Vətəndaş Həmrəyliyi Partiyası

Author: vhpadmin

  • Mən gəminin yalvarışını yox, həyəcanlı səsini eşitmişəm

    VHP Xətai rayon təşkilatının sədri, şair-publisist Faiq Balabəylinin Moderator.az saytıa müsahibəsini təqdim edirik.

     
    – Karantin rejiminin əhvalı yazmağa mane olmur ki?
    – Yox, əslində yeni mövzular verdi. Mənim yazmağıma heç nə mane ola bilməz, nə karantin rejimi, nə həbsxana həyatı, nə dənizdə gərgin iş şəraiti. Yetər ki, ovqatım nəsə yazmağa köklənsin, ürəyimdən yazmaq keçsin, yazacam.
    – İlk şeirinizi əzbər söyləyə bilərsiniz?
    – Əlbəttə, söyləyərəm. Amma ilk şeir deyildə indi deyəcəyim. İndi əzbərdən deyəcəyim bu şeiri hələ orta məktəbdə oxuyarkən Ukraynada, Rovno vilayətinin Kostopolski rayonun Zvezdovka kəndində yaşayan Yuxumeç Qalina adlı bir qıza yazıb göndərmişdim. Bilirsən, o zaman biz sovet məktəbliləri bir-birimizlə məktublaşardıq. Səhv etmirəmsə, 8-ci sinifdə oxuyurduq. Ona məktubun arasında novruzgülü göndərmişdim. Məktubda isə Azərbaycan dilində bu şeiri yazmışdım:
    Sənə göndərdiyim Novruz gülüdür
    Sevgi bildirirlər bu güllə, sən bil.
    Rəngi göz oxşayır, hənux gülüdür,
    Kədəri, göz yaşı bu güllə sən sil.
    İndi mən bu gülü göndərdim sənə
    Vaxt olar özüm də gəlləm yanına,
    Solsa da hər zaman saxla bu gülü
    Sənin də ətrini çəksin canına.
    – Necə oldu, sonra Qalinanı gördünüzmü, saxlamışdımı o gülü?
    – Yox əşşi, bu bir uşaqlıq sevgisi idi. Pioner idik. O, məktəblərindəki tədbirlərdən yazırdı, mən də elə kəndimizdən bəhs edirdim. Həm də bu yazışma rus dilini öyrənməyimizə kömək edirdi. Şəklini göndərmişdi, gözəl qız idi. Sonra böyüdüm, yazışırdıq yenə. İndi heç bir əlaqəmiz yoxdur.
    – Şeirlərinizdə hansısa şairin təsirini hiss etmisinizmi?
    – Yox, hiss etmirəm. Mən yaxşı şeirləri oxuyuram, əzbərləyirəm də hətta. Düşünmürəm ki, özümü hansısa şairə bənzədim, bilərəkdən, yaxud bilməyərəkdən təsir altına düşmək mənim xarakterimə yaddır.
    – Şairlik Tanrının bəxş etdiyi həyat tərzidir, yoxsa Yaradanın insana verdiyi tale yazmaq səlahiyyəti?
    – Kimdə necədir, deyə bilmərəm, ama onu bilirəm ki, yazırsansa səlahiyyətli olmalısan. Mənim həm də həyat tərzimdir. Yazmasam olmaz, elə bilərəm ki, içimdə ağır bir yük var, bu yükdən azad olmaq lazımdır. Gündəlik udduğum hava, içdiyim su, qəbul etdiyim qida, çəkdiklərim ağrı, keçirdiyim əsəb, həyacan, sevinc kimi həyatımda özünü təsdiqləyən bir vərdişdir, yəni mənim həyat tərzim budur.
     
    – Dənizi oxşayan, dənizi vəsf edən çoxlu şeir var. Poeziya dənizlə şeiriyyətin ruhi yaxınlığından söz açır. Hərçənd bunların arasında çətin qavranılan, alt qatı olan bir paradoks da mövcuddur. Gəmi kapitanı Faiq Balabəyli necə düşünür, dəniz mavi qatildir, yoxsa lənətlənmiş gözəl qurban? 
    – Lənətlənmiş gözəl qurban dedin, yadıma “Lənətlənmiş həyat” povestim düşdü. Bilirsən, dənizə çoxlu şeir yazılıb, iri həcmli əsərlərdə dənizdən, dənizçidən bəhs olunub, filimlər çəkilib. Bunların uğurlusu da var, uğursuz qələmə alınanı da. Mən dənizə qatil deməzdim, baxmayaraq ki, çoxlu can alıb və almaqdadır. Gənc vaxtlarımda şeir yazmışdım: Dəniz elə həmənkidir, gah mülayim, üzəgülər, Gah da dönüb ölüm olar, bizi güdər, – demişdim. Dənizi sevmək azdır, onu başa da düşmək, tanımaq lazımdır. Həyatımın müəyyən vaxtları dənizdə keçib, hər üzünü görmüşəm və inciməmişəm, məsuliyyətli olmuşam. Dənizdən nə yazmışamsa, uydurma, fantaziya olmayıb. Gördüklərimi, hiss etdklərimi, duyduqlarımı oxucuya ötürmüşəm.
     
    – Qəzaya uğrayan gəmilər birdən-birə suyun dibinə getmir, sanki imdad diləyə-diləyə, son ümidi suya qərq olanadək yalvarır, sonra da batır. Heç batan gəmi gördünüzmü? 
    – Batan, batmaq təhlükəsi olan gəmilər görmüşəm. Köməyinə də çatmışıq. Əsasən sən deyən kimidir. Gəmilər qəzaya düşəndə birdən-birə batmır. Amma qəzaya salınanda, gəmilər məqsədli şəkildə batırılanda qısa müddətə suyun dibinə baş vurduqları hallar da olur.
    Yelkəni küləklə dolan ağ gəmi
    üzər uzaqlara, geriyə dönməz…  
    Mənim xəyallarımda batan, vidalaşan gəmi həmişə belə olub, belə yaşatmışam. Mən gəmi kapitanıyam, kapitanlar gəmini sonda tərk edir. Mən komandiri olduğum gəminin yalvarışına dözə bilmərəm, hansı yollasa onu xilas etməyə çalışaram. Mən gəminin yalvarışını yox, həyəcanlı səsini eşitmişəm, qəhrəmanlığını, dözümünü görmüşəm – 1990-cı ilin 20 Yanvar hadisələri zamanı. Bakı buxtasında rus-sovet hərbi gəmiləri ilə savaşımız zamanı. “Kəsilməyən həyəcan fiti” adlı kitabım da var.
    – Təsis etdiyiniz Dənizçilərə Sosial Dəstək İctimai Birliyi qeydiyyatdan keçib. Təbrik edirəm. Dənizçi hüququ nə deməkdir, bu ifadə nəyi ehtiva edir? Ümumiyyətlə dənizçilərə sosial dəstək necə olmalıdır?
    – Təbrikə görə çox sağ ol. Bilirsən, Oqtay, dənizçi hüququ deyilən ayrıca bir termin yoxdur. İnsanlarımızın hüquqları pozulur və bu sırada istənilən peşə sahiblərinin adını çəkmək olar. Lap elə hüquqlarımızı müdafiə edən, qoruyan təşkilatların da əməkdaşları hüquqsuzluqdan şikayətli olur. O ki qaldı dənizçilərə sosial dəstəyə, onların hüquqları ilə məşğul olmağa, bu indiki durumda çox vacibdir, baxmayaraq ki, təsis etdiyim İctimai Birliyin yaranması ideyası ağlıma gəlməzdən bu çatışmazlıqlar mövcud olub. Hazırda “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin gəmilərinin və dənizçilərinin də hər hansı haqsızlıqla üzləşdiyi hallar olur, dediyim kimi bu əvvəllər də belə olub. Çoxlu irad, şikayət və təkliflər verilir. Soruşuram niyə rəhbərliyə demirsiz? Bəzləri ehtiyat edir ki, adı qara dəftərə düşər, bəziləri də deyir ki, nə xeyri olacaq… Mənim bu haqda “Azərbaycan Xəzər Dəniz Gəmiçiliyi” QSC-nin rəhbərliyi ilə görüşümüz zamanı söhbətimiz olub. Gəmiçiliyə rəhbərlik edəndən bəri çox yeniliklərə, ilklərə imza atan Rauf Vəliyev əslində mənim qeydiyyatdan keçirdiyim bu birliyə xoş münasibət bildirdi. Baxmayaraq ki, qaldıracağımız, ictimailəşdirəcəyimiz, həllinə nail olmağa çalışacağımız qüsurlarla bğlı əsasən ona müraciətlər ediləcək. Bilirsən, elə məsələlər var ki, o səviyyəyə qalxmadan həllini tapmalıdır. Ya buna mane olanlar var, ya da işinin öhdəsindən gələ bilməyənlər. Ya da işinin öhdəsindən gəlib, insan amilini ikinci, bəzən üçüncü dərəcəli hesab edənlər.
    – Eşitdiyimə görə, ilk nəsr əsəriniz çap olunanda ağsaqqal söz adamlarından biri şairi şeirdən almaq istəyən nəsrə etiraz edib, sizə poeziyadan uzaqlaşmamağı tövsiyə edib. Məgər şair Faiq Balabəyli nasir Faiqə qısqanır ki?
    – Qələm dostlarım olub ki, məni nəsrə keçdiyimə görə təbrik ediblər və hətta sən nəsrdə özünü daha yaxşı ifadə edə bilərsən deyiblər. Bilirsən, mən iddiası boyundan yuxarı olmayan adamam, yazıçıyam. Nəyi necə bacarıramsa, daha yaxşı harda ifadə edə bilirəmsə, o janrda da yazıram. Oxucu qıtlığım yoxdur. Bu elə kitablarımın tez bir zamanda satılmasında, tələb olunmasında da özünü göstərir. Hə, olub elə bir söhbət və mənim nəsrimlə tanışlıqdan sonra şeir də yaz, nəsr də deyiblər.
    – Bir şeir deyin…
    – Şeir demək mənim üçün çətin olmayan bir işdir. Yaxşı, deyim:
    Üzümü söykəməyə gövdəndə yer gəzirəm
    budaqların qol kimi sarmaşmır daha mənə,
    qaranlıq dərə bilib ovcumda əl gəzirəm
    qoşa əlin ovucu, qaranlıq kaha mənə…
    İlahi, daha rəhmin gəlməsin mən zalıma
    çöhrəmdə sevinc nədir,
    kədər də donmaz daha
    bu mənasız həyatda çiynimi söykədiyim
    bu ağac budağına
    quşlar da qonmaz daha…
    Gözlərimin işığı öləziyib şam kimi
    əriyib yoxa çıxır qəlbimin nisgili də.
    Bir həyatın dibindən boylanıb üzü bəri
    alın yazım oxunur… oxunur kölgəlikdə.
    Daha heç nə qəlbimin sarı simini qırmaz;
    nə bacımın göz yaşı, nə anamın ağısı
    çiynimi söykədiyim bu ağacın gövdəsi
    üzümü söykədiyim yarpaqların ağrısı…
    İlahi, rəhm eləmə, qoy uzansın bu ömür
    yaş olan yanaqların tamı, duzu bilinsin
    İlahi, qələmindən boy verən alnımdakı
    hər yetənə oxunan yazıların silinsin.
    – Azərbaycan poeziyası bu gün arzuladığı yerdədirmi? 
     
    – Nəyimiz varsa budur. Bizim poeziya heç vaxt gözüqıpıq olmayıb. Dünyada istənilən xalqın poeziyası ilə ayaqlaşan və onların poeziyasından qabaq olan poeziyamız var. İstər klassik, istər çağdaş şeir nümunələri olsun. O tamam başqa söhbətdir ki, çox vaxt tərcümə məsələsində geriyik. Kimin gücü çatır özünü, yaxud qohumunu tərcümə etdirir ki, bu da bizim poeziyanın əsas sifəti olmur.
    – Şeir yazmaq get-gedə kütləviləşir. Doğrudanmı, biz şair xalqıq?
    – Qardaş, əlimizdən bir iş gəlmir də… bütün dərdimizi, sevincimisi sözün, şeirin köməyi ilə ifadə edirik. Xalq qəhrəmanımız Koroğludur ki, döyüşə də şeir deməmiş girməzdi. Dədə Qorqud boylarında da nəzm var. Demək, xalqımız şeirə, sözə meyillidir.
    – Azərbaycanda neçə böyük şairin adını çəkmək olar? Ümumiyyətlə sizin ən çox oxuduğunuz şairlər kimlərdir?
    – Hər kəsin özünün oxuduğu, böyük bildiyi şairi var. Zövqlər müxtəlifdir. Məsələn, mən yaşayanlardan bir neçə şairi öz şairim bilirəm və adlarını da çəkmirəm. Özləri bilir…
    – Sizi görəndə “heç şairə oxşamırsınız” deyənlər olubmu?
    – Hə, olub. Bir dəfə Şərif Ağayar hansısa müzakirə, yaxud mübahisə zamanı dedi ki, sən öl, Faiq “KamAz” şoferinə oxşadı. Belədə də, mən heç vaxt özümdə şair obrazı yaratmamışam. Saçm dağınıq olmayıb, yalandan siqaret çəkib özümü “şair cildinə” salmamışam. Şeir də yaza bilirəm, dava da edirəm, vaxtı ilə qumar da oynamışam, ona-buna söz də atmışam və insanlara yaxşılıq etmək istəmişəm, etmişəm də, bacardığım qədər.
    – XXI əsrin bombalı, viruslu çağında, kabusun və qorxunun Yer üzünü qara bulud təki aldığı dövrdə, hər gün daha çox insanın günahsız əzab çəkdiyi zamanda, görəsən, hələ də İsa Məsih kimi suyun üzərində yeriyə biləcək qədər mömin adam varmı dünyada?
    – Mən namaz qılmıram, oruc tutmuram, Allahın evinə – məscidə gedib ibadət etmirəm və özümü bunu edənlərdən daha mömün hesab edirəm. Sualına cavab olaraq isə deyirəm, yoxdur elə bir adam, olmayıb və olmayacaq da. Dövr, zaman, kütləvi qırğınlar, Allaha “paçka” gəlib, guya ibadət edib, namaz qılıb, amma yüz cürə hiylə-məkrlə yaşayanlar, başqalarına acılar yaşadanlar, bununla da “gözəgörünməz kişini” aldatmaq cəhdləri insanlarda daha çoxdur.
    – Maraqlı söhbət oldu, sağ olun, dənizi şeirlə oyadın, kapitan… 
    – Sən sağ ol, saytınız uzunömürlü olsun, daima izləyirəm. Və bütün söhbət boyu “sən” deyə müraciətim isə söhbətimizin daha da isti olması üçün idi…
    Söhbətləşdi: Oqtay Qorçu

  • Gənclər təşkilatlarının sükut illəri – passivliyin arxasındakı səbəblər

    Səlahəddin Əsgər: “Bu, bütövlükdə cəmiyyətin durumu ilə bağlıdır”

    Azərbaycanda son illərdə gənclər təşkilatlarının fəaliyyəti sıfıra enib. Halbuki, vaxtilə siyasi partiyaların, yaxud partiyalara bağlılığı olmayan gənclər təşkilatları var idi ki, ölkədə fəallıqları ilə seçilirdilər.

    Hazırda əksər siyasi partiyalarda ya gənclər təşkilatları yoxdur, ya da həmin partiyalarda gənclərlə əlaqələri rəhbərlərin təyin etdikləri müavinlər, yaxud müşavirlər qururlar. Siyasi fəaliyyətlə məşğul olan gənclərin nə iş gördükləri, nə üçün gənclər təşkilatlarının fəaliyyətinin bu qədər zəifləməsi ilə maraqlandıq.

    Səlahəddin Əsgər
    Səlahəddin Əsgər

    VHP Gənclər Şöbəsinin müdiri Səlahəddin Əsgər milli məsələlərdə gəncləri aktiv olmağa çağırdı: “Hazırda partiyamızda 3 minədək gənc fəaliyyət göstərir. Ümumiyyətlə, partiyanın müxtəlif strukturlarında gənclər yer alıb və Gənclər Təşkilatında olan bir çox gənc sonradan partiyanın rəhbər strukturlarında təmsil olunurlar. Bu gün VHP Mərkəzi İcra Aparatına rəhbərlik edən Samir Əsədli zamanında Gənclər Təşkilatının rəhbəri olub. VHP Gənclər Təşkilatı ölkənin bir çox gənclər təşkilatları ilə əlaqələr qurub. Müsavat, Ümid, AXCP, AMİP kimi partiyaların gənclər təşkilatları, eləcə də NİDA və müstəqil gənclər təşkilatları ilə əməkdaşlıqlarımız var. Bir neçə dəfə birgə tədbirlər keçirilib, siyasi polemikalar aparılıb. Ölkədə gənclər təşkilatlarının fəaliyyətinin passivliyinə gəldikdə isə, bu bütövlükdə cəmiyyətin durumu ilə bağlıdır. Təbii ki, Qarabağ məsələsində, bir çox milli məsələlərdə gənclər aktivlik göstərməlidir. Bizim fəaliyyətimiz də əslində bu aktivliyi yaratmaq, gənclərin ölkənin ictimai-siyasi həyatına təsirini artırmaqdan ibarətdir”.

    Araz Teymurlu
    Araz Teymurlu

    AĞ Partiyanın gənclərlə iş üzrə müşaviri Araz Teymurlu deyilənlərlə dolayısı ilə razılaşmır: “Gənclər nəinki Azərbaycan siyasətində, bütün dünyada siyasətin lokomotivini təşkil edir. Tarixən siyasi proseslərə nəzər salsaq görərik ki, dünyada baş verən bütün önəmli hadisələrdə gənclər aparıcı qüvvə olub, olmaqda da davam edəcəklər. Boşuna deyil ki, bütün siyasi partiyalar təşkilatlanmış gəncləri, tələbə gənclər təşkilatlarını və s. öz sıralarında görmək istəyir. Siyasi partiyaların enerjisi, gücü, motivasiyası gənclərin çiyinləri üzərində olur. Bildiyiniz kimi, AĞ Partiya Azərbaycan siyasi səhnəsində  digər partiyalarla müqayisədə yeni qurulmuş partiyadır. Belə olmasına baxmayaraq, kifayət qədər çəkisi olan və günü-gündən güclənən partiyadır. Bu nüansı boş yerə vurğulamadım. Çünki partiyamızın rəhbərliyində təmsil olunan şəxslər zamanla ölkənin ən böyük siyasi partiyalarından olan bir təşkilatın gənclər qollarında yetişmiş, ciddi siyasi fəaliyyətlə məşğul olmuş şəxslərdir. Bu siyasi təcrübə bu gün partiya quruculuğunda və fəaliyyətində öz sözünü deyir. Partiyamızın gəncləri təşkilatlanmaqla, gücünə güc qatmaqla, ölkəmizdə yetişən gəncliklə işləməyin yolunu tapmaq üzərində çalışır. Gördüyümüz işlərə baxacaq olsaq rahatlıqla deyə bilərik ki, bu sahədə nəticə də əldə edirik. Əlbəttə, daha böyük işlər üçün müəyyən zaman lazımdır. Hər bir AĞ Partiyalı gənc məsuliyyətini dərk edir, ideoloji cəhətdən hazırlıqlıdır, daima öz üzərində işləyir”.

    Cavanşir ABBASLI,
    “Yeni Müsavat”

  • Sabir Rüstəmxanlı Rusiya səfirini təbrik edib

    Vətəndaş Həmrəyliyi Partiyasının sədri, millət vəkili Sabir Rüstəmxanlı Rusiya Federasiyasının Azərbaycan Respublikasındakı səfiri cənab Boçarnikov Mixail Nikolayeviçi Rusiya günü münasibəti ilə təbrik məktub göndərib. Məktubda millət vəkili “Rusiya günü”nün tarixinə toxunub: “1990-cı il iyunun 12-də RSFSR-in dövlət suverenliyi haqqında bəyannamənin qəbulu Rusiyanın tarixində yeni mərhələnin başlanğıcı oldu. Bununla Rusiya tarixdə ilk dəfə siyasi plüralizm, demokratiya, bazar iqtisadiyyatı yoluna qədəm qoydu. Bu proses həm də sovet respublikalarının dövlət müstəqilliyi qazanması prosesinə ciddi təkan vermiş oldu”.

    Sabir Rüstəmxanlı məktubda Azərbaycan Rusiya münasibətlərinə toxunaraq səfirə xoş arzularını çatdırıb: “Azərbaycan ictimaiyyəti Rusiya dövlətinin ölkəmizin ərazi bütövlüyünün bərpası üçün mövqeyini hər zaman diqqətlə izləyib. İnanırıq ki, Azərbaycan torpaqlarının işğaldan azad olunmasından sonra böyük tarixi keçmişə malik Rusiya-Azərbaycan münasibətləri daha uğurlu və dinamik inkişaf yoluna qədəm qoyacaq.

    Hörmətli cənab Səfir!

    Bir daha Sizi Rusiya günü münasibəti ilə təbrik edir, Sizə diplomatik fəaliyyətinizdə uğurlar, şəxsi həyatınızda xoşbəxtlik arzulayıram”.

  • Виновные должны быть наказаны – депутат возмущен действиями полиции Политика

    Баку/10.06.20/Turan: Граждане не должны были бросать мусор в полицейских с балконов, но  полиция не должна была атаковать квартиры гражданин, как будто они ловят террористов. Такое мнение агентство Turan выразил депутат Сабир Рустамханлы, комментируя инцидент 7- 8 июня в столичном  массиве Ени Ясамал.

    «Полиция, которую я увидел на кадрах 8 июня, во время  их нападения на жилое здание было анормальным явлением. Зачем надо было собирать такое количество полиции  стучать в двери в 6 часов утра?

    Даже если бы там был преступник, его можно было бы задержать  более спокойным, более цивилизованным способом в соответствии с требованиями закона. Людям не дали даже одеться.

    Такое отношение к гражданам , которое видно на кадрах, недопустимо», – сказал депутат.

    Там, где происходит подобное, теряется доверие к полиции. Подобные действия должны быть решительно осуждены.

    Депутат считает, что эта спецоперация не принесла ничего положительного  имиджу  полиции.

    Особенно возмутительно то, что полицейские сами снимали на видео происходящее, а потом размещали в соцсети. «Что это такое? Как так можно?», задает вопросы Растамханлы.

    “МВД и соответствующие ведомства должны разобраться с этим.  Что же касается офицеров полиции, оскорблявших и нарушавших права граждан, то они должны быть наказаны”, отметил Рустамханлы.

    www.turan.az/

  • Sabir Rüstəmxanlının qaldırdığı problemə reaksiya verildi

    Məlum olduğu kimi, Neftçala rayonunda içməli su problemi yaranmışdı. Belə ki, çayda suyun səviyyəsinin hədsiz dərəcədə aşağı düşməsi nəticəsində Xəzər dənizinin suyu Kürə axırdı. Ekoloji hadisə Neftçala rayonunda Kürün Xəzərə töküldüyü yerdə yəni, çayın mənsəbində baş vermişdi.

    İlkin məlumata görə, dəniz suyu 30 kilometr məsafədə Kür çayına qarışmışdı. Rayonun Sübh, Qırmızı Şəfəq, Yenikənd, 1 nömrəli, 2 nömrəli Mayak, Bankə qəsəbəsi, Kürkənd, Uzunbabalı, Şirvanlı, Tatarməhlə kəndləri və rayon mərkəzi içməli su qıtlığı ilə üzləşib. 61 saylı Neftçala seçki dairəsinin deputatı Sabir Rüstəmxanlı Musavat.com-a duruma operativ müdaxilə edildiyini bildirdi: “ Neftçala Rayon İcra Hakimiyyətində qərargah yaradıldı və⁣ “Azərsu” Açıq Səhmdar Cəmiyyəti ilə birlikdə problemin aradan qaldırılması istiqamətində müvafiq tədbirlər həyata keçirilməyə başlandı. Rayon sakinləri də həmin vaxt razılıqla bildirirdi ki, insanların içməli su ilə təmin olunması üçün işlər görüldü”.

    Yaranmış vəziyyətlə bağlı mətbuatda həyacan təbili çalan deputat Sabir Rüstəmxanlı hazırda problemin aradan qaldırıldığını bildirib: “Hazırda dəniz suyunun Kürə qarışması demək olar ki dayanıb, vəziyyət stabilləşib. Problemin həlli üçün operativ fəaliyyətə keçən əlaqədar təşkilatların işi təqdir olunmalıdır”.

    Emil Salamoğlu,

    Musavat.com

  • “O qədər polisi ora cəmləməyə, səhər saat 6-da qapıları döyməyə nə ehtiyac var idi?” – Sabir Rüstəmxanlı

    “Hesab edirəm ki, nə vətəndaş yuxarı mərtəbədən polisin başına zibil atmalı idi, nə də polis vətəndaşın evinə sanki terrorçu axtatrımış kimi hücum etməli deyildi”. 

    Mia.az xəbərr verir ki, bunu deputat Sabir Rüstəmxalı iyunun 7-də və 8-də Yasamal rayonu Dadaş Bünyadzadə küçəsi 13-də baş vermiş hadisə ilə bağlı Turan-a şərhində bildirib.

    “İynun 8-də kadrlarda gördüyüm polislər, onların binaya hücumları anromal bir hadisə idi. O qədər polis nəfərini ora cəmləməyə, səhər saat 6-da qapıları döyməyə nə ehtiyac var idi? Lap orada cinayətkar var idisə belə, bunu daha sakit, daha mədəni formada müvafiq qanunun tələblərinə uyğun həll etmək olardı. İnsana paltarını geymək imkanı yaradardı. Amma vətəndaşa kadrlarda görünən münasibəti bəsləmək olmazdı”, deyə deputat bildirib.

    O, deyir ki, belə münasibət olan yerdə polisə inam itir, belə davranışı qətiyyələ pisləyir və qəbul etmir. Onun fikrincə, dövlət məmuruna münasibət nədirsə, sıravi vətəndaşa da həmin hörmət, ehtiram olmalıdır.

    Deputat hesab edir ki, bu əməliyyat polisin imicinə müsbət heç nə gətirməyib. Üstəlik, polis nəfələrinin özlərinin baş verənləri videoya çəkmələri, bunların sosial mediaya ötürülməsi anlaşılan deyil: “Bu nə deməkdir? Bunun arxasında nə dayanır? Niyə belə əməliyyat aparılır, bunlar hamısı düşündürücüdür. 

    Fikrimcə, həm DİN, həm əlaqədar qurumlar bünün üzərində düşünərlər ki, bu, təxirbat da ola bilər” .

    S.Rüstəmxanlı hesab edir ki, vətəndaşın evində tərbiyəsilzik edən, xanımı, həyat  yoldaşını təhqirə məruz qoyan şəxslər isə mütləq cəzalandırılmalıdırlar.

    /mia.az

  • “Siyasətdə olan şəxslərlə bağlı arxivlər açıla bilər”

    Sülhəddin Əkbərin agent ittihamlarına Sabir Rüstəmxanlıdan reaksiya; “O, Rusiyaya kimin bağlı olub-olmadığını bilməmiş olmazdı”

    1992-93-cü illərdə mərhum prezident Əbülfəz Elçibəy hakimiyyəti dönəmində milli təhlükəsizlik nazirinin birinci müavini postunu tutan Azad Demokratlar Partiyasının sədri Sülhəddin Əkbərin son müsahibəsi müxalif camiyədə, sosial şəbəkələrdə hələ də müzakirə olunur.

    AXC hökumətində rəhbərliyə Rusiyanın xüsusi xidmət orqanlarının agentlər yerləşdirdiyini deyən S.Əkbərin fikirlərinə ən müxtəlif reaksiyalar verilir.

    1992-1995-ci illərdə mətbuat və informasiya naziri vəzifələrində çalışan VHP sədri, deputat Sabir Rüstəmxanlı agent ittihamlarının çox mürəkkəb bir məsələ olduğunu qeyd etdi: “Onu bilirəm ki, sovetlər dönəmində ölkədən xaricə gedən, şərqşünaslıq fakültəsində oxuyan adamların qarşısına müəyyən öhdəliklər qoyurdular. Bu, getdikləri ölkədən xəbər vermək öhdəliyi idi. Amma bu o demək deyil ki, xaricə gedənlərin hamısı SSRİ-nin xüsusi xidmət orqanlarının agenti olurdular. O zaman Azərbaycan sovet sisteminin bir parçası idi. Söz yox ki, ölkə içərisindən Moskvaya xidmət edən, onların qarşısında müəyyən öhdəlikləri olan, ora məlumat ötürən, Rusiyadan qopmağın əleyhinə çıxış edən, SSRİ-nin dağılmasını istəməyən kifayət qədər adamlar var idi. Onları ayırd etmək çox çətindir. Elçibəy Sülhəddin Əkbəri Təhlükəsizlik Komitəsi sədrinin müavini təyin edəndə istəyirdi ki, bu strukturla bağlı müəyyən məlumatlar əldə etsin, sənədlər aşkarlansın. Bütövlükdə Xalq Cəbhəsi komandasına kölgə düşməsini istəməzdim. Orada xalqını, dövlətini sevən kifayət qədər insanlar var idi”.

    Deputat S.Əkbərin çox şeylərdən xəbərdar olduğunu düşünür: “Yəqin Sülhəddin bəy nazir müavini işləyəndə özü üçün çox şeyi aydınlaşdırıb. Rusiyaya kimin bağlı olub-olmadığını bilməmiş olmazdı. Üstündən bu qədər vaxt keçməsi fərq etmir, bildiyi bir şey olubsa, indi də aça bilər. Ümumiyyətlə, dünyada bir müddət keçəndən sonra arxivlər açılır. Bizdə də belə olacaq. O vaxt bu məsələ Milli Məclisdə müzakirə olunmuşdu. Çox təklif olunurdu ki, arxivlər açılsın. Maraqlıdır ki, təkid edənlərin çoxu və ya onların ailə üzvləri uzun illər dövlət təhlükəsizliyinə bağlı olublar. Onlar ucuz xal qazanmaq, özlərini cəsarətli göstərmək istəyən adamlar idilər. Millətin taleyini düşünən adamlar bu məsələdə bir qədər ehtiyatlı davranmalıdırlar. Ölkədə çoxsaylı problemlər var idi, müharibə şəraitində yaşayırdıq. Ən müxtəlif qruplar fəaliyyət göstərirdi. Hakimiyyət çevrilişinə cəhdlər olmuşdu. Çox çətin bir dövr idi. Düşünün ki, arxivlər də açılsa ölkədə qarşılıqlı ittihamlar, düşmən axtarışı daha da artacaqdı. Nəticədə dövlətin müstəqilliyi təhlükə altına düşərdi. Bütün bunları düşünüb, arxivlərin açılmasının əleyhinə idim. Əgər arxivlərin açılması millətə, dövlətə zərər vuracaqsa, nə əhəmiyyəti var? Nəticələri düşünmədən qəhrəmanlıq çağırışları etməyin heç bir xeyri yoxdur. Amma indi vəziyyət bir qədər dəyişib. Siyasətdə olan, ölkənin ictimai-siyasi həyatında yer tutan şəxslərlə bağlı arxivlər açıla bilər”.

    Cavanşir ABBASLI,
    “Yeni Müsavat”

  • “Azərbaycan polisinə belə davranışı yaraşdırmıram”

    Sabir Rüstəmxanlı: “Ailənin, qadın-uşağın yanında belə əməliyyat keçirmək, ailədəkiləri təhqir etmək, zorakılıqla vətəndaşı aparmaq düzgün deyil”

     

    Ölkəmizin gündəmində əsas müzakirə mövzusu polis-vətəndaş münasibətləridir. İyunun 7-də Yasamal rayonunda baş verən hadisələr ictimaiyyətdə ikitirəliyin yaranması ilə nəticələndi. Belə ki, ötən həftənin son iki günü üçün elan edilən sərt karantin rejimini pozduğuna görə, Yasamal ərazisində polis vətəndaşı saxlayır, bölməyə aparmaq istəyir. Bu zaman yaxınlıqdakı binadan bir vətəndaş polisə zibil atır, müxtəlif söyüşlər söyərək təhqir edir.

    Dünən isə səhər saatlarında polislər zibil atan şəxsi bölməyə apararaq inzibati şəkildə cəzalandırmaq üçün onun evinə gəlirlər. Əməliyyatın videosu mətbuatda yayıldıqdan sonra ictimaiyyətdə polisə qarşı aqressiya yarandı. Videodan görünür ki, polislər vətəndaşın mənzilinin qapısını qışqıraraq döyəcləyir, içəri keçdiyində ailənin qadınlarını, uşaqlarını nəzərə almadan kobudluq edir, kişini isə çılpaq şəkildə zorakılıqla aparırlar. Bu zaman polislər evin xanımını “dovşansan” deyə təhqir etməyi də unutmurlar.

    Məsələ ilə bağlı ictimaiyyətdə, xüsusən də sosial şəbəkələrdə müzakirələr şiddətlənib. Bir qrup hesab edir ki, polis bu əməliyyatı düzgün aparıb, çünki vətəndaş qanunu pozub, polisə zibil ataraq təhqir edib. Digər bir tərəf isə hesab edir ki, polisin bu cür zorakılıq etməsi qanundan kənardır. Yəni, vətəndaş nə qədər qanunu pozsa da, cəzalandırılması da qanuni şəkildə olmalıdır. Vətəndaşların əksəriyyəti düşünürlər ki, polisin əməliyyat zamanı davranışı həmin şəxsin etdiklərinə adekvat deyil.

    Bu arada qeyd edək ki, polis tərəfindən əməliyyat aparılan evin xanımının təhqir edilməsi ilə bağlı Daxili İşlər Nazirliyi (DİN) məlumat yayıb. Məlumatda qeyd olunur ki, iyunun 7-də Yasamal rayonunda gücləndirilmiş karantin rejiminə nəzarəti həyata keçirən polis əməkdaşlarının üzərilərinə məişət əşyaları atanlar saxlanılarkən çəkilmiş videogörüntülər araşdırılıb və bu zaman əməkdaşlardan birinin bir qadınla yüksək səs tonunda danışaraq, onun həyat yoldaşının ünvanına yersiz ifadələr işlətməsi müəyyən edilib ki, bu da bağışlanmaz hal kimi qiymətləndirilib. Xəbərdə daha sonra bildirilib ki, həmin qadın Bakı Şəhər Baş Polis İdarəsinə dəvət edilib və ondan üzr istənilib. Bundan sonra DİN rəhbərliyi tərəfindən həmin əməkdaşın tutduğu vəzifədən azad edilməsi və barəsində xidməti yoxlama aparılması haqqında qərar qəbul edilib.

    Baş verən olay və ətrafında gedən müzakirələrlə bağlı AYNA-ya danışan Vətəndaş Həmrəyliyi Partiyasının (VHP) sədri, Xalq şairi, millət vəkili Sabir Rüstəmxanlı məsələyə iki qütbdən yanaşır. O, hər şeydən əvvəl Azərbaycanın həm vətəndaşının, həm də polisinin güclü, qanunlara bağlı, sayğılı olmasını istəyir: “Həm vətəndaşlarımızı, həm polisi güclü görmək arzusundayam. Hər kəs bir-birinə hörmətlə yanaşmalıdır. Birinin rütbəsi ola bilər, birinin olmaz, amma hər kəs Azərbaycan vətəndaşıdır. Vətəndaşlar bir-birini sevməlidir, bir-birinə hörmət eləməlidirlər. Hamı bilməlidir ki, bu torpağın övladıdır, torpağa, ölkəyə, adət-ənənəmizə hörmətlə yanaşılmalıdır. Bu, məsələnin mənəvi tərəfidir. Yəni bir vətəndaş general ola bilər, başqa bir vətəndaş sıravi ola bilər. Hər kəs öz səlahiyyəti çərçivəsində, qarşılıqlı hörmət çərçivəsində hərəkət etməlidir”.

    Konkret əməliyyatla bağlı isə S.Rüstəmxanlı bildirib ki, istənilən vəziyyətdə, nə qədər əsəbi, gərgin, çılğın olsa da, vətəndaşın polisin başına zibil atmasını qəbul etmir: “Polisin xüsusi statusu və vəzifəsi var. Onlar gecə-gündüz ölkə ərazisində ictimai asayişi qoruyurlar, qorumalıdırlar. Necə qoruya bilir, vəzifəsini necə yerinə yetirir – o, ayrı məsələdir. Bu, məsələnin birinci tərəfidir ki, mən karantin günü vətəndaşın hərəkətini birmənalı şəkildə qəbul etmirəm”.

    “Yasamaldakı hadisənin videokadrlarına baxdım. Hesab edirəm ki, hansısa xırda hadisəyə görə o qədər polis əməkdaşının, böyük polis dəstəsinin bir evin həyətinə gəlməsi, bir mənzildə elə əməliyyat keçirilməsi doğru deyildi. Polis əməliyyat keçirsin, bu olmalıdır. Amma qatı cinayətkar olarsa, elə əməliyyat keçirilməlidir. Hardasa terrorçu var, ölkənin taleyi üçün təhlükəli hal və ya şəxs varsa, əməliyyat dünənkindən də sərt keçirilməlidir. Amma məsuliyyətsizlik edən bir vətəndaşın qapısını döymək, ailənin, qadın-uşağın yanında belə əməliyyat keçirmək, ailədəkiləri təhqir etmək, belə zorakılıqla vətəndaşı aparmaq düzgün deyil. Mən bunu qəbul etmirəm, Azərbaycan polisinə də belə davranışı yaraşdırmıram”, – deputat vurğulayıb.

    Xalq şairi onu da qeyd edib ki, Azərbaycan polisi son illərdə əməliyyatları, asayişi təmin etməsi, nizam-intizamı ilə seçilir: “Elə koronavirus pandemiyasına görə tətbiq edilən karantin zamanı mən müşahidə etdim, polis küçədə, məhəllələrdə çox gözəl xidmət apardı. İnsanlarla mehribanlıqlarının, mədəniyyətinin şahidi olmuşam, bununla qürur duyuram. Həkimlərlə bərabər polisimiz də gecə-gündüz çalışdı, hazırda da çalışırlar. Amma yenə də deyirəm, kankret olaraq Yasamaldakı əməliyyat epizodu polisimizə yaraşmadı”.

    Hokm.az

  • Siyasi məhbus olan ata-oğul: Təbrizin mərkəzi həbsxanasına aparılıb

    Birlikdə 12 ay həbs cəzasına məhkum edilən güney azərbaycanlı milli-mədəni fəal Cəfər İsmayılzadə və oğlu Milad İsmayılzadə dünən Təbriz məhkəməsinin hökmləri icra edən şöbəsinə getdikdən sonra saxlanılıblar.

    DAK İdarə Heyətinin üzvü Ağrı Qaradağlının dak.az-a verdiyi məlumata görə, İran həbsxanalarında koronavirusun geniş yayılmasına baxmayaraq milli fəallar iyunun 6-də Təbriz Mərkəzi Zindanına aparılıblar.

    Təbrizin Apelyasiya Məhkəməsinin 3-cü şöbəsi milli fəalların həbs cəzasını təsdiq edib. Daha öncə Təbriz İnqilab Məhkəməsinin 1-ci şöbəsi “Sepah”ın təhlükəsizlik bölümünün raportunu əsas götürərək fəalların hər birini 6 ay azadlıqdan məhrum edib.

    Ata və oğul “bölücülüyü əks etdirən vərəqələr paylamaqla sistemin əleyhinə təbliğat aparmaq” və “Təbriz şəhərində kürd və erməni dillərində olan lövhələri yandırmaq”da ittiham olunublar. 2019-cu il mayın 29-da Təbrizdə öz iş yerlərində “Sepah”ın təhlükəsizlik bölümünün əməkdaşları tərəfindən saxlanılan ata və oğul 50 milyon tümənlik mülki vəsiqə qarşılığında sərbəst buraxılmışdı.

  • Müxalifət iki günlük sərt karantini necə keçirdi – rəylər

    Düşərgə təmsilçiləri arzu və təkliflərini də dilə gətirdilər

    Azərbaycanda şənbə-bazar günləri koronavirusla bağlı 4 iri şəhərdə və Abşeron rayonunda ilk dəfə, faktiki, komendant saatı tətbiq edildi. Belə bir şəraitdə ölkə müxalifətinin necə fəaliyyət göstərməsi ilə maraqlandıq.

    VHP Ali Məclisinin katibi Asif Şəkərli: “Bu iki günlük karantin pandemiya dövrünün ən sərt qərarı idi. Təbii ki, müxalifət də hamı kimi qadağalara əməl etdi. Bu qadağaların insanların sağlamlığı və yoluxmanın qarşısını almaq üçün edildiyinin fərqindəyik. Ancaq təəssüflər olsun ki, bu iki gündə həm vətəndaşlar, həm də polis tərəfindən xoşagəlməz olayların şahidi olduq. Unutmayaq ki, insanlarımız bu şəkildə sərt karantinə hazır deyildilər və buna vərdiş etməyiblər. Buna görə bəzi məqamlarda aqressiyasız da ötüşmək olardı. Növbəti həftə üçün də eyni karantin qaydaları hazırlanır. Ümid edirik ki, bu dəfə hər iki tərəf təmkinli davranacaq”.

    AĞ Partiya başqanı Tural Abbaslı iki gün ərzində fəaliyyətsiz qalmadıqlarını söylədi: “Müxalifət də xalqın bir parçasıdır. Demək olar ki, biz xalqımızdan fərqli formada yaşamırıq. Ancaq təbii ki, fəaliyyət sahəmizə görə fərqlərimiz mövcuddur. Adətən biz yeni, gənc partiya olaraq çalışırıq ki, hər məqamı inkişafımız üçün məqama çevirək. Bunun üçün də karantin günlərində, sadəcə, olaraq evdə oturmaqla kifayətlənmirik. Bu məqamdan istifadə edib partiyanın tamamlanmamış işlərini tamamlamağa, daxili məsələləri həll etməyə və digər partiyalarla əlaqələrin güclənməsinə çalışırıq.

    Gücləndirilmiş 2 günlük karantin müddətində də AĞ Partiya olaraq bu işlərlə məşğul olmuşuq. Təbii ki, mətbuatın suallarını cavablamışıq, dünyada və ölkəmizdəki siyasi prosesləri diqqətdə saxlayaraq, hadisələri analiz edib adekvat mövqelər sərgiləmişik. Bir sözlə, çalışmışıq ki, karantin günlərini də partiya üçün səmərəli keçirək”.

    Böyük Azərbaycan Partiyasının sədri Elşad Musayev karantin şərtlərinə əməl etdiklərini bildirdi: “Biz karantin rejiminin tələblərinə əməl edib, hamı kimi evdə olmuşuq. Müasir dövrün imkanlarından istifadə edərək həm siyasi, həm də digər işlərimizi həyata keçirməyə çalışmışıq. Amma ölkə olaraq əsas vəzifəmiz koronavirus təhlükəsindən azad olmaqdır və bizim də siyasi təşkilatlar olaraq bu istiqamətdə görəcəyimiz iş – təkliflər vermək, prosesin müsbət istiqamətdə inkişaf etməsi üçün əməli addımlar atmaqdır”.

    ALDP rəhbəri Fuad Əliyev: “Həftəsonu olduğuna görə həmişəki kimi ailəmlə birlikdə iki gün keçirdim. Düzdür, evdən çıxa bilmədik, amma evdə uşaqlarla çox səmərəli vaxt keçirdik. Sosial şəbəkələr üzərindən mənə ünvanlanan sualları cavablandırdım. Bir neçə partiya sədri ilə zəngləşib, söhbətləşdik. Partiyanın Sədr Aparatının Whatsapp qrupunun işini yenidən aktivləşdirdik”.

    KXCP İdarə Heyətinin üzvü Xəzər Teyyublu problemlərin aradan qalxacağına ümid edir: “Hamı iki günü necə keçirdisə, biz də elə. Operativ Qərargahın qərarlarına tabe olduq. Qadağalardan qabaq mağazalardan zəruri ərzağın, əsasən də çörəyin sistemsiz, pərakəndə satışında, mağazalara daşınma işində ciddi qüsurlar oldu. Bu məsələ ictimai narazılıq yaratsa da, ümid edək ki, bu cür problemlər aradan qalxacaq”.

    Cavanşir ABBASLI,

    “Yeni Müsavat”