Blog

Azərbaycanda fəaliyyət göstərən partiyaların əksəriyyətinin məramnamələrində vətəndaş həmrəyliyi, vətəndaş birliyi, milli birlik ifadələri öz əksini tapır.

Amma bir həqiqəti qəbul etmək lazımdır ki, vətəndaş həmrəyliyi ifadəsinin və bu adlı partiyanın sahibi bizik.

Sabah Bakıda mitinq keçirmək niyyətində olan gənclərin bir qrupu Bakı Şəhər Baş Polis İdarəsinə (BŞBPİ) çağırılıb.

Gənclərin Hüquqlarını Müdafiə Komitəsinin (GHMK) İdarə Heyətinin üzvü Samir Əsədli bildirilib ki, görüşə mitinqin təşkilatçıları-Samir Əsədli, Turqut Qəmbər, Əbülfəz Qurbanlı, Səxavət Soltanlı, Rail Abbasov, Ülvi Həsənli və Cəmil Hacıyev hüquq-mühafizə orqanları tərəfindən isə BŞBPİ-nın rəis müavini Səhlab Bağırov, Bakı şəhər prokurorunun müavini Fazil Həsənəliyev və digərləri iştirak ediblər. 

Görüşdə mitinq təşkilatçılarına hüquq və vəzifələri izah edilib, bəzi tələb və xahişlər diqqətə çatdırılıb. Gənclərin Hüquqlarını Müdafiə Komitəsinin üzvləri isə polisin mitinq zamanı aksiya iştirakçılarına qarşı diqqətli davranış nümayiş etdirməsini istəyiblər.

Qeyd edək ki, GHMK Bakı Şəhər İcra Hakimiyyətinə aksiya keçirməklə bağlı müraciət edib. Paytaxt meriyası müraciətə baxaraq, kütləvi aksiyanın keçirilməsi niyyətini müsbət qarşılayıb. İcra hakimiyyəti mitinq üçün Səbayel rayonu, 20-ci yaşayış sahəsi, Elçin Əzizov küçəsində yerləşən sürücülük məktəbinin həyətindəki meydançanı məqbul hesab edib. 

GHMK sabah saat 15.00-dan 17.00-dək paytaxt meriyasının mitinq üçün ayırdığı yerdə aksiya keçirməyə hazırlaşır. 

Xatırladaq ki, GHMK-ya Vətəndaş Həmrəyliyi, Xalq Cəbhəsi, Demokrat və Müsavat gənclər təşkilatları, o cümlədən “Nida” Vətəndaş Hərəkatı, “Dalğa”, “Azad”, “Müsbət Dəyişiklik” gənclər hərəkatları və İnsan Hüquqları Klubu daxildir. Aksiyada “Qarabağ”, “Siyasi məhbuslara azadlıq”, “Rüşvətsiz təhsil” və “Rüşvətə yox” şüarları səslənəcək. 

VHP sədri, millət vəkili, Xalq şairi Sabir Rüstəmxanlı Novruz bayramı münasibəti ilə Azərbaycan xalqını təbrik eləyib. Təbrikdə deyilir:

“Əziz soydaşlarım!

Sizi Novruz bayramı münasibətilə səmimi qəlbdən təbrik edir, ölkəmizə əmin-amanlıq, hər birinizə can sağlığı, ailə səadəti və firavanlıq arzulayıram.

Novruz xalqımızın ən qədim və milli bayramlarından biridir və min illərlə soydaşlarımız Baharın gəlişini yüksək əhval-ruhiyyə və sevinclə qarşılamışlar. Ən çətin tarixi dövrlərdə, Novruz bayramı dövlət səviyyəsində qadağan edildikdə belə, xalqımız bu mərasimi təmtəraqla keçirmiş, min illərin ənənəsini yaşatmış, milli ruhunu, milli kimliyini ayaqda saxlamağı bacarmışdır.

Novruz – təkcə torpağın oyanması, ruzi-bərəkət, bolluq rəmzi deyil, həm də ruhumuzun təzələnməsi, qan yaddaşımızda yaşatdığımız adət-ənənlərimizin, dünyagörüşümüzün, həyata baxışımızın təzahürü, milli arzu və istəklərimizin ifadəsi, xalq olaraq Tanriya dua mərasimlərimizin cəmləşdiyi törəndir. Arzu edək ki, torpaqlarımız işğaldan təmizlənsin, qaçqınlarımız yurduna dönsün, Vətənimizdə əmin-amanlıq olsun.

Əziz soydaşlarım, bir daha sizləri Novruz bayramı münasibəti il təbrik edir, hamınıza xoşbəxtlik, ruzi-bərəkət arzulayıram.

 

Sayğılarla,

Sabir RÜSTƏMXANLI

VHP sədri, millət vəkili, Xalq şairi”

1918-ci ilin martında Rusiya bolşeviklərinin rəhbəri Vladimir Lenin bolşevik Stepan Şaumyanı Qafqaz fövqəladə komissarı təyin edərək Bakıya göndərmişdir. Bolşeviklər Bakıda hakimiyyəti ələ keçirmək adı ilə erməni daşnaklarının silahlı qüvvələrinin gizli niyyətləri üçün şərait yaratmışlar. Martın 31-də Bakı şəhərində azərbaycanlıların kütləvi qırğını başlamışdır. Stepan Şaumyanın etirafına görə, dinc azərbaycanlıların qırğınında Bakı Sovetinin altı min silahlı əsgəri, eyni zamanda «Daşnaksütyun» partiyasının 3-4 minlik silahlı dəstəsi iştirak etmişdir.

Üç gün davam edən qırğın zamanı erməni silahlıları bolşeviklərin köməyi ilə azərbaycanlıların yaşadıqları məhəllərə qəflətən basqınlar etmiş, əhalini uşaqdan böyüyədək qətlə yetirmişdir. Həmin dəhşətli günlərin şahidi olmuş Kulner familiyalı bir alman, 1925-ci ildə Bakı hadisələri barədə bunları yazmışdır: «Ermənilər müsəlman (azərbaycanlı) məhəllələrinə soxularaq hər kəsi öldürür, qılıncla parçalayır, süngü ilə dəlmə-deşik edirdilər. Qırğından bir neçə gün sonra bir çuxurdan çıxarılan 87 azərbaycanlı cəsədinin qulaqları, burunları kəsilmiş, qarınları yırtılmış, cinsiyyət orqanları doğranmışdır. Ermənilər uşaqlara acımadıqları kimi, yaşlılara da rəhm etməmişdilər».

Ümumiyyətlə, XX əsrin birinci yarısında Zaqafqaziyada baş vermiş iki qırğın zamanı (1905-1907-ci illər, 1918-1920-ci illər) 2 milyona yaxın azərbaycanlı, ermənilər tərəfindən qətlə yetirilmiş, öz ev-eşiyindən zorla qovulmuşdur.

Mart qırğını zamanı Bakı şəhərinin təkcə bir yerində qulaqları, burunları kəsilmiş, qarınları yırtılmış 57 azərbaycanlı qadınının meyidi tapılmışdır. Gənc qadınların diri-diri divara mıxlanması, ermənilərin hücumundan sığınmağa çalışan iki min nəfərin yerləşdiyi şəhər xəstəxanasının yandırıldığı da bu dəhşətli faktlar sırasındadır.

Qaçıb canını qurtarmağa çalışan əhalini gülləbaran etmək üçün isə ermənilər şəhərin müvafiq yerlərində əvvəlcədən pulemyotlar yerləşdirmişdilər.

İrəvan quberniyası, Şərur-Dərələyəz, Sürməli, Qars və digər ərazilərdə azərbaycanlıların qırğınının fəal iştirakçılarından biri olmuş erməni zabiti Ovanes Apresyanın xatirələri əsasında amerikalı aqronom Leonard Ramsden Hartvill «İnsanlar belə imişlər» adlı kitab yazmışdır. Ovanes Apresyan kitabın müəllifi ilə söhbəti zamanı ermənilərin ingilislərin və Rusiyanın yardımı ilə öz məqsədlərinə çatdıqlarını qeyd edərək təkcə Bakıda mart qırğını zamanı iyirmi beş min azərbaycanlının qətlə yetirildiyini bildirmişdir.

Daşnakların azərbaycanlılara qarşı soyqırımı yalnız Bakı ilə məhdudlaşmamışdır. Qısa müddətdə Şamaxı, Quba, İrəvan, Zəngəzur, Qarabağ, Naxçıvan, Qarsda da azərbaycanlıların qırğını törədilmişdir.

1918-ci ilin mart-aprel aylarında Şamaxıda 8 minə qədər dinc sakin qətlə yetirilimişdir. Şamaxı Cümə məscidi də daxil olmaqla əksər mədəniyyət abidələri yandırılmış və uçurulmuşdur.

Cavanşir qəzasının 28 kəndi, Cəbrayıl qəzasının 17 kəndi tamamilə yandırılmış, əhalisi məhv edilmişdir.

1918-ci iln aprelin 29-da Gümrü yaxınlığında əsasən qadınlardan, uşaqlardan və yaşlılardan ibarət 3 min nəfərlik azərbaycanlı köçü pusquya salınaraq son nəfərinədək məhv edilmişdir.

Erməni silahlı dəstələri Naxçıvan qəzasının bir neçə kəndini yandırmış, Zəngəzur qəzasında 115 azərbaycanlı kəndi məhv edilmiş, 3257 kişi, 2276 qadın və 2196 uşaq öldürülmüşdür. Bütövlükdə bu qəza üzrə 10068 azərbaycanlı öldürülmüş və ya şikəst edilmiş, 50000 azərbaycanlı qaçqın düşmüşdür.

İrəvan quberniyasının 199 kəndində yaşayan 135 min azərbaycanlı məhv edilmiş, kəndlər isə yerlə yeksan edilmişdir. Erməni silahlı dəstələri daha sonra Qarabağa yürüş etmiş, 1918-1920-ci illər arasında Qarabağın dağlıq hissəsində 150 kənd dağıdılımış, əhalisi məhv edilmişdir. (ADR hökuməti, Fövqəladə İstintaq Komissiyasının materiallarından)

1920-ci ilin mayında ermənilərin və XI Qızıl Ordunun iştirakı ilə Gəncədə 12 mindən çox azərbaycanlı qətlə yetirilmişdir.

Dünya Azərbaycanlıları Konqresinin həmsədri, millət vəkili Sabir Rüstəmxanlı və DAK İdarə Heyətinin üzvü Adil Minbaşı martın 30-da İsveçə yola düşəcəklər. Səfərdə məqsəd azərbaycanlıların «31 mart soyqırımı günü»nə həsr olunmuş konfranslarda iştirak etməkdir. DAK rəhbərliyinin soyqırım həqiqətlərinin tanıdılması ilə bağlı İsveç parlamentariləri və siyasi partiya liderləri ilə görüşləri də səfər proqramına daxildir.

Səfər zamanı həm də 21-23 aprel tarixlərində Ukraynanı Donetsk şəhərində keçiriləcək DAK-ın 12-ci qurultayının İsveçdəki diaspor təşkilatları ilə müzakirəsi də aparılacaq.

Sabir Rüstəmxanlı və Adil Minbaşının İsveç görüşlərindən sonra Danimarkaya səfər edəcəkləri nəzərdə tutulur.

 

Mətbuat Xidməti

Azərbaycanlıların 31 mart soyqırımı İsveçdə və Rusiyada geniş tədbirlərlə qeyd edilib. Bu barədə həmin tədbirlərdə iştirak edən millət vəkili, DAK həmsədri Sabir Rüstəmxanlı məlumat verib.

Millət vəkilinin bildirdiyinə görə, DAK İdarə Heyətinin üzvü Adil Minbaşı ilə bərabər Stolholm və Yoteburqda Azərbaycan diaspor təşkilatlarının soyqırımla bağlı təşkil etdikləri mərasimlərdə çıxış ediblər. Həmçinin Azərbaycanın son iki əsrdə yaşadığı faciələrin dünya ictimaiyyətinə çatdırılması, DAK-ın 12-ci qurultayına hazırlıq və s. məsələlərlə bağlı diaspor nümayəndələri ilə müzakirələr keçiriblər. Avropada fəaliyyət göstərən Güney Azərbaycan siyasi qurumları və Azərbaycan dərnəklərinin fəaliyyətlərinin əlaqələndirilməsi istiqamətində isə birgə razılıq əldə edilib.

Millət vəkili Sabir Rüstəmxanlı və Adil Minbaşı daha sonra İsveç parlamentinin deputatları C.Magnusson və A.Vaberi ilə görüşüblər. Görüşdə 31 mart soyqırımı, Dağlıq Qarabağ münaqişəsi barədə həqiqətlər İsveç parlamentarilərinin diqqətinə çatdırılıb, İçveç-Azərbaycan əlaqələrində sivil toplumun rolu müzakirə edilib, İsveçdəki Azərbaycan diasporunun problemləri müzakirə edilib. S.Rüstəmxanlı Azərbaycanla daha yaxından tanış olmaq üçün İçveç parlamentarilərini şəxsi qonağı olaraq ölkəmizə dəvət edib.

Aprelin 3-də isə S.Rüstəmxanlı və A.Minbaşı Moskvada 31 mart soyqırımı və Kəlbəcərin işğalı ilə bağlı düzənlənən tədbirlərə qatılıblar. Həmçinin DAK-ın Rusiya nümayəndəliyinin üzvləri və ziyalıların iştirakı ilə qurultaya hazırlıq, diasporun qayğıları və s. məsələlər müzakirə edilib.

Mətbuat Xidməti

 

Dünya Azərbaycanlıları Konqresinin (DAK) rəhbərliyi mətbuat konfransı keçirib. APA-nın xəbərinə görə, DAK həmsədri Sabir Rüstəmxanlı təşkilatın XII qurultayının vaxtı və yeri haqda məlumat verib, eyni zamanda qurum ətrafında gedən söz-söhbətlər barəsində də danışıb. 

S. Rüstəmxanlı bildirib ki, DAK-ın XII qurultayı aprelin 21-də, 22-də və 23-də Ukraynanın Donetsk şəhərində keçiriləcək. Qurultayda dünya azərbaycanlılarının problemləri, Güney Azərbaycan məsələsi, İran türklərinin haqlarının pozulması və digər mühüm məsələlər müzakirə ediləcək. Tədbirin sonuncu günü diaspora təşkilatlarının nümayəndələrindən ibarət koordinasiya mərkəzinin yaradılması nəzərdə tutulub. Türkiyə telekanallarından birinin qurultayın açılış mərasimini canlı yayımlaması planlaşdırılır. 

S. Rüstəmxanlı DAK-ın diaspora təşkilatları arasında ən nüfuzlu qurum olduğunu diqqətə çatdıraraq bundan narahat olan qüvvələrin qurum daxilində parçalanma yaratmaq cəhdlərinin olduğunu söyləyib: “Konqres təsis olunduğu 15 ildə çox böyük yol keçib. Konqresin ilk qurultayı İran bayrağı altında keçirilmişdi. Bu gün artıq DAK Azərbaycan xalqının milli ideallarının ifadəçisidir və dünyanın bir çox ölkəsində təmsilçiliyi fəaliyyətdədir. Bu da həm İranda, həm də bizə düşmən olan dövlətlərdə narahatlıq doğurur. Konqresə iddialı qüvvələr var. Əslində bu cür fəaliyyət azərbaycanlıların birliyinə xəyanətdir. Biz çalışırıq ki, azərbaycanlıların milli birliyinə gedən yolda DAK bütün imkanları səfərbər etsin. DAK-dan çıxan və ya çıxarılan bəzi şəxslər Belçikanın paytaxtı Brüsseldə birlik konfransı adı altında tədbir keçiriləcəyi haqda xəbərlər yayırlar. Biz birliyin tərəfdarıyıq. Bu səbəbdən də bu insanları qurultaya dəvət edirik. Burada heç bir problem yoxdur. Bundan sonra DAK ətrafında söz-söhbətlərə son qoyulacaq”. 

S. Rüstəmxanlı DAK-ın gələcək hədəfləri haqqında da danışıb. 

2010-cu ildən Azərbaycanın siyasi səhnəsinə çıxan yeni gənclik bu ilin ilk izdihamlı mitinqini keçirdi. Etiraz aksiyası razılaşdırılmış mitinq şəklində baş tutdu və ölkə gəncliyinin aktiv kəsimi bu nümayişdə yüksək səviyyədə iştirak etdi. Aramsız yağan qara, soyuğa, hər cür hava müxalifətinə, mitinq meydanının uzaqlığına baxmayaraq, demokratik düşərgədə birləşən gənclər tarix yazmağı bacardılar.

Hələ 2011-cu ildən etibarən güclənən gənclik hərəkatı 2 aprel mitinqindən sonra Gənclərin Hüquqlarını Müdafiə Komitəsini (GHMK) yaratmışdı. Müxalifət partiyalarının gənclər təşkilatları və o cümlədən müstəqil gənclər qurumları bu komitədə bir araya toplaşıb.

Aksiya yaxşı təşkil olunmuşdu. Mitinqə gələnlərin hərəkətini nizamlayan, jurnalistlər üçün uyğun şərait yaradan ayrı-ayrı fərdlər müəyyənləşdirilmişdi. Tribunada səsgücləndiricilər qaydasındaydı. Ən diqqətçəkən məqamlardan biri hazırlanan plakatların, şüarların rəngarəngliyi idi – “Qalx ayağa Azərbaycan, ümidlərimin üstündə oturmusan!”, “Siyasi məhbuslara azadlıq!”, “Analoqlu təhsil istəyirik!”, “YAP-sız həyat istəyirik!”,  “Təhsildə rüşvətə yox deyirik!”, “Əlinizi xalqın cibindən çəkin”, “Oyun bitdi”, “Yetər artıq, səsimiz boğma”, “Bizə “Eurovision” yox, Qarabağ lazımdır”, və s.

“İstefa” demək qadağandır

GHMK-nin öncədən müəyyənləşdirdiyi taktikaya əsasən martın 17-nə təyin olunan mitinq hakimiyyətlə razılaşdırılmış olmalı idi. Bakı Şəhər İcra Hakimiyyətinin sanksiyası ilə mitinqə Səbayel rayonu, 20-ci yaşayış sahəsindəki sürücülük məktəbinin stadionu ayrılmışdı. Yağan qara, soyuğa baxmayaraq Bibiheybət yaxınlığında yerləşən stadiona minlərlə gənc toplaşdı. Aksiya keçirilən əraziyə xeyli sayda polis qüvvələri də cəlb olunmuşdu. Mülki geyimli naməlum şəxslər arasında çəkiliş aparanlar, tribunada çıxış edənlərin ad-soyadlarını qeydə alanlar, aksiyada provokasiya yaratmağa təşəbbüs göstərənlərə qədər rast gəlmək olardı.
Hətta stadionun arxasındakı yarımçıq tikilinin yuxarı mərtəbəsindən haralarasa “canlı reportaj” verənlər də var idi.

Öncə polis aksiyanı kənarda tamaşa edirdi və heç bir müdaxilə yox idi. Yalnız aksiya ərzində “İstefa” və “Davam edir 37″ şüarı səsləndirəndə polis tədbirin təşkilatçılarına irad tutdu ki, bu ifadələr işlədilməsin. Əsasları da bu oldu ki, gənclərin mitinqlə bağlı müraciətlərində bu şüarlar göstərilməyib. Mitinq təşkilatçıları deyilənə əməl etdilər.

Gənclərdən rejimə ismarış

Aksiyada çıxış edənlər bildirdilər ki, vətəndaşların mülkiyyət hüququnu pozan, 18 ildə Qarabağ problemini həll edə bilməyən hakimiyyət istefaya getməlidir. Yağmurlu hava şəraitinə baxmayaraq, aksiya gələnlərin sayı getdikcə artırdı.

Mitinqi Vətəndaş Həmrəyliyi Partiyası sədrinin gənclər üzrə müşaviri Samir Əsədli aparırdı. O, giriş nitqində hakimiyyətin insan haqlarını boğmasından, ölkədə sərbəst toplaşma azadlığının təmin olunmamasından danışdı: “Buna baxmayaraq Azərbaycanın fəal gəncliyi bu şəraitsiz, şəhərdən kənarda olan meydana yığışıb sözünü deyir. Mübarizəmiz davam edəcək. Vicdan məhbuslarını azad etməyən, insanların evlərini başına uçurub öz hakimiyyətini yıxılan evlər üzərində quran rejimə biz ”yox” deyirik. Ölkə gəncliyi rüşvətsiz təhsil, iş, normal əmək haqqı, firavanlıq istəyir. Mən bu qədər gəncin bu hava şəraitində gələcəyini gözləməzdim. Əslində bu, hələ aktiv gəncliyin bir hissəsidir”.

Müsavat Partiyası Gənclər Təşkilatının sədr müavini Səxavət Soltanlı çıxışında dedi ki, İlham Əliyev hakimiyyətinin siyasi məhbusları azad etməməsi başadüşülən deyil: “Hakimiyyəti bütün vicdan məhbuslarını azad etməyə çağırıram. 18 il ərzində torpaqları işğaldan azad edə bilməyən hakimiyyət istefa verməlidir. Azərbaycan səfalət, zülmət içindədir. Bu gün bu qədər gənc kefindən bura toplaşmayıb. Təhsili, savadı, dünyagörüşü olan gənclərin hüquqları pozulur, onlara şərait yaradılmır. Hakimiyyət düşünür ki, biz stadiona yığışmaqla fəaliyyətimiz məhdudlaşır. Əsla. Bu, sadəcə nümunədir ki, gənclik hakimiyyətdən narazıdır”.

Daha sonra “Dalğa” Gənclər Hərəkatının sədri Xanım Yadigarlı çıxış edib dedi ki, onlar heç bir siyasi partiyanı dəstəkləmirlər, onlar rüşvətsiz təhsil istəyirlər. O, çıxışını “Təhsildə rüşvətə yox!” şüarı ilə bitirdi.

AXCP Gənclər Komitəsinin sədri Əbülfəz Qurbanlı isə dedi ki, Azərbaycan hakimiyyəti gəncləri aldadır. O, onlarla gəncin siyasi məhbus kimi həbsxanalarda, “qul bazarı”nda olduğunu qeyd etdi. Ə.Qurbanlı Azərbaycan gəncliyinin hazırda ölkədəki ədalətsizliyə və haqsızlıqlara qarşı birlik nümayiş etdirməsindən danışdı. O, 17 mart mitinqinin bir başlanğıc olduğunu dedi və qarşıdakı hədəflərdən danışdı.

“Azərbaycan iqtidarı ölkədə daha müxalifətin qalmadığını bəyan edirdi. Bu gün biz sübut etdik ki, müxalifət var, onun mübarizəsi davam edir” – deyə Qurbanlı bildirdi.
Onun çıxışından sonra aksiya iştirakçıları “Azərbaycan!” şüarları səsləndirdilər. Aksiyada dindarların həbs olunması, jurnalistlərin şantaj olunması, onların şəxsi həyatına müdaxilə olunması pisləndi.

İşıqlar kəsildi, dava düşdü və…

ADP gənclər təşkilatının sədri Cəmil Hacıyev sovet banklarında batan əmanətlərin qaytarılması zamanı yol verilən ədalətsizlikdən, gənclərin sosial problemlərindən bəhs etdi. Bildirdi ki, hakimiyyətin 18 ildə bir uğuru da yoxdur: “Gənclik bu gün narazı olmasaydı, bura gəlməzdi. Ölkə problemlər içində boğulur”. 
“NİDA” Gənclər Hərəkatının nümayəndəsi Üzeyir Məmmədli isə Azərbaycan ordusundakı vəziyyətə toxundu və iqtidarın Qarabağ faktından hakimiyyətdə qalmaq üçün istifadə etdiyini vurğuladı.

VHP Gənclər Təşkilatının nümayəndəsi Emil Bağırov da çıxışında hakimiyyətin təhsil siyasətini pislədi.

Bir qədər sonra mitinq keçirilən əraziyə verilən elektrik enerjisi kəsildi. Bu, aksiyaçıların etirazına səbəb oldu. Onlar hakimiyyət əleyhinə şüarlar səsləndirdi. Sonra generator vasitəsilə mikrofonlar işə salındı və çıxışlar, şüarlar davam etdi.

“İnsan Haqları” Klubunun  nümayəndəsi Natiq Cəfərli mitinqin bu ərazidə keçirilməsinin özəlliyindən söz açdı: “Hamı gördü ki, Bakı təkcə “Torqovı”dan ibarət deyil, təkcə mərkəzdəki fəvvarələrlə, bulvara döşənən metlaxlarla bitmir. Gördülər ki, şəhərin mərkəzindən kənara çıxan kimi yollar bərbad gündədir, heç bir yenilik yoxdur. Hakimiyyət öz ailəsinin və yaxınlarının mənafeyinə yox, bütün millətə xidmət etməlidir”.

“Azad Gənçlik” Təşkilatının İdarə Heyəti üzvü Məcid Mərcanlı da çıxışında hakimiyyətin uğursuz siyasətini tənqid etdi.

Sonda “Müsbət Dəyişiklik” Hərəkatı İdarə Heyətinin üzvü Rəşad Həsənov çıxış etdi, “Azad Gənçlik” Təşkilatının sədri Ülvi Həsənli mitinqin qətnaməsini oxudu və mirinq bağlı elan edildi.

“Yeni Müsavat”

 

Sabir Rüstəmxanlı: “Dövlət müstəqilliyini bərpa eləməyin özü təzədən dövlət qurmağa bərabər bir işdir”

Azərbaycanın dövlət müstəqilliyinin bərpası haqqında Konstitusiya Aktının qəbul olunduğu gün – 18 oktyabr istirahət günü elan olunacaq. Bu, Azərbaycan Nazirlər Kabineti, Azərbaycan Həmkarlar İttifaqları Konfederasiyası və Azərbaycan Sahibkarlar (İşəgötürənlər) Təşkilatları Milli Konfederasiyası arasında imzalanmış 2012-2013-cü illər üçün Baş Kollektiv Sazişdə nəzərdə tutulur.

Nazirlər Kabinetindən verilən məlumata görə, sazişin “Sosial müdafiənin gücləndirilməsi istiqamətləri” hissəsində bildirilir ki, sənədi imzalayan tərəflər müstəqillik gününün (18 oktyabr) də iş günü hesab edilməyən bayram günü kimi qeyd edilməsinə və bununla əlaqədar Əmək Məcəlləsinin 105-ci maddəsinin 2-ci hissəsində dəyişiklik edilməsinə nail olunması üçün tədbirlər görəcəklər. Qeyd edək ki, 1991-ci il oktyabrın 18-də Azərbaycan Ali Soveti dövlət müstəqilliyinin bərpası haqqında Konstitusiya Aktını qəbul edib. 1992-2006-cı illərdə 18 oktyabr Azərbaycanda qeyri-iş günü hesab edilib. 2006-cı il dekabrın 8-də isə Milli Məclis Əmək Məcəlləsinə dəyişiklik edib. Həmin dəyişikliyə əsasən, 18 oktyabr – Müstəqillik Günü, 12 noyabr – Konstitusiya Günü, 17 noyabr – Milli Dirçəliş Günü bayram kimi qalsalar da, istirahət günü kimi qeyd edilmir. 
İstiqlalçı deputat, sabiq təhsil naziri Firudin Cəlilov Müstəqillik Gününün yenidən istirahət günü elan edilməsini müsbət qarşılayır: “Həmin günün iş günü olması iqtidarın Azərbaycanın müstəqilliyinə, azadlığına olan münasibəti idi. Axır ki, indi ağılları başlarına gəldi. Əgər həmin günü qeyri-iş günü elan etməsəydilər, bu, gələcəkdə mütləq ediləcəkdi. Çünki 18 oktyabr bizim xalqın, ölkəmizin müstəqillik günüdür. Bunu necə ola bilər ki, qeyd etməyəsən?! Çox absurd bir durum yaranmışdı. Heç xalqa, dövlətə aidiyyəti olmayan günləri qeyd edirdilər, amma Müstəqillik Günü kənarda qalmışdı. Azərbaycan xalqının ən önəmli sayılan iki bayramı var- Novruz və Müstəqillik Günü. Hər iki bayram da yüksək səviyyədə qeyd edilməlidir”. 
Müstəqillik aktına qol çəkən digər istiqlalçı deputat Tahir Kərimli də xəbəri eşidib, çox sevindiyini bildirdi: “Bir qədər də rahatlıq tapdım. Bu, tək bizim keçmişimizə deyil, həm də gələcəyimizə aid bir məsələdir. Bu, mənim ümidimi də artırdı. Gürcüstan prezidenti Mixail Saakaşvili də bu məsələyə toxunmuşdu. Onun açıqlamasından sonra yenidən belə bir niyyətin olmasını alqışlayıram”. 
Müstəqillik Aktında imzası olan deputat Sabir Rüstəmxanlı da bildirdi ki, 18 oktyabrın yenidən qeyri-iş günü kimi qeyd edilməsi doğru addım olar: “Hesab edirəm ki, 18 oktyabr bizim tariximizin ən parlaq günlərindən biridir. SSRİ kimi bir imperiyadan qopmaq, dövlət müstəqilliyini bərpa eləməyin özü təzədən dövlət qurmağa bərabər bir işdir”. S.Rüstəmxanlı eyni zamanda hesab edir ki, 18 oktyabr günündə xidməti olan adamların zəhməti 1918-ci ildə Azərbaycan Xalq Cümhuriyyətini quranların xidmətlərindən az deyil: “Onların da tariximizdə, taleyimizdə çox böyük rolu olub, 1991-ci il 18 oktyabrda bu işi görənlərin də. Ona görə də bu günün bayram günü kimi qeyd olunması çox vacibdir”.
İstiqlalçı deputat Mirmahmud Mirəlioğlu isə məsələyə münasibət bildirərkən dedi ki, əvvəl-axır haqq yerini tapmalıdır. Onun fikrincə, 18 oktyabr Azərbaycanın şərəf tarixidir: “Əslində biz burda hüquqi varisliyin bünövrəsini qoymuşuq. Əvvəl bu gün bayram kimi qeyd olunurdu, sonradan ləğv olundu”. M.Mirəlioğlunun sözlərinə görə, 18 oktyabrın yenidən qeyri-iş günü kimi qeyd olunması barədə nəzərdə tutulan qərar Azərbaycan hakimiyyətinin islahata gedən yolundakı addımlarından hesab oluna bilər: “Ara-sıra belə məsələlər olacaq. Bunlar təqdir olunan məsələdir”.

Günay MUSAYEVA

“Yeni Müsavat” qəzeti