Vətəndaş Həmrəyliyi Partiyası

Blog

  • “Ermənistanda anti-Rusiya ovqatı güclənir”

    Erməni baş nazir “cib müxalifəti” yaradır və səfir Marukyan bu prosesdə önə verilir – ekspertlərin rəyi

    Ötən həftəsonu Ermənistanda xüsusi tapşırıqlar üzrə səfir Edmon Marukyanın qəfildən, “xarici siyasət məsələlərində fikir ayrılığı” səbəbindən istefa verməsi ciddi müzakirə mövzusu olub. “Yeni Müsavat” bildirir ki, əksər erməni politoloqlar bu istefanın ərizədə göstərilən kimi olmasını mümkünsüz sayır. Çünki Marukyan heç vaxt müstəqil fikir sahibi olmayıb və yalnız tapşırıqları icra edib. Onun gözlənilmədən istefası da Ermənistan-Azərbaycan münasibətlərində “barışmaz mövqeyi ilə” bağlı deyil. Bəs Marukyanın istefasının səbəbi nədir?

    Erməni siyasi şərhçi Avetis Babacanyan düşünür ki, Nikol Paşinyan ona istefa ərizəsi yazmağı təklif etməklə, əslində Marukyanı “xarici siyasət üzrə xüsusi tapşırıqlar üzrə səfir” vəzifəsindən alaraq, daxili siyasət üzrə “xüsusi tapşırıqlar yerinə yetirən şəxs” təyin edib. Belə ki, Marukyan qısa müddətdə Paşinyanın əsas tənqidçisi olacaq, Rusiya ilə münasibətlərin inkişafının tərəfdarı kimi çıxış edəcək, nəhayət, seçkilərə partiyasını gücləndirərək aparacaq və rusiyayönümlülərin səsini parçalamağa nail olacaq. Marukyan həm də Rusiya ilə əlaqələr quraraq, Paşinyana məxfi xəbərlər və Rusiyanın gizli oyunları haqda məlumat daşımaqla məşğul olacaq. Belə desək, Nikol Edmon vasitəsilə “rusiyayönümlü cib müxalifəti” formalaşdırır, əsl ruspərəstlər arasında parçalanmaya səbəb olur, onların seçkidəki səslərinin bir hissəsi Marukyana gedir, nəticədə Moskvadan təlimat alan müxalif partiyalar arasında təmərküzləşmə baş vermir.

    Bu mövzuda ermənilərin “Hraparak” nəşri də yazır ki, Marukyanın fevralın 29-da səfir postundan istefa verməsinin səbəbi ölkədə keçiriləcək növbədənkənar seçkilərlə bağlıdır. Nəşrin yazdığına görə, Paşinyan-Marukyan tandemi “saxta fikir ayrılıqları” yaratmağa çalışır ki, qarşıdan gələn seçkilərdə Edmonun rəhbərlik etdiyi “Parlaq Ermənistan” özünü müxalifət kimi göstərib parlamentə daxil olsun. Qəzet qeyd edir ki, “Paşinyan bununla da idarə olunan və proqnozlaşdırıla bilən müxalifət formalaşdırır”. Xatırlatmaq yerinə düşər ki, fevralın 29-da Marukyan xüsusi tapşırıqlar üzrə səfir vəzifəsindən istefa ərizəsini Ermənistanın baş nazirinə təqdim edib. O qeyd edib ki, son vaxtlar fundamental siyasi məsələlərə baxışdakı fərqliliklər onun “xarici siyasət cəbhəsində” iştirakını davam etdirməsini qeyri-mümkün edib. O, fərqlərin nədən ibarət olduğunu açıqlamayıb.

    Lakin həqiqətənmi Paşinyan anti-Azərbaycan mövqeli şəxsləri “təmizləyir”, yoxsa erməni mediasının və analitiklərinin dediyi kimi, erkən seçkilərə hazırlaşır, sistem müxalifəti yaradır? Ümumiyyətlə, növbədənkənar seçkidə Paşinyan uduzar, yoxsa Rusiya aranı qatar?  

    “Yeni Müsavat”a danışan Vətəndaş Həmrəyliyi Partiyası Mərkəzi İcra Aparatının rəhbəri Samir Əsədli hesab edir ki, Marukyanın istefası erməni mətbuatının təqdim etdiyi kimi ola bilər, lakin böyük ölçüdə dəyişiklik yaratmayacaq. S.Əsədlinin sözlərinə görə, əvvəllər də Paşinyan kabinetini Qarabağ və Azərbaycan məsələlərinə görə tərk edənlər olub: “Xarici işlər naziri Ara Ayvazyan var idi, Paşinyanla fikirləri üst-üstə düşmədiyi üçün istefa verdi. Keçmiş müdafiə naziri də komandada yer almadı. Marukyan son dövrlərdə hakimiyyətin mövqeyini bölüşmürdü. Amma onun yerini doldurmaq Nikol üçün çətin olmayacaq”. Partiya funksioneri Marukyanın iqtidarın təlimatı ilə “rus müxalifəti”nin içinə daxil olacağını istisna etmir: “Ermənistanda anti-Rusiya ovqatı güclənir. Qarabağdakı nəticələrdən sonra xalqın Rusiyaya inamı ölüb. Paşinyan kabineti də bu ictimai rəyi körükləyir. Onlar Rusiyanın Ermənistanda hərbi varlığına son qoymaq istəyirlər. Ancaq bu çoxkombinasiyalı oyunda manevr üçün Paşinyana əlini gücləndirməyə müxtəlif siyasi gedişlər lazımdır. Bunun üçün şahmat masasında fərqli fiqurlardan istifadə edə bilər. Mümkündür ki, Marukyan da səhnədə bu rolu alsın və ruspərəst müxalifət içində parçalanma, qovğa yaratsın. Bu işdə amerikalı diplomatların da Paşinyan komandasına verdiyi məsləhətlər az deyil”.

    Emil SALAMOĞLU
    “Yeni Müsavat”

     

  • Sabir Rüstəmxanlı tələbələrlə görüşdü – FOTO

    Azərbaycan Dövlət Mədəniyyət və İncəsənət Universitetində millət vəkili, Xalq şairi Vətəndaş Həmrəyliyi Partiyasının sədri Sabir Rüstəmxanlı ilə görüş keçirilib.
    “Azərbaycan Gənclərinin İnkişaf Hərəkatı”nın təşkilatçılığı ilə “Mədəniyyətimizdə bu gün” devizi altında keçirilən görüşdə Universitetin tələbə və müəllimləri iştirak edib.

    Tədbirdə çıxış edən Sabir Rüstəmxanlı görüşə görə Universitet rəhbərliyinə təşəkkür edərək tələbələrlə ziyalıların ünsiyyətinin, bu kimi tədbirlərin vacibliyini vurğulayıb.
    Millət vəkili ədəbiyyatımızın keçdiyi yol və bu günü haqda fikirlərini qeyd edərək, Milli Azadlıq Hərəkatında və Zəfər savaşında ədəbiyyatın rolunundan danışıb.
    Mədəniyyət İncəsənət Universitetinin prorektoru Sədaqət Əliyeva, “Azərbaycan Gənclərinin İnkişaf Hərəkatı”nın sədri Miri Miriyev çıxış edərək xalq şairinə görüşə görə təşəkkür edib.
    Daha sonra Sabir Rüstəmxanlının həyat və yaradıcılığını əks etdirən videoçarx nümayiş olunub. Millət vəkili tələbələrə Azərbaycan cəmiyyətinin bu günü, gənclərin dövlətin və xalqın gələcəyində rolu haqda danışıb.
    Tələbələr S.Rüstəmxanlının şerlərini səsləndirib, millət vəkili onların suallarını cavablandırıb.

  • Sevgilisindən ayrılan “dəli şair”, səfil həyatı yaşayan dahi – Rüstəmxanlı söhbətləri – VİDEO

    Xalq şairi Sabir Rüstəmxanlı müəllifi olduğu “Rüstəmxanlı söhbətləri” verilişinin budəfəki buraxılışını Azərbaycan ədəbiyyatında mühüm yer tutan, romantizmin tanınmış nümayəndələrindən biri olan Məhəmməd Hadiyə həsr edib.

    Verilişdə Məhəmməd Hadinin həyat və yaradıcılığından bəhs edən Xalq şairi onun Nəsimi, Xətai, Sabirlə bərabər Azərbaycan ruhunun ifadəçisi olduğunu vurğulayıb.
    S.Rüstəmxanlı Azərbaycanın söz-sənət paytaxtlarından biri olan Şamaxıda 145 il əvvəl dünyaya gələn Məhəmməd Hadinin təhsil almağa böyük marağının olduğunu, xaricdə təhsil almaq istədiyini, lakin bu istəyinin baş tutmadığını bildirib. O qeyd edib ki, imkansızlıq səbəbindən Məhəmməd Hadi Şamaxıda təhsil almaq məcburiyyətində qalıb:
    “Lakin o zaman Şamaxı mühiti elə idi ki, orada olmaq böyük bir universitet qutarmağa bərabər idi. Hadi müəllimlik etmək istəyirdi. Təəssüf ki, Şamaxı zəlzələsi təkcə onu deyil, bütün şamaxılıları öz yurdundan qopardı. Məhəməd Hadi Kürdəmirə gəlib oradakı qohumu ilə məktəb açdı, uşaqların təhsili ilə məşğul oldu və ilk şeirləri yarandı. Bəlkə də zəlzələnin təsiri, bəlkə də Şamaxıda itirdiyi – sevdiyi, amma ona verilməyən əmisi qızı Əminənin eşqi ilə ilk şeirlərini yazdı. Sonra o şeirlərin hamısını yandırdı və “dəli şair” ləqəbi qazandı”.
    S.Rüstəmxanlı qeyd edib ki, M.Hadi sevgi şeirlərindən sonra daha çox millətin taleyi ilə bağlı şeirlər yazmağa başlayıb. Xüsusən maarif, təhsilin əhəmiyyəti, milləti zülmətdən qurtarmağın yolları haqqında düşünən Hadinin şeirləri ondan xəbərsiz Bakıya göndərilib. Bu şeirlərin qəzetlərdə, həm də böyük təriflərlə dərc olunmasından sonra M.Hadinin heyrətləndiyini deyən S.Rüstəmxanlı onun daha sonra böyük həvəslə publisistik yazılar yazdığını da bildirib.
    M.Hadinin Həştərxan həyatından danışan S.Rüstəmxanlı daha sonra onun Əli bəy Hüseynzadə tərəfindən “Füyuzat” qəzetində işləmək üçün Bakıya dəvət olunmasından söz açıb. Xalq şairi Bakıda çıxan qəzetlərin böyük həvəslə onun şeirlərini çap etdiyini, birdən-birə şairin bir ulduz kimi parladığını deyib.
    M.Hadinin böyük ümidlərlə Türkiyəyə getməsindən söz açan S.Rüstəmxanlı onun orada da mətbuatda çalışdığını, lakin istiqlal, azadlıq eşqi ilə yazılan şerlərinin Türkiyədə də bəzi dairələrin xoşuna gəlmədiyini vurğulayıb.
    Şairin Balkan savaşına qatıldığından bəhs edən S.Rüstəmxanlı daha sonra onun İstanbula qayıtmasından, burada yazdığı şeirlərə görə Selanikə sürgünə göndərilməsindən, oradan isə yunanlar tərəfindən yenidən İstanbula sürgün edilməsindən, yolda ölüm təhlükəsilə üzləşməsindən danışıb. O, öz ağlı və biliyi hesabına ölümdən qurtulan şairin Bakıya döndüyünü, lakin neçə illər ərzində yazdığı bütün şeirlərin İstanbulda qaldığını deyib.
    S.Rüstəmxanlı müsəlman alayı tərkibində Karpat dağlarında olan, 1917-ci inqilabından sonra Peterburqa, oradan isə Bakıya qayıdan şairə təəssüf ki, yeni qurulan Xalq Cumhuriyyətinin də sahib çıxa bilmədiyini deyib. Onun sözlərinə görə, yaşamaq üçün şeirlərini vərəqələrdə çap etdirib satan, qazandığı qəpik-quruşu Şamaxı qaçqınlarına xərcləyən M.Hadi sonradan məcburiyyət üzündən Gəncəyə üz tutub və orada Qızıl Ordu tərəfindən şəhid edilib.
    Cəmi 40 il ömür yaşayan Hadinin bu müddətdə böyük əsərlər yaratdığını qeyd edən S.Rüstəmxanlı özünün “Şair və şər” əsərini Məhəmməd Hadiyə həsr etdiyini bildirib.

  • VHP-çilər Xocalı soyqırımı qurbanlarının xatirəsinə ucaldılmış “Ana harayı” abidəsini ziyarət ediblər

    Bu gün Vətəndaş Həmrəyliyi Partiyası Mərkəzi İcra Aparatının və Bakı rayon təşkilatı üzvləri Xocalı soyqırımı qurbanlarının xatirəsinə ucaldılmış “Ana harayı” abidəsini ziyarət ediblər.

    VHP.az-a verilən məlumata görə, ziyarətdə VHP Ali Məclisinin sədri Felmar Ələkbərli, Mərkəzi İcra Aparatının rəhbəri Samir Əsədli, MNTK sədri Zeynal Fətullayev, partiyanın məkəzi icra aparatının və Bakı şəhər təşkilatlarının üzvləri iştirak ediblər.

  • Felmar Ələkbərli: “Sülh sazişi imzalanmalıdır”

    Bakının İrəvana ikitərəfli formatda danışıqlar aparmaqla bağlı təklifi gündəmdə və qüvvədədir
      Rusiya Beynəlxalq Münasibətlər Şurasının eksperti Aleksey Fenenko Azərbaycan-Ermənistan arasında aparılan sülh danışıqlarından danışıb. Ekspert rəsmi Bakının ortaya konkret mövqe qoyduğunu, hər platformada vahid mövqe sərgilədiyini vurğulayıb. Fenenko qeyd edib ki, Azərbaycan dövlət başçısı İlham Əliyev Münhendə də Qərbə açıq siqnal verdi: “Prezident İlham Əliyev Ermənistanla birbaşa danışıqlar aparılacağını və heç kimin prosesə müdaxilə etməyəcəyini konkret şəkildə söylədi. Göründüyü kimi, Azərbaycan öz suverenliyini və ərazi bütövlüyünü bərpa etdikdən sonra İlham Əliyev Qərbin təsirindən fəal şəkildə xilas olur”. Rusiyalı ekspert onu da qeyd edib ki, Münhendə Paşinyanın Qərb tərəfdaşları dövlət başçısı İlham Əliyev prizmasından keçərək aydın təhlükəsizlik zəmanəti verə bilməyəcəklərini nümayiş etdiriblər: “Paşinyanın onlara anti-Rusiya mövqeyi formasında “hədiyyə”lər verməsindən asılı olmayaraq, heç kim Ermənistanı müdafiə etmək öhdəlikləri haqqında müqavilə imzalamağa hazırlaşmır”. Xatırladaq ki, Prezident yanvarın 10-da yerli televiziya kanallarına müsahibəsində də bu məsələyə toxunaraq demişdi ki, Ermənistan bu sülh müqaviləsinin zəmanətçiləri olmasını istəyir: “Biz hesab edirik ki, buna heç bir ehtiyac yoxdur. Bu, iki suveren dövlət arasında imzalanacaq sülh müqaviləsidir. Biz orada heç bir zəmanətçilərə ehtiyac duymuruq və əgər bu, ikitərəfli formatda imzalanacaqsa, imzalanmalıdır”. Dövlət başçısı Ermənistanla Azərbaycan arasında münasibətlərin normallaşmasına kömək etmək istəyənlərə rəsmi Bakının etiraz etmədiyini də vurğulamışdı: “Ancaq bu kömək elə olmalıdır ki, məcburi olmasın. Çünki bəziləri indi yarışa çıxıblar ki, danışıqlar bu ölkədə keçirilsin, o ölkədə keçirilsin, ya üçüncü ölkədə keçirilsin. Bu, bir qədər geosiyasi rəqabətə bənzəyən bir şeydir. Mən bunu istəməzdim. Mən ümumiyyətlə istəməzdim ki, Ermənistan-Azərbaycan münasibətləri geosiyasi mövzuya çevrilsin”. Münhendə reallaşan görüş Prezidentin irəli sürdüyü “vasitəçi lazım deyil” şərtinə beynəlxalq tədbirlər çərçivəsində əməl edildiyinin göstəricisi idi. Rəsmi Bakı belə görüşləri keçirməklə irəli sürdüyü təşəbbüslərə, təkliflərə, şərtlərə əməl etdiyini bir daha nümayiş etdirir. Münhen görüşü son zamanlar Ermənistanın törətdiyi təxribatlara rəsmi İrəvanın aydınlıq gətirməsi üçün də şərait yaradır. Bundan başqa, ikitərəfli görüşlərin davam etməsi üçün zəmin hazırlayır. Bunlar Azərbaycanın baş nazirinin müavini Şahin Mustafayev və erməni həmkarı Mqer Qriqoryan arasında yeni görüşün keçirilməsinə təkan verə bilər. İstənilən halda rəsmi Bakı sübut edir ki, iki suveren dövlət problemlərini müzakirə yolu ilə həll etməyə qadirdir. Ermənistanın kənardan vasitəçi tutub danışıqlara cəlb etməsi təşəbbüsü isə münasibətlərin normallaşmasına yardım deyil, maneədir.
     
      Vətəndaş Həmrəyliyi Partiyasının Ali Məclisinin sədri, politoloq Felmar Ələkbərli “Sherg.az”a açıqlamasında deyib ki, uzun müddətdir rəsmi Bakı Ermənistanla ikitərəfli danışıqların tərəfdarı olduğunu bildirib və İrəvana təkliflər göndərib. Ekspert qeyd edib ki, rəsmi İrəvan buna hələlik qəti cavab verməyib: 
    “Amma rəsmi Bakı Avropa İttifaqının vasitəçiliyi ilə aparılan danışıqlar prosesində iki görüşdən imtina edib. Azərbaycan tərəfi buna səbəb kimi həmin formatda aparılan danışıqlarda başda Fransa olmaqla bəzi vasitəçi ölkələri Ermənistanı müdafiə etməkdə, birtərəfli mövqe nümayiş etdirməkdə günahlandırıb. Azərbaycan üçün vacib olan məqam danışıqların real nəticə verməsidir. Vasitəçisiz, ikitərəfli ünsiyyətdə bu, daha realdır. Amma obyektivliyini və tərəfsizliyini qorumaq şərti ilə hansısa vasitəçinin iştirakı da problem deyil. Təki sülhə nail olunsun”.
     Politoloq əlavə edib ki, Azərbaycan üçün sülh sazişinin harada imzalanmasının da fərqi yoxdur:
     “Sülh sazişi imzalanmalıdır. Ən yaxşı variantı Azərbaycan təklif etdi. Bildirdi ki, “gəlin sərhəddə imzalayaq, başqa heç kəs lazım deyil”. Amma görünən odur ki, Ermənistana kimsə lazımdır. Hazırda sülh danışıqları ilə bağlı üç format var – Moskva, Brüssel və Vaşinqton. Hansı format Azərbaycanın maraqlarına uyğun deyilsə, ondan birmənalı imtina olunur. Rəsmi Bakının İrəvana ikitərəfli formatda danışıqlar aparmaqla bağlı təklifi gündəmdə və qüvvədədir. Əgər hər üç formatda danışıqlar alınmırsa, demək ki, Bakının ikitərəfli formatda danışıqlar aparmaq təklifi alternativsizdir. Düşünürəm ki, Ermənistan rəhbərliyi bu təklifi yenidən nəzərdən keçirməlidir. Rəsmi İrəvan sülhdə maraqlıdırsa, o zaman Bakının ikitərəfli formatda görüş təklifinə müsbət cavab verməlidir”.

  • Sabir Rüstəmxanlı Beynəlxalq Ana dili Günü ilə bağlı Hədəf liseyinin tədbirinə qatıldı

    Bu gün “Hədəf” Liseyində 21 fevral – Beynəlxalq Ana dili Günü münasibəti ilə tədbir keçirilib. Tədbiri giriş sözü ilə “Hədəf” Şirkətlər Qurupunun qurucusu, dosent Şəmil Sadiq açaraq qonaqları salamladı. Daha sonra Liseyin şagirdlərinin ifasında Azərbaycan mətbuat tarixi və ana dilimizin inkişafı ilə bağlı səhnəciklər göstərilib, Azərbaycan dilinin tarixi, keçdiyi yol və zənginliyi haqda məlumat verilib.

    Tanınmış ziyalıların, ictimai-siyasi xadimlərin dəvət olunduğu tədbirdə millət vəkili, Xalq şairi, Vətəndaş Həmrəyliyi Partiyasının sədri Sabir Rüstəmxanlı , şair Rüstəm Behrudi çıxış ediblər.

    Tədbirin yüksək səviyyədə və ruh yüksəkliyi ilə hazırlandığını xüsusi vurğulayan Sabir bəy bildirib ki, ana dili ilə bağlı maarifləndirici tədbirlərin önəmi olduqca böyükdür: “Hər bir insan ana dilinin incəliyinə bələd olmalı, onun böyüklüyünü, qüdrətini dərk etməlidir. Belə tədbirlər dilin imkanlarının uşaqlara, yeniyetmələrə izah edilməsi baxımından da önəmlidir. Odur ki, bu cür tədbirləri alqışlayır, dilimizin bu günü və gələcəyi baxımından əhəmiyyətli hesab edirəm. Ana dili uğrunda Azərbaycan xalqı böyük mübarizələr aparıb, qurbanlar verib, fədakarlıqlar göstərilib. Şükürlər olsun ki, Azərbaycan türkcəsi bu sıxıntılardan qurtarıb. Dilimiz dünyada tanınan, qəbul edilən bir dövlətin dilidir və dövlət səviyyəsində qorunur”.
    Şair Rüstəm Behrudi Azərbaycan türkcəsinin qorunması və latın qrafikasına keçid işində Sabir Rüstəmxanlı ilə birgə çalışdıqları “Azərbaycan” qəzetinin rolundan danışdı.

    Sonda qonaqlar ana dili ilə bağlı şerlərini oxudular.

  • Seçki bitdi, separatizmdən qurtulmuş ərazilərdə hüquqi dövlət quruculuğu sürətlənir…

    7 fevral seçkisi haqda Prezident İlham Əliyevin mövqeyi kifayət qədər aydın ifadə olundu. Sitat: “Bu seçkilər Azərbaycan xalqı üçün xüsusi tarixi əhəmiyyət daşıyır. Seçkilər ilk dəfə Azərbaycan Respublikasının suverenliyi və ərazi bütövlüyü təmin olunmuş şəkildə ölkəmizin bütün ərazisində, o cümlədən Xankəndidə, Şuşada və digər rayonlarda keçirilib, bu, Azərbaycan xalqı üçün xüsusi tarixi əhəmiyyət daşıyır”.

    Bəli, bütöv Azərbaycanda seçki keçirilməsi həm də hüquqi dövlət quruculuğu istiqamətində addımlar atılması üçün mühüm idi. Azərbaycanda hüquqi dövlət quruculuğu prosesi Xankəndi və ətraf bölgələri də əhatə etməlidir. Artıq bu ərazilərdə hüquq-mühafizə orqanları, müxtəlif sosialyönümlü qurumlar fəaliyyətə başlayıb. Bundan sonra separatizmdən qurtulmuş ərazilərdə hüquqi dövlət quruculuğu işləri daha da sürətlənməlidir. Həmçinin Xankəndi və Xocalıya köç üçün hazırlıq prosesi gedir. 30 ildən çox bu torpaqlarda hüquqi dövlət olmayıb. Xankəndi və digər yuxarı Qarabağ ərazilərində qondarma “artsax” adlı oyuncaq respublika olub.

    Həmin saxta dövlətin müstəqilliyini heç Ermənistan tanımamışdı. Lakin 30 il xunta rejimi ərazilərimizdə özünə saxta prezident, təlxək parlament, oyuncaq nazirlər, müşavirlər seçib, ordu saxlayıb, özlərinin ikinci erməni dövləti qura biləcəklərinə inanıblar. 19 sentyabr əməliyyatı bir günün içində 30 illik oyuncaq hakimiyyəti ağ bayraq qaldırmağa məcbur elədi. İndi İrəvanda toplaşan təlxək separatçılar “mühacir hökumət” xəyalları qurur, liderləri isə Bakıda istintaq təcridxanasında oturublar. Bu il həmin ərazilərdə hüquqi və qanuni seçki oldu ilk dəfə. Bundan sonra “dqr” yoxdur, Qarabağın erməni separatizmi olan ərazilərində hüquqi dövlət quruculuğu başlanır. Azərbaycan otuz illik erməni separatizminə son qoymaqla yanaşı, bu bəladan əziyyət çəkən xalqları və dövlətləri qəflət yuxusundan oyatdı. Qarabağdakı münaqişə dalğası sonradan Gürcüstana – Cənubi Osetiya və Abxaziyaya, daha sonra Moldovaya yayıldı. Ərazilərdə yaradılan qondarma qurumlar 30 ildən çoxdur ki, bu ölkələri inkişafdan saxlamaqla yanaşı, insanları qaçqın və ya məcburi köçkün həyatı yaşamağa məcbur edir. Ümid etmək olar ki, Azərbaycanın əldə etdiyi zəfəri bir gün onlar da yaşayacaq. Belə ki, artıq Azərbaycan MDB, xüsusilə postsovet məkanında işğala və separatizmə son qoyan ilk ölkə kimi tarixə damğasını vurub. Eyni zamanda Azərbaycan dünyada yaxın illər ərzində işğala son qoyan tək ölkə kimi də tarixə düşüb.

    Vətəndaş Həmrəyliyi Partiyasının Mərkəzi İcra Aparatının rəhbəri Samir Əsədlinin “Yeni Müsavat”a bildirdiyinə görə, Xankəndidə və azad olunmuş digər ərazilərdə prezident seçkisinin keçirilməsi bütövlükdə bu bölgədə Azərbaycan dövlətinin suveren hüquqlarının bərpasının başlanğıcı sayıla bilər: “Bu, həm də sürətli infrastruktur quruculuğunun aparıldığı rayonlarda vacib dövlət strukturlarının da ən yaxın zamanda tam formalaşacağının siqnalıdır. Öz yurd-yuvasına qayıtmış vətəndaşlarımızın bütün sosial və hüquqi tələbatının ödənilməsi üçün regionda mükəmməl dövlət idarəetmə sistemi yaradılmalıdır. Bu istiqamətdə mühüm işlər görülüb və prosesin uğurla yekunlaşacağına inanırıq”. S.Əsədli qeyd etdi ki, yeri gəlmişkən, işğaldan azad olunmuş yaşayış məntəqələrində xeyli sayda VHP üzvü də yaşayır: “Və qeyd etdiyimiz işlərin kompleks şəkildə həlli üçün siyasi partiyaların Qarabağda regional təşkilatlarının formalaşması da zəruridir. Çünki bu proses qarşıdakı parlament və bələdiyyə seçkilərində daha böyük aktivliyə səbəb ola bilər”. VHP rəsmisi açıqladı ki, azad edilən ərazilərə qayıtmış vətəndaşların sosial problemlərinin həlli bütün bu məsələlərdən ən vacibidir: “Biz partiya olaraq da bu mövzunu daim diqqətdə saxlamaqdayıq. Hökumətin fəaliyyətinə ictimai nəzarəti zəruri hesab edirik. Siyasi partiyalar daxil olmaqla, vətəndaş cəmiyyətinin də regionda sərbəst fəaliyyəti görüləcək işlərin uğuruna zəmin yaratmış olacaq. Vətəndaş cəmiyyətinin güclənməsi, demokratikləşmə prosesi və hüquqi dövlətin qurulması, sadəcə olaraq, şüar, yaxud da bir niyyət deyil, Azərbaycanın inkişafının başlıca şərtidir. Ermənistanın Azərbaycanın 20 faiz torpaqlarını işğal etməsi nəticəsində yaranmış qondarma, separatist “Dağlıq Qarabağ respublikası” faktiki destabillik mənbəyi idi. Biz bu “boz zona”nı təmizləməmiş, suverenliyi bərpa etməmiş hüquq dövlət quruculuğu prosesində yarımçıq ola bilərdik. Ona görə də qarşıda dayanan hədəflərdən biri bundan sonra vətəndaş cəmiyyətinin inkişafı və hüquqi dövlət quruculuğu üçün real addımların atılması olmalıdır. Xüsusən də hüquq-məhkəmə sistemində çox əhəmiyyətli dəyişikliklərə, islahatlara ehtiyac var”.

    Hazırladı:

    Emil SALAMOĞLU

    Yeni Müsavat

  • Sabir Rüstəmxanlı: “Yaşım imkan versəydi, silah da götürərdim”

    “Düzünü deyək” rubrikamızın qonağı Vətəndaş Həmrəyliyi Partiyasının sədri, millət vəkili, xalq şairi Sabir Rüstəmxanlıdır.

    Bakıvaxtı.az söhbəti təqdim edir.

    Dövlət idarəçilik sistemində müəyyən islahatlar aparıla bilər

    – Sabir bəy, Azərbaycanda Prezident seçkisi başa çatdı. Ölkə başçısı İlham Əliyev yüksək səs faizi ilə yenidən Prezident seçildi. Bütün seçkilərdən sonra bir dəyişiklik, yenilənmə gözlənilir. Sizcə, bu dəfə ölkəmiz, cəmiyyətimiz nə kimi dəyişiklik və yenilənmənin şahidi olacaq?

    – Azərbaycanın həyatında yeni bir dövr başlayır. Şübhəsiz ki, yeni era dedikdə ordunun güclənməsi nəzərdə tutulur. Bundan başa, sərhədlərimizin təhlükəsizliyi daha möhkəm qorunacaq.

    Qarabağda, elə bil, yenidən bir dövlət qurulur. Hər şey sıfırdan başlanıb. Orada böyük işlər həyata keçirilir. Şəhərlərimiz, kəndlərimiz bərpa olunur. Bu, az qala 50 illik bir proqramdır. Çox böyük işlər görülür və görülməkdə davam edəcək. Mövcud proseslərin hamısını başa çatdırmaq həm böyük vəsait, həm güc, həm də zaman istəyir. Bununla yanaşı, Azərbaycanın digər rayonlarında da abadlıq və quruculuq işləri aparılır.

    – İnsanların sosial şəraitinin yaxşılaşdırılacağına dair də gözləntilər var…

    – Bəli, ən başlıcası əhalinin işlə təmin olunması, rayonlarda iş yerlərinin açılması, torpaqların bərpa olunması, şoranlaşmanın qarşısının alınması, ölkənin su ilə təchiz olunması, Azərbaycanın neft və qaz asılılığından xilas olunmasıdır. Bütün bunların hamısı böyük işlərdir və görülməlidir. Dövlət idarəçilik sistemində, məxsusi olaraq, bölgələrin idarə olunmasında müəyyən islahatlar aparıla bilər. Bunların hamısı zaman tələb edən məsələlərdir. Düzdür, sözügedən istiqamətlərdə zaman-zaman müəyyən işlər görülür, amma görünür, sürət daha da artmalıdır.

    Türk dünyasının Aİ-yə bənzər vahid birliyə çevrilməsi yönündə işlər görməliyik

    – 44 günlük Vətən savaşındakı qələbədən sonra ölkəmizə qarşı beynəlxalq təzyiqlər də gücləndi. Səbəb nədir və nə etməliyik?

    – Doğrudur, Qarabağ zəfərindən sonra “üstümüzə gələnlər” çoxdur. Azərbaycanın öz torpaq bütövlüyünü təmin etməsi, ermənilərin özlərinin ərazilərimizdən köçüb getməsindən sonra bir sıra ölkələrin Azərbaycana münasibəti dəyişilib. Bizə qarşı qəzəblidirlər. Beynəlxalq hüquqa, ölkələrin öz torpaqlarına sahiblənmək hüququna sayğısızlıq var. Bunu nəzərə almırlar. Azərbaycan bütün bunların qarşısında dayanmalıdır. Bunun üçün ölkədə milli birlik, vətəndaş birliyi, ordu, iqtisadiyyat güclü olmalıdır.

    – Beynəlxalq əlaqələrin möhkəmlənməsi istiqamətində hansı addımlar atılmalıdır?

    – Kənar təzyiqlərə baxmayaraq, biz onlardan qaça bilmərik. Beynəlxalq əlaqələrimiz kəsilə bilməz. Demokratiya və insan haqları istiqamətində müəyyən addımlar atmaqla əslində bu münasibətləri yumşaltmalıyıq və beynəlxalq aləmdə Azərbaycanın nüfuzunu qoruyub saxlamalıyıq.

    – Yeni erada Türk dünyası ilə bağlı nə kimi işlər görülməlidir?

    – Türk dünyası ilə əlaqələri genişləndirməliyik. Özəlliklə Türkiyə ilə münasibətlərimizi daha da möhkəmləndirməliyik. Türk dünyasının Avropa İttifaqına bənzər vahid birliyə çevrilməsi yönündə ciddi işlər görməliyik.

    Ermənistan getdikcə anlayacaq ki, sülh müqaviləsindən başqa yolları qalmayıb

    – Azərbaycanla Ermənistan arasında yekun sülhlə bağlı da düşüncələriniz maraqlıdır. Bir tərəfdən sülh danışlarından bəhs olunur, digər tərəfdən Zəngilan istiqamətindən əsgərlərimizə atəş açılır…

    – Bu, ağır prosesdir, hələ belə güllələr açılacaq. Qazaxın 7 kəndi və Naxçıvanın Kərki kəndinin qaytarılması istiqamətində yubatmalar olacaq. Ermənistanın daxilindəki “Qarabağ klanı”nın adamları daim Ermənistan və Azərbaycanın yaxınlaşmağına mane olacaq. Bütün bunlar məlumdur, amma sülh prosesinin qarşısını almaq mümkün olmayacaq. Müharibə bitib, hər kəs torpağında oturub, öz dövlətinin gələcəyini düşünür. Bu gələcək də qonşularla normal münasibətlərdən asılıdır. Rəsmi İrəvan bunu dərk edəcək. Sülh Azərbaycana da, Ermənistana da lazımdır. Buna rəğmən Ermənistan gələcək taleyini İrana, Fransanın ona olan himayədarlığına bağlayır. Ancaq onun ətrfaında Azərbaycan, Türkiyə, Rusiya, Gürcüstan var. Rəsmi İrəvan bu ölkələrlə də əlaqələrini qurmalıdır ki, dövlətini inkişaf etdirsin. Onlar getdikdə bunu daha yaxşı dərk edəcəklər. Anlayacaqlar ki, sülh müqaviləsindən başqa yolları qalmayıb.

    – Fransanın adını çəkdiniz, bilirik ki, bu ölkənin “canfəşanlığı” nəticəsində Azərbaycan nümayəndə heyəti AŞPA-dakı fəaliyyətini dondurdu. Rəsmi Paris niyə və nədən narahatdır?

    – Fransada əleyhimizə danışanların əksəriyyəti oradakı ermənilərin qohumları, yaxınlarıdır. Orada erməni lobbisi və diasporu güclüdür. Onların pulu ilə danışan lobbi təşkilatları var. Ermənistan və Fransanın ənənəvi, köhnədən mövcud olan əlaqələri var. Üstəgəl, Fransa Avropada öz nüfuzunu gücləndirməyə çalışır. Böyük Britaniya Avropa Birliyindən çıxandan sonra Fransa özünü əsas söz sahibi kimi aparmaq istəyir. Ona görə də nə zaman ki Azərbaycanla Ermənistan rəsmiləri arasında Brüsseldə danışıqlar baş tutur, dərhal Fransa özünü ora pərçimləməyə çalışır.

    Fransanın çox ciddi liderləri olub, indiki prezidenti Emmanuel Makron onların yanında təcrübəsiz uşağa bənzəyir. Bilmədiyi məsələ və proseslərdən danışır. Azərbaycan öz torpaqlarını separatçılardan təmizləyəndə, işğalçıları torpaqlarımızdan qovanda, Makron bəyanat verirdi ki, Azərbaycan işğaldan əl çəkməlidir. Çoğrafiyadan xəbəri yox, tarixdən xəbəri yox… Parisdə oturub, elə bilir ki, dünya Fransadan ibarətdir. Onun yanlış siyasəti Qafqazdakı münasibətləri gərginləşdirir. Makronun addımları sülhyaratma işinə deyil, gərginliyə xidmət edir və Fransanın nüfuzdan düşməyinə səbəb olur. Ona görə də Fransanı yavaş-yavaş Afrikadan qovurlar və addım-addım geri çəkilir. Dünya elə bir nöqtəyə gəlib çıxıb ki… Müstəmləkəçilik siyasəti yürüdənlərin sonu başlayır. Bu gün heç bir xalqı zorla əsarət altında saxlamaq olmaz. Belə bir müddətdə Fransa Ermənistanın deyil, özünün qayğısına qalmalıdır.

    Ədəbiyyatı AYB deyil, konkret şəxslər yaradır

    – İkinci Qarabağ savaşından sonra qeyd olunurdu ki, qələbəmizlə bağlı sanballı nəsr və nəzm əsərləri yaradılmır. Hətta Azərbaycan Yazıçılar Birliyi (AYB) də qınanılırdı ki, istedadsız adamları ora toplayıblar, ancaq ortada nə “fal var, nə də yumurta”. Bu iradlarla razılaşırsınızmı?

    – Əvvəla, ədəbiyyatı AYB deyil, konkret şəxslər yaradır. AYB ədəbiyyat adamlarının nümayəndələrinin bir araya gəldiyi məkandır. Bütün bu məsələlərin günahını AYB-də görmək cahillikdir, bu təşkilatın işindən xəbərsizlikdir. Hesab edirəm ki, belə bədgümanlıq doğru deyil. Ədəbiyyatımız bütün məsələlərə həmişə cavab verib. Həyatımızın elə bir sahəsi yoxdur ki, ədəbiyyatımızın iri gözlərindən kənarda qalsın. Zəfərimizlə bağlı şeirlər, oçerklər, poemalar yazılır. Müxtəlif kitablar çap olunur, bunları görməmək olmaz.

    -Siz özünüz nələri qələmə almısınız?

    – 2020-ci ildə, müharibə qurtarandan sonra “Qarabağa dönüş” adlı iri həcmli poema yazdım və bunu Qarabağ qələbəsinin ilk iri həcminli dastanı adlandırırlar. Böyük bir poemadır, onu kitab kimi buraxdım. Kitabın özündə də rəylər var və sonra da bu poema haqqında yazılar yazıldı. Dəfələrlə nəşr olunsa da, əlimdə heç biri qalmayıb.

    Qazilərlə bağlı şeirim var. Ağdama ilk gedişimdə böyük bir publisistik yazı yazdım.

    Bundan başqa, Füzuli və Şuşa ilə bağlı qeydlərimi yazmışam.

    Hərə öz ruhundan çıxış edib, Qarabağ zəfərimizə münasibət bildirib. Savaş zamanı əsgərlərin dilində ən çox populyar olan “Çəkil torpağımdan, ey yağı düşmən!” marşı mənim sözlərimə yazılıb, sonuncu Zəfər marşının da sözləri mənə məxsusdur. Bir şair müharibədə bu cür iştirak edə bilər. Yaşımız imkan versəydi, silah da götürərdik, təəssüf ki, buna imkan yoxdur.

    Ayyət Əhməd

    BakıVaxtı

  • Vətəndaş Həmrəyliyi Partiyasının BƏYANATI

    Müstəqil Azərbaycanın siyasi tarixində ən böyük seçki təcrübəsinə malik olan Vətəndaş Həmrəyliyi Partiyası ölkəmizdə keçirilən bütün seçki və referendumlarda həm namizəd, həm də müşahidəçilərlə fəal şəkildə təmsil olunmuşdur. 7 fevral 2024-cü il tarixində ölkəmizdə keçirilən Prezident seçkilərində Vətəndaş Həmrəyliyi Partiyası öncədən Yeni Azərbaycan Partiyasının namizədi, Azərbaycanın ərazi bütövlüyünü və suverenliyini təmin edən Ali Baş Komandan İlham Əliyevi dəstəkləyəcəyini açıq şəkildə bildirmişdir. Bu mövqeyinə sona qədər sadiq qalan Vətəndaş Həmrəyliyi Partiyası seçki prosesini diqqətlə izləmiş və seçki günü Seçki məntəqəsində öz müşahidəçiləri vasitəsilə səsverməni müşahidə etmişdir.
    Seçki öncəsi təbliğat və təşviqat işlərində namizədlər üçün yaradılmış bərabərhüquqlu şərait, onların mətbuata rahat çıxışının təmin olunması, əhali ilə görüşlərinə geniş imkanlar yaradılması seçkilərin demokratik ruhda keçiriləcəyinin ilkin əlamətləri olmuşdur. Seçki günü həm canlı şəkildə məntəqə və dairələrdə müşahidələr aparılmış, həm də yüzlərlə seçki məntqəsində quraşdırılan kameralar vasitəsilə proses birbaşa izlənmişdir.
    Seçki prosesi boyu və səsvermə günü hansısa qanunsuz hal və pozuculuq fəaliyyəti tərəfimizdən müşahidə edilməmişdir. Seçkilərdə əhalinin rahat və dinc şəkildə səsverməsi təşkil edilmiş, onların seçiminə təsir göstərilməmiş, seçki günü məntəqələrin ətrafında heç bir təbliğat işləri aparılmamışdır.
    Bu seçkilərdə Azərbaycan xalqı öz demokratik prinsiplərini qoruyaraq Prezident seçkilərində yüksək seçici fəallığı göstərmişdir. Seçicilərin böyük əksəriyyəti Azərbaycan xalqına misilsiz qələbələr bəxş edən, bizim də dəstəklədiyimiz İlham Əliyevə səs vermişdir.

    Vətəndaş Həmrəyliyi Partiyası və partiyamızın çoxsaylı üzvləri adından seçkilərin nəticəsini ədalətli hesab etdiyimizi bəyan edir və İlham Əliyevi yenidən Azərbaycan Respublikasının Prezidenti seçilməsi münasibətilə ürəkdən təbrik edirik. İnanırıq ki, İlham Əliyev bundan sonra Azərbaycanın daha güclü dövlətə çevirilməsi yolunda əvvəlki kimi qətiyyətlə çalışacaq, öz ali missiyası ilə türk dövlətləri birliyinin yaranmasında da həlledici rol oynayacaqdır. Bu şərəfli yolda Prezident İlham Əliyevə böyük uğurlar arzulayırıq.

    Sabir Rüstəmxanlı
    Vətəndaş Həmrəyliyi Partiyasının sədri,
    Millət vəkili

  • VHP Naxçıvan MR təşkilatının sədri Almaniya kanalına Zəngəzur dəhlizindən danışdı

    Vətəndaş Həmrəyliyi Partiyası (VHP) Naxçıvan Muxtar Respublika Təşkilatının sədri Abdulla Abdullayev Almaniyanın ikinci dövlət kanalı “ZDF”ın əməkdaşı Sebastian Ehmə Muxtar Respublikadakı ictimai-siyasi, iqtisadi vəziyyət, Zəngəzur dəhlizinin açılması, sülh danışıqları, prezident seçkiləri və siyasi partiyaların bölgə təşkilatlarının fəaliyyəti barədə müsahibə verib.

    Abdulla bəy müsahibəsində Muxtar Respublikanın 30 ildən artıq blokadada qalmasının yaratdığı iqtisadi-sosial problemlərdən və Azərbaycanın ərazi bütövlüyünü təmin etməsindən sonra bölgədə yaranmış yeni situasiya haqqında danışıb. VHP-nin bölgə təmsilçisi Zəngəzur dəhlizi məsələsinin aktuallığı, dəhlizin açılmasının həm bölgə xalqları, həm də bütövlükdə regionda sabitliyin möhkəmlənməsi, iqtisadi yüksəliş üçün vacibliyindən danışıb. A.Abdullayev alman jurnalisti maraqlandıran suallara cavab verib və partiyanın Naxçıvan Muxtar Respublika Təşkilatının fəaliyyətindən danışıb.