimi istifadə etdiyinə görə regionda alovlanma potensialı davam edəcək” cümləsidir. Burada Azərbaycan aqressor və hərbi eskalasiya yolu ilə təzyiq göstərən tərəf kimi təqdim olunur. Amma Bakı hər hansı hərbi qarşıdurmada maraqlı deyil. Əksinə, yanvarın 5 və 6-sı günlərində erməni tərəfi Laçın istiqamətində mövqelərimizi atəşə tutub. Hərbi gərginliyin artmasında maraqlı olan da Ermənistan və havadarlarıdır. Azərbaycan bu il ən azı çərçivə sənədi imzalanmasını gözləyir, sülh mətnində 15 bənd razılaşdırılıb. Hesabatda ikinci detal isə Ermənistanın ABŞ-dan dəstək almayacağıdır. Tramp administrasiyası Bayden hakimiyyəti qədər Paşinyana can yandırmayacaq.

    Vətəndaş Həmrəyliyi Partiyasının sədr müavini Samir Əsədli genişmiqyaslı hərbi əməliyyatları istisna edir. Onun sözlərinə görə, analitik mərkəz iki ölkənin addımlarını təhlil edərək bu qənaətə gəlib: “İnanmıram ki, regionda yeni müharibə olsun. Ermənistan silahlansa belə, döyüşməyə və yüzlərlə əsgər itirməyə hazır deyil. Onu da bilirlər ki, revanş uğur gətirməyəcək. Ümumiyyətlə, bu hərbi güclə Azərbaycana qalib gələ bilməzlər. Sadəcə, şərti sərhəddə lokal toqquşmalar, hərbi təxribatlar gözləniləndir. Məncə, bu hərəkətlənmə Avropa İttifaqının mülki missiyasının bölgədə qalmasını təmin etməyə hesablanıb. Ermənistan atəşkəsi pozur, sonra müşahidəçilərin burada daha uzun müddət qalmasına guya zərurət yaranır. Belə bir siyasi hiyləni görə bilirik. Hesabatdan da görünür ki, regionda kövrək sabitlik olduğu vurğulanır. Zənnimcə, bu il də sülh danışıqları davam edəcək. Sadəcə, yekun sülh sazişi imzalanmayacaq”.

    ABŞ-ın Ermənistana dəstəyinə gəlincə, VHP sədrinin müavini mərkəzin yaydığı proqnoza inanır: “Bəli, Bayden dönəmində olduğu qədər yardım edilməyəcək. Amma o demək sayılmır ki, Amerika Ermənistana dəstək verməyəcək. Biz Trampla bağlı tələsməməliyik. Onun komandasında antitürk kadrlar var. Elə dövlət katibi Rubionu qeyd etmək olar. Üstəlik, erməni lobbisi Amerikada təsiredici gücə malikdir. Əlbəttə, Respublikaçılar Demokratlar kimi erməni lobbisi ilə sıx işləmirlər, amma əlaqələr var. Ən azından Ermənistanda Rusiyanın təsirlərinin azaldılması nöqteyi-nəzərindən İrəvana dəstək davam etdiriləcək”.

    Emil SALAMOĞLU,
    “Yeni Müsavat” 

  • Azərbaycanlılar və qazaxlar eyni kökə, mədəniyyətə, qədim tarixi münasibətlərə və ənənələrə malikdirlər

    “Qazaxıstanlı qardaşlarımızın, bacılarımızın həmrəylik nümayişi Azərbaycan xalqının qəlbində çox böyük iz buraxdı”. Bu sözləri dövlət başçısı İlham Əliyev təyyarə qəzası ilə bağlı AZTV-yə müsahibəsində səsləndirib. Dövlət başçısı bildirib ki, o, Qazaxıstan prezidentinə minnətdarlığını ifadə etmək üçün zəng edib: “Çünki biz bilirdik və məlumat əldə etmişdik ki, qəza baş verən kimi Qazaxıstan xilasediciləri dərhal hadisə yerinə yetişdilər və insanları o dağılmış füzelyajdan çıxartmağa başlamışdılar. Öz həyatlarını risk altına atmışdılar. Çünki onlar bilmirdilər ki, növbəti partlayış olacaq, yoxsa yox. Çünki təyyarənin bir hissəsi yanmışdı və bu hissədə yana bilərdi. Amma buna baxmayaraq, onlar da əsl qəhrəmanlıq göstərmişdilər. Eyni zamanda, həkim personalının fəaliyyəti də çox qiymətli idi. Çünki yaralı sərnişinlər dərhal tibb məntəqələrinə aparıldılar və buna görə də Prezident Tokayevə mən təşəkkürümü bildirdim. Qazaxıstanlı qardaşlarımızın, bacılarımızın həmrəylik nümayişi də mən bilirəm ki, Azərbaycan xalqının qəlbində çox böyük iz buraxmışdır. Adi vətəndaşlar bizim Aktaudakı konsulluğa gələrək gül qoydular, öz münasibətlərini bildirdilər, bizimlə həmrəy olduqlarını bildirdilər. Əsl dostluq, qardaşlıq belə olar. Eyni zamanda, mən Prezident Tokayevlə söhbət zamanı Azərbaycanın istintaqla bağlı mövqeyini də bildirdim və bax, sizə dediyim məsələləri də onun diqqətinə çatdırdım ki, biz beynəlxalq ekspertizanın tərəfdarıyıq və heç cür bu məsələni Dövlətlərarası Aviasiya Komitəsinin sərəncamına verə bilmərik. Bu mövqe də anlayışla qarşılandı. Təbii olaraq, bizim dövlət qurumlarımızın nümayəndələri, komissiyanın üzvləri və rəhbərləri, prokurorluq orqanlarının nümayəndələri daim təmasdadırlar. Qazaxıstan da öz növbəsində Dövlət komissiyası yaratmışdır və Prezident Tokayev söhbət zamanı bu barədə mənə məlumat vermişdi. Onlar da təbii olaraq istəyirlər və çalışırlar ki, məsələ tam təfərrüatları ilə açılsın. Eyni zamanda, mən Prezident Tokayevə də başsağlığı verdim, çünki qəza nəticəsində altı Qazaxıstan vətəndaşı həlak olmuşdu. O da mənə başsağlığı vermişdi. Yəni, bu nə qədər ağır hadisə olsa belə, eyni zamanda, bir sınaq məsələsi idi. Yəni, bu sınaqdan kim necə çıxacaq? Mən şadam ki, yenə də bu faciəyə baxmayaraq, görürəm və əminəm ki, Qazaxıstanda da eyni fikirdədirlər. Bizim dostluğumuz, qardaşlığımız bu ağır vəziyyətdən sonra daha da gücləndi”.
     
    Vətəndaş Həmrəyliyi Partiyasının sədr müavini Samir Əsədli “Sherg.az”a açıqlamasında deyib ki, Azərbaycan-Qazaxıstan münasibətlərinin qədim tarixi var. 
    Siyasi şərhçi vurğulayıb ki, azərbaycanlılar və qazaxlar eyni kökə, mədəniyyətə, qədim tarixi münasibətlərə və ənənələrə malikdirlər: 

    “Həmçinin bu iki xalqı dil və din eyniliyi də birləşdirir. Bu xalqlar Çar imperiyası və Sovet İttifaqı dönəmində vahid mərkəzdən idarə olunublar. Stalin rejimi zamanı minlərlə azərbaycanlı Qazaxıstana sürgün olunub. Qeyri-rəsmi məlumatlara görə, hazırda Qazaxıstanda üç yüz minə qədər azərbaycanlı yaşayır. İki ölkə arasındakı qardaşlıq münasibəti dəfələrlə sınaqdan çıxıb. 1990-cı il 20 yanvar faciəsi zamanı Azərbaycanın səsini dünyaya duyuranlardan biri də Qazax xalqının böyük oğlu Oljas Süleymanov idi. Sonrakı illərdə də Qazaxıstan beynəlxalq münasibətlər sistemində Azərbaycanla dost ölkə olduğunu dəfələrlə ortaya qoyub və bizim Qazaxıstana münasibətimiz də adekvatdır. Son təyyarə qəzasında qardaş ölkənin və vətəndaşlarının münasibəti də bu tarixi keçmişi, qardaşlığı möhkəmləndirən bir fakt olaraq təsdiqləndi”.

  • VHP sədrinin bayram təbriki

    Dünya Azərbaycanlılarının Həmrəyliyi Günü və Yeni il münasibəti ilə Vətəndaş Həmrəyliyi Partiyasının (VHP) sədri, Dünya Azərbayccanlıları Konqresinin həmsədri Sabir Rüstəmxanlının təbriki:
    “Əziz soydaşlarım! Bacılar və qardaşlar!
    Sizləri Dünya Azərbaycanlılarının Həmrəyliyi Günü və Yeni təqvim ili münasibəti ilə səmimi qəlbdən təbrik edir, xalqımıza rifah, firavanlıq, əmin-amanlıq arzulayıram.
    1989-cu il dekabrın sonlarında Naxçıvanda İranla sərhədlərin sökülməsi və tikanlı məftillərin parçalanaraq onillərlə Güney həsrətilə yaşayan soydaşlarımıza hədiyyə olaraq göndərilməsi, Arazın o tayından bu tayına, bu tayından o tayına axan insan seli böyük bir ruhun, idealına doğru yürüyən xalqın birlik düşüncələrini gerçəkləşdirmək arzusunun ən yüksək məqamıydı. Bu bütövləşmiş, böyük ruhun qarşısında dünyanın heç bir gücü davam gətirə bilməzdi. Azərbaycanı müstəqilliyinə qovuşduran da bu böyük birliyin, həmrəyliyin, bir ideal uğrunda yumruğa dönməyin bəhrəsidir.
    Biz dünyanın yeganə xalqıyıq ki, hər ilimiz Milli Həmrəylik ruhu ilə başa çatır. Hər ilin son günü bütün azərbaycanlıar bir nöqtədə birləşib, bir nota köklənərək, Həmrəylik Gününü ümummilli səviyyədə qeyd etməklə bir daha öz milli identikliyini, milli mənsubiyyətini təsdiqləmiş olurlar. Həmrəylik Günü bir dəyərdir. Həmrəylik bayramı ildə bir dəfə bizi toplum olaraq format edən, yeniləyən bir prosesdir, sosial hadisədir. 31 dekabrda dünyanın harasında olmağımızdan asılı olmayaraq hamımızın nəzərlərimiz bir-birimizə və bütün azərbaycanlıların vahid dövlətinə – müstəqil Azərbaycan Respublikasına yönəlir. Başqa sözlə desək, 31 dekabrda biz hamımız saatlarımızı Bakı vaxtı ilə qururuq. Hər ilin sonunda köhnə illə vidalaşdığımız gündə dünyada yaşayan azərbaycanlıların milli birlik və həmrəylik bayramı keçirmələri rəmzi məna daşıyır, yəni biz hər yeni ilə 50 milyonluq Azərbaycan türkünün və bütün Azərbaycan vətəndaşlarının yüksək vətən sevgisi ilə, birlik və bərabərlik uğrunda mübarizə əzmi ilə başlayırıq.
    Əziz soydaşlar! Azərbaycanlıların həmrəyliyi özəlliklə qürurla yaşadığımız indiki günlərdə- torpaqlarımız işğaldan tam azad edildikdən, ərazi bütünlüyümüz bərpa olunduqdan sonra ermənipərəst qüvvələrin antiazərbaycan təbliğatının gücləndiyi bir dövrdə son dərəcə ciddi zərurətə çevrilib. Uzun illərdir dünyaya səpələnmiş soydaşlarımızın təşkilatlanması, vətənlə əlaqələrinin möhkəmlənməsi, yaşadıqları ölkələrdə Azərbaycanı daha yaxşı təmsil eləmələri yolunda çalışırıq və bunun sayəsində təşkilatımızın bütün qitələri əhatə edən geniş bir şəbəkəsi qurulmuşdur və bu iş ildən-ilə genişlənir.
    Dünyada yaşayan bütün soydaşlarımızı Milli Həmrəylik və Yeni il bayramları münasibətilə ürəkdən təbrik edir, sizə bütün xeyirli işlərinizdə uğurlar, can sağlığı və ailə xoşbəxtliyi arzulayıram!
    Yaşasın Bütöv Azərbaycan!
    Yaşasın Türk birliyi!”

  • Nəsiminin məzarının Azərbaycana gətirilməsi niyə mümkün deyil?

    Suriyada vətəndaş müharibəsinin son vaxtlar yenidən alovlanması və bu ölkənin Hələb şəhərinin əldən-ələ keçməsi Azərbaycanın görkəmli şair və mütəfəkkiri İmadəddin Nəsiminin məzarını da gündəmə gətirib. Məlum olduğu kimi, İmadəddin Nəsiminin məzarı Suriyanın Hələb şəhərində yerləşir.

    Maraqlıdır, Azərbaycan şairi İmadəddin Nəsiminin böyük dağıntılara məruz qalmış Hələb şəhərindəki məqbərəsi də ziyan çəkibmi? Ümumiyyətlə, Azərbaycan xalqının ümumbəşər mədəniyyətinə bəxş etdiyi qüdrətli söz ustasının məzarı ökəmizə gətirilə bilərmi?

    Mövzu ilə bağlı “Cebheinfo.az” Azərbaycan Milli Elmlər Akademiyasının (AMEA) Akademik Ziya Bünyadov adına Şərqşünaslıq İnstitutunun aparıcı elmi işçisi, institutun “Nəsimi qrupu”nun rəhbəri, filologiya üzrə fəlsəfə doktoru, dosent Səadət Şıxıyeva bildirib ki, İmadəddin Nəsiminin məzarının silə bağlı fikirlər cəfəngiyyatdır. Onun sözlərinə görə, hazırda İmadəddin Nəsiminin məzarı məscidin həyətində yerləşir: “Bu məsələ dəfələrlə gündəmə gəlib, mən də bunun əleyhinə çıxışam. Müharibə olacaq və bitəcək. Nəsiminin məzarının Azərbaycana gətirilməsi absurd fikirdir. Bu gün Nəsiminin məzarının Azərbaycana gətirilməsinə nə ehtiyac var? Onun oğlunun və qohumlarının məzarı oradadır. Nəsiminin həyatı Hələbdə keçib. Nə İslam əxlaqı baxımından, nə də tarix baxımından bu, doğru deyil”.

    DAK həmsədri, Xalq şairi Sabir Rüstəmxanlı mövzu ilə bağlı “Yeni Müsavat”a danışıb: “Bir neçə il öncə də Nəsiminin məzarının Bakıya gətirilməsi haqqında məsələ qaldırılmışdı. Həmin vaxt da mənim fikrim belə idi ki, vəfat edənləri narahat etmək, yəni bir məzardan çıxarıb, ayrı məzara aparmaq düzgün deyil. Nəsimi orada doğulub, orada yaşayıb, ailəsi də oralardadır. Ona görə də məzarı da orada qalmalıdır. Yəni ömrünün müəyyən hissəsini Hələbdə yaşayıb, faciəvi sonluğu da orada çatıb. Hələbdə Nəsiminin məzarını ziyarət etmişəm. Orada hətta onun nəslindən olan insanlar da yaşayır. Ona görə də məzarına toxunmaq lazım deyil. Əsas odur ki, onun canlı xatirəsi bu gün Azərbaycanda yaşayır. Heykəli var, kitabları nəşr olunur və hər bir azərbaycanlının qəlbində xüsusi yeri var. Sanki onun məzarı Bakıdadır. Nə fərqi var? Məncə, yerdəyişmə haqqında düşünmək lazım deyil”.

  • Min illik plan açıqlandı – Yaxış Şərq layihəsi belə işləyirmiş

    Sabir Rüstməmxanlı
    Sabir Rüstməmxanlı

    Vətəndaş Həmrəyliyi Partiyasının sədri Sabir Rüstəmxanlı Teleqraf.com-un suallarını cavablandırıb:

    Onunla müsahibəni təqdim edirik:

    – Suriyada rejim dəyişikliyi baş verdi. Ölkə hələ tam toparlanmasa da müəyyən müsbət işartılar var. Bu hadisələrin digər regionlara təsiri haqqında nə demək olar?

    – Suriyada Bəşər Əsədin hakimiyyətdən getməsindən sonra bölgədə proseslər fərqli istiqamətdə cərəyan etməyə başlayıb. Sözsüz ki, bu hadisələr digər bölgələr kimi Cənubi Qafqaza da təsirsiz ötüşməyəcək. Amma gələcəyi görən siyasətçilər və dövlət başçıları vəziyyəti dəyərləndirib öz xalqlarının, millətlərinin xeyrinə bundan istifadə edə bilərlər. Faktiki olaraq bölgədə min ildir ki, davam edən bir prosesin başa çatmadığı müşahidə edilir.

    – Uzun müddət “ərəb baharı”, “Yaxın Şərq layihəsi” kimi planlardan bəhs edilirdi. Baş verənləri bu xronologiyanın tərkib hissəsi hesab etmək nə dərəcədə məntiqlidir?

    – Əslində Əfqanıstan, İraq, Suriyada baş verən hadisələr burada terror təşkilatlarının fəaliyyətinin gücləndirilməsi, dini və etnik qarşıdurmaların artması ABŞ-nin ortaya atdığı “Yaxın Şərq layihəsinin” addım-addım həyata keçirilməsidir. Eyni zamanda burada İslam düşmənçiliyi də var. İsrailin atdığı addımlar, Avropa və Rusiyanın bu ölkələrdən yararlanmaq istəyi min il öncə bölgədə başlamış səlib yürüşünün hələ də bitmədiyini göstərir. İslam, türk düşmənçiliyi hələ də qalmaqdadır.

    – Bölgə ilə bağlı ilkin plan nədən ibarət idi?

    – Məqsəd bölgədəki dövlətləri bölüb, parçalayıb xırda knyazlıqlar yaratmaqdır. Dünyanın böyük güclərinin əsas arzusu məhz budur. Fransa, ABŞ-nin atdığı addımlar bu yolun davam etdiyini göstərir. Suriyada baş verənlər eyni ssenarinin tərkib hissəsidir. Həmçinin bu ölkədə öz millətini zülm altında saxlayan dövlət başçısı sonunu əvvəlcədən görməli idi. Həbsxanalardan azad edilənlərin sayı və digər amillər, insanlığa sığmayan əməllər gec-tez üzə çıxacaqdı. Bu hərəkətləri edən ölkə başçısı bilməliydi ki, bıçaq sümüyə dayananda xalq fil kimi hər şeyi ayağının altına ata bilir. Bunu isə Rusiyaya qaçıb sığınan Bəşər Əsəd bilmədi.

    – Suriyanın gələcəyi ilə bağlı proqnozlar necədir?

    – Proseslərin gələcəyi Suriyada hakimiyyəti ələ alan müxalif qüvvələrin və daxili güclərin nə qədər tez bir-biri ilə dil tapa biləcəyindən asılıdır. Çünki onların davranışları dövlətinin taleyini həll edir. Ölkələrinin taleyini qumara qoymamağı bacarmalıdırlar.

    – Türkiyənin Suriyada baş verənlərə yanaşması necədir?

    – İrandan fərqli olaraq Türkiyə Suriya ilə sərhəd bütövlüyünü tanıyır. Rəsmi Ankara bu gün Suriya dövlətinin parçalanmasına qarşıdır. Türkiyə Suriyanın bütöv bir dövlət kimi yaşamasını istəyir. Arzu edilən də odur ki, bu ölkə bütöv şəkildə qala bilsin. Çünki burada parçalanmanın olması əvəzində bir neçə dövlətin yaranması qonşu ölkələrə yaxşı heç nə vəd etmir.

    – Parçalanmış Suriyanın taleyi qonşu ölkələr üçün nə kimi təhdidlər yarada bilər?

    – Bu sözsüz ki, qonşu ölkələrə təhlükə yaradır. Burada Türkiyənin taleyi daha çox düşündürücüdür. Ona görə də, Suriyanın torpaq bütünlüyü, ərazisinin qorunması, dövlətin yenidən toparlanması önəmlidir. Bu, ən azı Amerikanın “Yaxın Şərq planı”nın pozulması üçün lazımdır. Çünki bu bölgədə yaşayanlar talelərini özləri həll etməlidir. Suriya qədim bir dövlətdir. Onun üzərində belə bir oyunun baş verməsi nəticədə İrana, Türkiyəyə də təsir edəcək. İranda olan xalqımızın taleyi bizi düşündürürsə, millətin ziyanına, onların qırğına verilməsi hesabına nələrinsə olması arzu olunmur. İstək odur ki, millət addım-addım öz haqqını müdafiə etsin və ona çatsın.

    – Bölgədə olan dağıdıcı güclərin Suriyanı parçalamaqda əsas planları nədən ibarətdir?

    – Suriyanın şimalından dəhliz açıb Aralıq dənizinə çıxmaq istəyən terrorçuların niyyəti baş tutmadı. Onlar ərazidən çıxarıldı. Eyni zamanda Rusiya Suriyanın Tarsus şəhərindən çıxdı, Rusiya gəmilərini belə limanlardan çəkib apardı. Hazırda İsrailin Suriyanın cənubundan təhdidləri qalıb. Qolan təpələri İsrail tərəfindən götürülüb. Ona görə də, bütün bu təhdidlərə qarşı Suriya dövlətinin toparlanması lazımdır.

    Müəllif: Tapdıq Qurbanlı

  • Ermənistanın çıxış yolu – neytral ölkə statusu

    Digər yollar İrəvanı gec-tez “əjdahalar”ın qəzəbinə gətirə bilər, o sırada Azərbaycan da var…

    Azərbaycan Ermənistanın sülh sazişinə əsas əngəl olan konstitusiya dəyişikliyi haqda referendum qərarı gözləyərkən, İrəvan Avropa İttifaqına üzvlüklə bağlı referendum keçirilməsi “eşqinə düşüb”. 

    Ötən həftəsonu baş nazir Nikol Paşinyanın Avropa İttifaqına üzvlüklə bağlı referendum keçirilməsi təşəbbüsünü dəstəklədiyi xəbəri yayılıb. Avropa Partiyasının rəhbəri Tiqran Xzmalyan bildirib ki, referendum layihəsinin müzakirəsi üçün imzatoplama kampaniyası yekunlaşıb və yaxın günlərdə sənəd parlamentə təqdim olunacaq. Onun sözlərinə görə, layihə qanunverici orqanın dəstəyini qazana bilməsə, kampaniya yenidən keçiriləcək və 300 min imza toplamaq mümkün olsa, ümumxalq səsverməsi qanunverici orqanın qərarı olmadan da baş tuta bilər. Bu həmin Xzmalyandır ki, bugünlərdə “Krımın müvəqqəti ilhaqı müqabilində Ukraynanın NATO və Aİ-yə üzvlük” sxemi Qarabağla bağlı da tətbiq edilə bilər” kimi sərsəm açıqlama vermişdi. Bu analogiyanın özü başdan-ayağa qüsurludur.

    O ki qaldı Ermənistanın Avroatlantik məkana inteqrasiya kursu götürməsi, Rusiyanın himayəçiliyindən imtina öz seçimləridir, yüz illərlə Qafqazda rusların jandarmı rolunu oynayan, hər cür şeytanlığa təhrik edilən Ermənistanın indi onun təbəəliyindən çıxmaq istəməsi anlaşılandır. Amma Paşinyanın Ermənistanın bir dövlət kimi gələcəkdə Fransa daxil, Avropa İttifaqına üzv bir neçə ölkənin də əlaltısına çevirmək istəyi dövlətin süqutu ilə nəticələnə bilər. Əslində İrəvan Qərbin hərbi-siyasi “müşahidəçi”lərini Ermənistan sərhədinə gətirməklə bu istiqamətdə ilk addımı atıb. KTMT-dən çıxmaq, hətta Gümrüdəki hərbi bazanın mövcudluğunu 2044-cü ildən tez başa çatdırmaq öz istəkləridir. Amma bu addımları gedib hansısa hərbi bloka “peşka”lıq etmək üçün atırlarsa, bu böyük siyasi qanmazlıqdır.

    Nəzərə alınmalıdır ki, hazırda Ermənistanın təkcə Azərbaycanla deyil, Türkiyə, indi isə Rusiya ilə ciddi problemləri var, tədricən İranla da olacaq, Avrointeqrasiyadan xeyir tapmayan Gürcüstanla da. Paşinyan ləngimədən regional problemi həll etmək üçün ciddi addım ata, ən əvvəl yeni konstitusiya ilə Bakı və Ankara ilə problemləri aradan qaldıra bilər. Rusiya və İranın təzyiqlərindən qorunmaq üçün beynəlxalq qarantiya olmaq şərti ilə Ermənistan neytral ölkə statusu almaq yolunda fəaliyyətə başlamalıdır. Bütün bunlar Ermənistanın yeni konstitusiyasında öz əksini tapmaqla ölkənin xarici siyasətinin proqnozlaşdırıla bilən fundament rolunu oynaya bilər. Digər yollar Ermənistanı gec-tez “əjdahalar”ın qəzəbinə gətirə bilər, o sırada Azərbaycan da var… Bəs Ermənistan neytral ölkə statusu almağı niyə istəmir?

    Ermənistan hazırda Rusiya və Qərb arasında var-gəl edir, hər iki tərəfi qane etməyə çalışır. Bu isə bumeranq effekti verir: hər iki tərəf qıcıqlanır və İrəvana təzyiqləri artırır. Avropa İttifaqı (Aİ) rəsmilərinin tez-tez Ermənistana səfərləri, habelə Rusiya rəsmilərinin zaman-zaman Ermənistanın mövcud siyasətini tənqid etmələri onu deməyə əsas verir ki, hər iki tərəf İrəvana daha çox təzyiq göstərməklə bu dövləti tamamilə özündən asılı vəziyyətə salmaqda israrlıdır. Rəsmi İrəvan üçün yeganə çıxış yolu regional əməkdaşlıq yolunu tutmaqdır. Bunun üçün isə Azərbaycan və Ermənistanla əlaqələrin normallaşması şərtdir, daha doğrusu, ilkin addımdır. Regional əməkdaşlığın konyunkturası da məlumdur: rəsmi Bakı və Ankaranın təşəbbüskarı olduğu 3+3 formatı. Əgər Ermənistan sürətlə Azərbaycan və Türkiyə ilə münasibətləri normallaşdırarsa və regional əməkdaşlıqda fəal iştirak edərsə, bu, İrəvanın təhlükəsizliyi üçün yeni çətir ola bilər. “Azərbaycana qarşı aqressiyalara baxmayaraq, Ermənistanla razılığa gəlmək mümkündür”. Azərbaycanın xarici işlər nazirinin müavini Elnur Məmmədov deyib. “İnanıram ki, qarşı tərəf səsimizi eşidəcək, Qafqazda sülhə və tərəqqiyə nail olacağıq”, – nazir müavini əlavə edib.

    Vətəndaş Həmrəyliyi Partiyasının sədr müavini Samir Əsədli Ermənistanın “iki od arasında” oynadığını müşahidə edir. VHP rəsmisi tərəflərdən birinin Paşinyanı cəzalandıracağını gözləyir. İrəvanın Qərbə əyildiyini deyən S.Əsədlinin sözlərinə görə, Rusiya Ermənistanı öz forpostu kimi görməkdə davam edir: “Moskva hesab edir ki, ermənilər hər şeyə görə onlara borcludurlar. Tarixə ekskursiya edəndə də bu həqiqəti qeyd etmək mümkündür. Ona görə Rusiya Ermənistan hakimiyyətinə müvəqqəti iqtidar kimi yanaşır. Hərçənd Paşinyan getdikcə möhkəmlənir, Qərbdən dəstəyi artır. Tramp və Makronla görüşü də Moskvaya ciddi siqnal idi”.

    VHP funksioneri 2026-cı il seçkilərində Paşinyanın asanlıqla qalib gələcəyini ehtimal edir: “Rusiya Ukraynada ciddi şəkildə ilişib və bu vəziyyətdən Qərb istifadə edərək Ermənistanda mövqelərini gücləndirir. Paşinyanı qoruyan Amerika və Fransa kəşfiyyatıdır. Əslində Rusiya onun azca büdrəməsini gözləyir ki, aşırsın. Sadəcə, erməni cəmiyyəti ruspərəst müxalifəti qəbul etmir. Ona görə də hər iki tərəf fürsət gözləməkdədir. Məncə, Gürcüstan hadisələrinin yekunu Paşinyan üçün nəticə çıxarmağa əsas olacaq. Hər halda, “iki stul”da oturmaq siyasəti Paşinyanı bitirə bilər. Odur ki, Ermənistan Qoşulmama Hərəkatına üzvlüyü seçməlidir, “altılıq” platformasında fəal iştirak etməlidir. Bu ölkənin nicatı Azərbaycan və Türkiyədədir…”

    Emil SALAMOĞLU,
    “Yeni Müsavat”

  • Əsas məqsəd hərbi və kəşfiyyat hədəflərinə çatmaqdır

    Avropa Birliyinin 13-14 nəfərdən ibarət monitorinq missiyasının əməliyyat mərkəzi daimi olaraq Cermukda yerləşir. Onlar sürücülər və köməkçilərlə birlikdə Cermukda qonaqlar üçün bağlı olan üçulduzlu “Ani” hotelində qalıblar. “Hraparak” nəşri məlumat yayıb ki, müşahidəçilər demək olar ki, hər gün rayonu gəzir, sərhədə gedir, bir neçə kilometr məsafədən vəziyyəti müşahidə edirlər: “Avropalı müşahidəçilər yerli administrasiya ilə demək olar ki, əlaqə saxlamırlar: heç bir məlumat tələb etmirlər, onlara heç nə vermirlər və onların nə etdiklərini heç kim bilmir”. Bununla belə qəzetin yazdığına görə, avropalı müşahidəçilərin gəlişi Cermuk sakinlərini çox sevindirib: “Onlar özlərini qorunmuş hiss edirlər. Cermuk sakinləri 2022-ci ildən sonra Azərbaycan tərəfdən hücumun olmamasını müşahidəçilərin olması ilə əlaqələndirir və onların qalmasını istəyirlər. Müşahidəçilər tez-tez küçəyə çıxır, Cermuk sakinləri ilə ünsiyyət qurur və insanların onlarla necə davranması ilə maraqlanırlar”.
     
    Vətəndaş Həmrəyliyi Partiyasının Ali Məclisinin sədri Felmar Ələkbərli “Sherg.az”a deyib ki, Azərbaycan tərəfi dəfələrlə Aİ missiyasının gəlişinin regionda vəziyyətin sabitləşməsinə yox, gərginləşməsinə xidmət edəcəyini bildirib. Onun sözlərinə görə, Aİ tərəfindən həyata keçirilən bütün əməliyyatların kuratoru Fransa nümayəndəsidir: 
    “Digər əməkdaşların isə istefada olan hərbçilər və müxtəlif Qərb ölkələrinin mövcud kəşfiyyatçılardır. Zaman keçdikcə bu kontingentin mülki yox, hərbi missiya olmasına heç bir şübhə qalmadı. Aİ missiyasının əsas məqsədi hərbi və kəşfiyyat hədəflərinə çatmaqdır. Tərkibin yenidən genişləndirilməsi birbaşa Rusiya və İrana qarşı yönəlmiş addımdır. Bu missiya Aİ-nin deyil, NATO-nun missiyasına çevrilir. Prosesdə Kanadanın və ABŞ-nin iştirakı da qeyd edilənləri təsdiqləyir. Belə vəziyyətdə missiya Azərbaycan və Ermənistanın kövrək sülh danışıqları prosesinə mane olur. Görünən odur ki, rəsmi Qərb Ermənistanda möhkəmlənmək üçün bu missiyadan istifadə edir. Avropa İttifaqınnın mülki missiyası bölgəyə gəldiyi gündən indiyə qədər əsas hədəfi Rusiyaya qarşı yönəlib”.
     
    Ekspertə görə, Rusiya bu gün də maraqlıdır ki, həm Azərbaycanla sərhəddə, həm də Zəngəzur dəhlizi boyunca məhz rus sərhədçiləri dayansın:
     “Bu isə Qərbin və Ermənistanın maraqlarına tam ziddir. Ona görə də bu istiqamətdə əməli addımlar atmağa məcburdurlar. Rusiya KTMT qüvvələrinin bölgəyə, xüsusilə də sərhəddə yerləşdirilməsində olduqca maraqlıdır. Bu hal da Qərbin marağına uyğun deyil. Görünür, Aİ bu məsələdə Rusiyaya güzəştə getmək fikrində deyil. Ermənistan və Qərb sərhəd məsələsində Rusiyanın iştirakını tamamilə minimal səviyyəyə salmaq istəyirlər. Baş verən proseslərin Ermənistan və Rusiya arasında sərhədə nəzarətin kim tərəfindən icra ediləcəyi sualını ortaya çıxarmış olur. Bu məsələ Azərbaycanın da marağındadır ki, Ermənistanla sərhəddə məhz erməni sərhədçiləri dayansın, nəinki Aİ mülki missiyası və ya Rusiya sərhədçiləri”.